Низомномаи тартиби гузаронидани ҷамъомадҳои ҳарбӣ бо шаҳрвандоне, ки дар ҳайати эҳтиёт қарор доранд

1. МУҚАРРАРОТИ УМУМӢ

1. Низомномаи тартиби гузаронидани ҷамъомадҳои ҳарбӣ бо шаҳрвандоне, ки дар ҳайати эҳтиёт қарор доранд (минбаъд - Низомнома) дар асоси Қонуни Ҷумҳурии Тоҷикистон "Дар бораи уҳдадории ҳарбӣ ва хизмати ҳарбӣ" таҳия гардида, тартиби гузаронидани чорабиниҳоро оид ба омодагӣ ва азнавомодакунии шаҳрвандоне, ки дар ҳайати эҳтиёт қарор доранд (минбаъд - шаҳрвандон), ба хизмати ҳарбӣ дар Қувваҳои Мусаллаҳи Ҷумҳурии Тоҷикистон, дигар қӯшунҳо ва воҳидҳои ҳарбие, ки тибқи қонунгузорӣ дар онҳо хизмати ҳарбӣ пешбинӣ шудааст, таъминоти моддии шаҳрвандоне, ки дар ҳайати эҳтиёт қарор доранд, ташаккул додани шаҳрвандон дар захира, ки аз рӯйи ихтисосҳои бақайдгирии ҳарбӣ омода карда шудаанд ва барои густариши сафарбарии Қувваҳои Мусаллаҳ ва пуррагардонии онҳо дар рафти ҷанг зарур мебошад, ба танзим медарорад.

2. Тартиби гузаронидани ҷамъомадҳои ҳарбӣ тибқи Қонуни Ҷумҳурии Тоҷикистон "Дар бораи уҳдадории ҳарбӣ ва хизмати ҳарбӣ", дигар санадҳои меъёрии ҳуқуқии Ҷумҳурии Тоҷикистон ва Низомномаи мазкур ба роҳ монда мешавад.

2. МАҚСАДИ ГУЗАРОНИДАНИ ҶАМЪОМАДҲОИ ҲАРБӢ ВА НАМУДҲОИ ОНҲО

3. Мақсади асосии гузаронидани ҷамъомадҳои ҳарбӣ - ин омодагӣ ва азнавомодакунии шаҳрвандони Ҷумҳурии Тоҷикистон ба хизмати ҳарбӣ мебошад.

4. Ҷамъомадҳои ҳарбӣ бо мақсади баланд бардоштани савияи дониши ҳарбӣ, маҳорат, малакаи методӣ ва амалӣ аз рӯйи ихтисосҳои бақайдгирии ҳарбии дахлдор ва вазифаҳои ҳарбии афсарон, прапоршикҳо, старшинаҳо, сержантҳо ва сарбозҳои эҳтиётӣ гузаронида мешаванд.

5. Дар рафти ҷамъомадҳои ҳарбӣ машғулиятҳои назариявии нақшавӣ, машқҳо, тамринҳо ва корҳои амалӣ оид ба хизматрасонии аслиҳа ва техникаи ҳарбӣ дар мақомоти идоракунии ҳарбӣ, воҳидҳо, қисмҳои ҳарбӣ, муассисаҳои Қувваҳои Мусаллаҳ, дигар қӯшунҳо ва воҳидҳои ҳарбӣ (минбаъд - қисмҳои ҳарбӣ) гузаронида мешаванд.

6. Омодагӣ ва ҷамъкунии шаҳрвандони аз рӯйи ихтисосҳои бақайдгирии ҳарбӣ омодакардашуда бояд бо дарназардошти чорабиниҳои ташкилӣ-штатии банақшагирифташаванда, дурнамои азнавмусаллаҳонии қисмҳои ҳарбӣ бо намунаи нави аслиҳа ва техникаи ҳарбӣ амалӣ карда шавад.

7. Тартиби мушаххас ва вазифагузориҳо оид ба ташкил ва гузаронидани ҷамъомадҳои ҳарбӣ дар қӯшунҳо (қувваҳо) бо фармоишҳо ва дастурҳои вазири мудофиа, дастурҳои Ситоди генералии Қувваҳои Мусаллаҳ ва фармоишҳои фармондеҳони навъҳои Қувваҳои Мусаллаҳ, инчунин фармондеҳони (роҳбарони, сардорони) дигар қӯшунҳо ва воҳидҳои ҳарбӣ муқаррар карда мешавад.

8. Гузаронидани ҷамъомадҳои ҳарбӣ аз рӯйи мақсад ва хусусият ҷудо карда мешаванд ба:

1) ҷамъомадҳои таълимӣ:

- дар ҳайати қисмҳои ҳарбӣ ва ҷузъу томҳо ба вазифаҳои ҳарбии штатие, ки дар онҳо шаҳрвандон таъин гардидаанд (номнавис шудаанд) барои гузаштани хизмати ҳарбӣ дар замони ҷанг (минбаъд - ҷамъомадҳои таълимии ҳайати номнависшудагон);

- оид ба омодагӣ ва азнавомодакунии шаҳрвандон аз рӯйи ихтисосҳои бақайдгирии ҳарбӣ;

- оид ба хизматрасонии аслиҳа ва техникаи ҳарбии захираи дахлнопазир (минбаъд - ЗД) бо омӯзиши яквақтаи он (минбаъд - ҷамъомадҳои таълимӣ оид ба хизматрасонии техникии ЗД).

2) ҷамъомадҳо оид ба санҷиши омодабошии сафарбарии қисмҳои ҳарбӣ, комиссариатҳои ҳарбии шаҳрҳо (ноҳияҳо), дигар қӯшунҳо ва воҳидҳои ҳарбӣ (минбаъд - ҷамъомадҳои санҷишӣ);

3) ҷамъомадҳои махсус бо дастури Президенти Ҷумҳурии Тоҷикистон, ки шаҳрвандон метавонанд ба онҳо ба муҳлати то ду моҳ бо мақсади амалисозии чорабиниҳо дар самти пешгирӣ, бартараф намудани ҳолатҳои фавқулода ва оқибатҳои он ё дар ҳолатҳои дигар даъват карда шаванд.

9. Ғайр аз ҷамъомадҳои таълимӣ ва санҷишӣ, мумкин аст машғулиятҳои тамринӣ оид ба омодасозии дастгоҳҳои тақвиятбахшандаи комиссариатҳои ҳарбии шаҳрҳо (ноҳияҳо), инчунин оид ба омодагии шаҳрвандоне, ки барои иҷрои корҳои аввалиндараҷа дар қисмҳои ҳарбӣ ҳангоми гузаронидани онҳо ба штатҳои замони ҷанг ва оид ба омодагии шаҳрвандон аз рӯйи ихтисосҳои бақайдгирии ҳарбӣ ва вазифаҳои ҳарбӣ ҷалб ва гузаронида шаванд. Гузаронидани ҷамъомадҳои ҳарбӣ ва машғулиятҳои тамринӣ ба дигар мақсадҳо роҳ дода намешаванд.

10. Шаҳрвандон ҷамъомадҳои ҳарбиро дар муҳлати зерин мегузаранд:

1) ҷамъомадҳои ҳарбии ҳайати номнависшудагон - то 10 рӯз;

2) ҷамъомадҳои ҳарбӣ оид ба омодагӣ ва азнавомодакунии шаҳрвандон аз рӯйи ихтисосҳои бақайдгирии ҳарбӣ - то 60 рӯз;

3) ҷамъомадҳои ҳарбӣ оид ба хизматрасонии техникии ЗД - то 25 рӯз;

4) ҷамъомадҳои санҷишӣ - то 10 рӯз;

5) ҷамъомадҳои махсус - то 60 рӯз.

11. Давомнокии машғулиятҳои тамринӣ набояд дар як шабонарӯз аз 8 соат зиёд бошад.

12. Оғози ҷамъомадҳои ҳарбӣ аз рӯзи ба имзо расидани фармоиши командири қисми ҳарбӣ оид ба дохил намудани шаҳрванд ба рӯйхати қисми ҳарбӣ ва таъин намудан ба вазифаи ҳарбӣ ҳисоб карда мешавад. Анҷоми ҷамъомадҳои ҳарбӣ рӯзи хориҷ гардидани он аз рӯйхати ҳайати шахсии қисми ҳарбӣ, вале на дертар аз рӯзи муҳлати анҷоми ҷамъомадҳои ҳарбӣ ҳисоб карда мешавад.

3. БАНАҚШАГИРИИ ҶАМЪОМАДҲОИ ҲАРБӢ

13. Банақшагирӣ ва гузаронидани ҷамъомадҳои ҳарбӣ ба зиммаи Вазорати мудофиа, дигар қӯшунҳо ва воҳидҳои ҳарбие, ки дар онҳо хизмати ҳарбӣ пешбинӣ гардидааст, вогузор карда мешавад.

14. Банақшагирии умумии ҷамъомадҳои ҳарбӣ дар Қувваҳои Мусаллаҳ аз тарафи Ситоди генералии Қувваҳои Мусаллаҳ дар асоси шумораи шаҳрвандони даъватшаванда ба ҷамъомади ҳарбӣ, ки ҳарсола аз ҷониби Президенти Ҷумҳурии Тоҷикистон муқаррар мегардад, амалӣ карда мешавад.

15. Вазорати мудофиаи Ҷумҳурии Тоҷикистон бо тартиби муайяншуда оид ба шумораи зарурии шаҳрвандон барои Қувваҳои Мусаллаҳ, дигар қӯшунҳо ва воҳидҳои ҳарбӣ барои даъват ба ҷамъомадҳои ҳарбӣ ба Ҳукумати Ҷумҳурии Тоҷикистон пешниҳодҳо манзур менамояд.

16. Пешниҳодҳои муқарраршуда ва муҳлати даъвати шаҳрвандон ба ҷамъомадҳои ҳарбӣ аз тарафи Ситоди генералии Қувваҳои Мусаллаҳ таҳия карда мешаванд, ки ҳамасола то 15 июл аз ҷониби сарситодҳои навъҳои Қувваҳои Мусаллаҳ, раёсатҳои Вазорати мудофиа, инчунин дигар қӯшунҳо ва воҳидҳои ҳарбӣ пешниҳод мегарданд.

17. Муҳлати гузаронидани ҷамъомадҳои таълимӣ, шумораи шаҳрвандоне, ки ба ҷамъомадҳои ҳарбӣ аз рӯйи ҳар як ихтисоси бақайдгирии ҳарбӣ бояд даъват карда шаванд, танҳо барои омодагии шаҳрвандон дар пойгоҳҳои таълимии марказонидашуда, (муассисаҳои таълимии давлатии ҳарбии таҳсилоти олии касбӣ, марказҳои таълимӣ, курсҳо ва ғайраҳо) навъҳои Қувваҳои Мусаллаҳ, раёсатҳои Вазорати мудофиа, инчунин дигар қӯшунҳо ва воҳидҳои ҳарбӣ нишон дода мешавад.

18. Омодагии афсарони эҳтиётӣ, инчунин омодагии шаҳрвандон дар пойгоҳҳои қисмҳои ҳарбие, ки дар тобеияти бевоситаи ситодҳо ва раёсатҳо қарор надоранд, ҷамъомадҳои ҳарбиро ба нақша мегиранд, бо раёсати кадрҳо ва таълимоти ҳарбии Вазорати мудофиа, сарситодҳои навъҳои Қувваҳои Мусаллаҳ, раёсатҳои Вазорати мудофиа, дигар қӯшунҳо ва воҳидҳои ҳарбӣ мувофиқа карда мешавад.

19. Ситодҳои воҳидҳо ва қисмҳои ҳарбӣ пешниҳодҳои худро оид ба банақшагирии омодагии шаҳрвандон барои соли оянда то 15 июн ба сарситодҳои дахлдори навъҳои Қувваҳои Мусаллаҳ, раёсатҳои Вазорати мудофиа, дигар қӯшунҳо ва воҳидҳои ҳарбӣ пешниҳод менамоянд.

20. Дар ин муҳлат раёсатҳо, шуъбаҳо, намуди қӯшунҳо ва хадамоти навъҳои Қувваҳои Мусаллаҳ, раёсати ақибгоҳи Вазорати мудофиа, инчунин воҳидҳо, қисмҳои ҳарбӣ ва муассисаҳои тобеи марказ пешниҳодҳо оид ба банақшагирии ҷамъомадҳои таълимиро барои соли оянда ба раёсатҳои Вазорати мудофиа (дигар қӯшунҳо ва воҳидҳои ҳарбӣ) аз рӯйи тобеият пешниҳод менамоянд, хадамоти қадрҳо бошанд, ба хадамоти қадрҳои навъҳои Қувваҳои Мусаллаҳ, Раёсати кадрҳо ва таълимоти ҳарбии Вазорати мудофиа (дигар қӯшунҳо ва воҳидҳои ҳарбӣ) оид ба банақшагирии омодагии афсарони эҳтиётӣ пешниҳод манзур менамоянд.

