Низомномаи шӯрои нозирони Корхонаи воҳиди давлатии "Бонки амонатгузории Ҷумҳурии Тоҷикистон "Амонатбонк""

1. МУҚАРРАРОТИ УМУМӢ

1. Низомномаи шӯрои нозирони Корхонаи воҳиди давлатии "Бонки амонатгузории Ҷумҳурии Тоҷикистон "Амонатбонк"" (минбаъд - Низомнома) мақом, тартиби даъват, ташкил ва баргузории маҷлисҳои шӯрои нозирони Корхонаи воҳиди давлатии "Бонки амонатгузории Ҷумҳурии Тоҷикистон "Амонатбонк"" (минбаъд - Бонк), ҳуқуқу ухдадориҳои аъзои шӯрои нозирони Бонк, ҳамкорӣ бо мақомоти дигари идоракунии Бонк, инчунин тартиби пеш аз муҳлат қатъ намудани ваколатҳои аъзои шӯрои нозирони Бонкро муайян менамояд.

2. Шӯрои нозирони Бонк (минбаъд - шӯрои нозирон) мақоми идоракунии Бонк буда, роҳбарии умумии фаъолияти Бонкро амалӣ менамояд ва иҷрои қарорҳои муассиси Бонк ва мақоми ваколатдори давлатӣ дар соҳаи молияро тибқи қонунгузории Ҷумҳурии Тоҷикистон зери назорат мегирад.

3. Шӯрои нозирон бо мақсади ҳифзи манфиатҳои давлат ва Бонк, идоракунӣ ва таъмини фаъолияти самараноки Бонк таъсис дода мешавад.

4. Шӯрои нозирон дар фаъолияти худ қонунгузории Ҷумҳурии Тоҷикистон ва Низомномаи мазкурро ба роҳбарӣ мегирад.

2. САЛОҲИЯТИ ШӯРОИ НОЗИРОН

5. Ба салоҳияти шӯрои нозирон масъалаҳои зерин дохил мешаванд:

- муайян намудани самтҳои афзалиятноки фаъолияти Бонк;

- тасдиқи буҷети солона, хароҷоти амалиётию ғайриамалиётӣ ва нақшаи фаъолияти молиявию хоҷагидории Бонк;

- таъмини иҷрои талаботи қонунгузории Ҷумҳурии Тоҷикистон аз ҷониби Бонк;

- мавриди баррасӣ қарор додани ҳисоботи солонаи Бонк аз рӯйи ҳамаи самтҳои фаъолият, аз ҷумла даромад ва хароҷот;

- муайян намудани андозаи маоши вазифавии раис, муовини якум, муовинон, сармуҳосиб ва сараудитори Бонк, низоми мукофотонӣ ё намудҳои дигари ҳавасмандгардониҳои онҳо;

- таъсиси кумитаи аудит ва кумитаҳои дигари назди шӯрои нозирон ва тасдиқи низомномаи онҳо;

- баррасӣ намудани ҳисоботи кумитаи аудити Бонк;

- тасдиқи тартиби мукофотонии кормандони Бонк;

- маъқул донистани аҳдҳои калоне, ки 30 фоиз ё бештари арзиши тавозунии дороии Бонкро ташкил дода, мутобиқи маълумоти муҳосибавии он дар санаи охирини ҳисоботӣ муайян гардидаанд, ба истиснои аҳдҳо нисбати молу мулке, ки розигии муассиси Бонкро талаб мекунанд;

- тасдиқи ҳисоботи солона бо ҳисоботи муҳосибии Бонк ва ҳисоботи солонаи муҳосибавии Бонк;

- тасдиқи сараудитори Бонк ва муайян намудани андозаи пардохти хизматрасонии он;

- назорати татбиқи стандартҳои байналмилалии ҳисоботи молиявӣ дар Бонк;

- назорати ҳарсолаи гузаштани аудити ҳатмии беруна аз ҷониби Бонк ва пешниҳоди хулосаи аудиторӣ ба муассис, мақомоти ваколатдори давлатӣ дар соҳаи молия ва Бонки миллии Тоҷикистон;

- ҳар нимсола баррасӣ ва арзёбии ҳисоботи раиси Бонк;

