ОИННОМАИ Муассисаи давлатии "Маркази татбиқи лоиҳаҳои асосҳои рақамикунонии Тоҷикистон"-и Дастгоҳи иҷроияи Президенти Ҷумҳурии Тоҷикистон

1. МУҚАРРАРОТИ УМУМӢ

1. Муассисаи давлатии "Маркази татбиқи лоиҳаҳои асосҳои рақамикунонии Тоҷикистон"-и Дастгоҳи иҷроияи Президенти Ҷумҳурии Тоҷикистон (минбаъд - Марказ) ҳамчун сохтори идоракунӣ лоиҳаҳои маблағгузорӣ ва қарзии созмонҳои байналмилалии молиявӣ, инчунин лоиҳаҳои дигари грантӣ ва қарзиеро, ки тибқи санадҳои Дастгоҳи иҷроияи Президенти Ҷумҳурии Тоҷикистон ба зиммаи Марказ вогузор шудааст, амалӣ менамояд.

2. Марказ фаъолияти худро мутобиқи Конститутсияи Ҷумҳурии Тоҷикистон, Низомномаи Дастгоҳи иҷроияи Президенти Ҷумҳурии Тоҷикистон ва санадҳои Дастгоҳи иҷроияи Президенти Ҷумҳурии Тоҷикистон, санадҳои меъёрии ҳуқуқии байналмилалии эътирофнамудаи Ҷумҳурии Тоҷикистон, тавсияҳои созмонҳои байналмилалии молиявӣ ва Оинномаи мазкур амалӣ менамояд.

3. Марказ шахси ҳуқуқии мустақил ва ташкилоти ғайритиҷоратӣ буда, соҳиби молу мулки ҷудогона ва тавозуни мустақил мебошад. Мутобиқи қонунгузории ҷорӣ дар бонкҳои тиҷоратӣ суратҳисобҳо бо пули миллӣ, асъори хориҷӣ ва суратҳисобҳои махсуси дигар дошта, дорои муҳр, штамп ва бланкҳо бо номи худ мебошад.

4. Марказ оид ба фаъолияти молиявию хоҷагидории худ дар назди Дастгоҳи иҷроияи Президенти Ҷумҳурии Тоҷикистон ва созмонҳои байналмилалии молиявӣ ҳисоботдиҳанда мебошад.

5. Марказ нисбат ба уҳдадориҳои Дастгоҳи иҷроияи Президенти Ҷумҳурии Тоҷикистон масъул намебошад. Дастгоҳи иҷроияи Президенти Ҷумҳурии Тоҷикистон дар навбати худ нисбат ба уҳдадориҳои Марказ ҷавобгар намебошад.

6. Номи расмии Марказ: - бо забони давлатӣ: Муассисаи давлатии "Маркази татбиқи лоиҳаҳои асосҳои рақамикунонии Тоҷикистон"-и Дастгоҳи иҷроияи Президенти Ҷумҳурии Тоҷикистон. Номи расмии ихтисоршуда: МД "МТЛ АРТ" ДИП ҶТ;

- бо забони русӣ: Государственное учреждение "Центр реализации проектов цифровых основ Таджикистана" Исполнительного аппарата Президента Республики Таджикистан. Номи расмии ихтисоршуда: ГУ "ЦРП ЦОТ" ИАП РТ;

- бо забони англисӣ: State institution "Project, Implementation Unit Fundamentals of Digitalization in Tajikistan" of the Executive Office of the President of the Republic of Tajikistan. Номи расмии ихтисоршуда: SI "PIU FDT" EOP RT.

7. Маҳалли ҷойгиршавии Муассиса: Ҷумҳурии Тоҷикистон, шаҳри Душанбе, ноҳияи Исмоили Сомонӣ, кучаи Шоҳтемур, 20.

2. МАҚСАД ВА ВАЗИФАҲОИ МАРКАЗ

8. Мақсади асосии Марказ татбиқи лоиҳаҳои сармоягузорӣ дар соҳаи асосҳои рақамикунонии Тоҷикистон мебошад.

