ҲУКУМАТИ ҶУМҲУРИИ ТОҶИКИСТОН

ҚАРОР

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 18 июни соли 2024, №2297 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи алоқаи фелдегерӣ»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи алоқаи фелдегерӣ» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи алоқаи фелдегерӣ»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи алоқаи фелдегерӣ»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 18 июни соли 2024, №2297 барои додани хулоса ба Ҳукумати Ҷумҳурии Тоҷикистон пешниҳод гардидааст, баррасӣ карда, таклифҳои зеринро ба моддаи 1 манзур менамояд:

1. дар қисми муқаддимавӣ санаи қабули Қонун навишта шавад;
2. оид ба қисми 1:

• сархати якум хориҷ карда шавад, зеро меъёри амалкунанда фаҳмо ва дақиқ буда, зарурати илова намудани калимаи «дипломатӣ» ҷой надорад;
• сархатҳои сеюм ва чорум, сархатҳои чорум ва панҷуми дар таҳрири нав ифодашавандаи моддаи 2 муттаҳид ва мушаххас гардида, калимаҳои «амри Президенти Ҷумҳурии Тоҷикистон ва» хориҷ карда шаванд;

3. қисми 2 дар таҳрири зерин ифода карда шавад:

«2. Дар ном ва матни моддаи 3 калимаҳои «оиди хадамоти» ба калимаҳои «дар бораи» иваз гардида, калимаи «(Сарқонун)» хориҷ карда шавад.»;

4. оид ба қисми 4:

• сархати якум хориҷ карда шавад, зеро зарурати он дида намешавад;
• оид ба сархати дуюми қисми сеюми ба моддаи 5 Қонуни мазкур иловашаванда бинобар мавзуи танзими моддаи 5 набудан хориҷ карда шавад;

5. оид ба қисми 5:

• сархати дуюм таҷдид карда шавад, зеро он мазмун ва моҳияти муқаррароти сархати дуюми моддаи 6 Қонуни мазкурро коста менамояд;
• сархатҳои чорум ва панҷум бинобар коста таҳия гардидан таҷдид карда шаванд;
• сархати ҳафтум дар иртибот бо номи модда ва мавзуи танзими он набудан хориҷ карда шавад;

6. оид ба қисми 6:

• ба сархати дуюм пеш аз калимаи «ба» калимаи «мувофиқан» илова карда шавад;
• ба сархати сеюм пас аз калимаи «ба» калимаи «калимаи» илова карда шавад;
• сархати чорум бинобар коста будан таҷдид карда шавад;

7. оид ба қисми 7:

• сархатҳои якум ва дуюм муттаҳид карда шаванд;
• сархати сеюм хориҷ карда шавад, зеро масъалаи мазкур мавзуи танзими Қонуни Ҷумҳурии Тоҷикистон «Дар бораи алоқаи фелдегерӣ» намебошад;

8. аз қисмҳои 9, 10 ва 11 калимаҳои «аломат ва» хориҷ карда шаванд;
9. сархати дуюми қисми 10 дар қисмати иваз кардани калимаи «хурдсолон» бинобар ба миён омадани гуногунфаҳмӣ таҷдид карда шавад;
10. сархати дуюми қисми 12 бинобар зарурат надоштан хориҷ карда шавад.

Ҳамзамон дар лоиҳа хатоҳои имлоӣ, грамматикӣ ва техникии дигари ҷойдошта ислоҳ гардида, матни забони русӣ ба матни забони тоҷикӣ мутобиқ карда шавад.