- дар мувофиқа бо муассис тасдиқ намудани тақсимоти фоидае, ки баъд аз интиқоли пардохти ғайриандозӣ ба буҷети давлатӣ дар ихтиёри Бонк боқӣ мондааст;

- муайян намудани маълумоти ба Бонк ё фаъолияти он дахлдошта, ки дорои сирри хизматӣ, тиҷоратӣ ё сирри дигари бо қонунгузорӣ ҳифзшаванда мебошад, ба истиснои сирри бонкӣ, инчунин муайян намудани тартиби кушодани он ба шахсони сеюм аз ҷониби Бонк;

- таъсиси филиалҳо ва кушодани намояндагиҳои Бонк дар ҳудуди ҷумҳурӣ ва берун аз он;

- тасдиқи ҳуҷҷатҳои дохилии Бонк, ки тартиби ташкил ва истифодаи фондҳои Бонкро муайян менамоянд;

- муайян намудани сиёсати қарзии Бонк дар бобати додани қарзҳо, бастани шартномаҳои қарзӣ, барориши вомбаргҳо, додани замонатҳо, ҳамаи намудҳои кафолатҳо ва аккредитивҳо;

- муайян намудани ҳамкории Бонк бо ташкилотҳое, ки Бонк дар фаъолияти онҳо иштирок менамояд;

- пешакӣ маъқул донистани шартномаҳои коллективӣ ва созишномаҳое, ки аз тарафи Бонк дар доираи танзими муносибатҳои иҷтимоию меҳнатӣ баста мешаванд;

- муайян намудани сиёсати харид дар Бонк ва қабули қарорҳо мутобиқи ҳуҷҷатҳои дар Бонк тасдиқшуда, ки фаъолияти Бонкро оид ба харид ба танзим медароранд;

- ба муассиси Бонк манзур намудани пешниҳод дар бораи таъин ва қатъ намудани ваколатҳои мақоми иҷроияи Бонк;

- қабули қарор дар бораи истифодаи фонди захиравӣ ва фондҳои дигари Бонк;

- ба мансаб таъин ва озод намудани котиби шӯрои нозирон;

- тасдиқи низомномаи котиби шӯрои нозирон ва ворид намудани тағйиру иловаҳо ба он;

- муқаррар намудани стандартҳои идоракунии хавфҳо, муайян кардани пазириши хавф ва меъёрҳои ҳадди ақалли мақбули дохилӣ;

- назорати тадбирҳое, ки мақоми иҷроияи Бонк барои ошкор, андозагирӣ, мониторинг ва назорати хавфҳо меандешад;

- нигоҳдории низоми мувофиқу босамари назорати дохилӣ, инчунин мониторинги самарабахшии низоми назорати дохилии аз тарафи мақоми иҷроияи Бонк амалишаванда;

- муқаррар намудани сиёсати дохилӣ ва сармоягузорӣ, низоми назорати дохилӣ, комплаенс (мувофиқа) ва меъёрҳои ахлоқӣ;

- маъқул донистани ба вазифа таъин ва аз вазифа озод намудани сармуҳосиби Бонк ва муовини ч бо пешниҳоди раиси раёсати Бонк, ба истиснои роҳбар ва сармуҳосиби филиали Бонк;

- тасдиқи сохтори ташкилӣ;

- таъини роҳбари сохтори аудити дохилӣ (сараудитор) ва роҳбари сохтори идоракунии хавфҳои (сардори воҳиди сохтории идоракунии хавфҳои) Бонк;

- баррасии натиҷаҳои аудит ва санҷишҳои дохилию берунӣ;

- масъалаҳои дигаре, ки ҳалли онҳо тибқи қонунгузории Ҷумҳурии Тоҷикистон ба салоҳияти шӯрои нозирон дохил шудааст.

6. Масъалаҳое, ки ба салоҳияти шӯрои нозирон тааллуқ доранд, барои ҳал намудан ба мақоми иҷроияи Бонк супорида шуда наметавонанд.

3. ТАШКИЛИ ШӯРОИ НОЗИРОН

7. Шумораи аъзои шӯрои нозирони Бонк дар ҳайати 6 (шаш) нафар тасдиқ карда мешавад.

