Низомномаи Шӯрои илмию истеҳсолии моҳипарварӣ, моҳигирӣ ва ҳифзи захираҳои моҳӣ

1. МУҚАРРАРОТИ УМУМӢ

1. Шӯрои илмию истеҳсолии моҳипарварӣ, моҳигирӣ ва ҳифзи захираҳои моҳӣ (минбаъд - Шӯро) бо мақсади додани тавсияҳо барои истифодабарӣ ва ҳифзи захираҳои моҳӣ, пешниҳодҳо оид ба ташкили сайди саноатии моҳӣ, аз худ намудани ҳавзаҳои обии Ҷумҳурии Тоҷикистон барои моҳидорӣ якҷо бо муассисаҳои илмию таҳқиқотӣ ва мақоми ваколатдори давлатӣ дар соҳаи ҳифзи муҳити зист таъсис дода шудааст.

2. Ба ҳайати Шӯро намояндагони вазорату идораҳое, ки дар раванди батанзимдарорӣ ва таъмини истеҳсолии моҳипарварӣ, моҳигирӣ ва ҳифзи захираҳои моҳӣ иштирок мекунанд, дохил мешаванд.

3. Шӯро дар фаъолияти худ Конститутсияи Ҷумҳурии Тоҷикистон, Қонуни Ҷумҳурии Тоҷикистон "Дар бораи моҳипарварӣ, моҳигирӣ ва ҳифзи захираҳои моҳӣ" ва санадҳои дигари меъёрии ҳуқуқии Ҷумҳурии Тоҷикистон, инчунин Низомномаи Шӯроро ба роҳбарӣ мегирад.

2. ВАЗИФАҲОИ АСОСИИ ШӯРО

4. Вазифаҳои асосии Шӯро аз инҳо иборатанд:

- таҳияи тавсияҳо оид ба пешбурди корҳои илмию таҳқиқотӣ, ҳифз ва истифодаи оқилонаи захираҳои моҳӣ дар обҳавзаҳои табиии ҷумҳурӣ;

- фароҳам овардани шароити мусоиди рушд, истифодаи оқилонаи захираҳои моҳӣ дар обҳавзаҳои табиӣ;

- амалӣ намудани чорабиниҳо оид ба беҳтар гардондани нишондиҳандаҳои ҳолатҳои гидрологӣ, гидрогеокимиёвӣ, бунёди дастгоҳҳои муҳофизати моҳӣ дар обҳавзаҳо ва иншооти экологии об;

- амалӣ намудани чораҳо оид ба беҳтар намудани шароити тавлидгоҳҳои табиии моҳиҳо дар обҳавзаҳои табиӣ, пойгоҳҳои обӣ ва роҳҳои барқарорсозии тавлидгоҳҳо;

- ворид намудани намудҳои нави моҳиҳо ва намудҳои дигари ҳайвоноти обӣ аз хориҷи ҷумҳурӣ, инчунин мутобиқкунонии онҳо дар асоси тавсияҳои илман асоснокшуда ва омӯхташудаи иншооти табиии обии ҷумҳурӣ;

- баррасии масъалаҳои вобаста ба пешниҳодҳо оид ба моҳигирӣ;

- ҳолатҳои дигари пешбининамудаи қонунгузории Ҷумҳурии Тоҷикистон.

3. ҲУҚУҚУ УҲДАДОРИҲОИ ШӯРО

5. Шӯро ҳуқуқ дорад:

- бо тартиби муқаррарнамудаи санадҳои меъёрии ҳуқуқӣ мавод ва иттилооти барои иҷрои вазифаҳои Шӯро заруриро аз вазорату идораҳои дахлдори ҷумҳурӣ, мақомоти иҷроияи маҳаллии ҳокимияти давлатӣ ва ташкилотҳои дигар дархост намояд;

- барои иштирок дар кори Шӯро намояндагони мақомоти иҷроияи ҳокимияти давлатӣ, иттиҳодияҳои ҷамъиятӣ, ташкилотҳо, намояндагони созмонҳои байналмилалӣ, бахши хусусӣ ва ҷомеаи шаҳрвандиро даъват намояд;

- барои иҷрои вазифаҳои Шӯро гурӯҳ ва комиссияҳои кории байниидоравӣ таъсис диҳад ё коршиносони мустақилро ҷалб намояд.

