Низомномаи Комиссияи доимоамалкунанда оид ба баррасӣ ва арзёбии мавқеи Ҷумҳурии Тоҷикистон дар радабандиҳои байналмилалӣ

1. МУҚАРРАРОТИ УМУМӢ

1. Комиссияи доимоамалкунанда оид ба баррасӣ ва арзёбии мавқеи Ҷумҳурии Тоҷикистон дар радабандиҳои байналмилалӣ (минбаъд - Комиссия) бо мақсади беҳтар намудани мавқеи Тоҷикистон дар радабандиҳои байналмилалӣ, ташвиқи ҳавасмандгардонии сармоягузорӣ ва таҳкими симои кишвар дар арсаи байналмилалӣ таъсис дода мешавад.

2. Комиссия мақоми машваратию ҳамоҳангсоз дар назди Ҳукумати Ҷумҳурии Тоҷикистон буда, масъалаҳои баланд бардоштани мавқеи Тоҷикистон дар радабандиҳои байналмилалӣ, беҳтар намудани ҷолибияти сармоягузорӣ ва нуфузи кишвар дар арсаи байналмилалӣ ва ба ин васила ҷалби сармояи хориҷиро баррасӣ ва ҳал менамояд.

3. Комиссия дар фаъолияти худ Конститутсияи Ҷумҳурии Тоҷикистон, дигари санадҳои меъёрии ҳуқуқии Ҷумҳурии Тоҷикистон, санадҳои ҳуқуқии байналмилалии эътирофнамудаи Тоҷикистон ва Низомномаи мазкурро ба роҳбарӣ мегирад.

4. Комиссия ҳангоми амалӣ намудани вазифа ва ваколатҳои худ ҳамкориро бо мақомоти марказӣ ва маҳаллии ҳокимияти давлатӣ, иттиҳодияҳои соҳибкорони кишвар, ташкилотҳои рейтингии байналмилалӣ ва ниҳодҳои байналмилалии тадқиқотӣ ба роҳ мемонад.

2. ВАЗИФАҲОИ АСОСИИ КОМИССИЯ

5. Вазифаҳои асосии Комиссия:

- таҳлили ҳисоботҳо оид ба арзёбии радабандиҳои байналмилалӣ, муайян намудани монеаҳои мавҷуда ва қабули тадбирҳои зарурӣ ҷиҳати беҳтар намудани мавқеи Тоҷикистон дар арсаи ҷаҳонӣ;

- пешниҳоди таклифҳо оид ба такмили қонунгузорӣ барои беҳтар намудани мавқеи кишвар дар радабандиҳои байналмилалӣ;

- пешниҳоди таклифҳо баҳри вусъат додани ҳамгироии иқтисодиёти кишвар ба иқтисодиёти ҷаҳонӣ ва мустаҳкам намудани мавқеи Тоҷикистон дар радабандиҳои байналмилалӣ;

- ҳамоҳангсозии фаъолияти вазорату идораҳо ва мақомоти иҷроияи маҳаллии ҳокимияти давлатӣ дар самти беҳтар намудани фазои сармоягузорӣ ва мавқеи кишвар дар радабандиҳои байналмилалӣ;

- ташкили мониторинги иҷрои супоришҳо ва чорабиниҳо оид ба баланд бардоштани мавқеи Тоҷикистон дар радабандиҳои байналмилалӣ ва манзур намудани ҳисобот ба Ҳукумати Ҷумҳурии Тоҷикистон аз натиҷаи он.

3. ВАКОЛАТҲОИ КОМИССИЯ

6. Комиссия дорои ваколатҳои зерин мебошад:

- тартиби кори Комиссияро тасдиқ менамояд;

- нақшаи кори Комиссия, барномаҳо ва нақшаи чорабиниҳо оид ба баланд бардоштани мавқеи Тоҷикистон дар радабандиҳои байналмилалиро омода ва барои тасдиқ ба Ҳукумати Ҷумҳурии Тоҷикистон пешниҳод менамояд;

- нишондиҳандаҳои асосии арзёбии самаранокии фаъолияти вазорату идораҳои масъулро вобаста ба беҳтар намудани мавқеи Ҷумҳурии Тоҷикистон дар радабандиҳои байналмилалӣ муайян менамояд;