21. Ҳангоми банақшагирии ҷамъомадҳои таълимӣ дар қисмҳои ҳарбӣ ва муассисаҳои низомӣ, инчунин дар дигар қисмҳои ҳарбӣ ва муассисаҳо, ки дар онҳо шаҳрвандон дар ҷараёни гузаштани ҷамъомадҳо ба маълумоте, ки сирри давлатиро ташкил медиҳанд, иҷозат дода мешавад, дар пешниҳодҳо кадом шакли иҷозатро шаҳрвандони даъватшаванда ба ҷамъомадҳои ҳарбӣ ба ин қисмҳои ҳарбӣ дошта бошанд, нишон дода мешавад. Додани иҷозати шаҳрвандон ба маълумоти дорои сирри давлатӣ бо тартиби муқарраргардида амалӣ мешавад.

22. Пешниҳодҳо оид ба омодасозии мутахассисони разведка бо тартиби муқарраршуда ба мақомоти дахлдори Ситоди генералии Қувваҳои Мусаллаҳ, дигар қӯшунҳо ва воҳидҳои ҳарбӣ пешниҳод карда мешаванд.

23. Пешниҳодҳои худро сарситодҳои навъҳои Қувваҳои Мусаллаҳ ва раёсатҳои Вазорати мудофиа, дигар қӯшунҳо ва воҳидҳои ҳарбӣ бо дарназардошти таҳлили таклифҳои пешниҳоднамудаи раёсатҳо, шуъбаҳо, намуди қӯшунҳо ва хадамоти воҳидҳо, инчунин қисмҳои ҳарбӣ ва комиссариатҳои ҳарбии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ аз рӯйи тобеият таҳия менамоянд. Муҳлати манзур намудани пешниҳодҳо аз тарафи сардорони дахлдор муайян карда мешавад.

24. Асоси пешниҳодҳоро таҳлили сифати пуррагии қисмҳои ҳарбӣ бо шаҳрвандони омодакардашуда аз рӯйи ихтисосҳои бақайдгирии ҳарбӣ, дар маҳалҳои пуррагардонӣ ташкил медиҳад, ки дар муҳлати зерин аз ҷониби инҳо анҷом дода мешавад:

1) сарситодҳои навъҳои Қувваҳои Мусаллаҳ ва раёсатҳои Вазорати мудофиа, дигар қӯшунҳо ва воҳидҳои ҳарбӣ - як маротиба дар як сол ба ҳолати 1 январ;

2) ситодҳои воҳидҳо, қисмҳои ҳарбӣ ва комиссаритаҳои ҳарбӣ - ду маротиба дар як сол (ба ҳолатҳои 1 январ ва 1 июл).

25. Ҳангоми таҳлили мавҷудияти шаҳрвандоне, ки дорои ихтисосҳои бақайдгирии ҳарбӣ мебошанд:

1) дар сарситодҳои навъҳои Қувваҳои Мусаллаҳ, раёсатҳои Вазорати мудофиа, дигар қӯшунҳо ва воҳидҳои ҳарбӣ тавсифи сифатии пуррагии қӯшунҳо (қувваҳо), иҷрои нақшаи ҷамъбастии ҷамъкунии захираҳои сафарбарии инсонӣ, ки аз рӯйи ихтисосҳои бақайдгирии ҳарбӣ омода карда шудаанд ва имкониятҳои омода намудани шаҳрвандон аз рӯйи ихтисосҳои бақайдгирии ҳарбӣ дар пойгоҳи таълимии моддӣ-техникии марказонидашуда ба ҳисоб гирифта мешавад;

2) дар ситодҳо, раёсатҳо, шуъбаҳо ва хадамоти воҳидҳо (қисмҳои ҳарбӣ) тавсифи сифатии пуррагии қисмҳои ҳарбии (ҷузъу томҳои) тобеъ ва имкониятҳои омода намудани шаҳрвандон аз рӯйи ихтисосҳои бақайдгирии ҳарбӣ дар пойгоҳи таълимии моддӣтехникии худ ба ҳисоб гирифта мешавад;

3) дар комиссариатҳои ҳарбии шаҳрҳо (ноҳияҳо) сифати иҷрои супоришномаҳо ба даъват, маълумот оид ба нопуррагӣ аз рӯйи ихтисосҳои бақайдгирии ҳарбӣ ва вазифаҳои ҳарбӣ, мавҷудият, хароҷот ва боқимондаи захираҳои сафарбарии инсонӣ, ки дар қайди умумии ҳарбӣ мебошанд, ҳаракати онҳо (муҳоҷират, камшавии табиӣ ва ғайра), инчунин имконпазирии сарчашмаи ҷамъкунии онҳо (мувофиқи нақшаи ҷамъкунии захираҳои сафарбарии мардумии омодакардашуда аз рӯйи ихтисосҳои бақайдгирии ҳарбӣ, ки ҳамасола таҳия мегардад) ба ҳисоб гирифта мешавад.

26. Фармондеҳони навъҳои Қувваҳои Мусаллаҳ, сардорони раёсатҳои Вазорати мудофиа, инчунин фармондеҳони (роҳбарони, сардорони) дигар қӯшунҳо ва воҳидҳои ҳарбӣ дар асоси маҳдудиятҳои (лимитҳои) муқаррарнамудаи Ситоди генералии Қувваҳои Мусаллаҳ шумораи шаҳрвандонеро, ки бояд бо омодагӣ намудан дар ҷамъомадҳои ҳарбии воҳидҳои алоҳида ва қисмҳои ҳарбӣ фарогирӣ шаванд, муайян менамоянд. Дар асоси таклифҳои пешниҳодгардида аз рӯйи тобеияти қӯшунҳо (қувваҳо) шахсони мансабдори дар боло нишондодашуда инҳоро омода менамоянд:

1) нақшаҳои солонаи гузаронидани ҷамъомадҳои таълимӣ бо нишон додани қисмҳои ҳарбии мушаххас, шумораи шаҳрвандон аз рӯйи ихтисосҳои бақайдгирии ҳарбӣ даъватшаванда, муҳлати гузаронидани онҳо, инчунин чорабиниҳо оид ба таъминоти моддӣ, техникӣ ва молиявии ҷамъомадҳои ҳарбӣ, нигоҳдории сирри давлатӣ ва нақшаҳои ҷамъкунии шаҳрвандони аз рӯйи ихтисосҳои бақайдгирии ҳарбии омодакардашуда дар маҳалҳои пуррагардонии қӯшунҳо;

2) барномаҳои омодагӣ, тавсияномаи методӣ ва китобҳои дарсӣ оид ба масъалаҳои ташкил ва гузаронидани ҷамъомадҳои ҳарбӣ бо дарназардошти чорабиниҳо оид ба баланд бардоштани омодабошии ҷангӣ ва сафарбарии қӯшунҳо дар соли оянда.

27. Барои банақшагири таъминоти моддӣ ва молиявии ҷамъомадҳои ҳарбӣ шахсони мансабдори дахлдор ду маротиба дар як сол то 15 июл ва то 15 декабр ба Ситоди генералии Қувваҳои Мусаллаҳ, раёсати ақибгоҳ, раёсати молия ва буҷети Вазорати мудофиа, дигар қӯшунҳо ва воҳидҳои ҳарбӣ маълумот аз рӯйи воҳидҳо ва қисмҳои ҳарбӣ оид ба шумораи шаҳрвандони ҷалбшаванда ба ҷамъомадҳои ҳарбӣ ва муҳлати гузаронидани ҳамин ҷамъомадҳои ҳарбиро пешниҳод менамоянд.

28. Фармондеҳони навъҳои Қувваҳои Мусаллаҳ, фармондеҳони (роҳбарони, сардорони) дигар қӯшунҳо ва воҳидҳои ҳарбӣ, бо қабули дастури Ситоди генералии Қувваҳои Мусаллаҳ барои гузаронидани ҷамъомадҳои ҳарбӣ, фармоишҳоро ба қӯшунҳо барои гузаронидани ҷамъомадҳои ҳарбӣ бо нишондоди муайяни қисми ҳарбӣ, шумораи шаҳрвандони даъватшаванда аз рӯйи ихтисосҳои бақайдгирии ҳарбӣ, муҳлати гузаронидани ҷамъомадҳои ҳарбӣ, инчунин чорабиниҳо оид ба таъминоти моддӣ, техникӣ ва молиявии ҷамъомадҳои ҳарбӣ, тақсимоти майдонҳои таълимӣ ва тирпарронӣ, нигоҳдории сирри давлатиро таҳия менамоянд.

29. Нақшаи ҷамъбастшудаи омодагии шаҳрвандон ба ҷамъомадҳои ҳарбӣ барои гарнизони ҳарбӣ, ки ҳамаи навъҳои Қувваҳои Мусаллаҳ, қисмҳои ҳарбии тобеи маркази Вазорати мудофиа, дигар қӯшунҳо ва воҳидҳои ҳарбӣ, дар ҳудуди гарнизони ҳарбӣ ҷойгиршударо дар бар мегирад, ҳамасола ба 1 декабр ба Ситоди генералии Қувваҳои Мусаллаҳ пешниҳод менамоянд.

30. Дар ин муҳлат хадамоти кадрӣ нусха аз нақшаи ҷамъбастиро оид ба ҳамаи навъҳои Қувваҳои Мусаллаҳ, намудҳои қӯшунҳо ва хадамот дар робита бо омода намудани афсарони эҳтиётӣ ба раёсати кадрҳо ва таълимоти ҳарбии Вазорати мудофиа, инчунин ба хадамоти кадрии дигар қӯшунҳо ва воҳидҳои ҳарбӣ равона менамояд.

31. Супоришҳо ба комиссариатҳои ҳарбии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ барои даъвати шаҳрвандон ба ҷамъомадҳои ҳарбӣ ва машғулиятҳои тамринӣ барои ҳамаи навъҳои Қувваҳои Мусаллаҳ, инчунин дигар қӯшунҳо ва воҳидҳои ҳарбӣ аз тарафи Ситоди генералии Қувваҳои Мусаллаҳ равона карда мешавад.

32. Нусха аз нақшаи гузаронидани ҷамъомадҳои ҳарбӣ ва нақшаи таъминотӣ моддӣ, техникӣ ва молиявии ҳамин ҷамъомадҳои ҳарбӣ ба қисмҳои ҳарбӣ ва комиссариатҳои ҳарбӣ аз тарафи раёсатҳо ва шуъбаҳои дахлдори Вазорати мудофиа, инчунин дигар қӯшунҳо ва воҳидҳои ҳарбӣ аз рӯйи тобеият расонида мешавад.

33. Комиссарони ҳарбии Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳои тобеи ҷумҳурӣ ва шаҳру ноҳияҳо маълумот оид ба муҳлати даъвати шаҳрвандонро ба ҷамъомадҳои ҳарбии соли оянда ба мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳо, мақомоти худидоракунии шаҳрак ва деҳот ва роҳбарони ташкилотҳои дахлдор мерасонанд.

4. ДАЪВАТИ ШАҲРВАНДОН БА ҶАМЪОМАДҲОИ ҲАРБӢ

34. Мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳо, мақомоти худидоракунии шаҳрак ва деҳот уҳдадоранд:

1) огоҳонидан, даъват (таклиф намудан) ва ҳозиршавии шаҳрвандонро ба нуқтаҳои ҷамъшавии муқаррарнамудаи комиссариатҳои ҳарбии шаҳрҳо (ноҳияҳо) - ро сари вақт ташкил намоянд;

2) азназаргузаронии тиббии шаҳрвандони даъватшаванда, ки бояд ба ҷамъомадҳои ҳарбӣ даъват шаванд, сари вақт таъмин намоянд;

3) фиристодан ва ҳозиршавии шаҳрвандон ба маҳалли гузаронидани ҷамъомадҳои ҳарбӣ, инчунин пурра иҷро гардидани дархостҳои қисмҳои ҳарбиро сари вақт назорат намоянд;

4) ҷиҳати ба ҷамъомадҳои ҳарбӣ фиристодани шаҳрвандоне, ки ба талаботи муқарраршуда барои гузаштани хизмати ҳарбӣ ҷавобгӯ мебошанд, чораҳо андешанд.

35. Барои гузаронидани ҷамъомадҳои таълимӣ ва санҷишӣ даъвати шаҳрвандон ба ҷамъомадҳои ҳарбӣ гузаронида мешаванд.

36. Барои гузаронидани машғулиятҳои тамринӣ таклиф намудани шаҳрвандон ба комиссариати ҳарбии шаҳр (ноҳия) амалӣ карда мешаванд.

37. Ба ҷамъомадҳои ҳарбӣ мумкин аст шаҳрвандоне, ки ҳуқуқи ба таъхир гузоштани даъват ба сафарбариро надоранд, даъват карда шаванд.

38. Ба машғулиятҳои тамринӣ мумкин аст шаҳрвандоне, ки дар дастгоҳҳои тақвиятбахшандаи комиссариатҳои ҳарбии шаҳрҳо (ноҳияҳо) ҷалб карда мешаванд, инчунин ба ҳайати командаҳо оид ба иҷрои корҳои аввалиндараҷа дар қисмҳои ҳарбӣ дохилшуда ҳангоми гузаронидани онҳо ба штатҳои замони ҷанг, инчунин барои омодасозӣ аз рӯйи ихтисосҳои бақайдгирии ҳарбӣ ва вазифаҳои ҳарбӣ даъват карда шаванд.

