ТАРТИБИ ба категорияи киштигард мансуб донистани роҳҳои обӣ ва қоидаҳои истифодабарии онҳо

1.Муқаррароти умумӣ

1.Тартиби ба категорияи киштигард мансуб донистани роҳҳои обӣ ва қоидаҳои истифодабарии онҳо, ки минбаъд Тартиб номида мешавад, тибқи гурӯҳҳои роҳҳои обӣ ва қоидаҳои истифодаи онҳо вазифаву ӯҳдадориҳои асосии мақомоти нақлиёти дохилии обиро муайян менамояд.

2.Фаъолияти Тартиб ба тамоми дарёҳо, кӯлҳо ва роҳҳои сунъии обӣ, ки дар қаламрави Ҷумҳурии Тоҷикистон воқеъ мебошанд, дахл дорад. Барои роҳҳои сарҳадии ҳамлу нақли обӣ, ин Тартиб ҳангоми аз ҷониби Ҷумҳурии Тоҷикистон бо давлатҳои хориҷӣ бастани шартномаю созишномаҳо татбиқ карда мешавад.

3.Шино кардани киштиҳо дар роҳҳои обии дохилии Ҷумҳурии Тоҷикистон таҳти парчами Ҷумҳурии Тоҷикистон иҷозат дода мешавад.

Номгӯи дарёҳо ва кӯлҳое, ки барои шино кардани киштиҳо иҷозат дода мешавад, аз ҷониби Вазорати нақлиёти Ҷумҳурии Тоҷикистон якҷоя бо Вазорати мелиоратсия ва хоҷагии оби Ҷумҳурии Тоҷикистон муайян ва бо Ҳукумати Ҷумҳурии Тоҷикистон мувофиқа карда мешавад.

2.Роҳҳои обӣ

4.Тамоми роҳҳои обии дохилӣ, роҳҳои истифодаи умумӣ мебошанд.

5.Роҳҳои обии дохилӣ ва иншооти гидротехникии киштигардии мавҷудаи онҳо, моликияти Ҷумҳурии Тоҷикистон мебошанд ва бо мақсади киштигардии ҳама гуна шахсони ҳуқуқӣ ва воқеӣ истифода карда мешаванд.

6.Навъ ва воситаҳои таҷҳизоти киштигардӣ ва мӯҳлати кори онҳо, хаҷми кафолатии киштигардӣ, мӯҳлати кори иншооти киштигардии гидротехникиро Вазорати нақлиёти Ҷумҳурии Тоҷикистон ва Вазорати мелиоратсия ва хоҷагии оби Ҷумҳурии Тоҷикистон муқаррар менамоянд.

7.Таъмини шароитҳои киштигардию гидротехникии шино кардани киштиҳо дар роҳҳои обии дохилӣ, аз ҷониби Вазорати нақлиёти Ҷумҳурии Тоҷикистон анҷом дода мешаванд.

Таъмини шароитҳои киштигардию гидротехникии шино кардани киштиҳо дар роҳҳои обии дохилии қисматҳои минтақаҳои сарҳадӣ ба воситаи санадҳои ҳуқуқии байналмилалии эътирофнамудаи Ҷумҳурии Тоҷикистон танзим карда мешаванд.

3.Ба дараҷаҳои киштигардӣ мансуб донистани дарёҳо, кӯлҳо ва обанборҳои бузург

8.Вобаста ба имконияти гузарониш доштаи роҳҳои обӣ ва хусусиятҳои истифодабарию техникии киштии истифодашаванда аз роҳҳои обӣ, онҳо ба дараҷаҳои зерин тақсим карда мешаванд:

Роҳҳои обии дохилӣ ба табиӣ (дарёҳо, кӯлҳо) ва сунъӣ (каналҳо, қисматҳои дарғотии дарёҳо, обанборҳо) тақсим мешаванд.

9.Шароитҳои киштигардии шабакаҳои роҳҳои обӣ ба воситаи ҳаҷми ҳаракати киштӣ (чуқуриҳои кафолатӣ, васеӣ ва доираи гардиш) бо суръати маҷро, давомнокии давраи киштигардӣ, андозаҳои лаппиши сатҳи об, низомҳои гидрометеорологӣ ва яхкунӣ, ки асоснокии техникию иқтисодӣ ва меъмории киштиҳоро муайян менамоянд, тавсиф карда мешаванд.

10.Таносуби ҳаҷми киштиҳо ва роҳҳои обӣ ба воситаи захираҳои ҳадди ақали об дар зери дарёҳои озод муайян карда мешавад.

