Низомномаи Саридораи бойгонии назди Ҳукумати Ҷумҳурии Тоҷикистон

1. МУҚАРРАРОТИ УМУМӢ

1. Саридораи бойгонии назди Ҳукумати Ҷумҳурии Тоҷикистон (минбаъд - Саридораи бойгонӣ) мақоми иҷроияи марказии ҳокимияти давлатии Ҷумҳурии Тоҷикистон мебошад, ки дар доираи ваколатҳои худ амалисозии сиёсати давлатиро дар самти назорат ва бо заминаи меъёрию методӣ таъмин намудани тартиби пешбурди коргузорӣ ва кори бойгонидорӣ дар мақомоти давлатӣ, корхона, муассиса ва ташкилотҳои дигар, новобаста аз шакли моликият ва тобеияташон, таъмин менамояд.

2. Саридораи бойгонӣ фаъолияти ташкилотҳои Саридораи бойгониро роҳбарӣ, ҳамоҳанг ва назорат менамояд.

3. Саридораи бойгонӣ фаъолияти худро дар асоси Конститутсияи Ҷумҳурии Тоҷикистон, қонунҳои конститутсионӣ ва қонунҳои Ҷумҳурии Тоҷикистон, қарорҳои Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, фармону амрҳои Президенти Ҷумҳурии Тоҷикистон, қарору фармоишҳои Ҳукумати Ҷумҳурии Тоҷикистон, санадҳои ҳуқуқии байналмилалии эътирофнамудаи Тоҷикистон, инчунин Низомномаи мазкур ба роҳ мемонад.

4. Саридораи бойгонӣ фаъолияти худро дар ҳамкорӣ бо мақомоти дигари иҷроияи марказии ҳокимияти давлатӣ, мақомоти иҷроияи маҳалии ҳокимияти давлатӣ, мақомоти худидоракунии шаҳрак ва деҳот, ташкилотҳои ҷамъиятӣ, шахсони воқеӣ ва ҳуқуқӣ сарфи назар аз шакли ташкиливу ҳуқуқии онҳо анҷом медиҳад.

2. ВАЗИФА ВА ВАКОЛАТҲО

5. Саридораи бойгонӣ дар соҳаи муқарраргардидаи фаъолият вазифаҳои зеринро анҷом медиҳад:

- ба баррасии Ҳукумати Ҷумҳурии Тоҷикистон пешниҳод намудани лоиҳаи қонунҳои Ҷумҳурии Тоҷикистон, санадҳои меъёрии ҳуқуқии Президенти Ҷумҳурии Тоҷикистон ва Ҳукумати Ҷумҳурии Тоҷикистон оид ба масъалаҳое, ки ба фаъолияти Саридораи бойгонӣ тааллуқ доранд;

- баҳисобгирӣ ва нигоҳдории давлатии ҳуҷҷатҳои Хазинаи бойгонии миллӣ;

- муайян намудани самтҳои асосии фаъолияти низоми ташкилотҳои бойгонии мамлакат, инчунин пешбурд, рушд ва такмили онҳо;

- таҳия ва тасдиқи нақшаҳои кори бойгонидорӣ дар ҳудуди Ҷумҳурии Тоҷикистон.

6. Саридораи бойгонӣ мутобиқи вазифаҳои ба зиммааш гузошташуда ваколатҳои зеринро ба амал мебарорад:

- тасдиқи низомномаҳои бойгониҳои марказии давлатӣ;

- тасдиқи низомномаҳои бойгониҳои давлатӣ;

- таҳия ва тасдиқи низомномаҳои намунавии бахши бойгонии мақомоти иҷроияи ҳокимияти давлатии Вилояти Мухтори Куҳистони Бадахшон, вилоятҳо, шаҳру ноҳияҳои Ҷумҳурии Тоҷикистон ва бойгонии байниидоравии ҳуҷҷатҳои ҳайати шахсӣ;

- таҳияи низомномаҳои намунавии бойгониҳои соҳавӣ;

- таҳияи Низомномаи Комиссияи марказии муштараки ташхисию тафтишотӣ ва методии Саридораи бойгонӣ;

- тасдиқи Дастури кори Комиссияи ташхисию тафтишотӣ;

- мувофиқа намудани феҳристҳои парвандаҳои вазорату идораҳо ва мақомоти иҷроияи маҳаллии ҳокимияти давлатӣ;

- мувофиқа намудани номгӯйи ҳуҷҷатҳои намунавӣ ва соҳавии вазорату идораҳо ва мақомоти иҷроияи маҳаллии ҳокимияти давлатӣ;

