Тартиби пешбурди Феҳристи ягонаи давлатии қарздорон

1. МУҚАРРАРОТИ УМУМӢ

1. Тартиби пешбурди Феҳристи ягонаи давлатии қарздорон (минбаъд - Тартиб) раванди пешбурд ва воридсозии маълумот дар бораи қарздорон ба Феҳристи ягонаи давлатии қарздорон (минбаъд - Феҳрист) ва хориҷ намудани маълумот дар бораи қарздоронро муайян намуда, бо мақсади ба низом даровардани қарздорӣ, пешгирӣ намудани оқибатҳои номатлуби он ва таъмини иҷрои ҳуҷҷатҳои иҷро пеш бурда мешавад.

2. Пешбурди Феҳристи ягонаи давлатии қарздоронро Хадамоти иҷрои назди Ҳукумати Ҷумҳурии Тоҷикистон (минбаъд - мақоми ваколатдори давлатӣ дар самти истеҳсолоти иҷро) амалӣ менамояд.

3. Ба Феҳрист маълумот дар бораи қарздорон (ба истиснои маълумот дар бораи қарздороне, ки мақомоти давлатӣ, мақомоти маҳаллии ҳокимияти давлатӣ мебошанд, инчунин қарздороне, ки тибқи ҳуҷҷатҳои иҷро оид ба ситонидани пардохтҳои давравӣ зиёда аз се моҳ қарздор нестанд ва қарздорон оид ба ҳуҷҷатҳои иҷрои хусусияти ғайри молумулкидошта) дар баробари қабули қарори оғози истеҳсолоти иҷро ворид карда мешаванд.

2. ТАРТИБИ ПЕШБУРД ВА ВОРИДИ МАЪЛУМОТ ДАР БОРАИ ҚАРЗДОРОН БА ФЕҲРИСТ

4. Феҳрист дар шакли ҳомили қоғазӣ ва электронӣ пеш бурда мешавад.

5. Феҳрист дар бораи қарздорон дорои маълумоти зерин мебошад:

1) рақами тартибӣ;

2) насаб, ном ва номи падар (дар ҳолати будан)-и қарздор-шахси воқеӣ, маҳалли истиқомат, сана ва ҷойи таваллуд, ҷойи кор, агар он маълум бошад, рақами мушаххаси андозсупоранда;

3) номи қарздор-шахси ҳуқуқӣ, суроғаи шахси ҳуқуқӣ, рақами мушаххаси андозсупоранда, суратҳисоби бонкӣ;

4) рақам ва санаи оғози истеҳсолоти иҷро;

5) санади судӣ, санади мақомоти давлатӣ ё шахси мансабдор ва санаи қабули он;

6) насаб, ном ва номи падар (дар ҳолати будан)-и ситонандашахси воқеӣ, маҳалли истиқомат, таърихи рӯз ва ҷойи таваллуд, рақами мушаххаси андозсупоранда;

7) номи ситонанда-шахси ҳуқуқӣ, суроғаи шахси ҳуқуқӣ, рақами мушаххаси андозсупоранда, суратҳисоби бонкӣ;

8) муҳтавои ҳуҷҷати иҷро бо нишон додани маблағи ситонидашаванда;

9) маълумот оид ба иҷро гардидани талаботи ҳуҷҷати иҷро;

10) санаи хориҷ намудани қарздор аз Феҳрист.

6. Ворид намудани маълумот дар бораи қарздор ба Феҳрист дар асоси қарори оғози истеҳсолоти иҷро ва пешниҳоди иҷрочии мақомоти иҷро амалӣ карда мешавад.

7. Ҳомили коғазии Феҳрист дар китобҳо ва ҳомили электронии он дар барномаи электронӣ аз рӯйи тартиби ҳарфҳои алифбо бо дар назар доштани ҳарфи аввали насаби қарздор бо пурра нишон додани маълумоти дар банди 5 Тартиби мазкур, пеш бурда мешавад.

8. Мақоми ваколатдори давлатӣ дар самти истеҳсолоти иҷро маълумоти нисбати қарздор пешниҳодгардидаро таҳлил намуда, дар сурати ҷавобгӯ будан ба талаботи Тартиби мазкур, онро ба Феҳрист дар муҳлати на дертар аз панҷ рӯзи корӣ ворид карда, дар сомонаи худ ҷойгир менамояд.