8. Узви шӯрои нозирон метавонад танҳо шахси воқеӣ бошад.

9. Шӯрои нозирон аз ҳисоби шахсоне, ки дорои таҳсилоти олӣ буда, шахси аз нигоҳи касбӣ босалоҳият ва боэътимод мебошанд, интихоб мегардад.

10. Роҳбар ё корманди Бонк наметавонад ҳамзамон аъзои шӯрои нозирони Бонк бошад.

11. Аъзои шӯрои нозирон наметавонанд:

- кормандони ягон ташкилоти қарзии молиявии дигар бошанд;

- аъзои шӯрои нозирон ё дорандаи ҳиссаи иштироки афзалиятнок дар ташкилоти қарзии молиявии дигар бошанд;

- корманд, аз ҷумла корманди роҳбарикунандаи Бонк, ҷамъияти вобаста ва фаръии он бошанд, ба истиснои корманди ҷамъияти алоқаманди Бонк;

- синнашон аз сӣ кам бошад.

12. Шахсе, ки дар содир намудани ҷиноятҳои иқтисодию молиявӣ ё ҷиноятҳои муқобили ҳокимияти давлатӣ, манфиатҳои хизмати давлатӣ ва хизмат дар мақомоти идоракунии маҳаллӣ гунаҳкор дониста шудааст ё нисбати вай ҷазоҳои маъмурӣ барои ҳуқуқвайронкунӣ дар соҳаи фаъолияти соҳибкорӣ ё соҳаи молия, андозу хироҷ ва бозори коғазҳои қиматнок татбиқ шудаанд, узви шӯрои нозирон буда наметавонад.

13. Шахсоне, ки дар ҳайати шӯрои нозирон тасдиқ шудаанд, метавонанд ба таври номаҳдуд якчанд маротиба ба ҳайати шӯрои нозирон интихоб шаванд.

14. Дар сурати ба тариқи яктарафа даст кашидан аз ваколатҳо, узви шӯрои нозирон мутобиқи қонунгузории амалкунанда масъулият бар дӯш дорад. Узви шӯрои нозирон доир ба пеш аз муҳлат даст кашиданаш аз ваколатҳои узви шӯрои нозирон бояд ба таври хаттӣ раиси шӯрои нозиронро огоҳ намояд.

4. РАИСИ ШӯРОИ НОЗИРОН

15. Раиси шӯрои нозирон ба фаъолияти шӯрои нозирон роҳбарӣ мекунад.

16. Раиси шӯро бо қарори муассис тасдиқ карда мешавад.

17. Муовини раиси шӯрои нозирон тариқи овоздиҳии пинҳонии аъзои шӯрои нозирон бо аксарияти овози шумораи умумии аъзои шӯрои нозирон интихоб мегардад.

18. Дар ҳолати набудани раиси шӯрои нозирон вазифаҳои ӯро муовини раиси шӯрои нозирон иҷро мекунад.

19. Раиси шӯрои нозирон:

- кори шӯрои нозиронро ташкил карда, барои изҳори озодонаи андешаҳо аз тарафи аъзои шӯрои нозирон ва муҳокимаи озоди масъалаҳои рӯзнома шароит фароҳам меорад;

- маҷлисҳои шӯрои нозиронро даъват менамояд, рӯзномаи маҷлисҳоро тасдиқ мекунад, шакли гузаронидани маҷлисҳои шӯрои нозиронро муайян месозад ва дар онҳо раисӣ мекунад;

- дар маҷлисҳо пешбурди протоколҳоро ташкил менамояд ва онҳоро ба имзо мерасонад;

- қабули қарорҳои дахлдорро оид ба масъалаҳои рӯзномаи маҷлисҳои шӯрои нозирон таъмин менамояд;

- на дертар аз 10 (даҳ) рӯз ба аъзои шӯрои нозирон маълумоти заруриро барои баррасӣ дар маҷлисҳо пешниҳод менамояд;

- бо мақомоту сохторҳои дигари давлатӣ ва ғайридавлатӣ ва шахсони мансабдори Бонк ҳамкории доимиро ба роҳ мемонад;

- ҳисоботи баҳодиҳии фаъолияти солонаи шӯрои нозиронро барои дохил намудани он ба ҳисоботи солонаи Бонк таҳия менамояд.

