ОИННОМАИ Фонди ҷумҳурии кӯмак ба қисми аҳолии аз ҷиҳати иҷтимоӣ камтар муҳофизатшудаи Ҷумҳурии Тоҷикистон

1. Фонди ҷумҳурии кӯмак ба қисми аҳолии аз ҷиҳати иҷтимоӣ камтар муҳофизатшудаи Ҷумҳурии Тоҷикистон, ки минбаъд Фонди ҷумҳурии кӯмак номида мешавад, мутобиқи Фармони Президенти Ҷумҳурии Тоҷикистон аз 27 августи с.1991 таъсис ёфта, ташкилоти худидораи хайрияи ҷумҳурӣ мебошад.

2. Фонди ҷумҳурии кӯмак барои дастгирии хайрияи молиявию дигари моддии аҳолии камбизоат ва аз ҷиҳати иҷтимоӣ камтар муҳофизатшудаи ҷумҳурӣ, инчунин барои ташвиқ намудани комьёбию ташаббуси донишҷӯёни мактабҳои олӣ ва талабогони мактабҳои миёнаи махсус, ки ҳам дар қаламрави ҷумҳурӣ ва ҳам берун аз ҳудуди он таҳсил мекунанд, пешбинӣ шудааст.

3. Фонди ҷумҳурии кӯмак дар асоси ихтиёрӣ саъю кӯшиши коллективҳои меҳнатии корхонаю ташкилот ва иттифоқҳо, сарфи назар аз шакли ташкилу моликияташон, шаҳрвандони ҷумҳурӣ ва инчунин шаҳрвандону ташкилотҳои хориҷиеро, ки хоҳиши иштирок дар татбиқи вазифаҳои фондро доранд, муттаҳид месозад.

Фонди ҷумҳурии кӯмак фаъолияти хешро дар ҳамкории наздик бо вазорату идораҳо, мақомоти дигари идораи давлатӣ ва ташкилотҳои ҷамъиятие, ки аз фаъолияти онҳо некӯаҳволии моддии аҳолии ҷумҳурӣ вобастагӣ дорад, ба амал мебарорад.

4. Фонди ҷумҳурии кӯмак мутобиқи вазифаҳои ба зиммаш гузошташуда:

дар таҳқиқи вазъи моддию маишии шароити зиндагии аҳолии ҷумҳурӣ, донишҷӯён, талабагон ширкат варзида, аз рӯи натиҷаҳои таҳқиқ ба эҳтиёҷдоштагон ғамхорӣ зоҳир мекунад ва онҳоро дастгирӣ менамояд;

ба оилаҳои /шаҳрвандони/ камбизоат кӯмаки яквақтаи модцй ва ди- гар мерасонад, дар ҳолатҳои зарурӣ бошад, бевосита ё бо иштироки коллективхоимеҳнатии корхонаю ташкилотҳо, сарфи назар аз шакли моликияташон, ташкилотҳои ҷамъиятӣ ва шаҳрвандони алоҳида ба чунин оилаҳо /шаҳрвандон/ ғамхорӣ зоҳир мекунад;

дар мавридҳое, ки андозаи нафақаю ёрдампулиҳо талаботи оиларо қонеъ гардонида наметавонанд, ба онҳо иловапулӣ муқаррар менамояд;

бо роҳи муқаррар намудани стипендияҳои Фонди ҷумҳурии кӯмак ташаббуси донишҷӯёну талабагонро аз ҷиҳати моддӣ дастгирӣ менамояд;

фаъолияти ташкилоту иттиҳодияҳои хоҷагӣ ва ҷамъиятиеро, ки дар кори воқеан баланд бардоштани некӯаҳволии мардуми ҷумҳурӣ саҳми арзанда гузоштаанд, бо роҳи муқаррар намудани мукофотпулии махсус ва ҷоизаҳои дигар ташвиқ менамояд;

