ФАРМОНИ ПРЕЗИДЕНТИ ҶУМҲУРИИ ТОҶИКИСТОН

Дар бораи ворид намудани тағйиру иловаҳо ба баъзе фармонҳои Президенти Ҷумҳурии Тоҷикистон

Мутобиқи моддаи 69 Конститутсияи Ҷумҳурии Тоҷикистон ва моддаи 56 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" фармон медиҳам:

1. Ба фармони Президенти Ҷумҳурии Тоҷикистон аз 17 январи соли 2014, №116 "Дар бораи таҷдиди сохтори Дастгоҳи иҷроияи Президенти Ҷумҳурии Тоҷикистон" тағйиру иловаҳои зерин ворид карда шаванд:

- банди 11 дар таҳрири зерин ифода карда шавад:

"11. Бо мақсади тақвияти фаъолият вобаста ба таҳлил дар соҳаҳои маориф, фарҳанг ва иттилоот, ҳамоҳангсозӣ дар пешбурди сиёсати давлатӣ дар тарбияву таълими ҷавонон ва рушди варзиш раёсати маориф, фарҳанг ва иттилоот таъсис дода шавад.";

- банди 17(2) бо мазмуни зерин илова карда шавад:

"17(2). Бо мақсади арзёбии дастовардҳои илмӣ ва корҳои инноватсионӣ ва истифодаи самараноки онҳо дар фаъолияти истеҳсолкунандагони ватанӣ шуъбаи илм ва инноватсия таъсис дода шавад.";

- сархати ҳаждаҳуми замимаи фармони мазкур дар таҳрири зерин ифода карда шавад:

"Раёсати маориф, фарҳанг ва иттилоот"; 

- ба замимаи фармони мазкур сархати бистуҳафтум бо мазмуни зерин илова карда шавад:

"Шуъбаи илм ва инноватсия".

2. Дар банди 2 фармони Президенти Ҷумҳурии Тоҷикистон аз 17 марти соли 2014, №181 "Дар бораи тасдиқи Низомномаи Дастгоҳи иҷроияи Президенти Ҷумҳурии Тоҷикистон" рақами "343" ба рақами "347" иваз карда шавад.

3. Дастгоҳи иҷроияи Президенти Ҷумҳурии Тоҷикистон:

- мутобиқи тартиби муқарраргардида дар басти вазифаҳои Дастгоҳи иҷроияи Президенти Ҷумҳурии Тоҷикистон тағйиру иловаҳои дахлдор ворид намояд;

- ҳангоми зарурат ҷиҳати ворид намудани тағйиру иловаҳо ба санадҳои меъёрии ҳуқуқии Ҷумҳурии Тоҷикистон таклиф пешниҳод намояд;

- санадҳои худро бо фармони мазкур мутобиқ намояд.

4. Вазорати молияи Ҷумҳурии Тоҷикистон бо дар назар доштани тағйир ёфтани воҳидҳои корӣ, ба Дастгоҳи иҷроияи Президенти Ҷумҳурии Тоҷикистон маблағи заруриро дар доираи маблағҳои барои Дастгоҳи иҷроияи Президенти Ҷумҳурии Тоҷикистон пешбинишуда таъмин намояд.