Оинномаи Муассисаи давлатии қароргоҳи "Искандаркӯл"-и Дастгоҳи иҷроияи Президенти Ҷумҳурии Тоҷикистон

1. МУҚАРРАРОТИ УМУМӢ

1. Муассисаи давлатии қароргоҳи "Искандаркӯл"-и Дастгоҳи иҷроияи Президенти Ҷумҳурии Тоҷикистон (минбаъд - Қароргоҳ) тибқи қонунгузории Ҷумҳурии Тоҷикистон таъсис дода шудааст.

2. Муассиси Қароргоҳ Ҳукумати Ҷумҳурии Тоҷикистон (минбаъд - Муассис) мебошад.

3. Масъалаҳои ташкилию ҳуқуқии Қароргоҳ аз ҷониби Дастгоҳи иҷроияи Президенти Ҷумҳурии Тоҷикистон (минбаъд - Дастгоҳи Президент) ҳал карда мешаванд.

4. Қароргоҳ фаъолияташро мувофиқи Конститутсияи Ҷумҳурии Тоҷикистон, қонунгузории Ҷумҳурии Тоҷикистон, қарорҳои Муассис ва Оинномаи мазкур амалӣ менамояд.

5. Номи расмии Қароргоҳ:

- бо забони тоҷикӣ - муассисаи давлатии қароргоҳи "Искандаркӯл"-и Дастгоҳи иҷроияи Президенти Ҷумҳурии Тоҷикистон;

- бо забони русӣ - государственное учреждение резиденция "Искандаркул" Исполнительного аппарата Президента Республики Таджикистан;

- бо забони англисӣ - state institution residence "Iskandarkul" of the Executive Office of the President of the Republic of Tajikistan.

6. Суроғаи ҳуқуқии Қароргоҳ: Ҷумҳурии Тоҷикистон, ноҳияи Айнӣ, деҳоти Фон-дарё, Искандаркӯл.

2. МАҚОМИ ҲУҚУҚИИ ҚАРОРГОҲ

7. Қароргоҳ шахси ҳуқуқӣ буда, дорои муҳр бо тасвири Нишони давлатии Ҷумҳурии Тоҷикистон ва сабти номи худ, бланк ва штампҳои намунаи муқарраргардида мебошад ва аз суратҳисоби ягонаи Сарраёсати хазинадории Вазорати молияи Ҷумҳурии Тоҷикистон маблағгузорӣ карда мешавад.

8. Маблағгузории хароҷоти Қароргоҳ аз ҳисоби маблағҳои дар буҷети ҷумҳуриявӣ пешбинигардида, инчунин аз ҳисоби маблағҳои махсус тибқи тартиби бо Вазорати молияи Ҷумҳурии Тоҷикистон мувофиқагардида анҷом дода мешавад.

9. Қароргоҳ дар мувофиқа бо Дастгоҳи Президент дар асоси шартномаҳои тиҷоратӣ бо тартиби муқарраргардида ҳуқуқи истифодабарии қарзҳои бонкиро дорад.

10. Қароргоҳ дорои дигар ҳуқуқҳое мебошад, ки қонунгузории Ҷумҳурии Тоҷикистон барои муассисаҳо муайян кардааст.

3. МАҚСАД ВА САМТҲОИ ФАЪОЛИЯТИ ҚАРОРГОҲ

11. Мақсади асосии фаъолияти Қароргоҳ қабули Президенти Ҷумҳурии Тоҷикистон ва меҳмонони ӯ мебошад.

12. Қароргоҳ вазифаҳои зеринро иҷро менамояд:

- ба сатҳи байналмилалӣ бардоштани сатҳи хизматрасонӣ;

- ободонӣ ва кабудизоркунии ҳудуди Қароргоҳ;

- ташкили мавзеъҳои истироҳат.

13. Қароргоҳ метавонад тибқи тартиби муқарраргардида дар назди худ хоҷагии ёрирасони истеҳсолӣ ташкил намояд.

14. Бо ин мақсад Қароргоҳ чунин корҳоро анҷом дода метавонад:

- гузаронидани амалиёти содироту воридотӣ;

- ташкили фермаҳои чорводорӣ, асппарварӣ, қӯтоспарварӣ;

- истеҳсоли гӯшт, маҳсулоти гӯштӣ, ширӣ ва ташкили фурӯши он.

15. Қароргоҳ метавонад тибқи тартиби муқарраргардида ба фаъолияти даромаднок машғул шавад. Фоидаи бадастовардашуда тибқи тартиби муқарраргардида ба ихтиёри Қароргоҳ мегузарад ва он дар суратҳисоби махсус ба ҳисоб гирифта мешавад.

16. Қароргоҳ дар доираи мақсад ва вазифаҳо мувофиқи қонунгузории Ҷумҳурии Тоҷикистон ҳуқуқ дорад фаъолияти иқтисодии хориҷиро мустақилона амалӣ намояд.

17. Қароргоҳ дигар намудҳои фаъолиятеро, ки қонунгузории Ҷумҳурии Тоҷикистон манъ накардааст ва ба мақсадҳои оинномавиаш мутобиқат менамоянд, амалӣ менамояд.

4. МАҚОМОТИ ИДОРАКУНИИ ҚАРОРГОҲ

18. Идоракунии Қароргоҳ ба воситаи мақомоти зерин амалӣ карда мешавад:

- мақоми идоракунии Қароргоҳ - Дастгоҳи Президент;

- мақоми иҷроияи Қароргоҳ - маъмурият бо роҳбарии директори Қароргоҳ.