Эзоҳ:

-мафҳуми захираҳхо фарқияти байни ҳаҷми чуқурӣ дар қисмати ҳадди муқарраргардида ва фурӯравии нисбатан зиёди киштиро дар истгоҳ мефаҳмонад.

-ҳангоми аз ҳадди муқарраргардидаи чуқурии қисматҳо гузаштан, ронандагони киштиҳо бояд эҳтимолияти таҳнишасти киштиҳоро ба инобат гиранд ва ҷиҳати пешгирии он бо роҳи суст кардани суръати ҳаракати киштӣ ё ҷалб намудани ядаккиштии ёрирасон тадбирҳо андешанд: ҳангоми нокифоя будани ин тадбирҳо бо роҳи кам кардани фурӯравӣ (борҳо).

11.Вобаста ба мавҷзаниҳои оби кӯлҳо ва обанборҳо онҳо ба гурӯҳҳои зерин ҷудо мешаванд:

12.Номгӯи роҳҳои обҳои дохилие, ки барои киштигардӣ кушода мебошад, аз ҷониби Вазорати нақлиёти Ҷумҳурии Тоҷикистон ва Вазорати мелиоратсия ва хоҷагии оби Ҷумҳурии Тоҷикистон муайян карда мешавад.

13.Бақайдгирии роҳҳои обии дохилӣ, киштиҳои дар роҳҳои обҳои дохилӣ шинокунанда, пешбурди феҳрасти киштигардӣ ва таҳияи регистри дарёиро Вазорати нақлиёти Ҷумҳурии Тоҷикистон анҷом медиҳад.

4.Истифодаи ҳудудҳо, марзи соҳилҳо дар доираи роҳҳои обии дохилӣ ва заминҳое, ки ташкилотҳои нақлиёти обии дохилӣ истифода ва ишғол менамоянд

14.Дар доираи роҳҳои обии дохилӣ, ки берун аз ҳудуди шаҳрҳои аҳолинишин воқеъ мебошанд ташкилотҳои нақлиёти обии дохилӣ ҳуқуқ доранд барои корҳое, ки бо киштигардӣ алоқаманд мебошанд, марзи соҳилҳо - ҳангоми сатҳи миёнаи бисёрсолои об дар дарёҳои озод ва сатҳи мӯътадили обҳои дар роҳҳои обии ба таври сунъӣ таъсис додашуда, хати замини васеъгии 20 метр аз канори об то умқи соҳилро ройгон истифода намоянд. Дар соҳилҳое, ки нишебии бештар аз 45 дараҷа доранд ҳудуди соҳил аз канори соҳил то умқи он муайян карда мешавад.

Шароитҳои махсуси истифодаи марзи соҳилро Вазорати нақлиёти Ҷумҳурии Тоҷикистон ва Вазорати мелиоратсия ва хоҷагии оби Ҷумҳурии Тоҷикистон муайян менамоянд.

15.Идораи давлатӣ дар нақлиёти обии дохилӣ ҳуқуқҳои зерин доранд:

-ҷиҳати гузаронидани корҳои таъмини киштигардӣ ва сохтмони биноҳо, иморатҳо ва иншоотҳо барои ин мақсадҳо бо тартиби муқаррарнамудаи қонунгузории Ҷумҳурии Тоҷикистон марзи соҳилро истифода намоянд;

-дар хати соҳил воситаҳои соҳилии таҷҳизоти киштигардиро насб намоянд;

-ҷиҳати таъмини бехатарии киштигардӣ, аз ҷумла барои намоёнии воситаҳои соҳилии таҷҳизоти киштигардӣ, ҳамчунин барои асосноксозии геодезӣ ҳангоми аксбардории минтақаҳои маҷрои дарёҳо, буридани дарахтон ва буттаҳои дар марзи соҳил рӯидаро анҷом диҳанд. Насби воситаҳои соҳилии таҷҳизоти киштигардӣ ва сохтани пайраҳа барои таъмини биноиши онҳо, ҳамчунин метавонанд бо тартиби муқаррарнамудаи қонунгузории ҷангал ва оби Ҷумҳурии Тоҷикистон берун аз ҳудуди марзи соҳил анҷом дода шаванд;

-барои гузаронидани корҳои зикргардидаи моддаи мазкур замин, санг, шағал, дарахтон ва буттаҳои дар марзи хати соҳил мавҷудбударо ба таври ройгон истифода намоянд;

-барои ба бандар расидан, миҳор бастани киштӣ, истгоҳхои киштӣ ва дигар объектҳои шинокунанда, боркунӣ, борфурорӣ ва нигоҳдории борҳо, ба киштиҳо савор ва фуровардани мусофирон, сохтани иншооти муваққатӣ бо тартиби муқарраргардида ва ба мувофиқаи Вазорати нақлиёти Ҷумҳурии Тоҷикистон иҷозат дода мешавад;

-дар сурати зимистонгузаронии ногаҳонии киштиҳо ва садамаҳои нақлиётии киштиҳо, ба сохтмони иморатҳои муваққатӣ ва гузаронидани дигар корҳои зарурӣ ичозат дода шавад.