- таҳияи қоидаҳои асосии кори бойгониҳои давлатӣ ва идоравии Ҷумҳурии Тоҷикистон;

- таҳия ва тасдиқи номгӯйи хизматрасониҳое, ки бойгониҳои давлатӣ дар асоси шартнома анҷом медиҳад;

- таҳия ва тасдиқи тартиби намунаи меъёри намудҳои кори бойгониҳои давлатӣ, вақт ва коркарди асосӣ;

- ҷамъоварӣ ва нигоҳдории ҳуҷҷатҳои Хазинаи бойгонии миллии Ҷумҳурии Тоҷикистон дар бойгониҳои давлатӣ ва идоравии ҷумҳурӣ;

- назорати расмиёти супоридани ҳуҷҷатҳои ташкилотҳои ҷамъиятӣ ва шаҳрвандон ба бойгониҳои давлатӣ, инчунин ба осорхонаҳо ва китобхонаҳо;

- бо тартиби муқарраргардида ба роҳ мондани чорабиниҳо оид ба ошкор намудани ҳуҷҷатҳои марбут ба таърихи давлати тоҷикон, ки дар бойгониҳои давлатҳои хориҷӣ маҳфуз мебошанд ва бо нусхаи асл ё нусхаҳои ин ҳуҷҷатҳо таъмин намудани Хазинаи бойгонии миллии Ҷумҳурии Тоҷикистон;

- ташкили баҳисобгирии давлатии марказонидашудаи ҳуҷҷатҳои Хазинаи бойгонии миллии Ҷумҳурии Тоҷикистон, ки дар бойгониҳои давлатӣ, идоравӣ, осорхонаҳо ва китобхонаҳои Ҷумҳурии Тоҷикистон, инчунин дар моликияти шахсони воқеӣ ва ҳуқуқӣ маҳфуз мебошанд;

- дар асоси шартнома иҷрои корҳо оид ба коркарди илмию техникии ҳуҷҷатҳои бойгониҳои идоравӣ;

- иҷрои корҳо оид ба таъсиси Хазинаи эҳтиётии нусхаҳои ҳуҷҷатҳои нодир ва ниҳоят арзишноки дорои аҳаммияти таърихӣ;

- расонидани кумаки методию амалӣ дар кори таъмини ҳифз, ҷамъоварӣ ва истифодабарии ҳуҷҷатҳои Хазинаи бойгонии миллии Ҷумҳурии Тоҷикистон;

- таъсис ва рушди низоми дастгоҳи илмию маълумотдиҳии ҳуҷҷатҳои Хазинаи бойгонии миллии Ҷумҳурии Тоҷикистон;

- назорати корҳои илмию тадқиқотӣ ва методии муассисаҳои бойгонии Ҷумҳурии Тоҷикистон дар соҳаҳои бойгонишиносӣ, ҳуҷҷатнигорӣ ва археография, инчунин андешидани чораҳо ҷиҳати дар амал татбиқ намудани натиҷаҳои тадқиқотҳои илмӣ дар фаъолияти бойгонидорӣ;

- баррасии пешниҳод, ариза, шикоят ва муроҷиатҳои дигари шахсони воқеӣ ва ҳуқуқӣ ва қабули қарорҳои асоснок ва қонунӣ оид ба ариза, шикоят ва муроҷиатҳои дигари воридшуда ва дар ҳолати зарурӣ санҷиши онҳо дар маҳалҳо;

- дар доираи ваколатҳои худ таъмини ҳифзи маълумоте, ки сирри давлатиро ташкил медиҳад;

- ба роҳ мондани омодагии касбӣ, азнавтайёркунӣ, такмили ихтисос ва таҷрибаомӯзии кормандони Саридораи бойгонӣ;

- дар асоси шартнома ташкили омӯзиши шахсони масъули самти кори бойгонидорӣ ва коргузории вазорату идораҳо, мақомоти иҷроияи маҳалии ҳокимияти давлатӣ, корхона, муассиса ва ташкилоти дигар;

- таҳия, мувофиқа ва тасдиқи барномаҳои омӯзиши кормандони масъули самти бойгонидорӣ ва коргузории вазорату идораҳо, мақомоти иҷроияи маҳалии ҳокимияти давлатӣ, корхона, муассиса, ташкилоти дигар;

