Низомномаи Комиссияи даъватии ҷумҳуриявии шаҳрвандон ба хизмати ҳарбӣ

БОБИ 1. МУҚАРРАРОТИ УМУМӢ

1. Низомномаи Комиссияи даъватии ҷумҳуриявии шаҳрвандон ба хизмати ҳарбӣ (минбаъд - Низомнома) бо мақсади ташкил ва гузаронидани даъвати шаҳрвандон ба хизмати ҳарбӣ дар ҷумҳурӣ таҳия гардида, ваколатҳои раис ва ҳайати Комиссияи даъватии ҷумҳуриявии шаҳрвандон ба хизмати ҳарбӣ (минбаъд - Комиссия), ҳуқуқ, уҳдадорӣ ва тартиби фаъолияти онҳоро муайян менамояд.

2. Комиссия дар фаъолияти худ Конститутсияи Ҷумҳурии Тоҷикистон, Қонуни Ҷумҳурии Тоҷикистон "Дар бораи уҳдадории ҳарбӣ ва хизмати ҳарбӣ", дигар санадҳои меъёрии ҳуқуқии Ҷумҳурии Тоҷикистон ва Низомномаи мазкурро ба роҳбарӣ мегирад.

БОБИ 2. ВАКОЛАТҲОИ КОМИССИЯ

3. Комиссия дар ташкил ва гузаронидани даъвати шаҳрвандон ба хизмати ҳарбӣ дорои ваколатҳои зерин мебошад:

- таъмини иҷрои фармони Президенти Ҷумҳурии Тоҷикистон дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони Ҷумҳурии Тоҷикистон ба хизмати ҳарбӣ;

- назорати рафти даъвати шаҳрвандон ба хизмати ҳарбии ҳатмии муҳлатнок ва хизмати ҳарбӣ дар ҳайати захираҳои даъвати сафарбарӣ, фаъолияти нуқтаҳои ҷамъшавӣ, гузаронидани маъракаҳои гусели тантанавии даъватшавандагон, таъмини молу мулки шайъӣ, озуқаворӣ ва беҳдоштиву санитарӣ;

- назорати таъсис ва ташкили фаъолияти комиссияҳои даъватии Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳои тобеи ҷумҳурӣ ва шаҳру ноҳияҳо;

- назорати фиристонидани даъватшавандагон ба маҳалли адои хизмати ҳарбӣ;

- назорати рафти даъват ба хизмати ҳарбии ҳатмии муҳлатнок ва тақсимоти даъватшавандагон ба Қувваҳои Мусаллаҳи Ҷумҳурии Тоҷикистон, қӯшунҳо ва воҳидҳои дигари ҳарбӣ, инчунин хизмати ҳарбӣ дар ҳайати захираҳои даъвати сафарбарӣ;

- таъсиси комиссияи даъвати шаҳрвандон ба хизмати ҳарбӣ дар комиссариати ҳарбии шаҳру ноҳияҳои тобеи ҷумҳурӣ;

- вобаста ба фаъолият аз комиссияҳои даъватии Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳои тобеи ҷумҳурӣ талаб намудани ҳисобот;

- ҳангоми зарурат ба ҷаласаи Комиссия даъват намудани шахсони дигар;

- таъмин намудани иҷрои вазифаҳои ба зиммаи Комиссия гузошташуда;

- пеш аз даъвати шаҳрвандон ба хизмати ҳарбӣ гузаронидани ҷаласа ва қабул намудани қарор;

- баррасии муроҷиати шаҳрвандон оид ба масъалаҳои даъвати шаҳрвандон ба хизмати ҳарбӣ;

- пешниҳод намудани ҳисобот аз натиҷаи фаъолияти Комиссия ба Ҳукумати Ҷумҳурии Тоҷикистон;

- амалӣ намудани дигар ваколатҳое, ки санадҳои меъёрии ҳуқуқии Ҷумҳурии Тоҷикистон пешбинӣ намудаанд.

