ТАРТИБИ ТАЪСИС ДОДАНИ ФОНДҲОИ БОВАРИИ ТАЪМИНИ ОБИ НУШОКИ ВА РАФЪИ ОБҲОИ ПАРТОВ

Тартиби мазкур дар асоси моддаи 15 Қонуни Ҷумҳурии Тоҷикистон "Дар бораи таъмини оби нӯшокӣ ва рафъи обҳои партов" таҳия гардида, тартиби аз ҷониби мақомоти иҷроияи маҳаллии ҳокимияти давлатӣ таъсис додани фондҳои боварии таъмини оби нӯшокӣ ва рафъи обҳои партов (минбаъд - фонд), ҳамчунин маблағгузорӣ ва идора кардани истифодаи маблағҳои фондро дар воҳидҳои маъмурию ҳудудии дахлдор муайян менамояд.

БОБИ 1. МУҚАРРАРОТИ УМУМӢ

1. Мақомоти иҷроияи ҳокимияти давлатии вилоят, шаҳр ва ноҳияҳо метавонанд, ки дар сатҳи маҳал фондҳои боварии таъмини оби нӯшокӣ ва рафъи обҳои партовро таъсис диҳанд.

2. Таъсис додани фонд аз ҷониби мақомоти мазкур ихтиёрӣ мебошад.

3. Фонд дорои суратҳисоб бо асъори миллӣ ва хориҷӣ дар бонкҳои Ҷумҳурии Тоҷикистон мебошад.

4. Мақсади фонд ба даст овардани фоида намебошад.

5. Фонд шахси ҳуқуқӣ буда, дар асоси санадҳои меъёрии ҳуқуқии Ҷумҳурии Тоҷикистон ва оинномаи фонд амал менамояд.

6. Фонд ҳуқуқ дорад дорои молу мулки алоҳида бошад ва аз номи худ ҳуқуқ ва ухдадориҳои молумулкӣ ва ғайримолумулкиро ба даст орад.

7. Фонд ҳуқуқи бастани шартномаҳоро дорад.

8. Фонд дорои тавозуни алоҳида, сметаи хароҷотӣ, муҳру штамп ва бланки намунаи муқарраргардида буда, дар суд ҳамчун даъвогар ва ҷавобгар баромад мекунад.

БОБИ 2. МАНБАЪҲОИ МАБЛАҒГУЗОРИИ ФОНД

9. Манбаъҳои маблағгузории фонд метавонад инҳо бошанд:

- маблағҳои озоди буҷети ҷумҳуриявӣ ва маҳаллӣ; - маблағҳое, ки дар доираи барномаҳои давлатии беҳтар намудани таъмини аҳолии Ҷумҳурии Тоҷикистон бо оби тозаи нӯшокӣ пешбинӣ гардидаанд;

- маблағҳои истеъмолкунандагони оби нӯшокӣ ва истифодабарандагони шабакаҳои рафъи обҳои партов мутобиқи тарифҳои тасдиқшуда;

- маблағҳои ихтиёрии аҳолӣ ва субъектҳои хоҷагидор; маблағҳои грантии шарикони рушд;

- маблағҳои дигаре, ки қонунгузории Ҷумҳурии Тоҷикистон манъ накардааст.

БОБИ 3. САМТҲОИ АСОСИИ ИСТИФОДАИ МАБЛАҒҲОИ ФОНД

10. Маблағҳои фонд дар самтҳои зерин истифода бурда мешаванд:

- барои амалисозии дастовардҳои пешрафти илмӣ ва техникӣ, барқарорсозӣ, азнавсозӣ ва сохтмони шабакаҳои нави таъмини оби нӯшокӣ ва рафъи обҳои партов;

- дар дигар корҳои лоиҳакашӣ ва ҷустуҷӯӣ дар доираи барномаҳои тасдиқгардидаи бахши таъмини оби нӯшокӣ ва рафъи обҳои партов.

11. Истифодаи маблағҳои фонд ба мақсадҳое, ки ба таъмини оби нӯшокӣ ва рафъи обҳои партов алоқаманд нестанд, манъ аст.

БОБИ 4. ИДОРАКУНИИ МАБЛАҒҲОИ ФОНД

12. Маблағҳои фонд аз ҷониби Шӯрои фонд (минбаъдШӯро) идора карда мешавад.

13.Истифодаи маблағҳои фонд мутобиқи сметаи даромад ва хароҷоти маблағҳои фонд, ки ҳамасола аз ҷониби Шӯро тасдиқ карда мешавад, ба амал бароварда мешавад.

14. Сметаи даромад ва хароҷоти маблағҳои фонд дар асоси дурнамои пешбинишудаи воридшавии маблағҳои молиявӣ барои соли оянда ва зарурати гузаронидани чорабиниҳои дар банди 10 Тартиби мазкур пешбинигардида тартиб дода мешавад.

15. Шӯро метавонад, ки дар давоми сол бо дархости шарикони рушд ва шахсони саховатпеша дар бораи аз ҷониби онҳо ба фонд ворид кардани воситаҳои молиявии иловагӣ ба харҷномаи тасдиқгардидаи соли дахлдор тағйиру иловаҳо ворид намояд.

БОБИ 5. УЗВИЯТ ДАР ШӯРО ВА ФАЪОЛИЯТИ ОН

16. Мақомоти иҷроияи ҳокимияти давлатии вилоят, шаҳр ва ноҳияҳо аъзои Шӯроро муайян менамоянд, ки дар он намояндагони шабакаҳои таъмини оби нӯшокӣ ва рафъи обҳои партов, намояндагони истеъмолкунандагони оби нӯшокӣ ва истифодабарандагони шабакаҳои рафъи обҳои партов, намояндагони шахсони ҳуқуқие, ки ба фонд маблағ ворид менамояд ва намояндагони ташкилотҳои ҷомеаи шаҳрвандӣ, ки дар сатҳи маҳаллӣ фаъолият мекунанд, ба таври ихтиёрӣ ба аъзогии Шӯро дохил карда мешаванд.

17. Маҷлиси якуми Шӯро бояд на дертар аз 1 (як) моҳи баъди ташкили Шӯро гузаронида шавад.

18. Ба рӯзномаи маҷлиси якуми Шӯро ҳатман бояд масъалаҳои зерин дохил карда шаванд:

- интихоби раиси Шӯро;

- интихоби котиби Шӯро;

- тасдиқи оинномаи фонд;

- муайян намудани самтҳои афзалиятноки фаъолияти Шӯро.

19. Шӯро мувофиқи қоидаҳои амалкунанда қабули пешакии қарорҳоро ҷиҳати интихоби лоиҳаҳо ва маблағгузории онҳо амалӣ мегардонад.

20. Барои таъмини шаффофият ва ҳисоботдиҳӣ аъзои ҷомеаи шаҳрвандӣ метавонанд раванди қабули қарорҳои Шӯроро дида бароянд.

21. Самтҳои дигари фаъолияти кории Шӯро дар оинномаи фонд муайян карда мешавад.

БОБИ 6. МУҚАРРАРОТИ ХОТИМАВӢ

22. Шахсони воқеӣ ва ҳуқуқӣ барои риоя накардани талаботи Тартиби мазкур бо тартиби муқаррарнамудаи қонунгузории Ҷумҳурии Тоҷикистон ба ҷавобгарӣ кашида мешаванд.