Тартиби баҳисобгирии давлатии фонди манзил

1. МУҚАРРАРОТИ УМУМӢ

1. Тартиби баҳисобгирии давлатии фонди манзил (минбаъд - Тартиб) расмиёти баҳисобгирии давлатии фонди манзилро муайян менамояд.

2. Баҳисобгирии давлатии фонди манзил, сарфи назар аз шакли моликият ва мансубияти он, аз рӯйи низоми ягона аз ҷониби мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот якҷо бо мақоми махсуси ваколатдори давлатии Ҷумҳурии Тоҷикистон дар соҳаи бақайдгирии давлатӣ тибқи Тартиби мазкур ва дигар санадҳои меъёрии ҳуқуқӣ амалӣ карда мешавад.

3. Вазифаҳои асосии баҳисобгирии давлатии фонди манзил:

1) барӯйхатгирии техникии фонди манзил;

2) дастрас намудани маълумот дар бораи ҷойгиршавӣ, миқдор ва сифат, ҳолати техникӣ, сатҳи ободонӣ, арзиши иншоот, мансубият, шумораи шаҳрвандони дар он истиқоматкунанда ва тағйирёбии нишондиҳандаҳои фонди манзил.

2. ТАРТИБИ ПЕШБУРДИ БАҲИСОБГИРИИ ДАВЛАТИИ ФОНДИ МАНЗИЛ

4. Баҳисобгирии давлатии фонди манзил, сарфи назар аз шакли моликият ва мансубияти он дар асоси барӯйхатгирии техникии биноҳои истиқоматӣ, ки барои истиқомати шаҳрвандон муносибанд, ба амал бароварда мешавад.

5. Ба фонди манзил ворид намудан ва аз он хориҷ намудани манзилҳои истиқоматӣ тибқи тартиби муқаррарнамудаи Кодекси манзили Ҷумҳурии Тоҷикистон анҷом дода мешавад.

6. Дар рафти баҳисобгирии фонди манзил объектҳои зерин ба инобат гирифта намешаванд:

1) масоҳати таъиноти маъмурию хизматрасонии дар бинои истиқоматӣ ҷойгирбуда, ки барои эхтиёҷоти савдо, хизмати маишӣ ва дигар пешбинӣ шудаанд;

2) манзилҳое, ки барои истиқомати мавсимӣ ва муваққатӣ сохта шудаанд, сарфи назар аз муҳлати дар онҳо истиқомат намудани шаҳрвандон;

3) бино ва манзилҳои барои истиқомат номуносиб.

7. Тартиби ягонаи баҳисобгирии давлатии фонди манзил, сарфи назар аз шакли моликият ва мансубияти он, бо роҳи бақайдгирии давлатии молу мулки ғайриманқул ва ҳуқуқҳо ба он, барӯйхатгирии техникӣ ва баҳисобгирии омории фонди манзил ба амал бароварда мешавад.

8. Барӯйхатгирии техникии биноҳо ва манзилҳои истиқоматӣ тибқи талаботи Қонуни Ҷумҳурии Тоҷикистон "Дар бораи бақайдгирии давлатии молу мулки ғайриманқул ва ҳуқуқҳо ба он" гузаронда мешавад.

9. Баҳисобгирии фонди манзилро мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот якҷо бо вазорату идораҳои дахлдор мегузаронанд.

10. Мақоми ваколатдори давлатӣ дар соҳаи омор якҷо бо мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот, вазорату идораҳои дахлдор, шахсони ҳуқуқие, ки дар тавозуни худ бино ва манзилҳои истиқоматӣ доранд, дар асоси ҷамъбасти шаклҳои мушоҳидаи омории давлатӣ аз рӯйи фонди манзил, бақайдгирии омории фонди манзили Ҷумҳурии Тоҷикистонро мутобиқи тартиб ва муҳлати муайянгашта бо барномаҳои ҳарсолаи корҳои оморӣ, амалӣ менамояд.

11. Шаклҳои мушоҳидаи омории давлатӣ аз болои фонди манзил дар асоси ҳисоботҳои оморӣ гузаронида мешавад, ки тартиб ва муҳлати пешниҳод намудани онҳо аз тарафи мақоми ваколатдори давлатӣ дар соҳаи омор таҳия ва тасдиқ мешаванд.

