Низомномаи Комиссияи байниидоравӣ оид ба таъмини бехатарии авиатсионии авиатсияи гражданӣ

БОБИ 1. МУҚАРРАРОТИ УМУМӢ

1. Низомномаи Комиссияи байниидоравӣ оид ба бехатарии авиатсионии авиатсияи гражданӣ мутобиқи боби 5 Барномаи миллии бехатарии авиатсияи граждании Ҷумҳурии Тоҷикистон барои солҳои 2015-2020, ки бо қарори Ҳукумати Ҷумҳурии Тоҷикистон аз 2 апрели соли 2015, №188 тасдиқ шудааст, таҳия гардидааст.

2. Комиссияи байниидоравӣ оид ба таъмини бехатарии авиатсионии авиатсияи гражданӣ (минбаъд - Комиссия) бо мақсади таъмини амалҳои мувофиқашудаи мақомоти иҷроияи марказии ҳокимияти давлатӣ ва ташкилотҳои дигар оид ба такмил додани танзими давлатӣ ва низоми таъмини бехатарии авиатсионии авиатсияи гражданӣ таъсис дода мешавад.

3. Комиссия мақоми ҳамоҳангсоз ва дастаҷамъӣ буда, фаъолияти он доимоамалкунанда мебошад.

4. Комиссия фаъолияти худро дар асоси Конститутсияи Ҷумҳурии Тоҷикистон, қонунҳои Ҷумҳурии Тоҷикистон, амру фармонҳои Президенти Ҷумҳурии Тоҷикистон, қарору фармоишҳои Ҳукумати Ҷумҳурии Тоҷикистон, санадҳои меъёрии ҳуқуқии байналмилалӣ, ки Ҷумҳурии Тоҷикистон эътироф кардааст, инчунин Низомномаи мазкур амалӣ менамояд.

БОБИ 2. ВАКОЛАТҲО

5. Комиссия дорои ваколатҳои зерин мебошад:

- такмили танзими давлатӣ дар соҳаи таъмини бехатарии авиатсионии авиатсияи гражданӣ;

- омода намудани пешниҳодҳо оид ба татбиқи сиёсати давлатӣ дар соҳаи таъмини бехатарии авиатсионии авиатсияи гражданӣ;

- таҳлили маълумот дар бораи вазъи бехатарии авиатсионии авиатсияи граждании Ҷумҳурии Тоҷикистон;

- тайёр намудани пешниҳодҳо оид ба такмили низоми давлатӣ барои таъмини бехатарии авиатсионии авиатсияи гражданӣ, таҳияи лоиҳаҳои санадҳои меъёрии ҳуқуқӣ оид ба масъалаҳои бехатарии авиатсионии авиатсияи гражданӣ;

- таъмини ҳамкорӣ, аз ҷумла иттилоотии мақомоти марказии ҳокимияти давлатӣ ва ташкилотҳои дигари авиатсионии Ҷумҳурии Тоҷикистон бо мақсади беҳтар намудани бехатарии авиатсионии авиатсияи гражданӣ дар фаъолияти онҳо;

- таҳлили татбиқи чорабиниҳо оид ба таъмини бехатарии авиатсионии авиатсияи гражданӣ;

- таҳия пешниҳодҳо оид ба ташкил, ҳамоҳангсозӣ ва такмил намудани ҳамкорӣ байни мақомоти марказии ҳокимияти давлатӣ ва ташкилотҳои дигари Ҷумҳурии Тоҷикистон дар соҳаи таъмини бехатарии авиатсионии авиатсияи гражданӣ;

- ҳамоҳангсозии фаъолияти мақомоти ҳифзи ҳуқуқро бо мақомоти марказии хокимияти давлатӣ ва ташкилотҳои дигар оид ба масъалаҳои бехатарии авиатсионии авиатсияи гражданӣ;

- аз мақомоти марказии ҳокимияти давлатӣ, шахсони воқеӣ ва ҳуқуқӣ дархост ва дастрас намудани ҳуҷҷату маводи зарурӣ бо тартиби муқарраргардида барои ноил шудан ба ҳадафҳо мутобиқи қонунгузории Ҷумҳурии Тоҷикистон;

- таҳлили вазъи бехатарии авиатсионии авиатсияи гражданӣ, баррасӣ намудани пешниҳодҳо оид ба такмили низоми бехатарии авиатсионии авиатсияи гражданӣ ва татбиқи стратегияи такмили он;

- омода намудани маводи иттилоотию таҳлилӣ, таълимӣ ва пешгӯиҳо дар бораи системаи давлатии бехатарии авиатсионии авиатсияи гражданӣ;

- баррасии масъалаҳои маблағгузории чорабиниҳои афзалиятноки ташкилӣ, тадқиқотҳои бунёдӣ ва амалӣ дар соҳаи бехатарии авиатсионии авиатсияи гражданӣ;

- тибқи тартиби муқаррарнамудаи қонунгузорӣ барои иштирок дар кори Комиссия ҷалб намудани шахсони мансабдор ва мутахассисони мақомоти ҳокимияти давлатӣ ва ташкилотҳои авиатсионии кишвар, мақомоти иҷроияи маҳаллии ҳокимияти давлатӣ ва ташкилотҳо.

