Тартиби баргузории гуфтушунидҳо, баимзорасонӣ ва барои тасдиқ (ратификатсия) пешниҳод намудани шартномаҳои байналмилалӣ вобаста ба кумаки беруна

1. МУҚАРРАРОТИ УМУМӢ

1. Тартиби баргузории гуфтушунидҳо, баимзорасонӣ ва барои тасдиқ (ратификатсия) пешниҳод намудани шартномаҳои байналмилалӣ вобаста ба кумаки беруна (минбаъд - Тартиб) раванди баргузории гуфтушунидҳо, баимзорасонӣ ва тасдиқи (ратификатсия) шарномаҳои байналмилалӣ вобаста ба кумаки берунаро (минбаъд - шартнома) тибқи Қонуни Ҷумҳурии Тоҷикистон "Дар бораи шартномаҳои байналмилалии Ҷумҳурии Тоҷикистон" муайян мекунад.

2. Шартномаҳое, ки аз номи Ҷумҳурии Тоҷикистон баста мешаванд ва хусусияти таъҷилӣ доранд, аз ҷониби шахси масъул бе гузаронидани расмиёти пешбининамудаи боби 3 ва бандҳои 9 ва 10 боби 4 Тартиби мазкур дар асоси розигии Президенти Ҷумҳурии Тоҷикистон ба имзо расонида мешавад.

2. МАФҲУМҲОИ АСОСӢ

3. Дар Тартиб мафҳумҳои асосии зерин истифода мешаванд:

- агентии амаликунанда - ташкилоте мебошад, ки бо қарори Ҳукумати Ҷумҳурии Тоҷикистон ё агентии иҷроия таъсис дода шуда, барои амалигардонӣ ва истифодаи маблағҳои лоиҳаи кумаки беруна масъул аст.

- грант - кумаки ройгон, ки барои татбиқи лоиҳаи кумаки беруна аз тарафи шарикони рушд бо шартҳои дар созишномаи байни шарикони рушд ва гиранда ё агентии иҷроия муайяншуда расонида мешавад;

- кумаки беруна - аз ҷониби шарикони рушд пешниҳод гардидани маблағҳои пулӣ, аз ҷумла бо асъори хориҷӣ, мол (молу мулк, арзишҳои моддӣ ва техникӣ), иҷрои корҳо, хизматрасонии ройгон ва имтиёзнок ба гирандагон бо мақсади мусоидат барои паст намудани сатҳи камбизоатӣ, рушди иқтидори институтсионалӣ ва фардӣ, татбиқи ислоҳот ва рушди иқтисодии Ҷумҳурии Тоҷикистон, инчунин пешгирӣ ва бартарафсозии оқибатҳои офатҳои табиӣ ва/ё ҳолатҳои фавқулодаи дигар;

- кумаки иқтисодии аз ҷониби шарикони рушд ва лоиҳаҳо пешниҳодшуда, ки аз ҷониби давлат дар бахшҳои афзалиятноки иқтисодии аз ҷониби Ҳукумати Ҷумҳурии Тоҷикистон тасдиқ гардидааст, маблағгузорӣ мешаванд;

- кумакҳои дигар - кумакҳои башардӯстона, кумакҳои таъҷилӣ;

- қарз - маблағҳое, ки мутобиқи шартнома гирифта, ба ҳамон андоза бо фоиз ё бе фоиз барои истифодаи он баргардонида мешаванд ё маблағҳое, ки аз рӯйи онҳо ба қарздиҳанда фоиз ё пардохти дигари вобаста ба қарзгирӣ дода мешаванд;

- мақоми ваколатдори давлатӣ - мақоми ваколатдори давлатӣ дар соҳаи молия ва ё мақоми дигаре, ки барои гузаронидани гуфтушунид, баимзорасонӣ ва барои тасдиқ (ратификатсия) пешниҳод намудани шартномаҳо ваколатдор шудаанд;

- шарикони рушд - давлатҳои хориҷӣ, ҳукуматҳои давлатҳои хориҷӣ, агентиҳои ҳукуматҳои давлатҳои хориҷӣ, сохторҳои маъмурию ҳудудии онҳо, созмонҳои байналмилалии молиявӣ ва дигар созмонҳои байналмилалӣ, ки кумаки берунаро пешниҳод менамоянд.

3. РАВАНДИ БАРГУЗОРИИ ГУФТУШУНИДҲО

4. Мақоми ваколатдори давлатӣ баъд аз анҷом ёфтани ҷараёни таҳия ва арзёбии лоиҳа ҷиҳати баргузор намудани гуфтушунид вобаста ба муҳокимаи лоиҳаи шартнома бо шарикони рушд барои гирифтани розигӣ ба Президенти Ҷумҳурии Тоҷикистон ё Ҳукумати Ҷумҳурии Тоҷикистон дар шакли хаттӣ муроҷиат менамояд.