39. Даъват ва фиристодани шаҳрвандон ба ҷамъомадҳои ҳарбӣ, инчунин таклиф намудани онҳо барои машғулиятҳои тамринӣ аз ҷониби комиссари ҳарбии шаҳр (ноҳия) бе тақсимоти ноҳиявӣ дар асоси супоришҳо, супоришномаҳо ва тибқи нақшаи гузаронидани ҷамъомадҳои ҳарбӣ ва рӯйхати (рақамӣ) номӣ ташкил ва гузаронида мешавад.

40. Озодкунии шаҳрвандон аз ҷамъомадҳои ҳарбӣ бо тартиби муқаррарнамудаи Қонуни Ҷумҳурии Тоҷикистон "Дар бораи уҳдадории ҳарбӣ ва хизмати ҳарбӣ" амалӣ карда мешавад.

41. Интихоби шаҳрвандонро барои даъват ба ҷамъомадҳои таълимӣ комиссариатҳои ҳарбии шаҳрҳо (ноҳияҳо) якҷо бо намояндагони қисмҳои ҳарбӣ, ки барои онҳо захираи инсонӣ омода карда мешаванд, мегузаронанд. Омӯзиши онҳо то даъват ба ҷамъомадҳои таълимии ҳайати номнависшудагон тибқи ҳуҷҷатҳои бақайдгирӣ бе таклиф намудан ба комиссариатҳои ҳарбии шаҳрҳо (ноҳияҳо) ва ба ҷамъомадҳои таълимӣ бошад, оид ба омодагии шаҳрвандон аз рӯйи ихтисосҳои бақайдгирии ҳарбӣ ва хизматрасонии техникии ЗД - бо даъват ба комиссариатҳои ҳарбии шаҳрҳо (ноҳияҳо) дар рӯзҳои гузаронидани азназаргузаронии тиббӣ гузаронида мешавад. Худи ҳамон рӯз рӯйхати номии шаҳрвандоне, ки аз комиссияи тиббии ҳарбӣ (тиббӣ - ҳавонавардӣ) гузаштаанд ва бо вазъи саломатӣ барои иштирок дар ҷамъомадҳои таълимӣ муносиб дониста шудаанд, тартиб дода мешавад ва аз тарафи комиссари ҳарбии шаҳр (ноҳия) бо имзо ва муҳри нишондор тасдиқ карда мешавад.

42. Дар асоси рӯйхатҳои номии шаҳрвандони интихобшуда барои гузаштани ҷамъомадҳои таълимӣ, даъватномаҳо бо нишондоди муҳлати ҳозиршавии онҳо ба комиссариати ҳарбии шаҳр (ноҳия) ё қисми ҳарбӣ навишта ва супорида мешавад.

43. Шумораи номзадҳои барои даъват ба ҷамъомадҳои таълимӣ интихобшуда бояд ташкили захираи заруриро, аммо на зиёда аз 25 фоиз аз супориши асосӣ таъмин намояд.

44. Дар давраи интихоб, шаҳрвандон мумкин аст барои аниқ кардани маълумоти бақайдгирӣ ва азназаргузаронии тиббӣ ба комиссариатҳои ҳарбии шаҳрҳо (ноҳияҳо) таклиф карда шаванд.

45. Аз рӯйи натиҷаи интихоб, қарори ниҳоӣ оид ба даъвати шаҳрвандон ба ҷамъомадҳои ҳарбиро комиссари ҳарбии шаҳр (ноҳия) қабул менамояд.

46. Барои даъват ба ҷамъомадҳои санҷишӣ ва махсус интихоби номзадҳо гузаронида намешавад.

47. Ба шаҳрвандоне, ки бояд ба ҷамъомадҳои таълимӣ ба қисмҳои ҳарбии таҳти низом ва дигар қисмҳои ҳарбӣ равона карда шаванд, дар он ҷо иҷозатномаи онҳо ба маълумоти сирри давлатидошта ба нақша гирифта шуда, бо тартиби муқарраршуда иҷозатнома ба расмият дароварда мешавад.

48. Маълумот оид ба мавҷудияти иҷозатнома ба ҳуҷҷатҳои бақайдгирии ҳарбии шаҳрвандон, ки барои дар ҷамъомадҳои ҳарбӣ иҷозат ба маълумоти дорои сирри давлатӣ асос мебошанд, ворид карда мешавад.

49. Фиристонидани шаҳрвандоне, ки бо шакли муқарраргардида иҷозатнома надоранд, ба ҷамъомадҳои ҳарбӣ ба қисмҳои ҳарбии таҳти низом ва дигар қисмҳои ҳарбӣ ба вазифаҳои мутахассисон, ки дар он ҷо онҳо бо маълумоти дорои сирри давлатӣ фаъолият менамоянд, қатъиян манъ мебошад.

50. Даъвати шаҳрвандон ба ҷамъомадҳои таълимӣ барои омодагӣ аз рӯйи ихтисосҳои разведкаи ҳарбӣ дар асоси рӯйхатҳои номии раёсатҳои дахлдори Вазорати мудофиа, дигар қӯшунҳо ва воҳидҳои ҳарбӣ аз ҷониби комиссариатҳои ҳарбии шаҳрҳо (ноҳияҳо) амалӣ карда мешаванд.

51. Даъвати шаҳрвандон ба ҷамъомадҳои ҳарбӣ дар қисму воҳидҳои Кумитаи давлатии амнияти миллӣ, қӯшунҳои дохилии Вазорати корҳои дохилии Ҷумҳурии Тоҷикистон тибқи рӯйхатҳои шахсӣ (дархостҳои рақамӣ), ки бо ин мақомот фиристонидашаванда ба комиссариатҳои ҳарбии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ як моҳ пеш то оғози ҷамъомадҳои ҳарбӣ, амалӣ карда мешавад.

52. Огоҳонидани шаҳрвандон оид ба даъват ба ҷамъомадҳои таълимӣ оид ба омодагии шаҳрвандон аз рӯйи ихтисосҳои бақайдгирии ҳарбӣ ва хизматрасонии техникии ЗД пешакӣ дар ҷараёни омӯзиш ва интихоби номзадҳо гузаронида мешавад. Ба шаҳрвандони интихобгардида барои гузаштани ин намуди ҷамъомадҳои таълимӣ на дертар аз 10 рӯз то оғози онҳо даъватномаҳо бо нишондоди муҳлати ҳозиршавӣ ба комиссариати ҳарбии шаҳр (ноҳия) дастрас карда мешавад.

53. Дар рӯзи ҳозир шудани шаҳрвандон ба комиссариати ҳарбии шаҳр (ноҳия) даъвати онҳо ба ҷамъомадҳои таълимӣ ва фиристодан ба қисмҳои ҳарбӣ гузаронида мешаванд.

54. Огоҳонидан, даъват ва фиристодани шаҳрвандон ба ҷамъомадҳои таълимии ҳайати номнависшудагон ва ба ҷамъомадҳои санҷишӣ дар қисмҳои ҳарбӣ тибқи тартиб ва муҳлати муқаррарнамудаи ҳуҷҷатҳои нақшаҳои гузаронидани ин қисмҳои ҳарбӣ аз замони осоишта ба замони ҷанг гузаронида мешавад.

55. Огоҳонидан, даъват ва фиристодани шаҳрвандон ба ҷамъомадҳои махсус тибқи Низомномаи мазкур ва дар муҳлати муқаррарнамудаи Ҳукумати Ҷумҳурии Тоҷикистон сурат мегирад.

56. Дар ҳолати бе сабабҳои узрнок ба ҷамъомадҳои ҳарбӣ ҳозир нагардидани шаҳрвандони алоҳида, комиссарони ҳарбии шаҳрҳо (ноҳияҳо) барои ҷустуҷӯ, даъват ва ҳозир шудан ба қисмҳои ҳарбӣ тамоми чораҳои заруриро меандешанд. Вобаста ба зарурат, барои ин мақсад мақомоти корҳои дохилӣ ҷалб карда мешаванд.

57. Комиссариатҳои ҳарбии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ (шаҳрҳо ва ноҳияҳо) роҳбарони корхонаҳоро оид ба даъвати шаҳрвандон ба ҷамъомадҳои ҳарбӣ огоҳ менамоянд. Дар огоҳиномаи ба роҳбари корхона фиристода, вақти ҷалби шаҳрвандон аз фаъолияти истеҳсолӣ вобаста ба даъвати онҳо ба ҷамъомадҳои ҳарбӣ бо дарназардошти муҳлати гузаштани ҷамъомадҳои ҳарбӣ, вақт барои роҳ аз маҳалли истиқомат (коргоҳҳо, таҳсил) то маҳалли гузаштани ҷамъомадҳои ҳарбӣ ва бозгашт, нишон дода мешавад.

58. Ба шаҳрвандони даъватшуда барои гузаштани ҷамъомадҳои таълимӣ оид ба омодагии шаҳрвандон аз рӯйи ихтисосҳои бақайдгирии ҳарбӣ ва хизматрасонии техникии ЗД, комиссариатҳои ҳарбии шаҳрҳо (ноҳияҳо) ба командирони қисмҳои ҳарбӣ равона менамоянд:

1) барои афсарҳои эҳтиётӣ - рӯйхати номӣ ва парвандаҳои шахсӣ;

2) барои прапоршикҳо, старшинаҳо, сержантҳо ва сарбозҳои эҳтиётӣ - рӯйхати номӣ;

3) барои ҳайати ҳавонавардӣ - рӯйхати номӣ, парвандаҳои шахсӣ, китобчаҳои ҳавонавардӣ ва тиббӣ.

59. Рӯйхати номӣ, китобчаҳои ҳавонавардӣ ва тиббӣ тариқи муҳрбандӣ ба сардори команда бо имзо супорида мешавад.

60. Шахсоне, ки китобчаҳои ҳавонавардӣ надоранд, даъват ба ҷамъомадҳои таълимӣ оид ба омодагии ҳайати ҳавонавардӣ, манъ аст.

61. Парвандаҳои шахсии афсарҳои эҳтиётӣ, ки боиси даъват ба ҷамъомадҳои таълимӣ оид ба омодагии шаҳрвандон аз рӯйи ихтисосҳои бақайдгирии ҳарбӣ ва оид ба хизматрасонии техникии ЗД мебошанд, тавассути почтаи махфӣ ирсол мегарданд ва ба қисмҳои ҳарбӣ ва муассисаҳои низомӣ бошад, тавассути почтаи махфӣ, инчунин рӯйхатҳои номӣ, китобчаҳои ҳавонавардӣ ва тиббӣ бо дарназардошти қабули онҳо дар қисмҳои ҳарбӣ на дертар аз ду рӯз қабл аз оғози ҷамъомадҳои таълимӣ ирсол мегарданд.

62. Ҳангоми гузаронидани ҷамъомадҳои таълимии ҳайати номнависшудагон ва ҷамъомадҳои санҷишӣ комиссариатҳои ҳарбии шаҳрҳо (ноҳияҳо) ҳуҷҷатҳои дар банди 58 Низомномаи мазкур номбаршударо, дар намуди муҳрбандӣ бо имзо ба сардори команда супорида шуда, ба командирони қисмҳои ҳарбӣ равона мекунанад.

63. Ба шаҳрвандоне, ки ба ҷамъомадҳои таълимӣ оид ба омодагӣ аз рӯйи ихтисосҳои бақайдгирии ҳарбӣ дар қисмҳои ҳарбии низоми махсусдошта, бо тартиби яккагӣ ё дар ҳайати командаҳо, ҳидоятномаҳо мувофиқи тартиби барои қисмҳои ҳарбии низомӣ ва муассисаҳо муқарраргашта дода мешаванд. Дар рӯйхатҳои номӣ, ки ба сардорони командаҳо дода мешавад, танҳо насаб, ном ва номи падари шахсоне, ки дар ҳайати командаҳо ба чамъомадҳои таълимӣ равона карда мешаванд, зикр мегарданд.

5. ТАЪМИНОТИ ТИББИИ ШАҲРВАНДОНИ ДАЪВАТШУДА БА ҶАМЪОМАДҲОИ ҲАРБӢ

64. Шаҳрвандони ба ҷамъомадҳои ҳарбӣ даъватшаванда тибқи тартиби пешбининамудаи Низомномаи ташхиси тиббӣ-ҳарбии Қувваҳои Мусаллаҳ, ки бо қарори Ҳукумати Ҷумҳурии Тоҷикистон аз 3 декабри соли 2012, № 695 тасдиқ гардидааст, инчунин Дастурамал оид ба тартиби гузаронидани ташхиси тиббӣ-ҳарбӣ дар Қувваҳои Мусаллаҳи Ҷумҳурии Тоҷикистон бояд аз азназаргузаронии тиббӣ гузаронида шаванд.

