Низомномаи Шӯрои амнияти озуқавории Ҷумҳурии Тоҷикистон

1. МУҚАРРАРОТИ УМУМӢ

1. Шӯрои амнияти озуқавории Ҷумҳурии Тоҷикистон (минбаъд - Шӯро) мақоми байниидоравии машваратие мебошад, ки бо мақсади ҳамоҳангсозии идоракунӣ ва қабули қарорҳои стратегӣ ва фаврӣ вобаста ба таъмини муътадил ва мунтазами кишвар бо озуқаворӣ таъсис дода шудааст.

2. Ба ҳайати Шӯро намояндагони вазорату идораҳое, ки ба танзимдарорӣ ва таъмини амнияти озуқаворӣ иштирок мекунанд, дохил мешаванд.

3. Шӯро дар фаъолияти худ Конститутсияи Ҷумҳурии Тоҷикистон, Қонуни Ҷумҳурии Тоҷикистон "Дар бораи амнияти озуқаворӣ", дигар санадҳои меъёрии ҳуқуқии Ҷумҳурии Тоҷикистон, инчунин Низомномаи Шӯрои амнияти озуқавории Ҷумҳурии Тоҷикистон (минбаъд - Низомнома)-ро ба роҳбарӣ мегирад.

2. ВАЗИФАҲОИ АСОСИИ ШӯРО

4. Вазифаҳои асосии Шӯро аз инҳо иборатанд:

- таъмини ҳамкории байниидоравии байни вазорату идораҳо ва ташкилотҳои дахлдор оид ба масъалаҳои амнияти озуқаворӣ ва ҳамоҳангсозии фаъолияти мақомоти давлатӣ дар масъалаҳои амнияти озуқаворӣ;

- таҳлили рушди комплекси агросаноатӣ, инчунин вазъи бозори дохилӣ ва берунии маҳсулоти ашёи хоми кишоварзӣ вобаста ба амнияти озуқаворӣ;

- таҳияи стратегия ва усулҳои таъмини сиёсати аграрии Ҷумҳурии Тоҷикистон барои таъмини амнияти озуқаворӣ;

- амалигардонии стратегияву барномаҳо оид ба таъмини амнияти озуқаворӣ;

- омода сохтани чорабиниҳои фаврӣ оид ба бартараф сохтани хатари буҳрони озуқаворӣ ва ҳолатҳои фавқулода оид ба амнияти озуқаворӣ;

- пешниҳоди таҳлилҳо оид ба беҳбудии таъмини амнияти озуқаворӣ тавассути ислоҳоти мавҷуда, ҷамъоварӣ ва таҳлили маълумот оид ба фаъолияти системаи таъмини амнияти озуқаворӣ, пешниҳоди тавсияҳо оид ба такмили онҳо;

- таҳлили иттилоот дар бораи вазъи таъминоти озуқаворӣ дар ҷаҳон дар муқоиса бо таъмини озуқавории кишвар;

- омода намудани тавсияву пешниҳодҳо ба Президенти Ҷумҳурии Тоҷикистон ва Ҳукумати Ҷумҳурии Тоҷикистон барои таъмини истеъмоли меъёри физиологии озуқаворӣ аз ҷониби шаҳрвандон, инчунин таҳлил ва ҷамъбасти маълумот дар бораи ҳолати амнияти озуқавории Ҷумҳурии Тоҷикистон;

- назорати амалигардонии фармону амрҳои Президенти Ҷумҳурии Тоҷикистон, санадҳои меъёрии ҳуқуқии Ҳукумати Ҷумҳурии Тоҷикистон, қарорҳои Шӯро оид ба таъмини амнияти озуқаворӣ, бартараф намудани камбудиҳои ошкоргардида, муайян намудани сабабҳои онҳо ва андешидани чораҳои зарурӣ мутобиқи ҳолатҳои бамиёномада;

- баррасии масъалаҳои муҳимми дигари марбут ба сиёсати давлатии амнияти озуқавории Ҷумҳурии Тоҷикистон.