- тибқи тартиби муқарраргардида аз мақомоти марказӣ ва маҳаллии ҳокимияти давлатӣ, иттиҳодияҳои соҳибкорон, коршиносону мутахассисон дар доираи ваколатҳои Комиссия маълумоти оморию таҳлилӣ ва ҳисоботҳои давриро оид ба иҷрои чорабиниҳои қаблан банақшагирифташуда талаб менамояд;

- намояндагони қонунгузор, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот, инчунин роҳбарон ва намояндагони ваколатдори корхона, муассиса, ташкилотҳои дигар, коршиносону мутахассисонро ба ҷаласаҳои Комиссия даъват карда, масъалаҳои мансуб ба салоҳияти Комиссияро сари вақт баррасӣ менамояд ва вобаста ба онҳо қарорҳои дахлдор қабул мекунад;

- тибқи тартиби муқарраргардида ба Ҳукумати Ҷумҳурии Тоҷикистон оид ба масъалаҳои дар ҷаласаи Комиссия баррасишуда таклифу пешниҳод манзур менамояд;

- аз ҳисоби хизматчиёни давлатӣ, иттиҳодияҳои соҳибкорон, созмонҳои байналмилалӣ, коршиносон ва мушовирони мустақил гурӯҳҳои кориро оид ба масъалаҳои дар радабандиҳои байналмилалӣ арзёбишаванда таъсис медиҳад;

- ҷиҳати амалӣ намудани вазифаҳои дар Низомномаи мазкур пешбинигардида қарорҳои дахлдор қабул менамояд;

- фаъолияти вазорату идораҳоро оид ба кор бо радабандиҳои байналмилалии ба уҳдаашон вогузоргардида ҳамоҳанг намуда, ҳар шаш моҳ ҳисобот аз натиҷаи корҳои анҷомдодашуда дар самти беҳтар намудани мавқеи кишвар дар радабандиҳои байналмилалӣ талаб менамояд.

4. ТАРТИБИ КОРИ КОМИССИЯ

7. Фаъолияти Комиссия дар шакли ҷаласаҳо сурат мегирад. Дар ҷаласаҳо масъалаҳои мансуб ба ваколати Комиссия баррасӣ карда мешаванд.

8. Ҷаласаҳои Комиссия на камтар аз ду маротиба дар як сол гузаронида мешаванд. Ҷой ва вақти гузаронидани ҷаласаҳо аз ҷониби раиси Комиссия муайян карда мешавад.

9. Комиссия дар як сол як маротиба доир ба фаъолияти худ ба Ҳукумати Ҷумҳурии Тоҷикистон ҳисоботи солона пешниҳод менамояд.

10. Қарор оид ба баргузории ҷаласаи Комиссия аз ҷониби раиси Комиссия қабул карда мешавад ва ба маълумоти аъзои Комиссия аз ҷониби котиби масъули Комиссия на дертар аз 10 рӯзи корӣ то санаи гузаронидани ҷаласа расонида мешавад.

11. Узви Комиссия, дар сурати норозӣ будан аз қарори қабулнамудаи Комиссия, фикри махсусро хаттӣ баён мекунад, ки он ба протоколи ҷаласа замима карда мешавад.

12. Ҷаласаи Комиссия дар сурате босалоҳият ҳисобида мешавад, ки агар дар он на камтар аз нисфи ҳайати аъзои Комиссия иштирок карда бошад. Дар ҳолати ғайриимкон будани иштирок дар ҷаласа, узви Комиссия уҳдадор аст, ки дар муҳлати на камтар аз 2 рӯз то ҷаласаи навбатӣ котиби масъули Комиссияро оид ба имконияти иштирок накардан дар ҷаласа огоҳ намуда, оид ба масъалаҳои дар ҷаласа муҳокимашаванда пешниҳодҳои хаттии худро манзур намояд.

13. Раис ҷаласаҳои Комиссияро даъват менамояд ва дар онҳо раисӣ мекунад. Дар сурати ҳузур надоштани раиси Комиссия ё холӣ будани мансаби раис, ваколатҳои ӯро муовини раиси Комиссия амалӣ менамояд.

14. Қарори Комиссия оид ба ҳамаи масъалаҳои баррасишаванда бо аксарияти овозҳои аъзои дар ҷаласа ҳузурдошта қабул ва дар шакли протокол ба расмият дароварда мешавад. Дар сурати баробар будани овозҳо, овози раисикунандаи ҷаласа ҳалкунанда мебошад.