9. Вазифаҳои асосии Марказ аз инҳо иборат мебошанд:

- ҳамоҳангсозӣ ва идораи самараноки лоиҳаҳои грантӣ ва қарзии пешниҳодшудаи созмонҳои байналмилалии молиявӣ ва ҳамоҳангсозии онҳо бо вазорату идораҳои дахлдор, мақомоти маҳаллии ҳокимияти давлатӣ ва ташкилотҳои молиявӣ;

- гузаронидани тендерҳо ва озмунҳо тибқи талаботи сармоягузорон ва қонунгузории Ҷумҳурии Тоҷикистон;

- ҳамоҳангсозӣ ва таъмини шароити кории коршиносон, машваратчиёни байналмилалӣ ва миллӣ оид ба таҳия ва амалисозии лоиҳаҳои грантӣ ва қарзии созмонҳои байналмилалии молиявӣ;

- анҷом додани намудҳои дигари фаъолияте, ки қонунгузории Ҷумҳурии Тоҷикистон манъ накардааст ва барои ҳалли вазифаҳои ба зиммаи Марказ гузошташуда заруранд.

10. Марказ дар фаъолияти кории худ танҳо ба корҳои ташкилӣ ҷавобгар буда, ба қабули қарорҳое, ки аз ҷониби созмонҳои байналмилалии молиявӣ вобаста ба лоиҳаҳо бояд қабул шаванд ва амалисозии мақсад ва вазифаҳои созмонҳои байналмилалии молиявӣ дар асоси қоидаҳои техникӣ, ки дар ҳуҷҷатҳои лоиҳавии бонкӣ муайян шудаанд, мусоидат менамояд.

3. ҲУҚУҚ ВА УҲДАДОРИИ МАРКАЗ

11. Марказ ҳуқуқ дорад:

- тибқи тартиби муқаррарнамудаи қонунгузории Ҷумҳурии Тоҷикистон бо ҳуқуқи идоракунии оперативӣ молу мулки ба он тааллуқдоштаро соҳибӣ ва истифода намояд;

- шартномаҳо (қарордодҳо) бандад, амалҳои ҳуқуқиро анҷом диҳад, ҳуқуқҳои молумулкӣ ва ғайримолумулкиро ба даст орад, дар судҳо ҷавобгар ва даъвогар бошад;

- фаъолияти ҷорӣ ва дурнаморо мустақилона ба роҳ монад;

- дар муассисаҳои бонкии ҷумҳурӣ бо иҷозати Дастгоҳи иҷроияи Президенти Ҷумҳурии Тоҷикистон суратҳисобҳо бо пули миллӣ ва асъори хориҷӣ кушояд;

- фаъолияти дигареро, ки хилофи қонунгузории Ҷумҳурии Тоҷикистон намебошад, амалӣ намояд.

12. Марказ уҳдадор аст:

- мутобиқи қонунгузории Ҷумҳурии Тоҷикистон барои кормандон шароити бехатари корӣ фароҳам оварда, кафолатҳои ҳуқуқии шаҳрвандонро, ки давлат муқаррар кардааст, таъмин намояд ва барои зарари ба саломатӣ ва қобилияти кории онҳо расонидашуда бо тартиби муқарраргардида ҷавобгар бошад;

- баҳисобгирии муҳосибӣ ва оперативии фаъолияти молиявию хоҷагидориро ба амал барорад, ҳуҷҷатҳои оморӣ ва муҳосибавиро пеш барад;

- оид ба фаъолияти худ ба Дастгоҳи иҷроияи Президенти Ҷумҳурии Тоҷикистон, созмонҳои байналмилалии молиявӣ ва ба созмонҳои дигари молиявии маблағгузор дар муҳлатҳои муқарраргардида ҳисобот пешниҳод намояд.

4. МОЛУ МУЛК ВА ВОСИТАҲОИ МОЛИЯВӢ

13. Марказ барои таъмини фаъолият бино, иншооти ёрирасон, таҷҳизот, асбобу олот ва молу мулки дигар бо ҳуқуқи идоракунии оперативӣ дорад.

14. Манбаъҳои маблағҳои Марказ:

- буҷети давлатӣ;

- грантҳои созмонҳои байналмилалии молиявӣ барои татбиқи лоиҳаи "Асосҳои рақамикунонии Тоҷикистон";

- грантҳо ва қарзҳое, ки давлатҳои хориҷӣ, созмонҳои байналмилалӣ ва қарздиҳандаҳои бисёрҷониба ва дуҷониба барои татбиқи лоиҳаҳо ҷудо менамоянд;

- манбаъҳои дигаре, ки қонунгузории Ҷумҳурии Тоҷикистон манъ накардааст.

