Низомномаи Кумитаи роҳбарикунандаи байниидоравӣ оид ба ҳамоҳангсозӣ ва баррасии маблағгузории миллии тандурустӣ, захираҳои инсонӣ ва сиёсати рақамикунонӣ дар соҳаи тандурустӣ

1. МУҚАРРАРОТИ УМУМӢ

1. Кумитаи роҳбарикунандаи байниидоравӣ оид ба ҳамоҳангсозӣ ва баррасии маблағгузории миллии тандурустӣ, захираҳои инсонӣ ва сиёсати рақамикунонӣ дар соҳаи тандурустӣ (минбаъд – Кумита) мақоми олии машваратӣ ва қарор қабулкунанда буда, ҳамоҳангсозии фаъолияти вазорату идораҳо, иттиҳодияҳои ҷамъиятиро вобаста ба амалисозии сиёсати давлатӣ дар самти ислоҳоти соҳаи тандурустӣ дар доираи маблағгузории миллии тандурустӣ, захираҳои инсонӣ ва сиёсати рақамикунонӣ дар соҳаи тандурустӣ амалӣ месозад.

2. Кумита дар фаъолияти худ Конститутсияи Ҷумҳурии Тоҷикистон, Кодекси тандурустии Ҷумҳурии Тоҷикистон, қонунҳои Ҷумҳурии Тоҷикистон, санадҳои дигари меъёрии ҳуқуқии байналмилалие, ки Тоҷикистон онҳоро эътироф намудааст ва Низомномаи мазкурро ба роҳбарӣ мегирад.

2. ҲАДАФ ВА ВАЗИФАҲОИ КУМИТА

3. Ҳадафи асосии Кумита ин додани тавсияву машварат ва қабули қарорҳои саривақтӣ, инчунин таъмини ҳамоҳангсозии байнисоҳавӣ миёни мақомоти иҷроияи маҳаллии ҳокимияти давлатӣ, муассисаҳои таълимӣ, ташкилотҳои тандурустӣ ва иттиҳодияҳои ҷамъиятӣ бо мақсади мусоидат намудан ба татбиқи ислоҳот дар самти тандурустӣ доир ба маблағгузории миллии тандурустӣ, захираҳои инсонӣ ва сиёсати рақамикунонӣ дар соҳаи тандурустӣ равона гардидааст.

4. Вазифаҳои асосии Кумита аз инҳо иборатанд:

- ҳамоҳангсозии фаъолият ва таъмини ҳамкории мутақобилаи вазорату идораҳо, мақомоти иҷроияи маҳаллии ҳокимияти давлатӣ, созмонҳои байналмилалӣ, шахсони воқеӣ ва ҳуқуқӣ зимни татбиқи лоиҳа;

- таҳияи пешниҳодҳо ва қабули қарорҳо дар самтҳои асосии сиёсати давлатӣ;

- ташкили мониторинг ва арзёбии ҳолати татбиқи лоиҳа, ҳалли масъалаҳо, пешниҳоди тавсияҳо ба вазорату идораҳои дахлдор ва мақомоти иҷроияи маҳаллии ҳокимияти давлатӣ оид ба амалисозии самтҳои асосии сиёсати давлатӣ, ки аз татбиқи лоиҳа бармеоянд;