Созишнома дар бораи таъсиси Маркази байналмилалии баҳодиҳии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм

Давлатҳои иштирокдори Созишномаи мазкур, ки минбаъд Тарафҳо номида мешаванд,

бо назардошти хусусияти байналмилалӣ ва миқёси кунунии қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм, ки ба амнияти Тарафҳо таҳдид мекунанд,

бо таваҷҷуҳи хос ба рушди ҳамкорӣ барои ҳамоҳангии ҳамкории мутақобил ва андешидани чораҳои коҳиш додани хавфҳои ошкоршудаи қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм кӯшиш ба харҷ дода,

Созишнома дар бораи таъсиси Шурои роҳбарони воҳидҳои кашшофии молиявии давлатҳои иштирокдори Иттиҳоди Давлатҳои Мустақил аз 5 декабри соли 2012 ва шартномаҳои байналмилалии давлатҳои иштирокдори Иттиҳоди Давлатҳои Мустақил дар соҳаи муқовимат ба қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм ва маблағгузории паҳнкунии силоҳи қатли омро ба асос гирифта,

бо дарки он, ки рушди чунин ҳамкорӣ ҷавобгӯи манфиатҳои онҳо мебошад,

бо назардошти мақсаду вазифаҳои Иттиҳоди Давлатҳои Мустақил,

стандартҳои байналмилалии Гурӯҳи татбиқи чораҳои молиявии мубориза бар зидди пулшӯиро (минбаъд - ФАТФ) эътироф карда,

принсипҳо ва меъёрҳои аз ҷониби умум эътирофшудаи ҳуқуқи байналмилалиро ба асос гирифта,

дар ин хусус ба мувофиқа расиданд:

Моддаи 1. Мавзуи Созишнома

 Бо мақсади таъмини самарабахши ҳамкории мутақобили байнадавлатии иттилоотӣ ва гузаронидани баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм Тарафҳо Маркази байналмилалии баҳодиҳии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризмро (минбаъд – МББХ) таъсис медиҳанд.

Моддаи 2. Мафҳуму истилоҳоти асосӣ

1. Барои мақсадҳои Созишномаи мазкур истилоҳоти асосии зерин истифода мешавад:

- низоми иттилоотии МББХ – низоми ҳифзшудаи иттилоотӣ барои ташкили захираҳои умумии иттилоотӣ ва таъмини ҳамкории самарабахши байнидавлатии иттилоотии Тарафҳо, инчунин гузаронидани баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм;

- баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм — фаъолияти муштараки Тарафҳо таҳти ҳамоҳангии Шурои роҳбарони воҳидҳои кашшофии молиявии давлатҳои иштирокдори Иттиҳоди Давлатҳои Мустақил (минбаъд – ШРВКМ) оид ба баҳодиҳии таҳдидҳо, осебпазирӣ ва оқибатҳои марбут ба зуҳуроти фаромарзии қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм дар каламрави Тарафҳо, муайян намудани хавфҳо, инчунин роҳандозии тадбирҳои муштарак барои коҳиш додани онҳо.

2. Зери мафҳуми маркази миллии баҳодиҳии хавфҳо мақоми салоҳиятдори Тарафе фаҳмида мешавад, ки вазифаи воҳиди кашшофии молиявиро иҷро менамояд.

Моддаи 3. Масъалаҳои ташкилии фаъолияти МББХ

1. Таъминоти ташкилӣ – техникӣ ва иттилоотии фаъолияти МББХ аз ҷониби Оператори низоми иттилоотии МББХ (минбаъд - Оператори МББХ) амалӣ карда мешавад.

2. Вазифаҳои Оператори МББХ аз ҷониби Хадамоти федералии мониторинги молиявӣ (Федератсияи Россия) амалӣ карда мешавад.

3. Комплекси таҷҳизотию барномавии коркарди маълумоти низоми иттилоотии МББХ дар қаламрави Федератсияи Россия ҷойгир аст.

4. Оператори МББХ дар фаъолияти худ шартномаю қарорҳои байналмилалиеро, ки аз ҷониби ШРВКМ қабул шудаанд, инчунин Созишномаи мазкурро дастури амал қарор медиҳад.