20. Дар ҳолати набудани раиси шӯрои нозирон ва муовини раиси шӯрои нозирон, вазифаҳои раисиро мувофиқи қарори шӯрои нозирон, ки бо аксари овозҳои аъзои дар маҷлис иштирокдоштаи он қабул мегардад, яке аз аъзои шӯрои нозирон иҷро менамояд.

5. МАҶЛИСҲОИ ШӯРОИ НОЗИРОН

21. Маҷлисҳои шӯрои нозирон аз рӯйи зарурат, вале на камтар аз ду маротиба дар як сол гузаронида мешаванд.

22. Маҷлисҳои шӯрои нозирон аз тарафи раиси шӯрои нозирон (ё муовини раиси шӯрои нозирон) бо ташаббуси ӯ ё бо дархости аъзои шӯрои нозирон, сараудитори Бонк ва ё мақоми иҷроияи Бонк даъват карда мешаванд.

23. Омода ва баргузории маҷлисҳои шӯрои нозирон аз ҷониби котиби шӯрои нозирон (минбаъд - котиб) таъмин карда мешавад.

24. Котиб дар асоси низомномаи шӯрои нозирон, низомнома дар бораи котиб ва шартномаи байни котиб ва Бонк басташуда фаъолият менамояд.

25. Таклифи даъвати маҷлиси шӯрои нозирон дар шакли хаттӣ бо роҳи ирсоли мактуби фармоишӣ ба суроғаи Бонк ё супоридани чунин дархост ба котиб пешниҳод мегардад.

26. Санаи пешниҳоди дархост дар хусуси даъвати маҷлиси ғайринавбатии шӯрои нозирон аз рӯйи санаи супоридани он ба котиб муайян карда мешавад.

27. Дархост аз ҷониби аъзои шӯрои нозирон - ташаббускори даъвати маҷлис, мақоми иҷроияи Бонк ё сараудитори Бонк, ки даъвати маҷлисро талаб менамоянд, имзо карда мешавад.

28. Дар дархост бояд чунин маълумот зикр карда шавад:

- дар бораи ташаббускори даъвати маҷлис;

- оид ба мақсади гузаронидани маҷлис;

- оид ба рӯзномаи маҷлис.

29. Раиси шӯрои нозирон дар давоми 10 (даҳ) рӯзи тақвимӣ аз санаи пешниҳоди дархост бояд маҷлиси шӯрои нозиронро даъват намояд.

30. Огоҳинома дар бораи сана, маҳал ва вақти гузаронидани маҷлиси шӯрои нозирон бо зикри рӯзномаи маҷлис ва тартиби шиносшавӣ бо маълумоте, ки барои омодагӣ ба маҷлис зарур аст, бо мактуби фармоишӣ дар шакли хаттӣ ё тавассути почтаи электронӣ ирсол мегардад ва ё ба ҳар узви шӯрои нозирон ва ташаббускори гузаронидани маҷлис супорида мешавад, агар маҷлис бо дархости шахсони дар банди 22 Низомномаи мазкур номбаршуда на дертар аз 10 (даҳ) рӯзи тақвимӣ то санаи гузаронидани маҷлис баргузор шавад. Санаи ирсоли огоҳинома аз рӯи санаи супоридани огоҳинома муайян карда мешавад.

31. Маҷлиси якуми шӯрои нозирон бояд дар давоми на дертар аз 1 (як) моҳи баъди ташкили шӯрои нозирон гузаронида шавад.

32. Ба рӯзномаи маҷлиси якуми шӯрои нозирон ҳатман бояд масъалаҳои зерин дохил карда шаванд:

- интихоби муовини раиси шӯрои нозирон;

- интихоби котиб;

- муайян намудани самтҳои афзалиятноки фаъолияти Бонк.

33. Барои гузаронидани маҷлиси шӯрои нозирон котиб ва мақоми иҷроияи Бонк бояд маълумоти пурра омода намоянд.