12. Нишондиҳандаҳои баҳисобгирии фонди манзил бояд ба нишондиҳандаҳои ҳисоботи омории фонди манзил мувофиқат намоянд.

13. Мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот якҷо бо мақоми махсуси ваколатдори дахлдор барои баҳисобгирии давлатии фонди манзил уҳдадоранд, корҳои зеринро ба иҷро расонанд:

1) баҳисобгирӣ ва барӯйхатгирии фонди манзил;

2) назорати ҳолати техникии бино ва манзилҳои истиқоматӣ;

3) мусоидат ба шахсони воқеӣ ва ҳуқуқӣ зимни барӯйхатгирии техникии манзилҳои истиқоматӣ.

14. Шиносномаи техникии бино ва манзилҳои истиқоматӣ ҳангоми ба истифода қабул намудани бино ва манзилҳои истиқоматӣ ё дар мавриди ба фонди манзил дохил намудани манзили истиқоматӣ, инчунин дар ҳолати мавҷуд будани қарори мақоми ваколатдор оид ба додани қитъаи замин тартиб дода мешавад.

15. Маълумоти бақайдгирии фонди манзил, дигар маълумоти баҳисобгирӣ ва барӯйхатгирӣ, агар дар қонунгузорӣ дигар шартҳо пешбинӣ нашуда бошанд, дар ҳолатҳои зерин барои татбиқ ҳатмӣ мебошанд:

1) тартиб додани ҳисоботи давлатии оморӣ оид ба фонди манзил;

2) баҳисобгирии намудҳои алоҳидаи молу мулки ғайриманқул мутобиқи қонунгузорӣ;

3) ба истифода супоридани бино ва манзилҳои истиқоматӣ;

4) муайян намудани ҳолати техникӣ ва фарсудашавии бино ва манзилҳои истиқоматӣ;

5) қайди ширкатҳои моликони манзил;

6) рақамгузории иншооти фонди манзил.

16. Барӯйхатгирии техникии бино ва манзилҳои истиқоматӣ аз ҷониби ташкилотҳои минтақавии бақайдгирии молу мулки ғайриманқул ва ҳуқуқҳо ба он гузаронда мешаванд.

17. Ҳуҷҷатҳои баҳисобгирӣ ва техникии бино ва манзили истиқоматие, ки сохтмонашон анҷом ёфтааст, аз ҷониби мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот якҷо бо вазорату идораҳои дахлдор таҳия гашта, ба ҳуҷҷатҳои аз ҷониби фармоишгар (биносоз) ба комиссияи қабул пешниҳодшаванда дохил карда мешаванд.

18. Баҳисобгирии бино ва манзилҳои истиқоматӣ аз тарафи мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот якҷо бо вазорату идораҳои дахлдор бо роҳи пешбурди китоби баҳисобгирии фонди манзил бо истифода аз воситаи низоми автоматонидашудаи идоракунӣ, ки алоқаи заруриро бо дигар корхонаҳои низоми ягонаи баҳисобгирии давлатӣ таъмин мекунанд, амалӣ мегарданд.

19. Ҳуҷҷатҳои баҳисобгирию техникӣ, нархгузорӣ ва ҳуқуқии фонди манзил, аз ҷумла шиносномаҳои техникӣ, китобҳои бақайдгирӣ, нусхаҳои ҳуҷҷатҳои ба қайд гирифташуда, ки ба парвандаҳои барӯйхатгирӣ ташаккул ёфтаанд ва дигар ҳуҷҷатҳои барӯйхатгирӣ дар бойгонии мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот ба муҳлати даҳ сол нигоҳ дошта мешаванд, агар бо қонунгузорӣ тартиби дигаре муқаррар нагашта бошад.

20. Мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот якҷо бо вазорату идораҳои дахлдор, шахсони ҳуқуқие, ки дар тавозуни худ бино ва манзилҳои истиқоматӣ доранд, ба мақоми ваколатдори давлатӣ дар соҳаи омор бо тартиби муқарраргардида ва муҳлати пешбинишуда ҳисобот пешниҳод менамоянд.