БОБИ 3. ВАКОЛАТҲО, ҲУҚУҚ ВА УҲДАДОРИҲОИ РАИС ВА ҲАЙАТИ КОМИССИЯ

4. Раиси Комиссия ваколатҳои зеринро доро мебошад:

- роҳбарии фаъолияти Комиссияро амалӣ мекунад;

- ҷаласаҳои Комиссияро даъват мекунад ва мегузаронад;

- вазифаҳоро байни ҳайати Комиссия тақсим менамояд;

- масъалаҳои рӯзномаи ҷаласаро тартиб дода, оид ба иҷрои масъалаҳои баррасигардида ба аъзои Комиссия дастуру супоришҳо медиҳад;

- бо дарназардошти пешниҳодҳои аъзои Комиссия рӯзномаи ҷаласаи Комиссияро тасдиқ менамояд;

- сана, макон ва вақти гузаронидани ҷаласаи Комиссияро муқаррар менамояд;

- пешниҳодҳои ҳайати Комиссияро якҷо бо аъзои Комиссия баррасӣ менамояд;

- қарорҳои қабулкардаи Комиссияро тасдиқ менамояд;

- амалӣ намудани дигар ваколатҳое, ки санадҳои меъёрии ҳуқуқии Ҷумҳурии Тоҷикистон пешбинӣ намудаанд.

5. Раиси Комиссия ҳуқуқ дорад:

- дар ҳолати зарурӣ ҷаласаи ғайринавбатии Комиссияро даъват намояд;

- аз ҳайати Комиссия, асосноккуни масъалаҳои баррасишавандаро, ки ба рӯзномаи кори ҷаласаи Комиссия манзур намудаанд, талаб намояд.

6. Раиси Комиссия уҳдадор аст:

- барои пешбурди кори Комиссия ва иҷрои вазифаҳои он масъулият дошта бошад;

- ба протоколҳои ҷаласаи Комиссия имзо гузорад.

7. Муовинони раиси Комиссия ваколатҳои зеринро доро мебошанд:

- оид ба иҷрои супоришҳои раиси Комиссия чораҳои зарурӣ меандешанд;

- оид ба самтҳои асосии фаъолияти Комиссия пешниҳодҳо омода менамоянд;

- бо супориши раис (яке аз муовинон, ки раиси Комиссия муайян менамояд) дар набудани ӯ ба ҷаласаҳои Комиссия роҳбарӣ намояд.

8. Муовинони раиси Комиссия ҳуқуқ доранд, ки ҷиҳати иҷрои супоришҳои раиси Комиссия пешниҳоди дахлдор омода намоянд.

9. Муовинони раиси Комиссия уҳдадоранд:

- назорат ва иҷрои қарорҳои қабулкардаи Комиссияро таъмин намоянд;

- супоришҳои раиси Комиссияро иҷро намоянд.

10. Котиби Комиссия дорои ваколатҳои зерин мебошад:

- нақшаи ҷаласаи Комиссия ва рӯзномаи онро таҳия намуда, ба раиси Комиссия пешниҳод намояд;

- супоришҳои раис ва муовинони раиси Комиссияро оид ба ташкили фаъолияти Комиссия иҷро кунад;

- омодагии ҷаласаҳои Комиссия ва таҳияи қарорҳои онро таъмин намояд;

- аз натиҷаи фаъолияти Комиссия ба раиси Комиссия ҳисобот омода гардонад;

- ваколатҳои дигарро мутобиқи супориши раиси Комиссия ва муовинони ӯ иҷро намояд.

11. Котиби Комиссия уҳдадор аст:

- нақшаи ҷаласаи Комиссия ва рӯзномаи онро ба аъзои Комиссия пешниҳод намояд;

- оид ба омодагии ҷаласаҳои Комиссия ва таҳияи қарорҳои он чораҳои зарурӣ андешад;

- сари вақт протоколҳои ҷаласаи Комиссияро омода намуда, барои тасдиқ ба раиси Комиссия пешниҳод намояд.

12. Аъзои Комиссия дорои ваколатҳои зерин мебошад:

- дар доираи масъалаҳои марбут ба фаъолияти худ ба Комиссия таклифҳо пешниҳод намоянд;

- дар муҳокимаи пешниҳодҳо ва қабули масъалаҳои дар баррасии Комиссия қарордошта иштирок намоянд.

13. Аъзои Комиссия ҳуқуқ доранд оид ба фаъолияти Комиссия ва рафти амалисозии қарорҳои он маълумот гиранд.