34. Иттилооти зарурӣ барои гузаронидани маҷлиси шӯрои нозирон бояд дорои чунин маълумот бошад:

- нишондиҳандаҳои асосии фаъолияти Бонк, ки аз тарафи мақоми иҷроияи Бонк таҳия ва тасдиқ шудаанд;

- иттилооти пурраи молиявӣ;

- протокол ва тавсияҳои маҷлиси қаблан гузаштаи шӯрои нозирон;

- маълумот дар бораи самаранокии фаъолият дар Бонк.

35. Шумораи зарурии иштирокчиён (кворум) барои гузаронидани маҷлиси шӯрои нозирон бояд на камтар аз нисфи аъзои шӯрои нозиронро ташкил диҳад.

36. Аз тарафи узви шӯрои нозирон ба шахси дигар, аз ҷумла ба узви дигари шӯрои нозирон додани ҳуқуқи овоз манъ аст.

37. Ҳангоми ҳалли масъалаҳо дар маҷлиси шӯрои нозирон ҳар узви шӯрои нозирон танҳо як овоз дорад. Дар ҳолати баробар будани овозҳо зимни гузаронидани овоздиҳӣ, овози раисикунандаи маҷлис ҳалкунанда мебошад.

38. Қарорҳои шӯрои нозирон бо аксари овозҳои аъзои шӯрои нозирон, ки дар овоздиҳӣ, аз ҷумла ҳангоми овоздиҳии ғоибона иштирок мекунанд, қабул карда мешаванд.

39. Қарорҳои шӯрои нозирон метавонанд дар маҷлисҳо дар шакли иштироки якҷоя ё иштироки якҷоя бо дарназардошти андешаҳои аъзои ҳузурнадоштаи шӯрои нозирон, ки дар шакли хаттӣ пешниҳод намудаанд, ҳангоми муайян намудани кворум ва натиҷаҳои овоздиҳӣ, инчунин бо роҳи гузаронидани овоздиҳии ғоибона қабул карда шаванд.

40. Огоҳкунӣ дар бораи гузаронидани маҷлиси шӯрои нозирон бо тартиби пешбининамудаи банди 30 Низомномаи мазкур сурат мегирад.

41. Огоҳинома дар бораи гузаронидани маҷлис аз ду қисм иборат аст:

1) дар қисми якуми огоҳинома бояд чунин маълумот зикр карда шавад:

- номи пурраи расмии Бонк ва маҳалли ҷойгиршавии он;

- сана, маҳал ва вақти гузаронидани маҷлис;

- рӯзномаи маҷлис;

- маълумот оид ба тартиби шиносшавӣ бо мавод ва маълумоте, ки барои омодагӣ ба маҷлис зарур мебошад ё рӯйхати маводи ба огоҳинома замимашаванда;

2) қисми дуюми огоҳинома бояд чунин маълумотро дар бар гирад:

- суроғаи почтавие, ки ба он андешаи хаттиро фиристодан мумкин аст;

- санаи анҷоми қабули андешаҳо, ки дар шакли хаттӣ баён шудаанд;

- мазмуни қарорҳо аз рчйи ҳар масъалаи рӯзномаи маҷлис;

- намудҳои овоздиҳӣ оид ба ҳар як масъала: "тарафдор", "зид", "бетараф";

- ҷой барои баёни андешаи хаттии аъзои шӯрои нозирон оид ба ҳар масъалаи рӯзномаи маҷлис;

- ҷой барои имзои аъзои шӯрои нозирон бо зикри ҳатмӣ будани ин имзо.

42. Қисми дуюми огоҳинома мумкин аст бо мактуби фармоишӣ ё тавассути номарасон ба шӯрои нозирон ирсол карда шавад.

43. Қарор дар бораи гузаронидани маҷлиси шӯрои нозирон дар шакли овоздиҳии ғоибона аз ҷониби раиси шӯрои нозирон ё ташаббускорони гузаронидани маҷлиси ғайринавбатӣ қабул мегардад.