3. ҲУҚУҚУ УҲДАДОРИҲОИ ШӯРО

5. Шӯро ҳангоми амалӣ намудани фаъолияти худ ҳуқуқ дорад:

- фаъолияти вазорату идораҳо ва ташкилотҳоро оид ба масъалаҳои таъмини амнияти озуқаворӣ ҳамоҳанг созад;

- бо тартиби муқаррарнамудаи санадҳои меъери ҳуқуқӣ мавод ва иттилооти барои иҷрои вазифаҳои Шӯро заруриро аз вазорату идораҳои дахлдори ҷумҳурӣ, мақомоти иҷроияи маҳаллии ҳокимияти давлатӣ ва ташкилотҳои дигар дархост намояд;

- ҷиҳати иштирок дар ҷаласаҳои Шӯро намояндагони вазорату идораҳои дахлдор, мақомоти иҷроияи маҳаллии ҳокимияти давлатӣ, иттиҳодияҳои ҷамъиятӣ, ташкилотҳои илмӣ ва дигар ташкилотҳоро даъват намояд;

- барои иҷрои вазифаҳои Шӯро гурӯҳҳои кории байниидоравӣ ва комиссияҳо таъсис диҳад ё коршиносони мустақилро ҷалб намояд;

- иштироки намояндаи худро дар конференсия ва семинарҳои миллӣ ва байналмилалӣ оид ба таъмини амнияти озуқаворӣ таъмин намояд.

6. Уҳдадориҳои Шӯро:

- ҳамоҳангсозӣ ва мониторинги раванди амалисозии сиёсати давлатӣ оид ба таъмини амнияти озуқавории Ҷумҳурии Тоҷикистон;

- ҷамъоварӣ, ҷамъбаст ва таҳлили таклифу пешниҳодоти вазорату идораҳои дахлдори Ҷумҳурии Тоҷикистон, мақомоти иҷроияи маҳаллии ҳокимияти давлатӣ ва дигар ташкилотҳо оид ба масъалаҳои таъмини амнияти озуқаворӣ;

- тасдиқи нақшаи кори ҳарсолаи Шӯро;

- пешниҳоди ҳисобот ба Ҳукумати Ҷумҳурии Тоҷикистон дар бораи натиҷаҳои фаъолияти Шӯро дар самти таъмини амнияти озуқаворӣ.

4. ҲАЙАТИ ШӯРО ВА ҲУҚУҚУ УҲДАДОРИҲОИ ОНҲО

7. Ба ҳайати Шӯро раис, муовини раис, котиб ва аъзои Шӯро аз ҳисоби намояндагони мақомоти ҳокимияти давлатӣ аз рӯйи мансаб дохил мегарданд. Дар кори Шӯро метавонанд намояндагони созмонҳои байналмилалӣ, бахши хусусӣ ва ҷомеаи шаҳрвандӣ иштирок намоянд.

8. Раиси Шӯро:

- фаъолияти Шӯроро ҳамоҳанг месозад;

- ҷаласаҳои Шӯроро даъват мекунад ва мегузаронад;

- нақшаи кори Шӯроро тасдиқ мекунад;

- протоколҳои ҷаласаҳои Шӯро ва дигар ҳуҷҷатҳои заруриро барои иҷро имзо мекунад;

- уҳдадориҳои аъзои Шӯроро муайян мекунад;

- тибқи тартиби муқарраргардида аз вазорату идораҳо, мақомоти иҷроияи маҳаллии ҳокимияти давлатӣ ва ташкилотҳои дигар мавод ва иттилооти заруриро оид ба масъалаҳое, ки ба вазифаҳои Шӯро мансубанд, талаб мекунад;

- ҷиҳати иҷрои қарорҳои Шӯро ба вазорату идораҳои дахлдор, мақомоти иҷроияи маҳаллии ҳокимияти давлатӣ ва дигар ташкилотҳо таклифу супориш медиҳад;

- ҳисоботи аъзои Шӯро, намояндагони вазорату идораҳо ва мақомоти иҷроияи маҳаллии ҳокимияти давлатиро мешунавад;

- дигар ваколатҳои ба фаъолияти Шӯро дахлдоштаро амалӣ менамояд.

