ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи ворид намудани тағйиру иловаҳо ба қарори Ҳукумати Ҷумҳурии Тоҷикистон аз 3 марти соли 2014, №145

Мутобиқи моддаи 56 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Ба қарори Ҳукумати Ҷумҳурии Тоҷикистон аз 3 марти соли 2014, №145 "Дар бораи Вазорати маориф ва илми Ҷумҳурии Тоҷикистон" тағйироти зерин ворид карда шавад:

- банди 2 дар таҳрири зерин ифода карда шавад:

"2. Шумораи ниҳоии кормандони дастгоҳи марказии Вазорати маориф ва илми Ҷумҳурии Тоҷикистон ба миқдори 95 воҳид (бе ҳайати хизматрасон) муқаррар карда шавад. Маблағгузории 87 воҳиди корӣ аз ҳисоби буҷети ҷумҳуриявӣ ва 8 воҳиди корӣ аз ҳисоби маблағҳои махсуси вазорат анҷом дода шавад.";

 - дар банди 3 рақам ва калимаи "7 адад" ба рақам ва калимаи "5 адад" иваз гардида, калимаҳои ", аз ҷумла барои дастгоҳи марказӣ 5 адад" хориҷ карда шавад.

2. Ба замимаи 1 қарори Ҳукумати Ҷумҳурии Тоҷикистон аз 3 марти соли 2014, № 145 "Дар бораи Вазорати маориф ва илми Ҷумҳурии Тоҷикистон" тағйиру иловаҳои зерин ворид карда шавад:

- ба банди 7 сархатҳои сеюм-ёздаҳум бо мазмуни зерин илова карда шаванд:

"- таҳия ва қабули санадҳои меъёрии ҳуқуқӣ оид ба ҳифзи ҳуқуқҳои кӯдак дар доираи ваколатҳои худ;

- ҳамоҳанг намудани фаъолияти мақомоти давлатӣ ва дигар ташкилотҳо оид ба ҳифзи ҳуқуқҳои кӯдак;

- таҳия ва барои тасдиқ пешниҳод намудани барномаҳои давлатӣ ва маҳаллӣ оид ба ҳифзи ҳуқуқҳои кӯдак бо тартиби муқарраргардида;

- пешниҳод намудани ҳисоботи солона ба Ҳукумати Ҷумҳурии Тоҷикистон оид ба ҳифзи ҳуқуқҳои кӯдак;

- гузаронидани мониторинги меъёрҳои давлатии ҳадди ақали иҷтимоии нишондиҳандаҳои ҳаёти кӯдакон;

- пешниҳод намудани иттилоот оид ба таъмини ҳифзи ҳуқуқҳои кӯдак ба воситаҳои ахбори омма, ҷомеа ва мақомоте, ки ба ҳифзи ҳуқуқҳои кӯдак машғуланд;

- ба роҳ мондани ҳамкории байналмилалӣ оид ба ҳифзи ҳуқуқҳои кӯдак;

- ташкил ва пешбурди махзани ягонаи давлатии маълумот оид ба кӯдакони маъюб, ятим ва бепарастор дар Ҷумҳурии Тоҷикистон;

- дар доираи ваколатҳои худ амалӣ намудани назорати таъминоти моддӣ ва иҷтимоии пурраи давлатии кӯдакони ятим ва бепарастор;";

- сархатҳои шашум, чордаҳум ва понздаҳуми зербанди а) банди 7 хориҷ карда шаванд;

- сархати ҳаждаҳуми зербанди а) банди 7 дар таҳрири зерин ифода карда шавад:

"- таъсиси вазифаи ходимони илмӣ;";

- дар сархати сенздаҳуми банди 8 аломати нуқта ба аломати нуқта вергул ";" иваз карда шуда, сархатҳои чордаҳум-шонздаҳум бо мазмуни зерин илова карда шаванд:

"- тасдиқ намудани тартиби таъсис ва барҳам додани ихтисос дар муассисаҳои таҳсилоти ибтидоӣ, миёна, олии касбӣ ва касбии баъд аз муассисаи олии таълимӣ, муассисаҳои таълимии ғайридавлатӣ ва назорати иҷрои онҳо;

- тасдиқ намудани тартиби хориҷ, барқарор ва гузариши хонандагону донишҷӯёни муассисаҳои таълимӣ ва назорати иҷрои он;

- таъмини сифати таҳсилот ва риояи талаботи стандартҳои давлатии таҳсилот дар муассисаҳои таълимӣ, новобаста аз шакли ташкилию ҳуқуқӣ ва тобеияти идоравӣ;";

- сархати ҳабдаҳуми банди 8 хориҷ карда шавад;

- аз сархати ҳаштуми банди 11 калимаҳои "роҳбари Хадамоти давлатии назорат дар соҳаи маориф," хориҷ карда шаванд.

3. Ба замимаи 2 қарори Ҳукумати Ҷумҳурии Тоҷикистон аз 3 марти соли 2014, №145 "Дар бораи Вазорати маориф ва илми Ҷумҳурии Тоҷикистон" тағйиру иловаҳои зерин ворид карда шавад:

- аз сархати сеюм калимаҳои "томактабӣ ва" хориҷ карда шаванд;

- аз сархати чордаҳум калимаҳои "ва котибот" хориҷ карда шаванд;

- сархатҳои понздаҳум-ҳабдаҳум бо мазмуни зерин илова карда шаванд:

"Шуъбаи сифати таҳсилот

Шуъбаи коргузорӣ ва назорати иҷро

Бахши таҳсилоти томактабӣ".

4. Сархати дуюми замимаи 3 қарори Ҳукумати Ҷумҳурии Тоҷикистон аз 3 марти соли 2014, №145 "Дар бораи Вазорати маориф ва илми Ҷумҳурии Тоҷикистон" хориҷ карда шавад.