9. Мақоми ваколатдори давлатӣ дар самти истеҳсолоти иҷро бо дархости мақомоти давлатии дахлдор иттилооти заруриро аз Феҳрист пешниҳод менамояд.

10. Бо ворид намудан ба Феҳрист қарздорон ҳуқуқи ихтиёрдорӣ намудани молу мулки манқул ва ғайриманқулро, ки бояд дар феҳристи дахлдор ба қайд гирифта шавад, инчунин ихтиёрдории неъматҳои дигари молумулкии ғайримоддиро надоранд.

11. Мақомоти давлатӣ, мақомоти маҳаллии ҳокимияти давлатӣ, мақомоти худидоракунии шаҳрак ва деҳот (аз ҷумла нотариусҳо, мақомоти сабти асноди ҳолати шаҳрвандӣ, хадамоти шиносномавию бақайдгирӣ, бозрасии давлатии автомобилӣ, мақомоти бақайдгирандаи молу мулки ғайриманқул ва мақомоти дигари дахлдор) ва субъектҳои дигари дар ҳолатҳои иҷрои ваколатҳои ба онҳо вогузоршуда, дар сурати муроҷиати шахс барои иҷрои амали муайян, ки ба Феҳрист дохил гардида, дар сомонаи расмии мақоми ваколатдори давлатӣ ҷойгир карда шудааст, уҳдадоранд то иҷрои уҳдадориҳои бо санадҳои судӣ, мақомоти давлатӣ ва шахсони мансабдор вогузоркардашуда аз ҷониби шахси ба Феҳрист дохилкардашуда амалиёт нагузаронанд.

12. Ҳангоми дар бонкҳо кушодани суратҳисоб ба номи шахси воқеӣ, ки ба Феҳрист дохил карда шуда, дар сомонаи расмии мақоми ваколатдори давлатӣ ҷойгир карда шудааст, аз ҷумла тавассути зерсохторҳои бонк ё ҳангоми пӯшидани суратҳисоб аз ҷониби ин шахс, бонкҳо уҳдадоранд мақоми ваколатдори давлатӣ дар самти истеҳсолоти иҷроро дар рӯзи кушодан ё пӯшидани суратҳисоб (ба таври хаттӣ ва электронӣ) огоҳ намоянд.

3. ТАРТИБИ ХОРИҶ НАМУДАНИ МАЪЛУМОТ ДАР БОРАИ ҚАРЗДОРОН АЗ ФЕҲРИСТ

13. Мақоми ваколатдори давлатӣ дар самти истеҳсолоти иҷро уҳдадор аст, ки дар асоси пешниҳоди иҷрочии мақомоти иҷро маълумотро нисбат ба қарздорон аз Феҳрист дар ҳолатҳои зерин на дертар аз се рӯзи корӣ хориҷ намояд:

1) иҷрои пурраи талаботи ҳуҷҷати иҷро;

2) ивази ҷаримаи таъингардида ба намуди дигари ҷазо;

3) дар ҳолати қатъ гардидани истеҳсолоти иҷро;

4) аз рӯзи эътибори қонунӣ пайдо намудани қарори суд оид ба бекор кардани санади судӣ, қарори мақомоти давлатӣ ё шахси мансабдор.

14. Мақоми ваколатдори давлатӣ дар самти истеҳсолоти иҷро тибқи талаботи банди 13 Тартиби мазкур барои хориҷ намудани маълумот дар бораи қарздорон аз Феҳрист чораҷӯйӣ менамояд.

4. МУҚАРРАРОТИ ХОТИМАВӢ

15. Шакли электронии Феҳрист дар сомонаи расмии мақоми ваколатдори давлатӣ дар самти истеҳсолоти иҷро ҷойгир карда шуда, вобаста ба раванди иҷрои итеҳсолоти иҷро ба он тағйирот ворид карда мешавад.

16. Шахсоне, ки муқаррароти Тартиби мазкурро риоя намекунанд, тибқи қонунгузории Ҷумҳурии Тоҷикистон ба ҷавобгарӣ кашида мешаванд.