9. Муовини раиси Шӯро:

- уҳдадориҳои раиси Шӯроро дар вақти набудани ӯ иҷро менамояд;

- дигар супоришҳои раиси Шӯроро иҷро мекунад.

10. Котиби Шӯро:

- коргузории Шӯроро таъмин менамояд;

- муроҷиатҳо ва дигар ҳуҷҷатҳои ба Шӯро воридшударо омода ва ҷамъбаст карда, ба раиси Шӯро пешниҳод менамояд;

- якҷо бо аъзои Шӯро ҳуҷҷатҳои заруриро оид ба масъалаҳои баррасишаванда таҳия карда, лоиҳаи қарорҳоро ба раис ва аъзои Шӯро пешниҳод менамояд;

- протоколҳои ҷаласаҳо ва қарорҳои Шӯроро омода сохта, пас аз тасдиқ ҷиҳати чораандешӣ оид ба иҷрои онҳо ба вазорату идораҳои дахлдор, мақомоти иҷроияи маҳаллии ҳокимияти давлатӣ ва дигар ташкилотҳо пешниҳод менамояд;

- супоришҳои раиси Шӯро ва дигар вазифаҳоро вобаста ба фаъолияти Шӯро тибқи санадҳои меъёрии ҳуқуқии Ҷумҳурии Тоҷикистон иҷро менамояд.

11. Аъзои Шӯро:

- дар ҷаласаҳои Шӯро иштирок менамоянд;

- таклифҳои мушаххасро барои ворид намудан ба нақшаи кор ва рӯзномаи ҷаласаҳои Шӯро манзур менамоянд;

- мавод ва лоиҳаҳои қарорҳоро ба ҷаласаҳои Шӯро омода менамоянд;

- дар бораи кори анҷомдодаи вазорату идораҳо ё ташкилотҳое, ки онро намояндагӣ мекунанд, ҳисобот пешниҳод менамоянд;

- иттилооти заруриро бо дархости раиси Шӯро ё муовини ӯ пешниҳод мекунанд.

5. ТАШКИЛИ ФАЪОЛИЯТИ ШӯРО

12. Шакли фаъолияти Шӯро ҷаласаҳои он мебошад, ки дар як сол на камтар аз ду маротиба гузаронида мешаванд.

13. Дар мавриди зарурат метавонанд ҷаласаҳои ғайринавбатии Шӯро доир гарданд. Ҷаласаҳои ғайринавбатии Шӯро метавонанд дар асоси супориши Ҳукумати Ҷумҳурии Тоҷикистон ё бо ташаббуси раиси Шӯро, инчунин муовини раиси Шӯро гузаронида шаванд.

14. Рӯзномаи ҷаласа ва маводи баррасишаванда ба аъзои Шӯро на дертар аз се рӯз пеш аз оғози ҷаласа дастрас карда мешаванд.

15. Раисӣ дар ҷаласаҳои Шӯро аз ҷониби раиси Шӯро анҷом дода мешавад ва дар сурати ҳузур надоштани ӯ, раисӣ аз ҷониби муовини раиси Шӯро анҷом дода мешавад.

16. Ҷаласаҳои Шӯро ҳамон вақт салоҳиятнок ҳисобида мешавад, ки дар онҳо аз нисф зиёди аъзои он иштирок дошта бошанд.

17. Қарорҳои Шӯро бо тариқи овоздиҳии кушода бо аксарияти овозҳои аъзое, ки дар ҷаласаҳои Шӯро иштирок мекунанд, қабул карда мешаванд.