65. Хизматчиёни ҳарбӣ ва шаҳрвандоне, ки ба ҷамъомадҳои ҳарбӣ даъват шудаанд, ҳуқуқ ба кумаки тиббии ройгон, аз ҷумла ба тайёр ва таъмири қолабҳои дандонҳои сунъӣ (ба ғайр аз дандонҳои сунъии аз металлҳои қиматбаҳо дигар маводи қиматбаҳо), таъмини ройгони доруворӣ, дигар молу мулки тиббӣ тибқи дастурхати табибон дар воҳидҳо, қисмҳои ҳарбӣ ва муассисаҳои тиббӣ-ҳарбӣ (минбаъд - муассисаҳои тиббии ҳарбӣ) доранд. Дар мавриди набудани муассисаҳои тиббии ҳарбӣ ё шуъбаҳои дахлдори онҳо ё таҷҳизоти махсуси тиббӣ дар маҳалли адои хизмати ҳарбӣ ё маҳалли зисти хизматчиёни ҳарбӣ, ҳамчунин дар ҳолатҳои зарурӣ ёрии тиббӣ дар муассисаҳои низоми давлатии нигоҳдории тандурустӣ расонида мешавад. Хароҷоти муассисаҳои номбурда аз рӯйи кӯмаки тиббии ба хизматчиёни ҳарбӣ ва шаҳрвандони ба ҷамъомадҳои ҳарбӣ даъватшуда аз ҷониби Вазорати мудофиаи Ҷумҳурии Тоҷикистон (вазорату идораҳое, ки дар онҳо тибқи қонун хизмати ҳарбӣ пешбинӣ гардидааст) ҷуброн карда мешавад.

66. Ба ҷамъомадҳои таълимӣ оид ба омодагии шаҳрвандон аз рӯйи ихтисосҳои бақайдгирии ҳарбӣ, чун қоида шаҳрвандони гурӯҳҳои 1 ва 2, ки аз рӯйи вазъи саломатӣ ба хизмати ҳарбӣ дар навъҳои дахлдори Қувваҳои Мусаллаҳ, намуди қӯшунҳо ва дар вазифаҳои ҳарбии муайяншуда қобиланд, даъват карда мешаванд.

67. Ба ҷамъомадҳои таълимии ҳайати номнависшудагон оид ба хизматрасонии техникии ЗД, ҷамъомадҳои санҷишӣ ва машғулиятҳои тамринӣ шаҳрвандоне, ки бо комиссариатҳои ҳарбии шаҳрҳо (ноҳияҳо) ба командаҳо мувофиқи супоришномаҳо ба даъвати шаҳрвандон аз рӯйи сафарбарӣ номнавис шудаанд, равона карда мешаванд.

68. Ҳангоми даъват ба ҷамъомадҳои таълимии ҳайати номнависшудаи шаҳрвандоне, ки аз вазъи саломатии худ шикоят намудаанд, инчунин шахсоне, ки номзадҳои ба ҷамъомадҳои таълимии ҳайати номнависшудаи дар ҷузъу томҳои десантӣ, разведкавӣ, воҳидҳои таъиноти махсус, инчунин ба сифати ҳайати ҳавонаварди авиатсия интихоб шудаанд ва ба ҷамъомадҳои таълимӣ оид ба омодасозии шаҳрвандон аз рӯйи ихтисосҳои бақайдгирии ҳарбӣ тибқи Низомномаи ташхиси тиббӣ-ҳарбии Қувваҳои Мусаллаҳ, ки бо қарори Ҳукумати Ҷумҳурии Тоҷикистон аз 3 декабри соли 2012, № 695 тасдиқ гардидааст, бояд аз азназаргузаронии тиббӣ гузаронида шаванд.

69. Ба шаҳрвандоне, ки ба ҷамъомадҳои ҳарбӣ, ба вазифаҳои ҳарбии мутахассисони ғаввос, мутахассисони ғизодиҳии ҳарбӣ даъват карда мешаванд, аз рӯйи натиҷаҳои азназаргузаронии тиббӣ ҳуҷҷатҳои шакли муқарраршуда оид ба қобилият барои фаъолият кардан аз рӯйи ихтисосашон дода мешаванд. Ҳангоми зарурат дар қисмҳои ҳарбӣ азназаргузаронии тиббии шаҳрвандон мумкин аст, такроран гузаронида шавад.

70. Азназаргузаронии тиббии шаҳрвандон дар ҷойҳои зерин гузаронида мешавад:

1) дар нуқтаҳои ҷамъшавии комиссариатҳои ҳарбии шаҳрҳо (ноҳияҳо) - ҳангоми фиристодани онҳо тавассути нуқтаҳои ҷамъшавӣ;

2) дар комиссариатҳои ҳарбии шаҳрҳо (ноҳияҳо) - ҳангоми фиристодани онҳо тавассути комиссариати ҳарбии шаҳр (ноҳия);

3) ҳайати ҳавонаварди авиатсия аз ҷониби комиссияҳои тиббии ҳавонавардӣ азназаргузаронии тиббӣ гузаронида мешаванд.

71. Табибоне, ки фаъолияти азназаргузаронии тиббии шаҳрвандони даъватшавандаро ба ҷамъомадҳои ҳарбӣ роҳбарӣ менамоянд, дар асоси натиҷаи азназаргузаронии тиббӣ ба расмиятдарории протокол дар бораи қобил будани ин шаҳрвандон ба хизмати ҳарбӣ хулоса медиҳанд. Иқтибосҳо аз протокол бо нишон додани рақам, санаи азназаргузаронии тиббӣ ва хулоса ба парвандаҳои шахсии афсарони эҳтиётӣ гузошта мешавад ва ба рӯйхати номи прапоршикҳо, старшинаҳо, сержантҳо ва сарбозҳои эҳтиётӣ дар сутуни "Натиҷаҳои азназаргузаронии тиббӣ", дар бораи дараҷаи қобил будани онҳо ба хизмати ҳарбӣ қайдҳо гузаронида мешавад.

6. ТАШКИЛИ ГУЗАРОНИДАНИ ҶАМЪОМАДҲОИ ҲАРБӢ

72. Шаҳрвандони ба ҷамъомадҳои ҳарбӣ даъватгардида, уҳдадории хизмати ҳарбиро иҷро менамоянд.

73. Ҷойгиронии шаҳрвандон дар давраи ҷамъомадҳои ҳарбӣ дар нуқтаҳои ҷойгиршавии доимии қисмҳои ҳарбӣ, марказҳои таълимӣ ё дар қароргоҳҳо бо қарори фармондеҳони навъҳои Қувваҳои Мусаллаҳ, фармондеҳони (роҳбарони, сардорони) дигар қӯшунҳо, воҳидҳои ҳарбӣ ва командирони қисмҳои ҳарбӣ ташкил карда мешавад.

74. Шаҳрвандони ба ҷамъомадҳои ҳарбӣ даъватгардида дар вазъи казармавӣ нигоҳ дошта мешаванд. Мураххасии онҳо аз ҳудуди қисми ҳарбӣ аз ҷониби командирони ҷузъу томҳо (сардорони ҷамъомадҳо) бо тартиби муқаррарнамудаи командири қисми ҳарбӣ, мутобиқ ба талаботи Оинномаи хизмати дохилии Қувваҳои Мусаллаҳи Ҷумҳурии Тоҷикистон гузаронида мешавад.

75. Давомнокии муҳлати таълимӣ (машғулиятҳои таълимӣ) дар ҷамъомадҳои ҳарбӣ мувофиқи талаботи барномаҳои омодагии ҷангӣ ва махсус муқаррар карда мешавад.

76. Ҷараёни таълим бо шаҳрвандони ба ҷамъомадҳои ҳарбӣ даъватгардида, бо таъминот ва истифодабарии аслиҳа ва техникаи ҳарбии штатии қисмҳои ҳарбӣ, ки дар онҳо ҷамъомадҳои ҳарбӣ мегузаранд, ташкил карда мешавад.

77. Ба шаҳрвандони ба ҷамъомади ҳарбӣ даъватгардида, омӯзиш ва шиноснамоии намунаҳои нави аслиҳа ва техникаи ҳарбӣ, ки озмоиши қӯшуниро гузашта истодааст, манъ аст.

78. Истифодабарӣ аз номгӯйи аслии қисмҳои ҳарбӣ, рақамҳои почтаҳои саҳроии замони ҷанг, ки барои қисмҳои ҳарбии густаришёбанда ва ташаккулёбанда муқаррар шудааст, инчунин ҳуҷҷатҳои аслии нақшаи аз замони осоишта гузаронидан ба замони ҷанг ҳангоми баргузории ҷамъомадҳои ҳарбӣ, қатъиян манъ аст.

79. Дар давраи ҷамъомадҳои ҳарбӣ, қисмҳои ҳарбӣ дар ҳуҷҷатҳои расмӣ ва ҳангоми мукотиба танҳо бо номгӯйи шартии ба онҳо дар замони осоишта додашуда номбар карда мешаванд.

80. Қисмҳои ҳарбии ташаккулёбанда дар давраи ҷамъомадҳои ҳарбӣ бо рақамҳои рамзии шартии қисмҳои ҳарбии дар замони осоишта мавҷудбуда номгузорӣ карда мешаванд.

81. Шаҳрвандони ба ҷамъомадҳои ҳарбӣ даъватгардида, ки пеш савганди ҳарбиро қабул накардаанд, дар муҳлати панҷрӯза ба савганди ҳарбӣ омода карда мешаванд, ки дар ин бора командирони қисмҳои ҳарбӣ сабтҳои дахлдорро дар ҳуҷҷатҳои бақайдгирии ҳарбии шаҳрвандон мегузаронанд.

82. Ба шаҳрванде, ки санҷишҳоро бомуваффақият супоридааст, пас аз анҷоми ҷамъомадҳои ҳарбӣ, мувофиқи барномаҳои омодагии ҷангӣ ва махсус бо пешниҳоди шахсони вазифадор, ки ҷамъомадҳои ҳарбиро роҳбарӣ менамоянд, мумкин аст, рутбаи навбатии ҳарбӣ аз тарафи шахсони мансабдори дахлдор тибқи тартиби муқаррарнамудаи қонунгузорӣ дода шавад.

83. Барои қабули санҷишҳо бо фармоиши командири қисми ҳарбӣ комиссияи махсус аз ҳисоби афсарони омодагашта ва соҳибтаҷриба ташкил карда мешавад.

7. ҶАМЪОМАДҲОИ ҲАРБИИ ҲАЙАТИ НОМНАВИСШУДАГОН

84. Вазифаҳои асосии ҷамъомадҳои таълимии ҳайати номнависшудагон инҳоянд:

1) санҷиши воқеият ва муҳлати иҷрои чорабиниҳои алоҳидаи банақшагирифташудаи иҷрошаванда ҳангоми гузаронидани қисмҳои ҳарбӣ аз замони осоишта ба замони ҷанг;

2) омодагии мақомоти идоракунии қисмҳои ҳарбӣ ва ҷузъу томҳо ба амалиётҳои ҷангӣ дар шароити замони ҷанг;

3) такмилдиҳии омодабошии сафарбарии комиссариатҳои ҳарбии шаҳрҳо (ноҳияҳо);

4) такмили дониши ҳарбии шаҳрвандон, омодагии махсус ҳангоми иҷрои уҳдададории вазифавӣ, омӯзиши саҳроӣ, маҳорат ва малака дар истифодабарии аслиҳа ва техникаи ҳарбии штатӣ дар ҷанги ҳозиразамон;

5) такмили малакаи афсарони эҳтиётӣ дар роҳбарии ҳайати шахсӣ ҳангоми гузаронидани қисмҳои ҳарбӣ, ҷузъу томҳо ба штатҳои замони ҷанг ва ҳангоми омодагӣ ба иҷрои вазифаҳои ҷангӣ.

85. Барои гузаронидани ҷамъомадҳои таълимии ҳайати номнависшудагон қисман ва пурра гузаронидани қисмҳои ҳарбӣ аз замони осоишта ба замони ҷанг, ки аз тарафи Вазорати мудофиа тибқи фармони Президенти Ҷумҳурии Тоҷикистон аз рӯйи тобеият муқаррар мегардад, амалӣ карда мешавад.

86. Омодагии шаҳрвандон ба ҷамъомадҳои таълимии хайати номнависшудагон ба вазифаҳои ҳарбии штатии замони ҷанг дар ҳайати ҷузъу томҳо, қисмҳои ҳарбӣ гузаронида шуда, аз рӯйи барномаҳои таҳияшаванда аз ҷониби навъҳои Қувваҳои Мусаллаҳ ва раёсатҳои Вазорати мудофиа, дигар қӯшунҳо ва воҳидҳои ҳарбӣ амалӣ карда мешавад.

87. Даъват ва фиристодани шаҳрвандон ба ҷамъомадҳои таълимии ҳайати номнависшудагон аз тарафи комиссариати ҳарбии шаҳрҳо (ноҳияҳо) аз рӯйи ҳуҷҷатҳои махсуси таҳияшуда, мутобиқи ҳуҷҷатҳои банақшагирии сафарбарии тартибдода бе нишондоди истилоҳҳои сафарбарӣ амалӣ карда мешавад.

88. Равона намудани шаҳрвандон ба қисмҳои ҳарбӣ барои гузаштани намуди нишондодашудаи ҷамъомадҳои таълимӣ ва номнависшудагон ба ҳайати дигар қисмҳои ҳарбӣ (командаҳо), манъ аст.