19. Мақоми идоракунии Қароргоҳ дорои ваколатҳои зерин мебошад:

- самтҳои асосии фаъолияти Қароргоҳро муайян менамояд;

- шумораи ниҳоии кормандони Қароргоҳро тасдиқ менамояд;

- фаъолияти Қароргоҳро назорат карда, бо асноди коргузорӣ, ҳисоботӣ ва ҳуҷҷатҳои дигар шинос мешавад;

- тавозуни муҳосибавии Қароргоҳро тасдиқ намуда, ҳисоботи солонаи хароҷоти молиявии фаъолияти онро назорат мекунад;

- дигар масъалаҳоеро, ки қонунгузории Ҷумҳурии Тоҷикистон ба ваколати мақоми идоракунии давлатии Қароргоҳ мансуб донистааст, ҳал менамояд.

20. Директор ҳамчун мақоми иҷроияи Қароргоҳ ба фаъолияти ҷории Қароргоҳ роҳбарӣ мекунад. Директори Қароргоҳ аз ҷониби Ҳукумати Ҷумҳурии Тоҷикистон ба вазифа таъин ва аз вазифа озод карда мешавад. Директори Қароргоҳ муовин ва сармуҳосиб дорад, ки бо пешниҳоди директори Қароргоҳ аз ҷониби Роҳбари Дастгоҳи Президент ба вазифа таъин ва аз вазифа озод карда мешаванд.

21. Директор дорои ваколатҳои зерин мебошад:

- бе ваколатнома аз номи Қароргоҳ амал мекунад, роҳбарии фаъолияти Қароргоҳро таъмин мекунад;

- амру супоришҳои Президенти Ҷумҳурии Тоҷикистон ва Роҳбари Дастгоҳи Президентро иҷро мекунад;

- молу мулки Қароргоҳро тибқи тартиби муқарраргардида ихтиёрдорӣ мекунад;

- тибқи тартиби муқарраргардида Қароргоҳро дар тамоми муассисаҳо ва ташкилотҳо дар ҳудуди Ҷумҳурии Тоҷикистон ва берун аз он намояндагӣ мекунад;

- ҳисоботи солона, тавозунҳои муҳосибавии Қароргоҳро ба Роҳбари Дастгоҳи Президент дар муҳлатҳои муқарраршуда пешниҳод мекунад;

- кормандони Қароргоҳро, ба истиснои муовини директор ва сармуҳосиби Қароргоҳ, тибқи тартиби муқарраргардида ба кор қабул ва аз кор озод менамояд, инчунин нисбат ба онҳо чораҳои ҳавасмандкунӣ ва интизомӣ меандешад;

- дорои дигар ҳуқуқҳое мебошад, ки ба қонунгузории Ҷумҳурии Тоҷикистон ва мақсадҳои оинномавии Қароргоҳ мухолифат намекунанд.

22. Назорати фаъолияти молиявию хоҷагидории Қароргоҳ тибқи қонунгузории Ҷумҳурии Тоҷикистон амалӣ карда мешавад.

23. Муовини директори Қароргоҳ дар сурати ҳозир набудани директори Қароргоҳ ваколатҳои ӯро амалӣ менамояд.

5. МОЛУ МУЛК ВА ВОСИТАҲОИ ҚАРОРГОҲ

24. Молу мулки Қароргоҳ аз фондҳои асосӣ ва воситаҳои гардон, инчунин арзишҳои дигар, ки нархи онҳо дар тавозуни Қароргоҳ нишон дода шудааст, иборат мебошад. Молу мулки Қароргоҳ моликияти давлатӣ буда, ба Қароргоҳ бо ҳуқуқи идораи оперативӣ тааллуқ дорад. Қароргоҳ ба молу мулки дар ихтиёраш гузошташуда мутобиқи мақсади фаъолияти худдар доираи муайяннамудаи қонунгузорӣ ҳуқуқи ихтиёрдориро дорад.

25. Манбаъҳои ташкил ёфтани молу мулки Қароргоҳ:

- молу мулке, ки Муассис бо ҳуқуқи идораи оперативӣ вобаста намудааст;

- пардохтҳои пулӣ ва моддии Муассис;

- даромадҳое, ки аз хизматрасонии Қароргоҳ ба даст омадаанд;

- қарзҳои бонкӣ ва намудҳои дигари маблағгузорӣ;

- пардохтҳои бебозгашт ва хайрияи шахсони воқеӣ ва ҳуқуқӣ;

- дигар сарчашмаҳое, ки қонунгузории Ҷумҳурии Тоҷикистон манъ накардааст.

26. Қароргоҳ дар назди мақомоти давлатӣ мустақилона ҳисобот медиҳад, аз ҷумла оид ба супоридани андозҳо, омор ва ғайра.

27. Қароргоҳ воситаҳои пулии худро дар суратҳисоби ташкилотҳои қарзӣ нигоҳ медорад ва нисбати онҳо ҳама гуна амалиёти бонкиро мувофиқи қонунгузорӣ иҷро менамояд.

6. АЗНАВТАШКИЛДИҲӢ ВА БАРҲАМДИҲИИ ҚАРОРГОҲ

28. Азнавташкилдиҳӣ ва барҳамдиҳии Қароргоҳ бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.