15. Воситаҳои молиявии Марказ бояд мутобиқи шартҳое, ки дар созишномаҳои кредитӣ ва грантӣ пешбинӣ шудаанд, истифода шаванд.

5. МАҚОМИ ИДОРАКУНИИ МАРКАЗ

16. Роҳбари Марказ директор мебошад, ки аз ҷониби Дастгоҳи иҷроияи Президенти Ҷумҳурии Тоҷикистон дар мувофиқа бо созмонҳои байналмилалии молиявӣ ба мансаб таъин ва аз мансаб озод карда мешавад.

17. Ваколатҳои директори Марказ аз инҳо иборатанд:

- ташкили роҳбарии умумии тамоми фаъолияти Марказ;

- намояндагии манфиатҳои Марказ дар ташкилотҳои давлатӣ, ғайриҳукуматӣ ва байналмилалӣ;

- дар мувофиқа бо Дастгоҳи иҷроияи Президенти Ҷумҳурии Тоҷикистон ва созмонҳои байналмилалии молиявӣ муайян ва тасдиқ намудани шакл, андозаи музди меҳнат, ҷадвали штатӣ ва харҷномаи хароҷоти нигоҳдории Марказ;

- аз номи Марказ бастани шартномаҳо (қарордодҳо) ва анҷом додани амалҳои дигар;

- мутобиқи санадҳои қонунгузории Ҷумҳурии Тоҷикистон додани ваколатнома барои имзои ҳуҷҷатҳои молиявию хоҷагидорӣ;

- пешниҳод намудани ҳисоботи Марказ ба Дастгоҳи иҷроияи Президенти Ҷумҳурии Тоҷикистон ва ба созмонҳои байналмилалии молиявӣ ва ташкилотҳои манфиатдори дигар;

- интихоб, ҷобаҷогузорӣ, таъин ва озод намудани кадрҳои Марказ, бастани қарордодҳои меҳнатӣ дар асоси озмун бо риояи талаботи созмонҳои байналмилалии молиявӣ;

- татбиқи ҷазои интизомӣ ва ҳавасмандгардонии кормандони Марказ дар доираи буҷети лоиҳа;

- анҷом додани фаъолияти дигар мутобиқи қонунгузории Ҷумҳурии Тоҷикистон ва Оинномаи мазкур ба манфиати Марказ.

18. Директори Марказ фаъолияти худро мутобиқи қонунгузории Ҷумҳурии Тоҷикистон ва Оинномаи мазкур анҷом медиҳад. Директор барои фаъолияти худ дар назди Дастгоҳи иҷроияи Президенти Ҷумҳурии Тоҷикистон ва созмонҳои байналмилалии молиявӣ ҳисоботдиҳанда мебошад.

19. Директори Марказ барои иҷрои вазифаҳои ба зиммаи Марказ гузошташуда масъулияти шахсӣ дорад ва дараҷаи масъулиятнокии кормандони Марказро мувофиқи талаботи қонунгузории Ҷумҳурии Тоҷикистон, Оинномаи мазкур ва уҳдадориҳои мансабии онҳо муқаррар менамояд.

6. БАҲИСОБГИРӢ ВА ҲИСОБОТДИҲӢ

20. Баҳисобгирӣ ва ҳисоботдиҳии муҳосибавии Марказ мутобиқи талаботи қонунгузории Ҷумҳурии Тоҷикистон бо дарназардошти стандартҳои байналмилалӣ ва талаботи созмонҳои байналмилалии молиявӣ амалӣ карда мешавад.

21. Натиҷаҳои фаъолияти Марказ дар ҳисоботҳои семоҳа ва солона, ки ба Дастгоҳи иҷроияи Президенти Ҷумҳурии Тоҷикистон ва созмонҳои байналмилалии молиявӣ пешниҳод карда мешаванд, инъикос меёбанд.

22. Аудити молиявию техникии Марказ аз ҷониби аудиторони мустақил, ки дар асоси расмиёти муқаррарнамудаи созмонҳои байналмилалии молиявӣ интихоб шудаанд, гузаронида мешаванд.

7. АЗНАВТАШКИЛДИҲӢ ВА БАРҲАМДИҲИИ МАРКАЗ

23. Азнавташкилдиҳӣ ва барҳамдиҳии Марказ бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.