89. Баъди баанҷомрасии ҷамъомадҳои таълимии ҳайати номнависшудагон мумкин аст санҷиши азхуднамоии уҳдадории вазифавӣ аз ҷониби шаҳрвандон аз рӯйи вазифаи ишғолнамуда дар давраи ҷамъомадҳои вазифаи ҳарбӣ (бо супоридани санҷиш), ки аз рӯйи натиҷаи он хулоса оид ба мувофиқи мақсад будани ба шаҳрвандон додани рутбаҳои навбатии эҳтиётӣ, дар бораи тағйирёбии рақамҳои (рамзҳои) ихтисосҳои бақайдгирии ҳарбӣ (вазифаҳои ҳарбӣ) дода мешавад, гузаронида шавад.

8. ҶАМЪОМАДҲОИ ТАЪЛИМӢ ОИД БА ОМОДАГӢ ВА АЗНАВОМОДАКУНИИ ШАҲРВАНДОН АЗ РцЙИ ИХТИСОСҲОИ БАҚАЙДГИРИИ ҲАРБӢ

90. Дар ҷамъомадҳои таълимӣ оид ба омодагӣ ва азнавомодакунии шаҳрвандон аз рӯйи ихтисосҳои бақайдгирии ҳарбӣ гузаронида мешавад:

1) омода намудани афсарҳои эҳтиётӣ ба вазифаҳои ҳарбии болоӣ;

2) омода намудани афсарҳои эҳтиётӣ аз ҳисоби прапоршикҳо, старшинаҳо, сержантҳо ва сарбозҳои эҳтиётӣ;

3) омодагӣ, азнавомодакунӣ ва такмили дониши ҳарбии шаҳрвандон, аз ҷумла дар намуди (тамғаи) нави аслиҳа ва техникаи ҳарбӣ;

4) омода намудани шаҳрвандон аз рӯйи ихтисосҳои бақайдгирии ҳарбӣ, ки пеш хизмати ҳарбиро нагузаштаанд.

91. Омодагӣ ва азнавомодакунии шаҳрвандон аз рӯйи ихтисосҳои бақайдгирии ҳарбӣ бо таври марказикунонидашуда дар марказҳои таълимӣ (ҷузъу томҳо), дар воҳидҳо ва қисмҳои ҳарбӣ, ки заминаи таълимии моддӣ-техникии зарурӣ доранд, дар назди муассисаҳои таълимии давлатии ҳарбии таҳсилоти миёна ва олии касбӣ мувофиқи барномаҳое, ки бо навъҳои Қувваҳои Мусаллаҳ ва раёсатҳои Вазорати мудофиа, инчунин дигар қӯшунҳо ва воҳидҳои ҳарбӣ таҳияшаванда, гузаронида мешавад.

92. Шаҳрвандоне, ки ба ҷамъомадҳои таълимӣ оид ба омодагӣ аз рӯйи ихтисосҳои бақайдгирии ҳарбӣ даъват шудаанд, бо ҳисоби ҳозиршавии онҳо ба қисмҳои ҳарбӣ ба маҳалли гузаштани ҷамъомадҳои таълимӣ як рӯз пеш то оғози машғулиятҳо фиристонида мешаванд.

93. Бо анҷоми ҷамъомадҳои таълимӣ, санҷишҳо (бо супоридани санҷишҳо) оид ба азхуднамоии барномаи маводи гузашта бо шаҳрвандон гузаронида шуда, хулоса дар бораи омодагии онҳо бароварда мешавад, ки дар асоси он ба онҳо мумкин аст, ки ихтисосҳои бақайдгирии ҳарбӣ, бо нишон додани ба кадом вазифа вай метавонад таъин гардад ва мувофиқи мақсад будани рутбаи навбатии ҳарбӣ (эҳтиётӣ) дода шавад.

94. Шаҳрвандони рутбаи ҳарбии афсарӣ надошта, вале бо муваффақият санҷишҳоро аз рӯйи барномаи омодагии афсарони эҳтиётӣ супорида, бо тартиби муайяншуда барои аз ҷониби вазири мудофиа сарфароз гардонидан бо рутбаи афсарӣ пешниҳод карда мешаванд.

95. Шаҳрвандоне, ки омодагиро дар вазифаҳои ҳарбии механикронандаи мошинҳои ҷангӣ ва махсус гузаштаанд, оид ба сохт, истифодабарӣ ва қоидаҳои ҳаракати роҳ ва дар амал рондан имтиҳон месупоранд. Ба шахсони имтиҳонҳоро бо муваффақият супорида бо тартиби муайяншуда шаҳодатнома дар бораи идоракунии мошинҳои ҷангӣ ва махсуси дахлдор дода мешавад.

9. ҶАМЪОМАДҲОИ ТАЪЛИМӢ ОИД БА ХИЗМАТРАСОНИИ ТЕХНИКИИ ЗД

96. Ҷамъомадҳои таълимӣ оид ба хизматрасонии техникии ЗД бо мақсади гузоштани онҳо ба нигоҳдории давомнок, амалӣ намудани батартибандозӣ ва дигар корҳо, инчунин азхуднамоии аслиҳа ва техникаи ҳарбии хизматрасонанда, такмилдиҳии малакаи амалии шаҳрвандон оид ба истифодабарӣ ва истифодаи ҷангии онҳо, гузаронида мешавад.

97. Дар ҷамъомадҳои зикршуда ба омодагии ҷангии шаҳрвандон на кам аз 25 фоиз вақти таълимӣ ҷудо карда мешавад.

98. Ҷамъомадҳои таълимӣ оид ба хизматрасонии техникии ЗД мувофиқи нақшаҳои қисмҳои ҳарбӣ оид ба азнавкунии молу мулки ЗД ва амалӣ намудани корҳои батартибдарории аслиҳа ва техникаи ҳарбӣ гузаронида мешавад.

99. Шаҳрвандони даъватшуда ба ҷамъомадҳои таълимӣ оид ба хизматрасонии техникии ЗД ба қисмҳои ҳарбӣ бо ҳисоби ҳозиршавии онҳо ба маҳалли гузаштани ҷамъомадҳои таълимӣ як рӯз пеш то оғози машғулиятҳо фиристонида мешаванд.

100. Ҷамъомадҳои санҷишӣ бо мақсади муайянкунии сатҳи омодабошии ҷангӣ ва сафарбарии қӯшунҳо (қувваҳо), комиссариатҳои ҳарбии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ (шаҳрҳо ва ноҳияҳо) гузаронида мешавад.

101. Барои гузаронидани ҷамъомадҳои санҷишӣ гузариши қисман ё пурраи воҳидҳои алоҳида, қисмҳои ҳарбӣ ва комиссариатҳои ҳарбии шаҳрҳо (ноҳияҳо) аз замони осоишта ба замони ҷанг бо даъвати шаҳрвандон аз эҳтиёт, ки ба ин воҳидҳои ҳарбӣ (воҳидҳо, қисмҳои ҳарбӣ ва комиссариатҳои ҳарбии шаҳрҳо (ноҳияҳо)) номнавис шудаанд, амалӣ мегардад.

102. Баъди ба штати замони ҷанг гузаронидан ва пуррагардонии қисмҳои ҳарбӣ, комиссариатҳои ҳарбии шаҳрҳо (ноҳияҳо) - ро бо ҳайати шахсиашон, ҷиҳати қобилиятнокии онҳо оид ба иҷрои вазифаҳои таъингардида таҳти санҷиш қарор медиҳанд.

103. Ҳуқуқи гузаронидани ҷамъомадҳои санҷишӣ ба вазири мудофиа ё бо супориши ӯ, ба сардори Ситоди генералии Қувваҳои Мусаллаҳ, инчунин фармондеҳони (роҳбарони, сардорони) дигар қӯшунҳо ва воҳидҳои ҳарбӣ дода мешавад.

104. Машғулиятҳои тамринӣ бо шаҳрвандон ин шакли иловагии омодагӣ ба хизмати ҳарбӣ мебошад. Онҳо ҷудо карда мешаванд ба:

1) машғулиятҳои тамринӣ оид ба омодасозии дастгоҳҳои пурзӯркунии комиссариатҳои ҳарбии шаҳрҳо (ноҳияҳо);

2) машғулиятҳои тамринӣ оид ба омодагии шаҳрвандоне, ки барои иҷрои корҳои аввалиндараҷа ба қисмҳои ҳарбӣ ҳангоми гузаронидани онҳо ба штатҳои замони ҷанг, ҷалб карда мешаванд;

3) машғулиятҳои тамринӣ оид ба омодагии шаҳрвандон аз рӯйи ихтисосҳои бақайдгирии ҳарбӣ ва вазифаҳои ҳарбӣ.

105. Машғулиятҳои тамринӣ оид ба омодасозии дастгоҳҳои тақвиятбахшандаи комиссариатҳои ҳарбии шаҳрҳо (ноҳияҳо) - ин шакли асосии омодагӣ ва такмили дониши уҳдадории шаҳрвандон мебошад, ки ба онҳо ҳангоми гузаронидани сафарбарӣ ва малакаи амалӣ оид ба таъмини корҳои комиссариатҳои ҳарбии шаҳрҳо (ноҳияҳо) ҳангоми сафарбарии захираҳои инсонӣ ва нақлиётӣ вогузор карда мешавад. Ҳайати шуморавӣ ва сифатии шаҳрвандоне, ки ба ин машғулиятҳои тамринӣ ҷалб карда мешаванд, инчунин вақти гузаронидани онҳо аз тарафи комиссари ҳарбии шаҳр (ноҳия) вобаста ба супориши сафарбарӣ, ки ба комиссариати ҳарбии шаҳр (ноҳия) вогузор гардидааст, мавҷудияти воситаҳои молиявӣ барои ин мақсадҳо муайян карда мешавад.

106. Машғулиятҳои тамринӣ оид ба омодагии шаҳрвандоне, ки барои иҷрои корҳои аввалиндараҷа ба қисмҳои ҳарбӣ ҳангоми гузаронидани онҳо ба штатҳои замони ҷанг ҷалб карда мешаванд, ин шакли асосии омодагӣ ва такмилдиҳии шаҳрвандон, уҳдадории вазифавӣ худ ва малакаи амалии онҳо аз рӯйи иҷрои корҳои аввалиндараҷа ҳангоми гузаронидани қисми ҳарбӣ ба штатҳои замони ҷанг мебошад.

107. Машғулиятҳои тамринӣ оид ба омодагии шаҳрвандон аз рӯйи ихтисосҳои бақайдгирии ҳарбӣ ва вазифаҳои ҳарбӣ ин яке аз шакли машғулиятҳо оид ба такмилдиҳии дониши шаҳрвандон оид ба уҳдадории вазифаҳои худ, маҳорат ва малакаи амалӣ аз рӯйи ихтисосҳои бақайдгирии ҳарбӣ ва вазифаҳои ҳарбӣ, ки қобилияти ҷангии ҷузъу томҳоро муайян намекунанд, мебошад.

108. Дар анҷомдиҳии машғулиятҳои тамринӣ азхуднамоии маводи гузашта бо шаҳрвандон санҷиш гузаронида шуда, дар бораи омодагии онҳо хулоса бароварда мешавад, инчунин дар ин бора оид ба кадом ихтисосҳои бақайдгирии ҳарбӣ ва вазифаҳои ҳарбӣ шаҳрвандон мумкин аст, таъин (номнавис) карда шаванд.

109. Машғулиятҳои тамринӣ бо сарситодҳои навъҳои Қувваҳои Мусаллаҳ, раёсатҳо, ситодҳои воҳидҳо ва қисмҳои ҳарбии Вазорати мудофиа, инчунин дигар қӯшунҳо ва воҳидҳои ҳарбӣ, ҳамчун як қисми алоҳида дар нақшаи гузаронидани ҷамъомадҳои ҳарбӣ барои соли оянда ба нақша гирифта мешавад.

110. Аз тарафи қисмҳои ҳарбӣ, дархостҳо барои таклиф намудани шаҳрвандон ба комиссариатҳои ҳарбии шаҳрҳои (ноҳияҳои) пуррагардонанда на дертар аз як моҳ пеш аз оғози онҳо пешниҳод карда мешаванд.

111.Барои гузаронидани машғулиятҳои тамринӣ бо мақомоти омодагии ҷангӣ барномаҳои махсус таҳия карда мешаванд.

112. Рӯйхати рақамҳои ихтисосҳои бақайдгирии ҳарбӣ ва рамзҳои вазифаҳои ҳарбие, ки пас аз машғулиятҳои тамринӣ тағйир додан (таъин кардан) мумкин аст, аз тарафи Ситоди генералии Қувваҳои Мусаллаҳ муайян карда мешавад.