15. Иҷрои қарорҳои Комиссия, ки дар доираи ваколатҳояш қабул шудаанд, барои вазорату идораҳо, мақомоти иҷроияи ҳокимияти давлатӣ ва дигар субъектҳои дахлдор, инчунин ташкилотҳое, ки нисбат ба онҳо қарор қабул карда шудааст, ҳатмӣ мебошад.

16. Таъминоти моддию техникӣ ва коргузории Комиссия аз ҷониби Вазорати корҳои хориҷии Ҷумҳурии Тоҷикистон ба ҳайси котиботи Комиссия амалӣ мешавад.

17. Ваколатҳои котиби масъули Комиссия:

- лоиҳаи нақшаи кори Комиссияро таҳия ва бо аъзои Комиссия мувофиқа менамояд;

- лоиҳаи маводи ҷаласаи навбатиро барои баррасӣ ва тасдиқ панҷ рӯз пеш аз баргузории ҷаласа ба раиси Комиссия пешниҳод мекунад;

- коргузории Комиссияро амалӣ менамояд ва протоколи ҷаласаҳоро тартиб медиҳад;

- қарорҳои аз тарафи Комиссия қабулшударо ба вазорату идораҳо, мақомоти иҷроияи ҳокимияти давлатӣ, ташкилотҳои ғайридавлатӣ, бахши хусусӣ ва ҷомеаи шаҳрвандӣ ирсол намуда, иҷрои саривақтии онҳоро назорат менамояд;

- масъалаҳои мансуб ба ваколати Комиссияро ба рӯзномаи ҷаласаи навбатии Комиссия ворид менамояд;

- аз мақомоти дахлдори давлатӣ, ташкилотҳои ғайридавлатӣ, бахши хусусӣ ва созмонҳои байналмилалӣ маълумот ва пешниҳодҳоро дар самти беҳтар намудани мавқеи кишвар дар радабандиҳои байналмилалӣ, ҷолибияти сармоягузорӣ ва таҳкими симо (имиҷ)-и мусбати кишвар дар арсаи байналмилалӣ дархост менамояд;

- фаъолияти гурӯҳҳои корӣ оид ба баррасӣ ва таҳлили ҳисоботҳои радабандиҳои байналмилалиро ташкил ва ҳамоҳанг менамояд;

- мониторинги иҷрои қарорҳои протоколӣ ва нақшаҳои тасдиқнамудаи Комиссияро гузаронида, аз натиҷаи он ҳисобот ба раиси Комиссия пешниҳод менамояд;

- вазифаҳои дигари ба зиммаи котиби масъули Комиссия вогузоргардидаро иҷро менамояд.

18. Бо мақсади баррасӣ ва таҳлили ҳисоботҳои радабандиҳои байналмилалӣ ва пешниҳоди таклифҳо ҷиҳати баланд бардоштани мавқеи Тоҷикистон дар онҳо, дар ҷаласаҳо вобаста ба масъалаҳои алоҳидаи радабандиҳои байналмилалӣ гурӯҳҳои кории мақсаднок ташкил карда мешаванд.

19. Гурӯҳҳои кории мақсаднок, ки аз ҳисоби намояндагони мақомоти давлатӣ, иттиҳодияҳои соҳибкорон, созмонҳои байналмилалӣ, коршиносон ва мушовирони мустақил таъсис дода мешаванд, маводи вобаста ба рӯзномаи ҷаласаи навбатиро даҳ рӯз пеш аз баргузории ҷаласа ба Комиссия пешниҳод менамоянд.

5. ВАЗИФА ВА УҲДАДОРИҲОИ ВАЗОРАТУ ИДОРАҲО

20. Вазифа ва уҳдадориҳои вазорату идораҳои масъул барои беҳтар намудани мавқеи Ҷумҳурии Тоҷикистон дар радабандиҳои байналмилалӣ:

- таҳлили арзёбии мавқеи Тоҷикистонро дар радабандиҳои байналмилалии дахлдор амалӣ менамояд, омилҳо ва мушкилоти ҷойдоштаро муайян ва таклифҳои зарурӣ ҷиҳати баланд бардоштани мавқеи кишвар дар радабандиҳои байналмилалӣ ба Комиссия пешниҳод менамоянд;