6. Уҳдадориҳои Шӯро:

- ҳамоҳангсозӣ ва мониторинги раванди амалисозии фаъолият дар соҳаи моҳипарварӣ, моҳигирӣ ва ҳифзи захираҳои моҳии иншооти обии Ҷумҳурии Тоҷикистон;

- ҷамъоварӣ, ҷамъбаст ва таҳлили пешниҳоду дархости вазорату идораҳои дахлдори Ҷумҳурии Тоҷикистон, ташкилотҳои дигар оид ба масъалаҳои моҳипарварӣ, моҳигирӣ ва ҳифзи захираҳои моҳӣ;

- тасдиқи нақшаи кори ҳарсолаи Шӯро;

- пешниҳоди ҳисобот ба Ҳукумати Ҷумҳурии Тоҷикисгон дар бораи натиҷаҳои фаъолияти Шӯро дар самти моҳипарварӣ, моҳигирӣ ва ҳифзи захираҳои моҳӣ дар обҳавзаҳои табиӣ.

4. ҲАЙАТИ ШӯРО ВА ҲУҚУҚУ УҲДАДОРИҲОИ АЪЗОИ ШӯРО

7. Ба ҳайати Шӯро раис, муовини раис, котиб ва аъзои Шӯро аз ҳисоби намояндагони вазорату идораҳои давлатӣ аз рӯйи мансаб дохил мегарданд.

8. Раиси Шӯро:

- фаъолияти Шӯроро ҳамоҳанг месозад;

- ҷаласаҳои Шӯроро даъват мекунад ва мегузаронад;

- протоколҳои ҷаласаҳои Шӯро ва ҳуҷҷатҳои дигари заруриро барои иҷро имзо мекунад;

- бо тартиби муқарраргардида аз вазорату идораҳо, мақомоти иҷроияи маҳаллии ҳокимияти давлатӣ ва ташкилотҳои дигар мавод ва иттилооти заруриро оид ба масъалаҳое, ки ба вазифаҳои Шӯро мансубанд, дархост мекунад;

- ҷиҳати иҷрои қарорҳои Шӯро ба вазорату идораҳои дахлдор, мақомоти иҷроияи маҳаллии ҳокимияти давлатӣ ва ташкилотҳои дигар пешниҳоду дархост медиҳад;

- ҳисоботи аъзои Шӯроро мешунавад;

- ваколатҳои дигари ба фаъолияти Шӯро дахлдоштаро амалӣ менамояд.

9. Муовини раиси Шӯро:

- уҳдадориҳои раиси Шӯроро дар вақти набудани ӯ иҷро менамояд;

- супоришҳои дигари раиси Шӯроро иҷро мекунад.

10. Котиби Шӯро:

- коргузории Шӯроро таъмин менамояд;

- муроҷиатҳо ва ҳуҷҷатҳои дигари ба Шӯро воридшударо омода ва ҷамъбаст карда, ба раиси Шӯро пешниҳод менамояд;

- ҳуҷҷатҳои заруриро оид ба масъалаҳои баррасишаванда таҳия карда, лоиҳаи протоколҳоро ба раис ва аъзои Шӯро пешниҳод менамояд;

- протоколҳои чаласаҳои Шӯроро омода сохта, пас аз тасдиқ ҷиҳати амалӣ гардидани онҳо тадбирҳо меандешанд, барои иҷро онҳоро ба вазорату идораҳои дахлдор, мақомоти иҷроияи маҳаллии ҳокимияти давлатӣ ва ташкилотҳои дигар пешниҳод менамояд;

- супоришҳои раиси Шӯро ва вазифаҳои дигарро вобаста ба фаъолияти Шӯро тибқи санадҳои меъёрии ҳуқуқии Ҷумҳурии Тоҷикистон иҷро менамояд.