5. Оператори МББХ:

а) пайвастшавиро ба низоми иттилоотии МББХ ташкил карда, дастрасӣ ба марказҳои миллии баҳодиҳии хавфҳои Тарафҳоро ба низоми иттилоотии МББХ таъмин менамояд, инчунин дигар тадбирҳои техникиро мутобиқи қоидаҳои пайвастшавӣ ба низоми иттилоотии МББХ, боргирӣ ва истифодаи маълумотеро, ки аз ҷониби ШРВКМ тасдиқ шудааст, анҷом медиҳад;

б) ба воҳидҳои кашшофии молиявии Тарафҳо маводи техникии марбут ба пурра (таҷдид) кардани маълумоти низоми иттилоотии МББХ ва фаъолияти МББХ - ро омода карда, ирсол менамояд;

в) таъминоти моддию техникиро баҳо медиҳад, ҳуҷҷатҳои техникии низоми иттилоотии МББХ – ро бо риояи режими махфият ба ҳисоб гирифта, нигоҳ медорад;

г) дастрасӣ, тамомият ва махфияти массивҳои иттилоотии МББХ, ҳифзи инфрасохтори иттилоотию коммуникатсионӣ ва маълумоти коркардшудаи низоми иттилоотии МББХ - ро аз ҳама гуна истифодаи беиҷозат (ғайриқонунӣ) таъмин менамояд, кори бартарафсозии нуқсону носозиҳо ва халалдоршавии фаъолиятро, ки дар раванди кори низоми иттилоотии МББХ ба амал меоянд, ташкил мекунад ё кӯмаки техникӣ мерасонад;

д) вазифаҳои дигарро бо назардошти вазифаҳои муқарраркардаи Созишномаи мазкур амалӣ менамояд.

6. Оператори МББХ дар назди ШРВКМ барои иҷрои вазифаҳое, ки Созишномаи мазкур ба зиммааш гузоштааст, ҳисобот медиҳад.

Моддаи 4. Махфӣ будани иттилоот

1. Маълумоте, ки дар доираи Созишномаи мазкур гирифта шуда, дар низоми иттилоотии МББХ ҷойгир карда шудааст, махфӣ мебошад, ба шарте ки Тарафе, ки онро пешниҳод кардааст, мустақиман тартиби дигареро пешбинӣ накарда бошад ва нисбат ба он режими ҳифзи иттилоот, ки қонунгузории Тарафҳо пешбинӣ намудааст, татбиқ мегардад.

2.Ҳар як Тараф мувофиқи қонунгузории худ, Созишномаи мазкур ва дигар шартномаҳои байналмилалии татбиқшаванда риояи низоми махфиятро таъмин намуда, чораҳои зарурии ташкилӣ, техникӣ ва ҳуқуқӣ меандешад, ки ба ҳифзи маълумоти дар доираи Созишномаи мазкур гирифташуда, аз ҷумла татбиқи чораҳои ҷавобгарӣ барои нобудшавии тасодуфӣ ё ғайриқонунӣ, тағйир додан, ифшо кардан, инчунин ҳама гуна истифодаи ғайриқонунӣ нигаронида шудаанд.

3. Мақсад ва имконияти истифодаи маълумоти дар низоми иттилоотии МББХ мавҷудбуда аз ҷониби Тарафи пешниҳодкунандаи ин маълумот муайян карда мешавад.

Муҳлати нигоҳдории иттилоот аз ҷониби Тарафе, ки онро пешниҳод кардааст, вобаста ба мақсаде, ки он ҷойгир, дархост ва (ё) пешниҳод гардидааст, муайян карда мешавад.

4.Иттилооте, ки дар доираи ин Созишнома гирифта шудааст, бе розигии пешакии хаттии Тарафе, ки онро ҷойгир ва (ё) пешниҳод кардааст, барои мақсадҳои дигар, ба ғайр аз мақсадҳое, ки он дар низоми иттилоотии МББХ ҷойгир, дархост ва (ё) пешниҳод шудааст, истифода бурда намешавад.