10. УҲДАДОРИИ ШАХСОНИ МАСЪУЛ ВА МУТАСАДДӢ ОИД БА ТАШКИЛ ВА ГУЗАРОНИДАНИ ҶАМЪОМАДҲОИ ҲАРБӢ ВА ИҶРОИ НАЗОРАТИ ОНҲО

113. Ташкил ва гузаронидани ҷамъомадҳои ҳарбии шаҳрвандон бояд зери назорати доимии муовинони вазири мудофиа, фармондеҳони навъҳои Қувваҳои Мусаллаҳ, сардорони раёсатҳои Вазорати мудофиа, инчунин фармондеҳони (роҳбарони, сардорони) дигар қӯшунҳо ва воҳидҳои ҳарбӣ, командирони воҳидҳо, мақомоти кор бо ҳайати шахсӣ ва мақомоти кадрӣ бошад.

114. Шакли асосии назорат санҷиши ташкил ва рафти ҷамъомадҳои ҳарбӣ бевосита дар қисмҳои ҳарбӣ мебошад.

115. Бо ин мақсад навъҳои Қувваҳои Мусаллаҳ, раёсатҳои Вазорати мудофиа, дигар қӯшунҳо ва воҳидҳои ҳарбӣ, ситодҳо, намуди қӯшунҳо ва хадамоти воҳидҳо гузаронидани санҷишро бо муайян намудани кай ва аз ҷониби кӣ, дар давоми кадом муҳлат ва дар кадом қисмҳои ҳарбӣ онҳо ба нақша мегирад.

116. Ҳангоми санҷиши омодагии сафарбарӣ, ҷангӣ ва махсус, инчунин санҷиши инспексионии қӯшунҳо (қувваҳо) ташкил, гузаронидан ва банақшагирии ҷамъомадҳои ҳарбии шаҳрвандон бо тартиби ҳатмӣ санҷида шуда, натиҷаи санҷиш дар санадҳои дахлдор инъикос карда мешавад.

117. Ҷамъбасти ҳар як санҷиш бояд бо санад ё гузориши хаттии сардоре, ки санҷишро ба нақша гирифтааст, тартиб дода шавад. Ҳангоми ошкор гардидани камбудиҳои банақшагирӣ, ташкил ва гузаронидани ҷамъомадҳои ҳарбӣ, назорат барои ислоҳи камбудиҳои ошкоргардида ё санҷиши такрорӣ ташкил карда мешавад.

118. Ситодҳои воҳидҳо роҳбарии умумӣ ва назоратро нисбати банақшагирӣ, ташкил ва амалан гузаронидани ҷамъомадҳои ҳарбӣ бо шаҳрвандон амалӣ менамоянд. Онҳо барои пурра ва сифатнок иҷро гардидани нақшаҳои ҷамъомадҳои ҳарбӣ, таҳияи чорабиниҳо ва пешниҳодҳо оид ба такмилдиҳии ташкил ва гузаронидани ҷамъомадҳои ҳарбӣ масъул мебошанд.

119. Раёсати тайёрии ҷангии Вазорати мудофиа, мақомоти омодагии ҷангии навъҳои Қувваҳои Мусаллаҳ, инчунин дигар қӯшунҳо ва воҳидҳои ҳарбӣ ҷавобгарии пурраро бар зимма доранд барои инҳо:

1) ташкили омодагии ҷангӣ ва махсуси шаҳрвандон ҳангоми гузаронидани ҷамъомадҳои ҳарбӣ;

2) таҳлили сифат ва ҷамбасти натиҷаҳои омодагии ҷангӣ ва махсуси шаҳрвандон;

3) барои гузаронидани ҳамоҳангии ҷангии воҳидҳо, қисмҳои ҳарбӣ ва ҷузъу томҳо, таъмини қӯшунҳо (қувваҳо) бо барномаҳои омодагӣ барои дараҷаҳои мутахассисон ва пойгоҳи таълимии моддӣ-техникии дахлдор, инчунин ҷамъбаст ва паҳн кардани таҷрибаи пешқадами омодагии ҷангӣ ва махсус, таҳияи чорабиниҳо ва пешниҳодҳо оид ба такмили барномаҳои таълимии омодагии шаҳрвандон дар ҷамъомадҳои ҳарбӣ.

120. Барои санҷидани сифати гузаронидани машғулиятҳо ва расонидани кумаки зарурӣ ба командирон ва ситодҳои гузаронандаи ҷамъомадҳо метавонанд аз дигар қисмҳои ҳарбӣ бо фармоиши командирони (сардорони) дахлдор мутахассисони зарурӣ ҷалб карда шаванд.

121. Роҳбарии бевосита ва назорати гузаронидани ҷамъомадҳои таълимӣ ва машғулиятҳои тамриниро дар қисмҳои ҳарбии тобеъ командирони (сардорони) дахлдор амалӣ менамоянд.

122. Командирони қисмҳои ҳарбӣ масъуланд ба:

1) ташкил ва сифати тайёрии ҷангӣ, махсус ва ҷамъиятӣдавлатии шаҳрвандон;

2) ҳамоҳангии ҷангии ҷузъу томҳо;

3) сари вақт ва пурра таъмин намудани таъминоти моддӣ, техникӣ ва молиявии ҷамъомадҳои таълимӣ;

4) сифати интихоби шаҳрвандон ба ҷамъомадҳои ҳарбӣ;

5) ташкили қабул ва фиристодани шаҳрвандон аз ҷамъомадҳои ҳарбӣ ба маҳалҳои истиқомат (коргоҳҳо, таҳсилҳо);

6) пардохти саривақтии музди миёнаи меҳнат ба шаҳрвандон дар давраи гузаштани ҷамъомадҳои ҳарбӣ, инчунин хароҷоти сафарҳои хизматӣ дар вақти дар роҳ будан, маҳалли гузаронидани ҷамъомадҳо ва бозгашт;

7) ташкил ва таъмини нигоҳдории ҳуҷҷатҳои махфӣ, техникаи ҳарбӣ, аслиҳа ва дигар воситаҳои моддӣ;

8) ба шаҳрвандони ба ҷамъомадҳои ҳарбӣ ҳозиршуда сари вақт расонидани талабот оид ба нигоҳдории сирри давлатӣ, нигоҳдорӣ ва муносибат бо ҳуҷҷатҳои махфӣ, аслиҳа ва техникаи ҳарбӣ, тартиби гузаронидани мукотибаи шахсӣ;

9) таъмини чораҳои амниятӣ;

10) дурустии навиштаҷоти дохилкардашуда ба ҳуҷҷатҳои дахлдори ҳарбии бақайдгирии шаҳрвандон оид ба гузаштани ҷамъомадҳои ҳарбӣ ва машғулиятҳои тамринӣ.

123. Комиссарони ҳарбӣ Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ (шаҳрҳо ва ноҳияҳо) масъуланд ба:

1) омӯзиш ва сифати интихоби шаҳрвандони даъватшаванда ба ҷамъомадҳои ҳарбӣ;

2) сари вақт огоҳонидан, даъват, фиристодан ва ҳозиршавии шаҳрвандон ба маҳалли гузаронидани ҷамъомадҳои ҳарбӣ, иҷрои пурраи дархостҳои қисмҳои ҳарбӣ;

3) ба ҷамъомадҳои ҳарбӣ фиристодани шаҳрвандоне, ки ба талаботи муқарраршуда барои гузаштани хизмати ҳарбӣ ҷавобгӯ мебошанд;

4) ташкил ва сари вақт азназаргузаронии тиббии шаҳрвандони даъватшаванда ба ҷамъомадҳои ҳарбӣ;

5) дурустии маълумотномаҳои додашаванда аз рӯйи вақти ҳозиршавии аслии шаҳрвандон ба ҷамъомадҳои ҳарбӣ ва дохил намудани навиштаҷот дар ҳуҷҷатҳои бақайдгирии ҳарбӣ оид ба гузаштани ҷамъомадҳои ҳарбӣ, дар бораи тағйироти (додани) ихтисосҳои бақайдгирии ҳарбӣ (вазифаи ҳарбӣ).

124. Мувофиқи нақшаи солонаи гузаронидани ҷамъомадҳои таълимӣ ва машғулиятҳои тамринӣ командирони қисмҳои ҳарбӣ уҳдадоранд:

1) на дертар, аз як моҳ пеш аз оғози ҷамъомадҳои таълимӣ нақшаи гузаронидани ҷамъомадҳои таълимӣ бо ҳисоби соатҳо ва бо нишон додани мавзӯҳо аз рӯйи фанҳои омӯзишӣ барои ҳар ҳафта таҳия ва тасдиқ намоянд, сарфи мотозахираҳо, лавозимоти ҷангӣ ва дигар воситаҳои моддӣ-техникӣ, тартиби таъминоти молиявӣ, пас аз тасдиқ гардидани нақшаи гузаронидани ҷамъомадҳои таълимӣ аз ҷониби роҳбари болоӣ фармоиши ташкилотиро аз рӯйи гузаронидани ӯ нашр намоянд;

2) на дертар, аз як моҳ пеш аз оғози ҷамъомадҳои таълимӣ ба командирони (сардорони) дахлдор аз рӯйи тобеият дархостҳо дар бораи норасоии аслиҳа, техникаи ҳарбӣ, лавозимоти ҷангӣ ва дигар воситаҳои моддие, ки барои пурра таъмин намудани ҷамъомадҳои таълимӣ заруранд, пешниҳод намоянд, ба комиссариатҳои ҳарбии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ бошад - дархостҳо барои интихоби шаҳрвандон ва дар комиссариатҳои ҳарбии шаҳрҳои (ноҳияҳои) пуррагардонанда ташкил намудани интихоб ва омӯзиши шаҳрвандоне, ки ба ҷамъомадҳои таълимӣ ҷалб мешаванд, пешниҳод намоянд.

125. Дар ин муддат командирони қисмҳои ҳарбӣ барномаи методиро барои гузаронидани машқҳои гурӯҳӣ оид ба омодагии тактикӣ ва тактикӣ-махсус ва конспектҳои машғулиятҳоро тасдиқ намоянд.

126. Командирони қисмҳои ҳарбӣ дар як ҳафта то оғози ҷамъомадҳои таълимӣ, тибқи нақшаи омодагии ҷангӣ, ҷадвали машғулиятҳоро барои ҳафтаи якуми ҷамъомадҳои таълимӣ тартиб дода, тасдиқ намоянд.

127. Дар ҷамъомадҳои таълимӣ оид ба хизматрасонии техникии ЗД, ғайр аз ин, нақшаи хизматрасонии он таҳия карда мешавад.

1) дар се-панҷ рӯз то оғози ҷамъомадҳои таълимӣ бо хизматчиёни ҳарбии таъингардида барои омӯзиши шаҳрвандоне, ки ба ҷамъомадҳои ҳарбӣ ҷалб мегарданд, машғулиятҳои дастурӣметодӣ гузаронанд;

2) миқдори зарурии аслиҳа, техникаи ҳарбӣ, асбобҳои таълимӣ ва аёниро ҷудо намояд;

3) барои шаҳрвандон пешакӣ маҳалли ҷойгиршавӣ, миқдори зарурии либоси расмӣ, пойафзол ва дигар молу мулкро омода созад;

4) қабул ва нигаҳдории ашёи шахсии шаҳрвандони ба ҷамъомадҳои ҳарбӣ ҳозиршударо бо пешбинии ба онҳо додани квитансияи намунаи муқарраршуда ташкил намояд;

5) сари вақт ба ситодҳои болоӣ аз рӯйи тобеият маълумотро оид ба омодагӣ ва гузаронидани ҷамъомадҳои таълимӣ ва машғулиятҳои тамринӣ барои ҷамъоварӣ, ҷамъбаст ва таҳлили маълумот тибқи талаботи Низомномаи мазкур пешниҳод намояд.