- тибқи тартиби муқарраршуда ба роҳ мондани ҳамкорӣ бо мақомоти ҳокимияти давлатии давлатҳои хориҷӣ ва созмонҳои байналмиллалӣ дар соҳаи муқарраргардида;

- бо тартиби муқарраргардида баргузории озмунҳо, имзои қарордодҳои давлатӣ оид ба таъмини мавод, иҷрои корҳо ва хизматрасониҳо барои ҳалли эҳтиёҷоти Саридораи бойгонӣ, инчунин гузаронидани корҳои илмию тадқиқотӣ;

- ҷамъбаст намудани таҷрибаи татбиқи қонунгузории Ҷумҳурии Тоҷикистон дар соҳаи муқарраргардидаи фаъолият;

- анҷом додани функсияи ихтиёрдори асосии воситаҳои буҷети давлатӣ, ки барои таъминот ва ҳалли вазифаҳои Саридораи бойгонӣ пешбинӣ шудаанд;

- додани иттилоъ ба мақомоти давлатӣ, воситаҳои ахбори омма ва аҳли ҷомеаи Ҷумҳурии Тоҷикистон дар бораи фаъолияти Саридораи бойгонӣ;

- пешбурди назорати фаъолияти самти бойгонидорӣ ва коргузории вазорату идораҳо, мақомоти иҷроияи маҳаллии ҳокимияти давлатӣ, корхона, муассиса ва ташкилоти дигар сарфи назар аз шакли моликият ва тобеияти идоравиашон;

- таҳия ва тасдиқи дастурамалҳо, меъёрҳо, қоидаҳо ва санадҳои дигари меъёрию методӣ оид ба масъалаҳои марбут ба соҳаи бойгонидорӣ.

7. Саридораи бойгонӣ барои амалигардонии вазифаҳо ва ваколатҳои худ дар соҳаи муқарраргардидаи фаъолият ҳуқуқҳои зерин дорад:

- манбаъҳои ҷамъоварии ҳуҷҷатҳои Хазинаи бойгонии миллии Ҷумҳурии Тоҷикистон, инчунин таркиби ҳуҷҷатҳоеро, ки бояд дар бойгониҳои давлатӣ ва идоравӣ нигоҳ дошта шаванд, муайян намояд;

- бо тартиби муқаррарнамудаи қонунгузории Ҷумҳурии Тоҷикистон фаъолияти хадамоти бойгонидорӣ ва коргузориро санҷад;

- маълумоти барои қабули қарор вобаста ба масъалаҳои ба ваколати Саридораи бойгонӣ тааллуқдоштаро дархост карда гирад;

- барои бартараф намудани камбудиҳо дар кори бойгониҳои давлатӣ, идоравӣ, байниидоравӣ ва ташкили феҳристи парвандаҳо ва раванди минбаъдаи ба бойгонӣ супоридани ҳуҷҷатҳои коргузорӣ дастур диҳад;

- бо тартиби муқарраршуда ҷиҳати ба ҷавобгарии маъмурӣ кашидани шахсони воқеӣ ва ҳуқуқӣ, ки ба қонунвайронкуниҳо дар самти бойгонидорӣ роҳ додаанд, чорандешӣ намояд;

- тибқи қонунгузорӣ санадҳои ҳуқуқии марбут ба масъалаҳои бойгонидорӣ ва коргузориро, ки аз ҷониби вазорату идораҳо, мақомоти иҷроияи маҳаллии ҳокимияти давлатӣ, корхона, муассиса ва ташкилоти дигар сарфи назар аз шакли моликият ва тобеияти идоравиашон таҳия гардидаанд, мувофиқа намояд;

- тадқиқоту озмоишҳо, таҳлилҳо ва баҳодиҳӣ, инчунин тадқиқоти илмии зарурӣ оид ба масъалаҳои бурдани назорат дар соҳаи муқарраргардидаи фаъолиятро ба роҳ монад;

- ба шахсони воқеӣ ва ҳуқуқӣ масъалаҳои ба ваколати Саридораи бойгонӣ тааллуқдоштаро шарҳ диҳад;

- фаъолияти ташкилотҳои тобеи Саридораи бойгониро назорат намояд;

- ҷиҳати ҳалли масъалаҳои соҳаи муқарраргардидаи фаъолияташ муассисаҳои илмӣ, олимон ва мутахассисони алоҳидаро ҷалб намояд;