Моддаи 5. Вазифаҳои Созишнома

1.Созишномаи мазкур бо мақсади иҷрои вазифаҳои асосии зерин баста мешавад:

а) ташкили низоми иттилоотие, ки мубодилаи бехатари маълумот ва ҳуҷҷатҳои электрониро байни Тарафҳо таъмин мекунад;

б) таъмин намудани Тарафҳо бо иттилооти зарурӣ барои ба таври самарабахш ошкор намудани хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм;

в) ҷорӣ намудани стандартҳои ягонаи ҳамкории электронии воҳидҳои кашшофии молиявии Тарафҳо бо роҳи муқаррар намудани форматҳои ягона;

г) таъсиси захираҳои умумии иттилоотие, ки бо категорияҳои маълумоти дар моддаи 7 ҳамин Созишнома пешбинишуда пурра мешаванд ва таъмини дастрасӣ ба онҳо;

д) ҷамъоварии маълумот барои гузаронидани баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи бо роҳи ҷиноят бадастоварда ва маблағгузории терроризм ва ҷойгир намудани натиҷаҳои он дар низоми иттилоотии МББХ;

е) таъмини ҳифзи иттилоот ва режими махфияти маълумоте, ки бо мақсади гузаронидани баҳодиҳии хавфҳои фаромиллии қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм, инчунин ҳангоми ҳамкории мутақобили байнидавлатии иттилоотӣ истифода мешавад.

2. Татбиқи Созишномаи мазкур ба мустақилияти амалиётии воҳидҳои кашшофии молиявии Тарафҳо, ки дар Тавсияҳои ФАТФ муқаррар шудаанд, таъсир намерасонад.

Моддаи 6. Вазифаҳои асосии МББХ

Ба вазифаҳои асосии МББХ инҳо дохил мешаванд:

а) таъмини гузаронидани баҳодиҳии хавфҳои фаромиллии қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм тавассути ташкили махзани маълумоти дахлдор;

б) таъмини мубодилаи бехатари иттилоот дар самтҳои барои Тарафҳо афзалиятнок;

в) таъмини ҳамкории мутақобили воҳидҳои кашшофии молиявии Тарафҳо ҷиҳати ҷамъоварӣ, коркард ва таҳлили иттилооти зарурӣ тавассути форматҳои ягона.

Моддаи 7. Мукаммалсозии иттилооти низоми иттилоотии МББХ

1. Рӯйхати категорияҳои маълумоте, ки метавонад дар низоми иттилоотии МББХ ҷойгир карда шавад (дар ҳолати зарурӣ пас аз мувофиқа бо мақомоти манфиатдори Тарафҳо) ва методикаи ташаккули он бо қарори ШРВКМ тасдиқ карда мешавад. Рӯйхати категорияҳои маълумот инҳоро дар бар мегирад:

а) маълумот аз манбаъҳои озод;

б) ҳисоботҳои макротаҳлилӣ;

в) сигналҳои хавф;

г) маълумот мувофиқи қарорҳои ШРВКМ;

2. Барои мақсадҳои Созишномаи мазкур:

зери мафҳуми ҳисоботи макротаҳлилӣ иттилооте фаҳмида мешавад, ки аз ҷониби воҳиди кашшофии молиявии Тараф дар давраи муайян таҳия шуда, дар он маълумоти ҷамъшуда, бидуни зикри маълумоти мушаххаси субъектҳо ва номи муассисаҳои молиявӣ ва дигар муассисаҳо (ташкилотҳо, шахсон), ҳаҷм ва хусусиятҳои амалиёти (аҳдҳои) молиявии марбут ба қонунигардонӣ (расмикунонӣ)-и даромадҳои бо роҳи ҷиноят бадастоварда ва (ё) маблағгузории терроризм дар асоси натиҷаҳои таҳлили гузоришҳо дар бораи амалиёти (аҳдҳои) шубҳанок ва маълумоти дигар дарҷ гардидааст;

зери мафҳуми сигнали хавф маълумот оид ба гумонбарӣ дар маблағгузории терроризм ва (ё) қонунигардонӣ (расмикунонӣ)-и даромадҳои бо роҳи ҷиноят бадастоварда ва ҷиноятҳои предикатии алоқаманд дар қаламрави Тарафҳо, ки аз ҷониби воҳиди кашшофии молиявии Тараф дар асоси натиҷаҳои таҳлили гузоришҳо оид ба амалиёти (аҳдҳои) шубҳанок таҳия шудааст ва дигар иттилооте, ки чораҳои муштараки тарафҳоро барои вокуниш ба онҳо тақозо мекунад, фаҳмида мешавад.