ба оилаҳое, ки кӯдакони қобилияти хоса доштаро тарбия мекунанд, барои ба онҳо фароҳам овардани шапоити зарурӣ кӯмаки мақсаднок мерасонад;

либосу асбоби рӯзгорро ҷамъ карда, ба табақаҳои камбизоати аҳолӣ бо нархҳои арзон фурӯхтани онҳоро ба таври васеъ ташкил мекунад;

мувофиқи тартиби мукарраргардида корхонаҳои муштараке таъсис мекунад ва дар таъсиси онҳо ширкат меварзад, ки барои татбиқи ҳадафу вазифаҳои ба зиммаи фонд гузошташуда мусоидат мекунанд;

коғазҳои арзишноки худро мебарорад, бозиҳои лоторея ташкил мекунад ва саҳмҳои банку шахсони дигари юридикиро харида мегирад;

баҳри баланд бардоштани ҳифзи иҷтимоии аҳолии ҷумҳурӣ тадбирҳои дигар меандешад.

5. Маблағҳои Фонди ҷумҳурии кӯмак аз ин ҳисоб ташаккул меёбанд:

пардохту хайроти ихтиёрии шаҳрвандон, коллективҳои меҳнатӣ, муассисаҳои давлатӣ ва ташкилотҳои ҷамъиятӣ, инчунин ташкилотҳои хориҷӣ, миллӣ ва байналхалқӣ;

неъматҳои мухталифи моддӣ ва хайроти ғайримолиявии онҳо, аз ҷумла таҷҳизот, асбобҳо, мошину дастгоҳҳо барои минбаъд ба оилаҳои камбизоат, ки бо кӯмаки неъматҳои зикршуда метавонанд бизнеси худро ташкил намуда, некӯаҳволии оилаи худро баланд бардоранд, додани онҳо;

даромаде, ки аз ҳисоби фаъолияти корхонаҳои хурду муштараки дар назди Фонди ҷумҳурии кӯмак таъсисьёфта, инчунин аз ҳисоби фаъолияти тиҷоратии худи фонд ба даст меояд.

Асоси Фонди ҷумҳурии кӯмакро пардохти ихтиёрии ҳарсолаи Банки ҷумҳурии саҳҳомию тиҷоратии "Тоҷикбанкбизнес"-и Тоҷикистон ба андозаи 100 ҳазор сӯм ташкил мекунад.

6. Маблағпулию воситаҳои дигари Фонди ҷумҳурии кӯмак танҳо мутобиқи ҳадафу вазифаҳои он ва дар асоси қарори Правления сарф карда мешаванд.

7. Ба Фонди ҷумҳурии кӯмак Правления роҳбарӣ мекунад, ки ҳайати он аз ҷониби Девони Вазирони Ҷумҳурии Тоҷикистон тасдиқ мегардад.

Правленияи Фонди ҷумҳурии кӯмак:

дар асоси ҳуҷҷатҳои худ, инчунин тавсияҳои Президенти Ҷумҳурии Тоҷикистон ва Сарвазири Ҷумҳурии Тоҷикистон, кумитаҳои иҷроияи Шӯроҳои маҳаллии депутатҳои халқ, ташкилотҳои ҷамъиятӣ, кумитаҳои маҳаллаю ҳавлиҳо ва шахсони юридикию ҷисмонӣ дар хусуси хароҷоти маблағҳои зикршуда қарор қабул мекунад;

самтҳои асосии фаъолияти фондро баррасӣ ва тасдиқ менамояд;

ба корхонаю ташкилотҳои тобеи фонд роҳбарӣ мекунад;

сметаи даромаду хароҷоти фондро баррасӣ ва тасдиқ менамояд, аз болои пурра шудани он назорат мекунад, планҳо ва барномаи фаъолияти худ, плани солонаи молиявӣ ва инчунин ҳисоботро дар хусуси иҷрои онҳо тартиб ва тасдиқ мекунад;

ба фаъолияти мақомоти маҳаллии фонд роҳбарӣ ва назорат мекунад, ҳисоботи кори онҳоро шунида, тасдиқ менамояд;

манфиати Фонди ҷумҳурии кӯмакро дар назди фондҳои дигар, ташкилотҳои ҷамъиятӣ ва ғайра ифода мекунад ё барои иҷрои чунин вазифа шахси дигарро ваколатдор месозад.