11. Аъзои Шӯро:

- дар чаласаҳои Шӯро иштирок менамоянд;

- таклифҳои мушаххасро барои ворид намудан ба нақшаи кор ва рӯзномаи ҷаласаҳои Шӯро манзур менамоянд;

- мавод ва лоиҳаҳои қарорҳоро ба ҷаласаҳои Шӯро омода менамоянд;

- дар бораи кори анҷомдодаи вазорату идораҳо ё ташкилотҳое, ки онҳоро намояндагӣ мекунанд, ҳисобот пешниҳод менамоянд;

- бо дархости раиси Шӯро ё муовини ӯ иттилооти заруриро пешниҳод мекунанд.

5. ТАШКИЛИ ФАЪОЛИЯТИ ШӯРО

12. Шакли фаъолияти Шӯро ҷаласаҳои он мебошанд, ки дар як сол на камтар аз ду маротиба гузаронда мешаванд.

13. Дар мавриди зарурат метавонанд ҷаласаҳои ғайринавбатии Шӯро доир гарданд. Ҷаласаҳои ғайринавбатии Шӯро метавонанд дар асоси супориши Ҳукумати Ҷумҳурии Тоҷикистон ё бо ташаббуси раиси Шӯро, инчунин муовини раиси Шӯро гузаронда шаванд.

14. Рӯзномаи ҷаласа ва маводи баррасишаванда ба аъзои Шӯро на дертар аз се рӯз пеш аз оғози ҷаласа дастрас карда мешаванд.

15. Ҷаласаҳои Шӯро аз ҷониби раиси Шӯро, дар сурати ҳузур надоштани ӯ, аз ҷониби муовини раиси Шӯро гузаронида мешаванд.

16. Ҷаласаи Шӯро ҳамон вақт салоҳиятнок ҳисобида мешавад, ки дар он аз нисф зиёди аъзои Шӯро иштирок дошта бошанд.

17. Қарорҳои Шӯро бо тариқи овоздиҳии кушода бо аксарияти овозҳои аъзое, ки дар ҷаласаҳои Шӯро иштирок мекунанд, қабул карда мешаванд.

18. Вазорату идораҳо ва ташкилотҳои дигари дахлдор таклифу пешниҳодҳо ва ҳисоботҳои худро оид ба моҳипарварӣ, моҳигирӣ ва ҳифзи захираҳои моҳӣ барои баррасӣ ва ҷамъбаст ба раиси Шӯро ба таври расмӣ пешниҳод менамоянд.

19. Қарорҳои Шӯро бо протокол ба расмият дароварда шуда, аз ҷониби раис ва котиби Шӯро ба имзо расонда мешаванд.

20. Нусхаи протокол ва иттилооти дигари марбут ба фаъолияти Шӯро дар муддати панҷ рӯзи баъд аз гузарондани ҷаласа ба маълумоти ҳамаи аъзои Шӯро ва шахсони дигари манфиатдор расонда мешаванд.

Ҳайати Шӯрои илмию истеҳсолии моҳипарварӣ, моҳигирӣ ва ҳифзи захираҳои моҳӣ

Раиси Кумитаи ҳифзи муҳити зисти назди Ҳукумати Ҷумҳурии Тоҷикистонраиси Шӯро;

муовини якуми вазири кишоварзии Ҷумҳурии Тоҷикистон - муовини раиси Шӯро;

сардори раёсати назорати давлатии истифода ва ҳифзи олами набототу ҳайвонот ва захираҳои моҳии Кумитаи ҳифзи муҳити зисти назди Ҳукумати Ҷумҳурии Тоҷикистон - котиби Шӯро.

Аъзои Шӯро:

муовини якуми раиси Кумитаи ҳифзи муҳити зисти назди Ҳукумати Ҷумҳурии Тоҷикистон;

муовини якуми раиси Кумитаи бехатарии озуқавории назди Ҳукумати Ҷумҳурии Тоҷикистон;

муовини якуми директори Агентии беҳдошти замин ва обёрии назди Ҳукумати Ҷумҳурии Тоҷикистон;

муовини директори Агентии хоҷагии ҷангали назди Ҳукумати Ҷумҳурии Тоҷикистон;

президенти Академияи илмҳои кишоварзии Тоҷикистон;

директори Институти зоология ва паразитологияи Академияи миллии илмҳои Тоҷикистон.