3. Дар ҳолати зарурӣ, Тарафҳо ҳуқуқ доранд маълумоти дигарро берун аз категорияҳои маълумоти дар банди 1 ҳамин модда пешбинишуда барои ҷойгиркунӣ дар низоми иттилоотии МББХ бо мақсади ҳалли вазифаҳои Созишномаи мазкур пешниҳод намоянд.

4. Ҳаҷми маълумоте, ки барои ҷойгиркунӣ дар низоми иттилоотии МББХ пешниҳод мегардад, режими махфияти маълумот ва истифодаи онро Тарафи пешниҳодкунанда муайян мекунад.

5. Интиқоли маълумот ба низоми иттилоотии МББХ тавассути воситаҳои таҷҳизотию барномавӣ аз ҷониби воҳидҳои кашшофии молиявии Тарафҳо амалӣ карда мешавад.

6. Имконияти минбаъд аз ҷониби воҳидҳои кашшофии молиявӣ интиқол додани иттилооти дар низоми иттилоотии МББХ ҷойгиршуда мутобиқи ҳамин модда бо назардошти риояи режими махфияти муқаррарнамудаи Тарафи пешниҳодкунанда муайян карда мешавад.

Моддаи 8. Истифодаи низоми иттилоотии МББХ барои мубодилаи иттилоот байни воҳидҳои кашшофии молиявӣ

1. Воҳидҳои кашшофии молиявии Тарафҳо низоми иттилоотии МББХ -ро барои табодули маълумоти дарихтиёрдошта оид ба амалиёт (аҳдҳои) бо маблағҳои пулӣ ё дигар молу мулк, дороиҳои маҷозӣ, ки нисбат ба онҳо гумонбарӣ дар қонунигардонӣ (расмикунонӣ)-и даромадҳои бо роҳи ҷиноят бадастоварда, маблағгузории терроризм ва дигар ҷиноятҳои ба он алоқаманд вуҷуд дорад, инчунин барои мубодилаи маълумот оид ба шахсон ва ташкилотҳои дар содир кардани ин амалиёт иштирокдошта истифода мебаранд.

2. Мубодилаи иттилоот тавассути низоми иттилоотии МББХ дар шакли хаттӣ бо ташаббус ё дар асоси дархости воҳидҳои кашшофии молиявии Тарафҳо, аз ҷумла дар мувофиқа бо воҳидҳои кашшофии молиявии Тарафҳо тавассути истифодаи воситаҳои техникии интиқоли иттилоот сурат мегирад.

Моддаи 9. Дархостҳо

1. Дархост аз ҷониби роҳбари воҳиди кашшофии молиявии Тарафи дархосткунанда ё муовини ӯ имзо карда мешавад. Дар дархост бояд инҳо дарҷ гардад:

a) номи воҳидҳои кашшофии молиявии Тарафҳои дархосткунанда ва дархостшаванда;

б) баёни мухтасари моҳияти парванда (ҳодиса);

в) нишон додани мақсад ва асоснокии дархост;

г) мазмуни кумаки дархостшаванда (ё маълумоти дархостшаванда);

д) муҳлати иҷрои дархост (агар дархост фаврӣ бошад, воҳиди кашшофи молиявии Тарафи дархосткунанда зарурати дархости фавриро асоснок мекунад);

е) мақсади истифодаи маълумоти дархостшаванда;

ж) маълумоти дигаре, ки барои иҷрои дархост зарур аст.

2. Дар ҳолати зарурӣ воҳиди кашшофии молиявии Тарафи дархостшаванда метавонад аз воҳиди кашшофи молиявии Тарафи дархосткунанда маълумоти иловагии барои иҷрои дурусти дархост зарурбударо талаб намояд.