Правления ба қадри зарурат даъват карда мешавад. Он дар сурате ба қабули қарор ҳуқуқ дорад, ки на камтар аз се ду ҳиссаи аъзояш ҳузур дошта бошад. Қарорҳои правления ба тариқи раъйдиҳии кушод бо аксарияти оддии овози ҳозирон қабул карда мешаванд.

8. Раиси Правленияи Фонди ҷумҳурии кӯмак:

кори ҷории правленияро ташкил мекунад, маблағҳоро ба ҳисоб мегирад, доир ба истифодаи онҳо ҳисобот медиҳад ва ба онҳо назорат мекунад;

якҷоя бо бухгалтер ба ҳуҷҷатҳои молиявй имзо гузошта, ваколатномаҳо медиҳад.

9. Фонди ҷумҳурии кӯмак барои ҳалли вазифаҳои дар Оинномаи мазкур пешбинишуда дар шаҳру ноҳияҳои Ҷумҳурии Тоҷикистон намояндагиҳои худро таъсис медиҳад. Тартиби таъсису кори намояндагиҳоро правленияи фонд муайян менамояд.

10. Фонди ҷумҳурии кӯмак аз фаъолияти худ дар назди аҳли ҷомеа ҳисобот медиҳад. Бо ин мақсад баланси ҷамъбастии он ҳар сол ба забонҳои тоҷикӣ, ӯзбекӣ ва русӣ дар матбуот чоп мешавад.

Ҳисоботдиҳии фонд ба мақомоти омор, молия ва банкҳо ба воситаи қонунҳои ҷорӣ муайян мегардад.

11. Фонди ҷумҳурии кӯмак дорои ҳуқуқи шахси юридикӣ буда, мувофиқи тартиби муқарраргардида бояд ба қайд гирифта шавад.

Оинномаи Фонди ҷумҳурии кӯмакро Девони Вазирони Ҷумҳурии Тоҷикистон баррасӣ менамояд. Ба он тағьйроту иловаҳо бо қарори Девони Вазирони Ҷумҳурии Тоҷикистон дохил карда мешаванд.

12. Правленияи Фонди ҷумҳурии кӯмак дар ш.Душанбе ҷойгир аст.

ҲАЙАТИ  правленияи Фонди ҷумҳурии кӯмак ба қисми аҳолии аз ҷиҳати иҷтимоии камтар муҳофизатшудаи Ҷумҳурии Тоҷикистон

1. Вафоев Мурод Саидович         - Ҷонишини якуми Раиси Правленияи Банки саҳҳомию тиҷоратии

                                   "Тоҷикбанкбизнес" /Раиси Правления/

2. Ҷураева Сайёра Аминовна       - и.в. сардори шӯьбаи баҳисобгирии муомилоти пулию

                                   ҳисобисарбухгалтери УО Банки Саҳҳомию тиҷоратии

                                   "Тоҷикбанкбизнес"

3. Шелякова Тамара               - сардори шӯъбаи бопултаъминкунии инкишофи иҷтимоии

                                   Вазорати молияи Ҷумҳурии Тоҷикистон

4. Ҷунайдов Зайдулло Ҷунайдович  - ҷонишини Раиси Фонди атфоли Ҷумҳурии Тоҷикистон

5. Гончаренко Галина Бояновна    - сардори управленияи банақшагирии молиявии

                                   Вазорати таъминоти иҷтимоии Ҷумҳурии Тоҷикистон