18. Вазорату идораҳо, мақомоти иҷроияи маҳаллии ҳокимияти давлатӣ ва дигар ташкилотҳои дахлдор таклифу пешниҳод ва ҳисоботҳои худро оид ба таъмини амнияти озуқаворӣ барои баррасӣ ва ҷамъбаст ба котиби Шӯро ба таври расмӣ пешниҳод менамоянд.

19. Нақшаи кори Шӯро барои давраи муайян дар асоси нақшаҳои кори вазорату идораҳо, мақомоти иҷроияи маҳаллии ҳокимияти давлатӣ, стратегияву барномаҳои қабулгардида бо дарназардошти пешниҳоди мақоми ваколатдор оид ба таъмини амнияти озуқаворӣ дар ҷаласаҳои Шӯро тасдиқ карда мешавад.

20. Қарорҳои Шӯро бо протокол ба расмият дароварда шуда, аз ҷониби раис ва котиби Шӯро ба имзо расонида мешаванд.

21. Нусхаи протокол ва иттилооти дигари марбут ба фаъолияти Шӯро дар муддати панҷ рӯзи баъди гузаронидани ҷаласа ба маълумоти ҳамаи аъзои Шӯро ва шахсони дигари манфиатдор расонида мешавад.

22. Шӯро барои шунидани ҳисобот метавонад ба ҷаласаҳои худ роҳбарони вазорату идораҳо, мақомоти иҷроияи маҳаллии ҳокимияти давлатӣ, ташкилотҳо ва шахсони мансабдори дигарро даъват намояд.

Ҳайати Шӯрои амнияти озуқавории Ҷумҳурии Тоҷикистон

Муовини Сарвазири Ҷумҳурии Тоҷикистон, сарпарасти соҳа - раиси Шӯро;

вазири кишоварзии Ҷумҳурии Тоҷикистон - муовини раиси Шӯро;

сардори раёсати сиёсати аграрӣ ва мониторинги амнияти озуқавории Вазорати кишоварзии Ҷумҳурии Тоҷикистон - котиби Шӯро.

Аъзои Шӯро:

раиси Кумитаи давлатии идораи замин ва геодезии Ҷумҳурии Тоҷикистон ;

раиси Кумитаи бехатарии озуқавории назди Ҳукумати Ҷумҳурии Тоҷикистон;

раиси Кумитаи ҳифзи муҳити зисти назди Ҳукумати Ҷумҳурии Тоҷикистон;

директори Агентии беҳдошти замин ва обёрии назди Ҳукумати Ҷумҳурии Тоҷикистон;

директори Агентии захираҳои моддии давлатии назди Ҳукумати Ҷумҳурии Тоҷикистон;

муовини якуми вазири рушди иқтисод ва савдои Ҷумҳурии Тоҷикистон;

муовини якуми вазири энегетика ва захираҳои оби Ҷумҳурии Тоҷикистон;

муовини вазири адлияи Ҷумҳурии Тоҷикистон;

муовини вазири молияи Ҷумҳурии Тоҷикистон;

муовини вазири саноат ва технологияҳои нави Ҷумҳурии Тоҷикистон;

муовини вазири меҳнат, муҳоҷират ва шуғли аҳолии Ҷумҳурии Тоҷикистон;

муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон;

муовини раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон;

муовини директори Агентии омори назди Президенти Ҷумҳурии Тоҷикистон;

муовини директори Агентии хариди давлатии мол, кор ва хизматрасонии назди Ҳукумати Ҷумҳурии Тоҷикистон;

муовини директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон;

муовини якуми сардори Хадамоти зиддиинҳисории назди Ҳукумати Ҷумҳурии Тоҷикистон;

муовини сардори Хадамоти гумруки назди Ҳукумати Ҷумҳурии Тоҷикистон;