- барномаҳо ва нақшаи чорабиниҳоро оид ба баланд бардоштани мавқеи Тоҷикистон дар радабандиҳои байналмилалӣ таҳия карда, барои баррасӣ ба Комиссия пешниҳод менамоянд;

- иҷрои нақшаи кори тасдиқнамудаи Комиссия, дастурҳои Комиссия, барнома ва нақшаи чорабиниҳои аз ҷониби Ҳукумати Ҷумҳурии Тоҷикистон тасдиқгардидаро оид ба баланд бардоштани мавқеи Тоҷикистон дар радабандиҳои байналмилалӣ таъмин менамоянд;

- тибқи дастури Комиссия фаъолияти гурӯҳҳои кории вобаста ба масъалаҳои радабандиҳои байналмилалиро пеш бурда, иштироки намояндаи худро дар ҷаласаҳои гурӯҳҳои корӣ таъмин менамоянд;

- робита ва ҳамкориро бо созмонҳои байналмилалӣ ва хориҷӣ, ки радабандиҳои байналмилалиро ташкил менамоянд, бо мақсади расонидани иттилооти саҳеҳ оид ба ислоҳоти дар кишвар гузаронидашаванда, ҳангоми арзёбии кишварҳо ҷиҳати беҳтар намудани нишондиҳандаҳои Тоҷикистон дар радабандиҳои байналмилалӣ ба роҳ мемонанд;

- ҳар шашмоҳа ҳисобот оид ба корҳои анҷомдодашуда ва ислоҳоти амалигардида бо мақсади беҳтар намудани мавқеи Тоҷикистон дар радабандиҳои байналмилалӣ, инчунин гузориш оид ба мавқеи кишвар дар радабандҳои байналмилалии дахлдор ба раиси Комиссия пешниҳод менамоянд.

Ҳайати Комиссияи доимоамалкунанда оид ба баррасӣ ва арзёбии мавқеи Ҷумҳурии Тоҷикистон дар радабандиҳои байналмилалӣ

Муовини якуми Сарвазири Ҷумҳурии Тоҷикистон (раиси Комиссия);

Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон (муовини раиси Комиссия);

Муовини вазири корҳои хориҷии Ҷумҳурии Тоҷикистон (котиби масъули Комиссия).

Аъзои Комиссия:

1. Раиси Суди конститутсионии Ҷумҳурии Тоҷикистон (дар мувофиқа);

2. Раиси Суди Олии Ҷумҳурии Тоҷикистон (дар мувофиқа);

3. Раиси Суди Олии иқтисодии Ҷумҳурии Тоҷикистон (дар мувофиқа);

4. Раиси суди иқтисодии шаҳри Душанбе (дар мувофиқа);

5. Раиси Комиссияи марказии интихобот ва раъйпурсии Ҷумҳурии Тоҷикистон (дар мувофиқа);

6. Ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ;

7. Ёрдамчии Президенти Ҷумҳурии Тоҷикистон оид ба масъалаҳои иқтисодӣ;

8. Вазири адлияи Ҷумҳурии Тоҷикистон;

9. Вазири молияи Ҷумҳурии Тоҷикистон;

10. Вазири рушди иқтисод ва савдои Ҷумҳурии Тоҷикистон;

11. Вазири тандурустӣ ва ҳифзи иҷтимоии аҳолии Ҷумҳурии Тоҷикистон;

12. Вазири маориф ва илми Ҷумҳурии Тоҷикистон;

13. Вазири саноат ва технологияҳои нави Ҷумҳурии Тоҷикистон;

14. Вазири энергетика ва захираҳои оби Ҷумҳурии Тоҷикистон;

15. Вазири нақлиёти Ҷумҳурии Тоҷикистон;

16. Вазири меҳнат, муҳоҷират ва шуғли аҳолии Ҷумҳурии Тоҷикистон;

17. Вазири корҳои дохилии Ҷумҳурии Тоҷикистон;

18. Раиси Кумитаи давлатии идораи замин ва геодезии Ҷумҳурии Тоҷикистон;

19. Раиси Кумитаи давлатии амнияти миллии Ҷумҳурии Тоҷикистон;

20. Прокурори генералии Ҷумҳурии Тоҷикистон;

21. Директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон;

22. Директори Агентии омори назди Президенти Ҷумҳурии Тоҷикистон;

23. Раиси Кумитаи андози назди Ҳукумати Ҷумҳурии Тоҷикистон;