14. Аъзои Комиссия уҳдадоранд:

- дар доираи уҳдадориҳои худ чораҳои заруриро оид ба татбиқи амалии қарорҳои Комиссия андешанд;

- супоришҳои раиси Комиссияро мутобиқи талаботи санадҳои меъёрии ҳуқуқии самти даъват иҷро карда, тамоми чораҳои заруриро ташкил ва амалӣ кунанд;

- оид ба самтҳои асосии кори Комиссия пешниҳод омода намоянд;

- иҷрои қарорҳои қабулкардаи Комиссияро таъмин гардонанд;

- барои даъвати шаҳрвандон ба хизмати ҳарбӣ масъулият дошта, ба раиси Комиссия ҳисобот пешниҳод намоянд;

- дар ҷаласаҳои Комиссия, муҳокимаи масъалаҳои баррасишаванда ва таҳияи қарорҳо иштирок намоянд;

- ҳангоми имконнопазир будани иштирок, ба котиби Комиссия оид ба масъалаҳои рӯзнома пешниҳодҳои хаттии худро ирсол намоянд.

БОБИ 4. ТАШКИЛИ ФАЪОЛИЯТИ КОМИССИЯ

15. Фаъолияти Комиссия дар шакли ҷаласа сурат мегирад. Дар ҷаласа масъалаҳое, ки ба ваколати Комиссия дохиланд, мавриди баррасӣ қарор дода мешаванд.

16. Ҷаласаҳои Комиссия дар як сол ду маротиба пеш аз оғози даъвати шаҳрвандон ба хизмати ҳарбии ҳатмии муҳлатнок ва хизмати ҳарбӣ дар ҳайати захираҳои даъвати сафарбарӣ гузаронида мешаванд.

17. Ҷаласаи ғайринавбатӣ бо пешниҳоди раиси Комиссия ва ташаббуси аъзои он ҳангоми зарурати баррасии бетаъхиронаи масъалаҳо гузаронида мешаванд.

18.Ҷаласаҳои Комиссия ҳамон вақт салоҳиятнок ҳисобида мешаванд, агар дар он аз се ду ҳиссаи аъзои он иштирок дошта бошанд.

19. Қарорҳои Комиссия бо овоздиҳии аксарият бо дар назар доштани ақидаи аъзои ҳузурнадоштаи Комиссия, ки ба котиби Комиссия дар шакли хаттӣ ирсол шудаанд, қабул мегарданд. Дар сурати баробар будани овозҳо, овози раисикунанда дар ҷаласа ҳалкунанда мебошад.

20. Қарорҳои қабулнамудаи ҷаласаи Комиссия бо протоколҳо ба расмият дароварда шуда, аз тарафи раиси комиссия ё муовини ӯ, ки дар ҷаласа раисӣ мекунад, инчунин котиби комиссия имзо карда мешаванд. Нусхаи протоколҳо ба аъзои комиссия пешниҳод карда мешавад.

21. Таъминоти ташкилию техникии фаъолияти комиссияро Вазорати мудофиаи Ҷумҳурии Тоҷикистон амалӣ менамояд.

22. Нисбати қарорҳои комиссия ба мақомоти судӣ шикоят кардан мумкин аст. Дар ин ҳолат қарори комиссия то ба қувваи қонунӣ даромадани санади судӣ боздошта мешавад.

Ҳайати Комиссияи даъватии ҷумҳуриявии шаҳрвандон ба хизмати ҳарбӣ

муовини Сарвазири Ҷумҳурии Тоҷикистон - раиси Комиссия;

сардори раёсати мудофиа ва тартиботи ҳуқуқии Дастгоҳи иҷроияи Президенти Ҷумҳурии Тоҷикистон - муовини раиси Комиссия;

сардори Ситоди генералии Қувваҳои Мусаллаҳ - муовини якуми вазири мудофиаи Ҷумҳурии Тоҷикистон - муовини раиси Комиссия;

сардори шуъбаи даъват, пуррагардонӣ ва бақайдгирии теъдоди ҳайати шахсии раёсати ташкил ва сафарбарии Ситоди генералии Қувваҳои Мусаллаҳи Ҷумҳурии Тоҷикистон - котиби Комиссия.

Аъзои Комиссия:

- муовини вазири корҳои дохилии Ҷумҳурии Тоҷикистон;

- муовини вазири маориф ва илми Ҷумҳурии Тоҷикистон;

- муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон;

- муовини раиси Кумитаи давлатии амнияти миллии Ҷумҳурии Тоҷикистон;

- муовини раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон;

- муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон;

- вакили Маҷлиси намояндагони Маҷлиси Олии Ҷумҳурии Тоҷикистон (бо мувофиқа);

- сардори сарситод - муовини аввали фармондеҳи Гвардияи миллии Ҷумҳурии Тоҷикистон;

- раиси Кумитаи марказии Ташкилоти ҷамъиятии мададгори мудофиаи Ҷумҳурии Тоҷикистон.