5. Дар асоси муроҷиати мақоми ваколатдори давлатӣ аз ҷониби Президенти Ҷумҳурии Тоҷикистон ё Ҳукумати Ҷумҳурии Тоҷикистон ҳайати Тоҷикистон дар гуфтушунид аз ҳисоби муовини якум ва муовинони роҳбари аввали вазорату идораҳо (сарпарасти соҳа) ва масъулони Дастгоҳи иҷроияи Президенти Ҷумҳурии Тоҷикистон муайян мегардад. Барои роҳбарӣ намудани ҳайат ва ба имзо расонидани протоколи гуфтушунид ба роҳбари мақоми ваколатдори давлатӣ ваколатнома дода мешавад.

6. Пас аз дастрас гардидани ваколатнома мақоми ваколатдори давлатӣ уҳдадор аст, ки санаи баргузор намудани гуфтушунидро бо намояндагони шарикони рушд муайян карда, лоиҳаи шартнома ва дигар ҳуҷҷатҳои муҳокимашавандаро ба ҳайати гуфтушунид пеш аз баргузории гуфтушунид дар шакли хаттӣ ё электронӣ пешниҳод намояд.

7. Лоиҳаи шартнома бо дар назар доштани ҳифзи манфиатҳои миллӣ тибқи тартиби муқарраргардида мавриди муҳокима қарор дода мешавад.

8. Аз натиҷаи гуфтушунид аз ҷониби ҳайати гуфтушунид протокол ба имзо расонида мешавад.

4. РАВАНДИ БАИМЗОРАСОНИИ ШАРТНОМАҲО

9. Пас аз ба имзо расидани протоколи гуфтушунид мақоми ваколатдори давлатӣ бо ҷалби агентии амаликунанда тарҷумаи ниҳоии матни лоиҳаи шартномаи муҳокимашударо ба забони давлатӣ тибқи талаботи қонунгузории Ҷумҳурии Тоҷикистон таъмин менамояд.

10. Вобаста ба шартномаҳое, ки аз номи Ҷумҳурии Тоҷикистон баста мешаванд, мақоми ваколатдори давлатӣ пас аз тарҷумаи матни мувофиқашуда ва протоколи баимзорасонидашуда ба Президенти Ҷумҳурии Тоҷикистон ҷиҳати гирифтани ваколатнома дар хусуси баимзорасонии шартнома бо лоиҳаи мактуб-ваколатнома муроҷиат менамояд. Пас аз гирифтани ваколатнома шахси ваколатдор бо шарикони рушд шартномаро ба имзо мерасонад.

11. Доир ба шартномаҳое, ки аз номи Ҳукумати Ҷумҳурии Тоҷикистон баста мешаванд ва шартномаҳои байналмилалии дорои хусусияти байниидоравӣ ва протоколи баимзорасонидашуда ба Ҳукумати Ҷумҳурии Тоҷикистон тибқи тартиби муқарраргардида лоиҳаи қарори Ҳукумати Ҷумҳурии Тоҷикистонро дар хусуси баимзорасонии шартнома пешниҳод менамояд.

12. Имзои ҳуҷҷатҳо дар шакли хаттӣ ё электронӣ тибқи тартиби муқараргардида анҷом дода мешавад.

5. РАВАНДИ ТАСДИҚ (РАТИФИКАТСИЯ)-И ШАРТНОМАҲО

13. Пас аз ба имзо расидани шартномаҳо оид ба гирифтани қарзи давлатӣ ва шартномаҳое, ки дорои имтиёзҳои иловагии андозбандӣ мебошанд, мақоми ваколатдори давлатӣ нусхаи шартномаи имзогардидаро бо мактуб ва муҳри расмии худ ба Президенти Ҷумҳурии Тоҷикистон ё Ҳукумати Ҷумҳурии Тоҷикистон ирсол менамояд.

14. Шартномаи имзогардида бо мактуби дахлдори Президенти Ҷумҳурии Тоҷикистон ё қарори Ҳукумати Ҷумҳурии Тоҷикистон барои тасдиқ (ратификатсия) ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод мегардад.

15. Баъд аз тасдиқ (ратификатсия) гардидани шартномаи пешниҳодшуда аз ҷониби Маҷлиси намояндагони Маҷлиси Олии Ҷумҳурии Тоҷикистон мақомоти ваколатдор нусхаи ҳуҷҷатҳои тасдиқшударо ба Вазорати корҳои хориҷӣ пешниҳод менамояд.

6. МУҚАРРАРОТИ ХОТИМАВӢ

16. Мақомоти давлатӣ ва агентиҳои амаликунанда барои иҷро накардани Тартиби мазкур тибқи қонунгузории Ҷумҳурии Тоҷикистон ба ҷавобгарӣ кашида мешаванд.