44. Овоздиҳии ғоибона оид ба масъалаҳои зерин гузаронида намешавад:

- тасдиқи самтҳои афзалиятноки фаъолият ва нақшаи молиявию хоҷагии Бонк;

- тасдиқи ҳисоботи солонаи Бонк;

- интихоб ва аз нав интихоб кардани муовини раиси шӯрои нозирон.

45. Бюллетенҳо барои овоздиҳии ғоибона аз ҷониби раиси шӯрои нозирон имзо карда мешавад. Иттилооти зарурӣ барои омодагӣ ба маҷлис бо мактуби фармоишӣ ирсол мегардад ё шахсан ба аъзои шӯрои нозирон бо гирифтани имзои онҳо на дертар аз 10 (даҳ) рӯзи тақвимӣ то санаи баргузоршавии маҷлис супорида мешавад.

46. Санаи аз тарафи узви шӯрои нозирон гирифтани бюллетен аз рӯйи муҳри почта ё санаи супоридани ин бюллетен муайян карда мешавад.

47. Дар бюллетен бояд чунин маълумот нишон дода шавад:

- номи пурраи расмии Бонк ва маҳалли ҷойгиршавии он;

- мазмуни масъалаҳои ба овоздиҳӣ гузошташуда ва қарорҳо аз рӯйи ҳар масъала;

- шакли овоздиҳӣ оид ба ҳар як масъала: "тарафдор", "зид" ё "бетараф";

- маълумот оид ба тартиби шиносшавӣ бо мавод ва иттилооте, ки барои омодагӣ ба маҷлис зарур мебошанд, ё рӯйхати маводи ба бюллетен замимашаванда;

- суроғаи почтавие, ки бюллетенҳои пуркардашуда бояд ба он ирсол гарданд;

- санаи анҷоми қабули бюллетенҳо.

48. Аъзои шӯрои нозирон, ки бюллетенҳояшон на дертар аз санаи муқарраршудаи анҷоми қабули бюллетенҳо гирифта шудаанд, дар овоздиҳӣ иштирокнамуда шуморида мешаванд.

49. Ҳисобот оид ба натиҷаҳои овоздиҳӣ ба аъзои шӯрои нозирон дар муҳлати на дертар аз рӯзи таҳияи протокол оид ба натиҷаҳои овоздиҳӣ бо мактуби фармоишӣ ирсол мегардад ё шахсан ба аъзои шӯрои нозирон бо гирифтани имзо супорида мешавад.

50. Андешаҳои хаттие, ки ҳангоми муайян намудани кворум ва натиҷаҳои овоздиҳӣ ба назар гирифта шудаанд, ҳангоми қабули қарорҳо дар бораи маъқул донистани аҳдҳои калон ва аҳдҳое, ки анҷом додани онҳо боманфиатанд, ба ҳисоб гирифта намешаванд.

6. ПРОТОКОЛИ МАҶЛИСИ ШӯРОИ НОЗИРОН

51. Дар маҷлисҳои шӯрои нозирон протокол тартиб дода мешавад. Протоколи маҷлиси шӯрои нозиронро котиб пеш мебарад ва он на дертар аз 3 (се) рӯзи баъди гузаронидани маҷлис тартиб дода мешавад. Ба протокол ҳамаи маводи дахлдор оид ба масъалаҳои рӯзномаи маҷлис ва ҳуҷҷатҳои тасдиқнамудаи шӯрои нозирон замима мегарданд ва нусхаи протокол аз ҷониби Бонк на дертар аз 5 рӯзи баргузории маҷлис бо маълумоти дахлдор ба аъзои шӯрои нозирон тариқи мактуби расмӣ ирсол карда мешавад.

52. Дар сурати аз тарафи шӯрои нозирон тариқи овоздиҳии ғоибона қабул намудани қарорҳо, ба протокол варақаҳои пурсишнома барои овоздиҳӣ, ки аз ҷониби аъзои шӯрои нозирон имзо шудаанд, замима карда мешаванд.

53. Дар протоколи маҷлиси шӯрои нозирон маълумоти зерин нишон дода мешавад:

- маҳал ва вақти гузаронидани маҷлис;

- рӯйхати шахсони дар маҷлис иштирокнамуда;

- рӯзномаи маҷлис;

- масъалаҳои ба овоздиҳӣ гузошташуда ва натиҷаҳои овоздиҳӣ;

- қарорҳои қабулшуда.