- барои аз ҷониби шахсони воқеӣ ва ҳуқуқӣ роҳ надодан ва ё пешгирӣ намудани қонуншиканиҳо нисбат ба талаботи ҳатмӣ дар соҳаи муқарраргардидаи фаъолият, инчунин бартараф намудани оқибатҳои қонуншиканиҳои мазкур чораҳои дахлдорро тибқи қонунгузории Ҷумҳурии Тоҷикистон андешад;

- дар соҳаи муқарраргардидаи фаъолият мақомоти ҳамоҳангсозӣ, машваратӣ ва ташхисӣ (шуроҳо, комиссияҳо, гурӯҳҳо ва ҳайати мушовара), аз ҷумла байниидоравӣ, таъсис диҳад;

- дар ҳолатҳои пешбининамудаи қонунгузорӣ оид ба масъалаҳои ба ваколати Саридораи бойгонӣ мансуб донисташуда лоиҳаи санадҳои меъёрии ҳуқуқӣ таҳия намуда, ба баррасии Ҳукумати Ҷумҳурии Тоҷикистон пешниҳод намояд;

- нишонҳои сарисинагии соҳавӣ таъсис дода, бо он кормандони соҳаи бойгонӣ ва шаҳрвандонеро, ки дар рушди соҳа саҳми махсус гузоштаанд, сарфароз гардонад;

- дигар ҳуқуқҳоеро, ки дар қонунгузории Ҷумҳурии Тоҷикистон пешбинӣ шудааст, доро бошад.

3. ТАШКИЛИ ФАЪОЛИЯТ

8. Ба фаъолияти Саридораи бойгонии назди Ҳукумати Ҷумҳурии Тоҷикистон сардор роҳбарӣ менамояд, ки аз ҷониби Ҳукумати Ҷумҳурии Тоҷикистон ба мансаб таъин ва аз мансаб озод карда мешавад.

9. Сардор барои иҷрои вазифаҳои ба зиммаи Саридораи бойгонӣ гузошташуда ва татбиқи сиёсати давлатӣ дар соҳа шахсан масъул мебошад.

10. Сардори Саридораи бойгонӣ 1 муовин дорад, ки ӯ бо пешниҳоди сардор аз ҷониби Ҳукумати Ҷумҳурии Тоҷикистон ба мансаб таъин ва аз мансаб озод карда мешавад.

11. Фаъолияти меҳнатии кормандон дар дастгоҳи марказӣ ва воҳидҳои сохтории Саридораи бойгонӣ тибқи қонунгузории Ҷумҳурии танзим карда мешавад.

12. Сардори Саридораи бойгонӣ:

- вазифаҳоро байни сардор ва муовин тақсим менамояд;

- низомномаҳои воҳидҳои зертобеи Саридораи бойгониро тасдиқ менамояд;

- кормандони дастгоҳи марказии Саридораи бойгонӣ, роҳбарон ва муовинони роҳбарони ташкилотҳои зертобеъро ба вазифа таъин менамояд ва аз вазифа озод менамояд;

- тибқи қонунгузории Ҷумҳурии Тоҷикистон дар бораи хизмати давлатӣ масъалаҳои адои хизмати давлатиро дар Саридораи бойгонӣ ҳал менамояд;

- сохтор ва ҷадвали бастҳои Саридораи бойгониро дар доираи фонди музди меҳнат ва шумораи кормандони аз ҷониби Ҳукумати Ҷумҳурии Тоҷикистон муқарраргашта, инчунин хароҷоти нигоҳдории Саридораи бойгониро, ки дар доираи маблағгузории тасдиқшудаи буҷети ҷумҳуриявӣ пешбинӣ гардидааст, тасдиқ мекунад;

- нақшаи солонаи кор ва нишондиҳандаҳои фаъолияти Саридораи бойгонӣ ва воҳидҳои сохтории онро тасдиқ менамояд;

- ба Вазорати молияи Ҷумҳурии Тоҷикистон таклифҳо оид ба ташаккули буҷети ҷумҳурӣ дар қисми таъминоти молиявии фаъолияти Саридораи бойгонӣ пешниҳод манзур менамояд;

- ба Ҳукумати Ҷумҳурии Тоҷикистон лоиҳаи санадҳои меъёрии ҳуқуқиро пешниҳод менамояд;

- ба Ҳукумати Ҷумҳурии Тоҷикистон оид ба таъсис додан, таҷдид ва барҳамдиҳии воҳидҳои сохтории Саридораи бойгонӣ пешниҳод манзур менамояд;

- бо тартиби муқарраргардида кормандони Саридораи бойгонӣ ва сохторҳои тобеи онро барои қадршиносӣ бо мукофотҳои давлатии Ҷумҳурии Тоҷикистон пешниҳод менамояд;

- бо мақсади иҷрои муқаррароти Конститутсияи Ҷумҳурии Тоҷикистон, қонунҳои конститутсионӣ ва қонунҳои Ҷумҳурии Тоҷикистон, санадҳои Президенти Ҷумҳурии Тоҷикистон ва Ҳукумати Ҷумҳурии Тоҷикистон оид ба масъалаҳои ба ваколати Саридораи бойгонӣ дахлдошта, инчунин масъалаҳои ташкили фаъолияти ҳамарӯзаи Саридораи бойгонӣ фармоишҳо ба тасвиб мерасонад.

