ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи Барномаи давлатии рушди минбаъдаи мамнӯъгоҳи табиии давлатии "Дашти Ҷум" барои солҳои 2021-2025

 Мутобиқи моддаи 11 Қонуни Ҷумҳурии Тоҷикистон "Дар бораи дурнамоҳои давлатӣ, консепсияҳо, стратегияҳо ва барномаҳои рушди иҷтимоию иқтисодии Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1. Барномаи давлатии рушди минбаъдаи мамнӯъгоҳи табиии давлатии "Дашти Ҷум" барои солҳои 2021-2025 ва Нақшаи чорабиниҳо оид ба амалигардонии Барномаи давлатии рушди минбаъдаи мамнӯъгоҳи табиии давлатии "Дашти Ҷум" барои солҳои 2021-2025 тасдиқ карда шаванд (замимаҳои 1 ва 2).

2. Кумитаи ҳифзи муҳити зисти назди Ҳукумати Ҷумҳурии Тоҷикистон якҷо бо вазорату идораҳои дахлдор, мақомоти иҷроияи ҳокимияти давлатии вилояти Хатлон ва ноҳияи Шамсиддин Шоҳин амалисозии Барномаи давлатии рушди минбаъдаи мамнӯъгоҳи табиии давлатии "Дашти Ҷум" барои солҳои 2021-2025-ро дар доираи маблағҳои ҳамасола пешбинишавандаи буҷети давлатӣ ва манбаъҳои дигаре, ки қонунгузории Ҷумҳурии Тоҷикистон манъ накардааст, таъмин намояд.

3. Кумитаи ҳифзи муҳити зисти назди Ҳукумати Ҷумҳурии Тоҷикистон ҳар сол то 10 феврал ба Ҳукумати Ҷумҳурии Тоҷикистон оид ба ҷараёни иҷрои Барномаи давлатии рушди мамнӯъгоҳи табиии давлатии "Дашти Ҷум" барои солҳои 2021-2025 маълумот пешниҳод намояд.