54. Протоколи ҷаласаи шӯрои нозирони Бонк аз ҷониби раиси маҷлис ва котиб имзо карда мешавад.

55. Бонк протоколҳои маҷлисҳои шӯрои нозиронро ба аудитори Бонк бо дархости ч пешниҳод менамояд.

56. Бонк протоколҳои маҷлисҳои шӯрои нозиронро дар маҳалли ҷойгиршавии мақоми иҷроияи он нигоҳ медорад.

7. УҲДАДОРИҲО ВА МАСЪУЛИЯТИ УЗВИ ШӯРОИ НОЗИРОН

57. Аъзои шӯрои нозирон ҳангоми татбиқи ҳуқуқҳои худ ва иҷрои уҳдадориҳояшон бояд софдилона ба манфиати Бонк ва давлат амал кунанд, ҳуқуқу уҳдадориҳои худро нисбат ба Бонк татбиқ намоянд.

58. Аъзои шӯрои нозирон барои фаъолияти самараноки Бонк масъулият доранд.

59. Аъзои шӯрои нозирон ҳангоми татбиқи ҳуқуқҳои худ ва иҷрои уҳдадориҳои мансабӣ бояд:

- ҳамаи қарорҳои худро софдилона ба манфиати Бонк қабул кунанд;

- дар маҷлисҳои шӯрои нозирон иштирок намоянд;

- тавзеҳот талаб намоянд ва саволҳои аниқкунанда диҳанд;

- пешакӣ шӯрои нозиронро дар хусуси набудани имконияти иштирок дар маҷлиси шӯрои нозирон тариқи хаттӣ огоҳ намуда, дар он сабаби иштирок карда натавонистани худро зикр намоянд;

- аз шахсони воқеӣ ё ҳуқуқӣ туҳфаҳо, хизматҳо ё афзалиятҳоеро, ки ҳамчун подош барои қарорҳо ё амалҳои аз тарафи узви шӯрои нозирон дар доираи ваколатҳои хизматии вай қабулшуда ё иҷрошуда дониста мешаванд, ба ғайр аз нишонаҳои рамзии ҳусни таваҷҷуҳ мутобиқи қоидаҳои пазируфташудаи одобу эҳтиром ё туҳфаҳои хотиравӣ ҳангоми гузаронидани чорабиниҳои расмӣ қабул накунанд;

- иттилооти махфӣ, инсайдерӣ ва иттилооти дигари хизматиро, ки ба узви шӯрои нозирон ҳангоми фаъолият дар шӯрои нозирон маълум гаштааст, ба шахсони ба чунин иттилоот дастрасинадошта ифшо нанамоянд, инчунин онро ҳам дар давраи иҷрои вазифаҳои узви шӯрои нозирон ва ҳам дар муддати 5 (панҷ) соли баъди анҷоми ваколатҳои аъзои шӯрои нозирон ба манфиати худ ё манфиати шахсони сеюм истифода набаранд;

- ҳамаи қоидаҳои дар ҳуҷҷатҳои дохилии Бонк пешбинишударо вобаста ба таъмини амният ва ҳифзи иттилооти махфии Бонк риоя намоянд;

- сари вақт ба шӯрои нозирон дар бораи фаъолият ва вазъи молиявии Бонк маълумоти пурра ва дақиқ пешниҳод намоянд.

60. Шӯрои нозирон ба муассис ва мақоми ваколатдори давлатӣ дар соҳаи молия ҳисоботдиҳанда буда, ҳамасола ба муассис ва мақоми ваколатдори давлатӣ дар соҳаи молия дар бораи натиҷаҳои фаъолияти солонаи Бонк ҳисобот пешниҳод менамояд.

8. МУҚАРРАРОТИ ХОТИМАВӢ

61. Шӯрои нозирон шахси ҳуқуқӣ намебошад ва бланку муҳри расмӣ надорад.

62. Баҳсҳои марбут ба татбиқи ваколатҳои шӯрои нозирон аз ҷониби шӯрои нозирон ё муассис ҳал карда мешаванд.