4. МУҚАРРАРОТИ ХОТИМАВӢ

13. Саридораи бойгонӣ молу мулкеро, ки бо ҳуқуқи идоракунии оперативӣ аз тарафи Ҳукумати Ҷумҳурии Тоҷикистон ба ӯ дода шудааст, истифода мебарад.

14. Маблағгузории хароҷот барои нигоҳдории дастгоҳи марказии Саридораи бойгонӣ ва мақомоти тобеи он аз ҳисоби буҷети ҷумҳуриявӣ ва маблағҳои махсус анҷом дода мешавад. Маблағгузории бойгониҳои давлатии Вилояти Мухтори Кӯҳистони Бадахшон, вилоятҳо ва филиалҳои онҳо аз ҳисоби буҷети Вилояти Мухтори Кӯҳистони Бадахшон ва вилоятҳо анҷом дода мешаванд.

15. Саридораи бойгонӣ шахси ҳуқуқӣ буда, дорои муҳр бо тасвири Нишони давлатии Ҷумҳурии Тоҷикистон ва номи худ бо забонҳои давлатӣ ва русӣ, муҳрҳои дигар, штампу бланкҳои намунаашон муқарраргардида мебошад ва аз суратҳисоби ягонаи Сарраёсати хазинадории Вазорати молияи Ҷумхурии Тоҷикистон маблағгузорӣ мегардад.

16. Маҳалли ҷойгиршавии Саридораи бойгонӣ: 734018, Ҷумҳурии Тоҷикистон, шаҳри Душанбе, хиёбони Н. Қарабоев 38/1.

Cохтори дастгоҳи марказии Саридораи бойгонии назди Ҳукумати Ҷумҳурии Тоҷикистон

Роҳбарият

Шуъбаи ташкилию методӣ, банақшагирӣ, кор бо бойгониҳои давлатӣ ва идоравӣ

Шуъбаи таъминоти нигоҳдории ҳуҷҷатҳо, баҳисобгирӣ ва фаъолияти илмию иттилоотӣ

Шуъбаи коргузорӣ, назорат ва корҳои махсус

Бахши молия ва муҳосибот

Бахши ҳуқуқ ва кор бо кадрҳо

Нақшаи идоракунии Саридораи бойгонии назди Ҳукумати Ҷумҳурии Тоҷикистон

Дастгоҳи марказӣ

Воҳидҳои сохтории бойгонии мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Хатлону Суғд, шаҳру ноҳияҳои ҷумҳурӣ

Номгӯйи ташкилотҳои низоми Саридораи бойгонии назди Ҳукумати Ҷумҳурии Тоҷикистон

Бойгонии марказии давлатии Ҷумҳурии Тоҷикистон Филиали

Бойгонии марказии давлатии Ҷумҳурии Тоҷикистон дар шаҳри Ваҳдат

Филиали Бойгонии марказии давлатии Ҷумҳурии Тоҷикистон дар шаҳри Ҳисор

Филиали Бойгонии марказии давлатии Ҷумҳурии Тоҷикистон дар шаҳраки Ғарми ноҳияи Рашт

Бойгонии марказии давлатии ҳуҷҷатҳои аксу садо ва синамои Ҷумҳурии Тоҷикистон

Бойгонии давлатии таърихи навтарини Ҷумҳурии Тоҷикистон

Озмоишгоҳи марказии барқароркунӣ ва нусхабардории ҳуҷҷатҳои Ҷумҳурии Тоҷикистон

Бойгонии давлатии Вилояти Мухтори Кӯҳистони Бадахшон дар шаҳри Хоруғ

Бойгонии давлатии вилояти Суғд дар шаҳри Хуҷанд

Бойгонии давлатии вилояти Хатлон дар шаҳри Бохтар

Бойгонии давлатии вилояти Хатлон дар шаҳри Кӯлоб