3. Воҳиди кашшофии молиявии Тарафи дархостшаванда метавонад иҷрои дархостро рад кунад, агар он ба манфиатҳои миллӣ ё қонунгузорӣ ва уҳдадориҳои байналмилалии Тарафи дархостшаванда мухолиф бошад, инчунин агар дархост ба муқаррароти Созишномаи мазкур мувофиқат накунад.

Агар иҷрои дархост имкон надошта бошад, воҳиди кашшофии молиявии Тарафи дархостшаванда ба таври хаттӣ дар ин бора ба воҳиди кашшофи молиявии Тарафи дархосткунанда бо нишон додани сабаби радди дархост хабар медиҳад.

4. Воҳиди кашшофии молиявии Тарафи дархостшаванда метавонад иҷрои дархостро ба таъхир гузорад ё дар мувофиқа бо воҳиди кашшофии молиявии Тарафи дархосткунанда дархостро қисман ё дар асоси шартҳои зарурӣ, ки онҳо зарур мешуморанд, иҷро кунад, агар иҷрои дархост ба гузаронидани чорабиниҳои оперативӣ- ҷустуҷӯӣ, мурофиаи пешакии судӣ ё таҳқиқоти судӣ, ки Тарафи дархостшаванда амалӣ менамояд, зарар расонад.

5.Дархостҳо ва ҷавоби онҳо ба забони русӣ пешниҳод карда мешаванд, агар Тарафҳо тартиби дигареро пешбинӣ накарда бошанд.

6. Дархост дар муҳлати ҳарчи кӯтоҳтар, вале на дертар аз 60 рӯз аз рӯзи гирифтани он иҷро карда мешавад, агар аз ҷониби воҳидҳои кашшофии молиявии Тарафҳо тартиби дигаре пешбинӣ нашуда бошад.

7. Воҳиди кашшофи молиявии Тарафи дархосткунанда бо ташаббуси худ ё бо дархости воҳиди кашшофии молиявии Тарафи дархостшаванда маълумотро дар бораи натиҷаҳои истифодаи маълумоте, ки дар доираи Созишномаи мазкур аз воҳиди кашшофии молиявии Тарафи дархостшаванда гирифтааст, ирсол менамояд.

Моддаи 10. Тарзҳои дигари ҳамкории мутақобили воҳидҳои кашшофии молиявӣ

1. Воҳидҳои кашшофии молиявии Тарафҳо тартиби интиқоли маълумотро ба ҳамдигар мутобиқи қонунгузории ҳар як Тараф якҷоя муайян карда, дар ҳолати зарурӣ оид ба татбиқи Созишномаи мазкур машварат мекунанд.

2. Воҳидҳои кашшофии молиявии Тарафҳо метавонанд бо дархост ё бо ташаббуси худ маълумотро дар бораи қонунгузории ҳар як Тараф дар самти муқовимат ба қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм ва амалияи беҳтарини ин самт мубодила намоянд. Воҳидҳои кашшофии молиявии Тарафҳо метавонанд барои табодули таҷриба ва баррасии масъалаҳои мавриди таваҷҷуҳи тарафайн конфронсу семинарҳои муштарак баргузор кунанд.

Моддаи 11. Баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм

1. Тарафҳо дар ҳамоҳангӣ бо ШРВКМ якҷоя баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризмро анҷом медиҳанд.

2. Тартиб ва шартҳои гузаронидани баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризмро методологияи баҳодиҳии фаромиллии хавфи қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм, ки бо қарори ШРВКМ тасдиқ мегардад, муайян мекунад.

3.Баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм бо истифода аз маълумоте, ки воҳидҳои кашшофии молиявии Тарафҳо дар низоми иттилоотии МББХ ҷойгир кардаанд, анҷом дода мешавад.

4.Иттилооте, ки бо мақсади баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризм истифода мешавад, мутобиқи Созишномаи мазкур махфӣ мебошад, агар Тарафе, ки онро пешниҳод кардааст, дар шакли хаттӣ оид ба амали баръакс иттилоъ надода бошад.