128. Дар анҷоми ҷамъомадҳои ҳарбӣ ситодҳои қисмҳои ҳарбӣ уҳдадоранд:

1) барои афсарҳои эҳтиётӣ, ки ҷамъомадҳои таълимиро аз рӯйи ихтисосҳои бақайдгирии ҳарбӣ гузаштаанд, инчунин шаҳрвандоне, ки омӯзишро аз рӯйи барномаи омодагии афсарҳои эҳтиётӣ гузаштаанд, хислатнома тартиб дода, дар он дараҷаи азхуднамоии барномаи таълимии ҷамъомадҳои таълимӣ нишон дода, муносибат ба омӯзиши ихтисосҳои бақайдгирии ҳарбӣ ва нишондодҳои сифати ахлоқӣ ва корӣ, вазифаи ҳарбӣ, ки дар он метавонад шаҳрванд дар замони ҷанг таъин гардад, кадом аслиҳа ва техникаи ҳарбиро омӯхтааст, ихтисоси бақайдгирии ҳарбӣ, ки аз рӯйи он ӯ бояд ба қайд гирифта шавад (дар мавриде, ки агар шаҳрванд азнавомодакуниро аз рӯйи ихтисоси бақайдгирии ҳарбии нав гузаштааст) ва хулоса оид ба имконияти додани рутбаи навбатии (якуми) афсарӣ тибқи Қонуни Ҷумҳурии Тоҷикистон "Дар бораи уҳдадории ҳарбӣ ва хизмати ҳарбӣ" (шаҳрвандон бо хислатномаи тартиб додашуда бояд бо имзо шинос карда шуда бошанд);

2) сабт намудан оид ба гузаштани ҷамъомадҳои ҳарбӣ дар ҳуҷҷатҳои бақайдгирии ҳарбии шаҳрвандони дар эҳтиётбуда ва рутбаи ҳарбии афсарӣ доранд-дар парвандаи шахсӣ, дар варақаи хизматӣ ва билети ҳарбӣ бо нишондоди давомнокӣ ва намуди ҷамъомадҳои ҳарбӣ бо тасдиқоти имзои командир (сардори ситод) ва муҳри нишондори қисми ҳарбӣ;

3) барои прапоршикҳо, старшинаҳо, сержантҳо ва сарбозҳои эҳтиётӣ, ки ҷамъомадҳои таълимиро бомуваффақият гузаштаанд ва аз худ намудани омодагии зарурӣ дар вазифаҳои дахлдори ҳарбӣ (новобаста аз муҳлати ҷамъомадҳои ҳарбӣ), тартиб додани рӯйхатҳои номӣ бо нишондоди намуд ва давомнокии ҷамъомадҳои таълимӣ, рақамҳои (рамзҳои) ихтисосҳои бақайдгирии ҳарбӣ ва рамзҳои вазифаҳои ҳарбӣ, намуди аслиҳа ва техникаи ҳарбӣ, ки аз рӯйи ӯ мувофиқи мақсад қайд намудан ва истифодаи минбаъдаи ӯ, санаи савгандёдкунӣ шаҳрвандоне, ки пеш савганд ёд нанамуданд (дар қайди ҳарбӣ мебошанд, вале хизмати ҳарбиро нагузаштаанд) ва дар муҳлати даҳрӯза ин рӯйхатҳоро ба комиссариатҳои ҳарбии пуррагардонандаи шаҳрҳо (ноҳияҳо) равона намояд;

4) ба афсарҳо, старшинаҳо, сержантҳо ва сарбозҳои эҳтиётӣ, ки пас аз анҷоми ҷамъомадҳои таълимӣ санҷишҳоро бомуваффақият супоридаанд, мувофиқи барномаҳои омодагии ҷангӣ ва махсус сабт намудан оид ба имконияти додани рутбаи навбатии ҳарбӣ дар ҳуҷҷатҳои бақайдгирии ҳарбӣ: дар парвандаи шахсӣ, билети ҳарбӣ ва варақаи хизматии афсари эҳтиётӣ, дар билети ҳарбии прапорщикҳо, старшинаҳо, сержантҳо ва сарбозҳои эҳтиётӣ;

5) санҷиши мавҷудияти маводи махфӣ, аслиҳа ва техникаи ҳарбӣ, қисмҳои алоҳида, блокҳо ва ҷузъиёт ба онҳое, ки дар ҷамъомадҳо истифода шудаанд;

6) муташаккилона гузаронидани ҷойгирнамоии аслиҳа ва техникаи ҳарбӣ барои нигаҳдории дарозмуддат ва пур кардан дар ЗД воситаҳои моддӣ ба ҷойи сарфкардашуда дар давраи ҷамъомадҳои ҳарбӣ;

7) дар вазъи тантанавӣ муташаккилона гузаронидани равонагардонии шаҳрвандон аз қисмҳои ҳарбӣ ба маҳалли зисти истиқомат;

8) парвандаҳои шахсӣ ва хислатномаҳо ба афсарҳои эҳтиётӣ ва рӯйхатҳои номӣ ба прапорщикҳо, старшинаҳо, сержантҳо ва сарбозҳои эҳтиётӣ, ки ҷамъомадҳои ҳарбиро гузаштаанд, ба комиссариатҳои ҳарбии шаҳрҳо (ноҳияҳо) фиристодан дар муҳлати даҳрӯза аз рӯйи маҳалли бақайдгирии ҳарбии шаҳрвандон;

9) бо қабули варақаҳои номнависшуда аз комиссариатҳои ҳарбии шаҳрҳо (ноҳияҳо) барои шаҳрвандоне, ки ҷамъомадҳои ҳарбиро гузаштаанд, ворид намудан ба ҳуҷҷатҳои нақшаи пуррагардонӣ тағйироти дахлдор, аниқ намудани сифати пуррагии қисми ҳарбӣ.

129. Бо анҷоми ҷамъомадҳои ҳарбӣ комиссарони ҳарбии шаҳрҳо (ноҳияҳо) уҳдадоранд:

1) бо қабули рӯйхатҳои номӣ ва парвандаҳои шахсӣ номи шаҳрвандонеро, ки ҷамъомадҳои таълимӣ, машғулиятҳои тамриниро гузаштаанд ва омодагии заруриро аз худ намудаанд, дар муҳлати понздаҳрӯза ба рӯйхати воҳидҳои дахлдор ворид намоянд, хислатномаи сифатӣ ва натиҷаи беҳдошти пуррагии онҳоро аниқ намоянд. Ба ҳуҷҷатҳои бақайдгирии ҳарбӣ тағйироти заруриро дохил намуда, дар муҳлати як моҳ варақаҳои номнависшударо ба қисмҳои ҳарбии пуррашаванда ирсол намоянд;

2) ба шаҳрванде, ки бомуваффақият дар давраи ҷамъомадҳои таълимӣ, машғулиятҳои тамринӣ санҷишҳоро супоридааст ва дар қисми ҳарбӣ ба вазифае, ки тибқи штат рутбаи ҳарбии баробар ё баландтар нисбат ба рутбаи ҳарбии ба шаҳрванд додашуда пешбинӣ шудааст, номнавис гардидааст, рутбаи навбатии ҳарбӣ диҳад ё бо тартиби муқарраршуда ҳуҷҷатҳоро барои ба ӯ додани рутбаи ҳарбии навбатӣ тибқи қонунгузорӣ пешниҳод намояд;

- бо қабули рӯйхатҳои номӣ ва парвандаҳои шахсӣ ба шаҳрвандоне, ки ҷамъомадҳои санҷиширо гузаштаанд, дар муҳлати понздаҳрӯза ба ҳуҷҷатҳои бақайдгирии ҳарбӣ қайдҳои дахлдорро ворид намояд.

11. ТАЪМИНОТИ МОДДӢ ВА ТЕХНИКИИ ҶАМЪОМАДҲОИ ҲАРБӢ

130. Таъминоти ҷамъомадҳои таълимӣ оид ба омодагии шаҳрвандон аз рӯйи ихтисосҳои бақайдгирии ҳарбӣ, аз рӯйи хизматрасонии техникии ЗД ва машғулиятҳои тамринӣ бо аслиҳа, техникаи ҳарбӣ ва дигар воситаҳои моддӣ аз ҳисоби захираи таъминоти ҷории (таъминоти) қисмҳои ҳарбӣ, ки дар онҳо ҷамъомадҳои ҳарбӣ гузаронида мешаванд, амалӣ карда мешавад.

131. Норасоии аслиҳа, техникаи ҳарбӣ ва дигар воситаҳои моддӣ ва техникии қисмҳои ҳарбӣ бо фармоишҳои дахлдори раёсатҳои Вазорати мудофиа таъмин карда мешаванд.

132. Бо ин мақсадҳо муваққатан гирифтани ЗД-и аслиҳа, техникаи ҳарбӣ ва дигар воситаҳои моддӣ, инчунин аз нав пур кардани онҳо ба ЗД ва барқарорнамоии воситаҳои моддии сарфшуда дар давраи ҷамъомадҳои ҳарбӣ бо тартиби муқаррарнамудаи фармоиши вазири мудофиа, инчунин фармондеҳони (раисони, сардорони) дигар қӯшунҳо ва воҳидҳои ҳарбӣ гузаронида мешавад.

133. Барои таъмири аслиҳа, техникаи ҳарбӣ, омодагии онҳо барои нигаҳдории дарозмуддат ва пур кардан дар ЗД дар доираи муҳлати муқаррарнамудаи нақшаи ҷамъомадҳои таълимӣ, шаҳрвандони ҷамъомадҳои таълимиро гузаштаанд ва вобаста ба зарурат, қисмҳои ҳарбӣ ва ҷузъу томҳои таъмирӣ ҷалб карда мешаванд.

134. Сарфи моторесурсҳои (захираҳои) аслиҳа, техникаи ҳарбӣ ва дигар воситаҳои моддӣ барои таъмини ҷамъомадҳои таълимии ҳайати номнависшудагон бо қарори фармондеҳон, командирон ва сардорони дахлдор аз ҳисоби меъёрҳои ҳарсолаи истифодашаванда муқаррар карда мешавад.

135. Ҳангоми гузаронидани ҷамъомадҳои таълимӣ оид ба хизматрасонии техникии ЗД, сарфи захираҳо дар доираи меъёрҳои роҳгардии назоратӣ ва коркардгардида бо фармоиш ва дастурҳои дахлдори муқаррарнамуда амалӣ карда мешавад.

136. Таъмини баргузории ҷамъомадҳои ҳарбӣ бо лавозимоти ҷангӣ аз рӯйи меъёрҳои муқарраршуда амалӣ мегардад. Дархостҳо барои лавозимоти ҷангӣ ҳангоми зарурат аз тарафи қисмҳои ҳарбӣ ва муассисаҳои таълимии давлатии ҳарбии таҳсилоти миёна ва олии касбӣ ба раёсатҳои дахлдори Вазорати мудофиа пешниҳод карда мешавад.

137. Интиқол ва таъминот бо озуқаворӣ дар роҳи сафари шаҳрвандоне, ки ба ҷамъомадҳои ҳарбӣ даъват шудаанд, аз ҳисоби маблағҳои ба Вазорати мудофиа барои гузаронидани ҷамъомадҳои ҳарбӣ ҷудошуда амалӣ гардида, ба инҳо вогузор карда мешавад:

а) комиссариатҳои ҳарбии шаҳрҳо (ноҳияҳо) - аз нуқтаи ҷамъшавии маҳалли истиқомат то маҳалли ҷойгиршавии қисмҳои ҳарбие, ки ҷамъомадҳои ҳарбиро мегузаронанд;

б) нақлиёти автомобилӣ барои ин мақсадҳо аз тарафи корхонаҳо тибқи нақшаҳои (қарорҳои) мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳо, мақомоти худидоракунии шаҳрак ва деҳоти дахлдор ҷудо карда мешавад;

в) қисмҳои ҳарбӣ (баъд аз анҷоми ҷамъомадҳои ҳарбӣ) - аз маҳалли ҷойгиршавии қисмҳои ҳарбӣ то нуқтаи ҷамъшавӣ аз рӯйи маҳалли зисти шаҳрвандон.

138. Интиқоли шаҳрвандон ба ҷамъомадҳои ҳарбӣ ва бозгашт бояд тавассути роҳи оҳан, дар мавриди набудани он - бо нақлиёти автомобилӣ сурат гирад. Ҳангоми фиристодан ба ҷамъомадҳои ҳарбӣ, ки дар дигар гарнизонҳои ҳарбӣ гузаронида мешаванд, интиқол бо ҳавопаймо тибқи қарори вазири мудофиа сурат мегирад.

139. Дар мавриди набудани роҳи оҳан ва хатти роҳи мунтазами автобусҳо, хароҷоти роҳкиро ба маҳалли гузаронидани ҷамъомадҳои ҳарбӣ ва бозгашт ба ҷойи истиқомат ба шаҳрвандон аз ҳисоби маблағҳои Вазорати мудофиа дар ҳаҷми арзиши аслӣ, вале на зиёда аз тарифҳои ягона барои ҳамлу нақли автомобилӣ пардохт карда мешавад.

140. Ҳисоби шумораи шаҳрвандон дар команда, ҳангоми банақшагирии интиқоли онҳо бо қатораҳои мусофирбар вобаста аз шумораи ҷой дар вагонҳо сурат мегирад. Сардори командаи ҳарбӣ ва роҳбарони вагонҳо бо ҳисоби: сардори командаи ҳарбӣ - 1 нафар, роҳбарони вагонҳо - 2 нафар таъин карда мешаванд.

141. Сардори командаи ҳарбӣ аз ҳисоби афсарони комиссариати ҳарбии шаҳр (ноҳия) таъин карда мешавад. Роҳбарони вагонҳо аз ҳисоби шаҳрвандоне, ки дар ин командаҳо рафта истодаанд, таъин карда мешаванд. Сардори командаи ҳарбӣ дар роҳи сафар бо қоидаҳои аз рӯйи интиқоли қӯшунҳо тавассути роҳи оҳан ва ҳавоӣ, ки дар Вазорати мудофиа муқаррар гардидааст, амал менамояд.

142. Ҳангоми фиристодан, сардори командаи ҳарбӣ бояд варақаи хатсайри командаи ҳарбиро барои нишон додани он дар роҳи сафар ба коменданти ҳарбӣ дар роҳҳои алоқа қабул намояд. Ҳангоми ҳозиршавӣ варақаи хатсайр ба ситоди қисми ҳарбӣ (комиссариати ҳарбии шаҳр (ноҳия)) супорида мешавад.