16.Шахсоне, ки марзи соҳилро барои гузаронидани корҳои муваққатӣ истифода менамоянд, баъди ба итмом расонидани корҳо вазифадоранд онро тоза ва обод намоянд.

17.Дар марзи соҳил насб намудани ҳамагуна таҷҳизоти доимии рӯшноидиҳандае, ки ба тарафи ҳаракати киштиҳо равона гардида бошанд, манъ мебошад. Соҳибони рушноидиҳандагони муваққатӣ бояд насб намудани онҳоро бо идораи давлатӣ дар наклиёти обии дохилӣ мувофиқа намоянд ва чунин рушноидиҳандагонро аз ҷониби ҳаракати киштиҳо бо девор таъмин намоянд.

18.Барои анҷом додани фаъолияти хоҷагидорӣ ва ғайра, ки агар чунин фаъолият бо таъминоти бехатарии киштигардӣ мувофиқ набошад, ба истифодаи марзи соҳил иҷозат дода намешавад.

19.Лоиҳаҳои сохтмонӣ ё азнавсозии иншооти хоҷагидорӣ ва ғайрае, ки дар хати соҳил ҷойгир мебошанд, бояд ҳатман бо Вазорати нақлиёти Ҷумҳурии Тоҷикистон ва Вазорати мелиоратсия ва хоҷагии оби Ҷумҳурии Тоҷикистон мувофиқа карда шаванд.

20.Истифодаи минтакаҳои обӣ барои эҳтиёҷотӣ моҳигирӣ, агар чунин минтақаҳо бо мақсадҳои киштигардӣ истифода карда мешаванд, бо мувофиқаи Вазорати нақлиёти Ҷумҳурии Тоҷикистон ва Вазорати мелиоратсия ва хоҷагии оби Ҷумҳурии Тоҷикистон иҷозат дода мешавад.

21.Ҳуқуқи истифодаи марзи соҳил ба ҳудудҳои табиӣ махсус ҳимояшаванда, ҳудудҳои иншооти гидротехникӣ, заминҳое, ки иншоотҳои обёрӣ ҷойгир мебошанд, хатҳои барои роҳҳои автомобилӣ ва роҳи оҳан ҷудокардашуда, заминҳои бо иншооти махсус мустаҳкамкардашуда ва дигар заминҳое, ки қонунгузории замини Ҷумҳурии Тоҷикистон ва дигар қонунгузории Ҷумҳурии Тоҷикистон пешбинӣ менамоянд, дахл надорад.

22.Ҷудо кардани заминҳое, ки дар доираи хати соҳил мавҷуд мебошанд ва тақсим намудани минтақаҳои ҳудудҳои роҳҳои обии дохилӣ, сохтмони ягон хел биноҳо, иморатҳо ва иншоот бо тартиби муқаррарнамудаи қонунгузории Ҷумҳурии Тоҷикистон анҷом дода мешавад.

23.Истифодаи хати соҳил дар доираи роҳҳои обии дохилии минтақаҳои сарҳадӣ, мутобиқи қонунгузории Ҷумҳурии Тоҷикистон ва бо мувофиқаи мақомоти хадамоти сарҳадӣ анҷом дода мешавад.

24.Дар ҳудуд ва хати соҳилҳои роҳҳои обии дохилӣ беназорат мондани киштиҳо ва иншооте, ки барои вазъи роҳҳои обии дохилӣ таъсири манфӣ мерасонанд ва (ё) истифодаи онро душвор мегардонанд, манъ мебошад.

5.Талофии зараре, ки дар натиҷаи амалҳои номатлуб дар роҳҳои обии доҳилӣ расонида шудааст

25.Зарар ва олуда намудани обҳое, ки аз ҷониби шахсони воқеӣ ва ҳуқуқӣ ҳангоми вайрон ва нобуд кардани таҷҳизоти киштигард, иншооти гидротехникии киштигардӣ, ҳаракати киштиҳо ва объектҳои дигар расонида шудаанд ва онҳо ба ташкилотҳои нақлиёти дохилӣ тааллуқ доранд, мутобиқи қонунгузории Ҷумҳурии Тоҷикистон талофӣ карда мешаванд.