24. Раиси Кумитаи рушди сайёҳии назди Ҳукумати Ҷумҳурии Тоҷикистон;

25. Раиси Кумитаи меъморӣ ва сохтмони назди Ҳукумати Ҷумҳурии Тоҷикистон;

26. Раиси Кумитаи ҳифзи муҳити зисти назди Ҳукумати Ҷумҳурии Тоҷикистон;

27. Раиси Кумитаи кор бо занон ва оилаи назди Ҳукумати Ҷумҳурии Тоҷикистон;

28. Сардори Хадамоти гумруки назди Ҳукумати Ҷумҳурии Тоҷикистон;

29. Сардори Хадамоти зиддиинҳисории назди Ҳукумати Ҷумҳурии Тоҷикистон;

30. Сардори Хадамоти алоқаи назди Ҳукумати Ҷумҳурии Тоҷикистон;

31. Директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон;

32. Директори Агентии хариди давлатии мол, кор ва хизматрасонии назди Ҳукумати Ҷумҳурии Тоҷикистон;

33. Директори Агентии беҳдошти замин ва обёрии назди Ҳукумати Ҷумҳурии Тоҷикистон;

34. Директори Агентии авиатсияи граждании назди Ҳукумати Ҷумҳурии Тоҷикистон;

35. Сардори раёсати робитаҳои хориҷии Дастгоҳи иҷроияи Президенти Ҷумҳурии Тоҷикистон;

36. Сардори раёсати банақшагирии стратегӣ ва ислоҳоти Дастгоҳи иҷроияи Президенти Ҷумҳурии Тоҷикистон;

37. Сардори раёсати кафолатҳои ҳуқуқи инсони Дастгоҳи иҷроияи Президенти Ҷумҳурии Тоҷикистон;

38. Сардори маркази технологияҳои иттилоотӣ ва коммуникатсионии Дастгоҳи иҷроияи Президенти Ҷумҳурии Тоҷикистон;

39. Раиси Бонки миллии Тоҷикистон;

40. Президенти Академияи миллии илмҳои Тоҷикистон;

41. Раиси Ширкати саҳомии холдингии кушодаи "Барқи Тоҷик";

42. Директори генералии Ҷамъияти саҳомии кушодаи "Шабакаҳои тақсимоти барқ";

43. Директори Муассисаи давлатии "Маркази миллии патенту иттилоот"-и Вазорати рушди иқтисод ва савдои Ҷумҳурии Тоҷикистон;

44. Директори Корхонаи воҳиди давлатии "Хоҷагии манзилию коммуналӣ";

45. Ваколатдор оид ба ҳуқуқи инсон (дар мувофиқа);

46. Раиси Федератсияи иттифоқҳои касабаи мустақили Тоҷикистон (дар мувофиқа);

47. Раиси Палатаи савдо ва саноати Ҷумҳурии Тоҷикистон (дар мувофиқа);

48. Роҳбари Бюрои қарзию иттилоотии Тоҷикистон (дар мувофиқа);

49. Раиси Ассотсиатсияи миллии соҳибкории хурду миёнаи Тоҷикистон (дар мувофиқа);

50. Раиси Палатаи савдои Амрико дар Тоҷикистон (дар мувофиқа);

51. Раиси Ассотсиатсияи сохтмончиёни Тоҷикистон (дар мувофиқа);

52. Раиси Ассотсиатсияи энергетикҳои Тоҷикистон (дар мувофиқа);

53. Раиси Ассотсиатсияи нархгузорони Тоҷикистон (дар мувофиқа);

54. Раиси Ассотсиатсияи ташкилотҳои маблағгузории хурди Тоҷикистон (дар мувофиқа);

55. Раиси Ассотсиатсияи бонкҳои Тоҷикистон (дар мувофиқа);

56. Раиси Ассотсиатсияи миллии ташкилотҳои суғуртавии Тоҷикистон (дар мувофиқа);

57. Раиси Ассотсиатсияи байналмилалии боркашонии автомобилии Тоҷикистон (дар мувофиқа);

58. Раиси Шӯрои рушди бахши хусусии Тоҷикистон (дар мувофиқа).

Рӯйхати вазорату идораҳои масъул барои беҳтар намудани мавқеи Ҷумҳурии Тоҷикистон дар радабандиҳои байналмилалӣ

Ниг. ба Замимаи 3