143. Ба прапоршикҳо, старшинаҳо, сержантҳо ва сарбозҳои эҳтиётӣ, ки ба ҷамъомадҳои таълимӣ оид ба омодагии шаҳрвандон аз рӯйи ихтисосҳои бақайдгирии ҳарбӣ, барои омӯзиш аз рӯйи барномаҳои омодагии афсарони эҳтиётӣ даъват мешаванд, ба ҳама намуди таъминот аз рӯйи меъёрҳои муқарраргардида барои хизматчиёни ҳарбӣ, ки хизмати ҳарбиро тибқи даъват адо менамоянд, таъмин карда мешаванд.

144. Шаҳрвандоне, ки ба вазифаҳои пуррашавандаи афсарони эҳтиётӣ таъин гардидаанд, вале рутбаҳои ҳарбии афсарӣ надоранд, бо ҳама намуди таъминот дар роҳи сафар ва дар давраи гузаштани ҷамъомадҳои ҳарбӣ аз рӯйи меъёрҳои барои афсарони хурди эҳтиётӣ муқаррар карда шудааст, таъмин карда мешаванд ва маош аз рӯйи рутбаи ҳарбӣ бошад, бояд аз рӯйи рутбаҳои ҳарбии шахсии ба онҳо додашуда пардохт карда шавад.

12. ТАЪМИНОТИ МОЛИЯВИИ ҶАМЪОМАДҲОИ ҲАРБӢ

145. Ба уҳдадорони ҳарбиие, ки онҳо дар давраи иҷрои уҳдадории ҳарбӣ хизматчиёни ҳарбӣ намебошанд, бе расмиятдарории даъват (азназаргузаронии тиббӣ, омӯзиш ва ҷудо намудани номзадон барои гузаштани ҷамъомадҳои ҳарбӣ, машғулиятҳои машқӣ дар ҳайати дастаҳо оид ба иҷрои корҳои аввалиндараҷа) ҷойи кор (таълим) бо нигоҳ доштани пардохти музди миёнаи меҳнат (стипендия), хароҷоти сафар ҳангоми дар роҳ будан ва арзиши сафар аз ҳисоби маблағҳои буҷети давлатӣ нигоҳ дошта мешавад.

146. Пардохти музди миёнаи меҳнати уҳдадорони ҳарбӣ, ки онҳо аз фаъолияти меҳнатӣ барои иҷрои вазифаҳои ҳарбӣ ҷалб карда шудаанд, аз тарафи корхонаҳо (новобаста аз шакли моликият), ки дар он ҷо кор мекунанд, дар асоси маълумотномаи аз ҷониби комиссариати ҳарбии шаҳр (ноҳия) додашуда, оид ба вақти аслии дар комиссариати ҳарбии шаҳр (ноҳия) будани уҳдадорони ҳарбӣ, инчунин бо дарназардошти вақти дар роҳ будани онҳо, агар чорабинӣ бо баромад аз ҷойи истиқомат алоқаманд бошад, амалӣ карда мешавад.

147. Ба уҳдадорони ҳарбӣ, ки ба ҷамъомадҳо ҷалб карда мешаванд, вазифаи ишғолнамудаашон то тамоми давраи ҳаракат ба ҷойи гузаронидани ҷамъомадҳо ва бозгашт нигоҳ дошта шуда, музди миёнаи меҳнат, хӯрока ҳангоми дар роҳ будан тибқи меъёрҳое, ки барои хизматчиёни ҳарбии тибқи даъват адокунанда муқаррар карда шудаанд таъмин карда мешавад.

148. Назорат оид ба пурра ва сари вақт қонеъ гардонидани шаҳрвандон, ки ба ҷамъомадҳои ҳарбӣ даъват шудаанд, таъминоти пули муқарраршуда, инчунин оид ба дурустию эътимодбахшии аз ҷониби корхонаҳо додани маълумотнома доир ба музди миёна ё суратҳисобҳо, ки корхонаҳо барои пардохти маблағи музди миёнаи меҳнат пешниҳод менамоянд, ҳангоми гузаронидани санҷиш ва тафтиши (ревизияи) фаъолияти молиявӣ- хоҷагидорӣ амалӣ карда мешавад.

149. Бо мақсади муайян намудани дараҷаи тарифӣ барои шаҳрвандони дараҷаи нишондода, комиссариатҳои ҳарбии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ бо пешниҳоди комиссариатҳои ҳарбии шаҳрҳо (ноҳияҳо) на дертар аз ду моҳ аз оғози ҷамъомадҳои ҳарбӣ, аз ситодҳои қисмҳои ҳарбӣ маълумотро оид ба тарификатсияи вазифаҳои ҳарбии мутобиқ, ки минбаъд дар ҳуҷҷатҳои ҳамроҳикунандаи бо тартиби дар боло қайдгардида муқаррар шудааст, дархост менамоянд.

150. Шаҳрвандоне, ки дар вақти ҷамъомадҳои ҳарбӣ бемор шудаанд, маош оид ба вазифаи ҳарбӣ ва рутбаи ҳарбӣ, бояд дар вақти табобат қарор доштан ва дар роҳ аз ҷойи табобат то ҷойи гузаронидани ҷамъомад, инчунин хароҷоти сафарҳои хизматӣ аз ҷойи гузаронидани ҷамъомад то комиссариати ҳарбии шаҳрҳо (ноҳияҳо) пардохт карда мешавад.

151. Хароҷот оид ба таъмин ва гузаронидани ҷамъомадҳои ҳарбӣ бо шаҳрвандони Ҷумҳурии Тоҷикистон, ки дар эҳтиёт қарор доранд, аз ҳисоби маблағҷудокунии буҷети давлатии Ҷумҳурии Тоҷикистон амалӣ карда мешавад.

152. Банақшагирии молиявӣ, тақсимоти маблағҷудокунӣ, назорати фаврӣ оид ба истифодаи захираҳои молиявӣ тибқи моддаҳои сметаи хароҷотии Вазорати мудофиа, дигар қӯшунҳо ва ҷузъу томҳои ҳарбиро мақомоти ташкилӣ - сафарбарии навъҳои Қувваҳои Мусаллаҳ, дигар қӯшунҳо ва ҷузъу томҳои ҳарбӣ, бо иштироки бевоситаи мақомоти молиявӣ дар асоси аз ҷониби раёсати молия ва буҷети Вазорати мудофиа, дигар қӯшунҳо ва ҷузъу томҳои ҳарбӣ методикаи асосноккунии молиявӣ-иқтисодӣ, банақшагирии воситаҳои молиявӣ барои гузаронидани ҷамъомадҳои ҳарбӣ амалӣ менамоянд.

13. ҲИСОБОТДИҲӢ ОИД БА ҶАМЪОМАДҲОИ ҲАРБӢ

153. Аз рӯйи натиҷаи ҷамъомадҳои ҳарбӣ шахсони зерин ҳисоботҳо пешниҳод менамоянд:

1) командирони қисмҳои ҳарбӣ - ба ситодҳои воҳидҳо (аз рӯйи тобеият) гузориш оид ба натиҷаҳои ҷамъомадҳои ҳарбӣ дар муҳлати 15 рӯз баъд аз анҷомёбии ҷамъомадҳо;

2) командирони воҳидҳо - ба сарситодҳои дахлдори навъҳои Қувваҳои Мусаллаҳ, мақомоти дигар қӯшунҳо ва воҳидҳои ҳарбӣ ҳарсола 20 октябр ҳисобот дар бораи ҷамъбасти омодагии захираи сафарбарии инсонӣ аз рӯйи ихтисосҳои бақайдгирии ҳарбӣ ва ҷамъкунии онҳо;

3) комиссарони ҳарбии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ - ба раёсати ташкил ва сафарбарии Ситоди генералии Қувваҳои Мусаллаҳ, ҳарсола 20 октябр ҳисобот дар бораи ҷамъбасти омодагии захираи сафарбарии инсонӣ аз рӯйи ихтисосҳои бақайдгирии ҳарбӣ ва ҷамъкунии онҳо;

4) ситодҳои воҳидҳо, сардорони хадамот - ба сарситодҳои дахлдори навъҳои Қувваҳои Мусаллаҳ ва мақомоти дигар қӯшунҳо ва воҳидҳои ҳарбӣ ҳисобот дар бораи ҷамъбасти омодагӣ ва ҷамъкунӣ дар захира шаҳрвандони омодакардашуда аз рӯйи ихтисосҳои бақайдгирии ҳарбӣ ва маълумот барои навъҳои Қувваҳои Мусаллаҳ, ҳарсола 10 ноябр, то ин муҳлат бо раёсатҳои (шуъбаҳои) кадрҳои воҳидҳо ба раёсати кадрҳои Вазорати мудофиа ҳисобот пешниҳод карда мешавад, дар раёсат оид ба корҳои сиёсӣтарбиявии Вазорати мудофиа - аз рӯйи омодагии афсарони эҳтиётӣ оид ба кор бо ҳайати шахсӣ;

5) сарситодҳои навъҳои Қувваҳои Мусаллаҳ, раёсатҳои Вазорати мудофиа, инчунин дигар қӯшунҳо ва воҳидҳои ҳарбӣ - ба Ситоди генералии Қувваҳои Мусаллаҳ ҳисобот дар бораи ҷамъбасти омодагӣ ва ҷамъкунӣ дар захира шаҳрвандони омодакардашуда аз рӯйи ихтисосҳои бақайдгирии ҳарбӣ ва маълумоти пурра барои навъҳои Қувваҳои Мусаллаҳ, ҳарсола 1 декабр;

6) сарситодҳои навъҳои Қувваҳои Мусаллаҳ, раёсатҳои Вазорати мудофиа ва Ситоди генералии Қувваҳои Мусаллаҳ ҳармоҳа маълумот оид ба иҷрои нақшаи гузаронидани ҷамъомадҳои таълимӣ ва машғулиятҳои тамринии гузаронидашуда бо нишондоди намуди онҳо ва харҷи воситаҳои маблағӣ барои гузаронидани онҳо дар моҳи сипаригардида ва муҳлати аниқкардашудаи густаришёбии қисмҳои ҳарбӣ ба ҷамъомадҳои таълимии ҳайати номнависшуда барои моҳи навбатӣ - ба раёсати ташкил ва сафарбарии Ситоди генералии Қувваҳои Мусаллаҳ, санаи 25 ҳар моҳ.

14. ВАЗЪИ ҲУҚУҚИИ ШАҲРВАНДОН ВОБАСТА БА ГУЗАРОНИДАНИ ҶАМЪОМАДҲОИ ҲАРБӢ

154. Ба шаҳрвандоне, ки ба ҷамъомадҳои ҳарбӣ даъват шудаанд, вазъи ҳуқуқии хизматчии ҳарбӣ бо тартиби пешбининамудаи қонунгузорӣ ва санадҳои меъёрии ҳуқуқии Ҷумҳурии Тоҷикистон паҳн мегардад.

155. Хизматчиёни ҳарбӣ ва шаҳрвандони ба ҷамъомадҳои ҳарбӣ даъватшуда ҳатман аз ҳисоби маблағҳои Вазорати мудофиаи Ҷумҳурии Тоҷикистон (вазорату идораҳое, ки дар онҳо тибқи қонун хизмати ҳарбӣ пешбинӣ гардидааст), суғуртаи ҳатмии шахсии давлатӣ карда мешаванд. Асос, шароит ва тартиби суғуртаи ҳатмии шахсии давлатии хизматчиёни ҳарбию шаҳрвандони номбурдаро санадҳои меъёрии ҳуқуқии дахлдор муқаррар менамоянд.

156. Шаҳрвандони даъватшуда ба ҷамъомадҳои ҳарбӣ ҳангоми иҷрои уҳдадории хизмати ҳарбӣ ба ҳолатҳои фавт (марг), маъюбӣ, маҷруҳшавӣ, ҷароҳат, зарбхӯрӣ ё ба дигар бемории вазнин дар давраи гузаштани ҷамъомадҳои ҳарбӣ гирифтор шудаанд, тибқи Қонуни Ҷумҳурии Тоҷикистон "Дар бораи вазъи ҳуқуқии хизматчиёни ҳарбӣ" суғуртаи ҳатмии шахсии давлатӣ карда мешаванд.

157. Муҳлати гузаштани ҷамъомадҳои ҳарбӣ (аз рӯзи дохил то рӯзи хориҷ намудан аз рӯйхати ҳайати шахсии қисми ҳарбӣ) дар умум давомнокии хизмати ҳарбии шаҳрванд ҳисобида шуда, дар ин бора сабти дахлдор дар ҳуҷҷатҳои бақайдгирии ҳарбӣ бо имзои командир (сардори ситод) ва муҳри нишондори қисми ҳарбие, ки гузаронандаи ҷамъомади ҳарбӣ мебошад, тасдиқ карда мешавад.

158. Ҷалби шаҳрвандони ба ҷамъомадҳои ҳарбӣ даъватшуда, ба иҷрои дигар корҳо, ки барои гузаштани ҷамъомадҳои ҳарбӣ аз рӯйи уҳдадори алоқамандӣ надорад, аз ҷумла корҳои хоҷагидорӣ ва сохтмонӣ, манъ аст.

159. Шаҳрвандон барои иҷро накардани талаботи Низомномаи мазкур мувофиқи қонунгузории Ҷумҳурии Тоҷикистон ба ҷавобгарӣ кашида мешаванд.