5.ШРВКМ натиҷаҳои баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризмро тасдиқ мекунад, дар мувофиқа бо Тарафҳо дараҷаи махфияти онҳоро муайян мекунад. Бо дарназардошти қарорҳои ШРВКМ воҳидҳои кашшофии молиявии Тарафҳо доираи гирандагон ва тартиби пешниҳоди натиҷаҳои баҳодиҳии фаромиллии хавфҳои қонунигардонӣ (расмикунонӣ)-и даромадҳои бо роҳи ҷиноят бадастоварда ва маблағгузории терроризмро мустақилона муайян мекунанд.

Моддаи 12. Маблағгузории фаъолияти МББХ

Маблағгузории корҳои марбут ба таъсис, таъмини фаъолият ва рушди низоми иттилоотии МББХ аз ҷониби Оператори МББХ дар доираи маблағҳои буҷетӣ, ки ба Хадамоти федералии мониторинги молиявӣ тибқи қонунгузории Федератсияи Россия пешбинӣ шудааст, амалӣ карда мешавад.

Моддаи 13. Ворид намудани тағйирот 

Ба Созишномаи мазкур бо ризояти Тарафҳо тағйирот ворид намудан мумкин аст, ки он ҷузъи ҷудонашавандаи Созишнома буда, бо пайнавишти дахлдор ба расмият дароварда мешавад ва бо тартиби барои эътибор пайдо кардани Созишномаи мазкур муайянгардида эътибор пайдо мекунад.

Моддаи 14. Ҳалли баҳсҳо

Масъалаҳои баҳсноки байни Тарафҳо, ки ҳангоми татбиқ ё тафсири Созишномаи мазкур бармеоянд, тавассути машварату гуфтушуниди Тарафҳои манфиатдор ҳал карда мешаванд.

Моддаи 15. Эътибор пайдо кардан 

1.Созишномаи мазкур пас аз 30 рӯзи гирифтани огоҳиномаи сеюм аз ҷониби маҳфуздоранда оид ба иҷрои расмиёти дохилидавлатие, ки барои эътибор пайдо кардани он заруранд, аз ҷониби Тарафҳои онро имзонамуда, эътибор пайдо мекунад.

2. Барои Тарафҳое, ки расмиёти дохилидавлатиро дертар иҷро намудаанд, Созишномаи мазкур баъди 30 рӯзи пас аз гирифтани огоҳиномаи дахлдор аз ҷониби маҳфуздоранда эътибор пайдо мекунад.

Моддаи 16. Ҳамроҳшавӣ

Созишномаи мазкур бо ризояти давлатҳои онро имзонамуда ва ба он ҳамроҳшуда пас аз эътибор пайдо намудан барои ҳароҳшавии ҳама гуна давлатҳо бо роҳи ба маҳфуздоранда пешниҳод намудани ҳуҷҷати ҳамроҳшавӣ кушода аст.

Барои давлате, ки ба маҳфуздоранда ҳуҷҷати ҳамроҳшавиро пешниҳод намудааст, Созишномаи мазкур пас аз 30 рӯзи аз ҷониби маҳфуздоранда гирифтани огоҳиномаи охирин оид ба розигии давлатҳои онро имзонамуда ва ба он ҳамроҳшуда эътибор пайдо мекунад.

Моддаи 17. Қатъ намудани амали Созишнома

1.Ҳар кадоме аз Тарафҳо ҳуқуқ дорад бо ирсол намудани огоҳиномаи хаттӣ ба маҳфуздоранда дар бораи аз он баромадан дар муддати на дертар аз шаш моҳ пеш аз баромадан ва танзими уҳдадориҳои дар давоми амали Созишномаи мазкур пайдошуда аз он барояд.

2.Муқаррароти Созишномаи мазкур оид ба нигоҳ доштани махфияти маълумот пас аз қатъи амали он ё баромадан аз он татбиқ мегардад.

Дар шаҳри Бишкек 13 октябри соли 2023 дар як нусхаи асл ба забони русӣ тартиб дода шуд. Нусхаи асл дар Кумитаи иҷроияи Иттиҳоди Давлатҳои Мустақил нигоҳ дошта мешавад, ки он ба ҳар давлати ба он имзогузошта нусхаи тасдиқшудаи Созишномаро ирсол менамояд.