БОБИ 3. ҲАЙАТИ КОМИССИЯ

6. Комиссия аз ҳисоби намояндагони вазорату идораҳои дахлдор таъсис дода мешавад.

7. Ба кори Комиссия метавонанд намояндагони ташкилотҳои дигар ҷалб карда шаванд.

8. Аъзои Комиссия ҳуқуқ доранд:

- оид ба тамоми масъалаҳои фаъолияти худ ба Комиссия таклифҳо пешниҳод намоянд;

- дар муҳокимаи пешниҳодҳо ва қабули қарорҳо оид ба масъалаҳои дар баррасии Комиссия қарордошта иштирок намоянд;

- оид ба фаъолияти Комиссия ва рафти амалисозии қарорҳои он маълумот гиранд.

9. Уҳдадориҳои аъзои Комиссия:

- дар доираи уҳдадориҳои худ чораҳои заруриро оид ба амалигардии қарорҳои Комиссия андешанд;

- дар ҷаласаҳои Комиссия ҳузур дошта, дар муҳокимаи масъалаҳои баррасишаванда ва таҳияи қарорҳо аз рӯи онҳо иштирок намоянд;

- ҳангоми имконнопазир будани иштирок ба котиби Комиссия оид ба масъалаҳои рӯзнома пешниҳодҳои хаттӣ ирсол намоянд.

БОБИ 4. ТАШКИЛИ КОРИ КОМИССИЯ

10. Ба кори Комиссия раис роҳбарӣ мекунад, ки дорои ваколатҳои зерин мебошад:

- роҳбарии фаъолияти Комиссияро амалӣ мекунад;

- вазифаҳоро дар байни аъзои Комиссия тақсим менамояд;

- иҷрои вазифаҳои дар назди Комиссия гузошташударо таъмин менамояд;

- оид ба баргузории ҷаласаҳои Комиссия қарор қабул менамояд;

- қарорҳои қабулкардаи Комиссияро тасдиқ менамояд.

11. Муовинони раиси Комиссия:

- супоришҳои раиси Комиссияро иҷро менамоянд;

- оид ба самтҳои асосии кори Комиссия пешниҳодҳо омода менамоянд;

- бо супориши Раис дар набудани ӯ дар ҷаласаҳои Комиссия роҳбарӣ менамоянд;

- иҷрои қарорҳои қабулкардаи Комиссияро таъмин менамоянд.

12. Котиби Комиссия:

- лоиҳаҳои нақшаи ҷаласаҳои Комиссияро барои давраи навбатӣ ва рӯзномаи онҳоро таҳия намуда, ба раиси (муовинони раиси) Комиссия пешниҳод менамояд;

- супоришҳои раис ва муовинони раиси Комиссияро оид ба ташкили фаъолияти Комиссия иҷро менамояд;

- ташкили таъминотии ҷаласаҳои Комиссия, таҳияи лоиҳаи қарорҳои Комиссияро амалӣ менамояд ва қарорҳои қабулнамудаи Комиссияро ба расмият медарорад;

- таъминоти иттилоотию таҳлилии фаъолияти Комиссияро бо ҷалби мақомоти марказии ҳокимияти давлатӣ, ки ба Комиссия пешниҳод шудаанд, анҷом медиҳад;

- ҳуҷҷатҳо ва муроҷиатҳои шахсони ҳуқуқӣ ва воқеии манфиатдорро, ки ба Комиссия ворид гардидаанд, таҳлил менамояд;

- омода намудани маводи таҳлилӣ ва маълумотиро оид ба масъалаҳои дар ҷаласа баррасишаванда таъмин менамояд;

- ваколатҳои дигарро мутобиқи қарорҳои Комиссия ва супориши раис, муовинони раис ва котиби Комиссия иҷро менамояд.

13. Нақшаи кори ҳарсола ва рузномаи ҷаласаи Комиссия дар ҷаласаҳои Комиссия муайян карда мешаванд.

14. Ҷаласаҳои Комиссия мутобиқи нақшаи кори Комиссия, вале на камтар аз як маротиба дар ҳар шаш моҳ, инчунин ҳангоми зарурати баррасии беътахири масъалаҳои мансуб ба ваколати он гузаронида мешаванд. Омода намудани мавод ба ҷаласаҳои Комиссия аз ҷониби намояндагони мақомоти марказии ҳокимияти давлатӣ, ки масъалаҳои рӯзнома ба онҳо дахл доранд, амалӣ карда мешавад. Мавод панҷ рӯз пеш аз санаи баргузории ҷаласа ба котиби Комиссия пешниҳод карда мешавад. Ҷаласаҳои Комиссия комилҳуқуқ ҳисобида мешаванд, агар дар онҳо аз нисф зиёди аъзои он иштирок дошта бошанд. Қарорҳои Комиссия бо аксарияти овоздиҳӣ бо дар назар доштани ақидаи аъзои ҳузурнадоштаи Комиссия, ки ба котиби Комиссия дар шакли хаттӣ ирсол шудаанд, қабул мегарданд. Дар сурати баробар будани овозҳо, овози раисикунанда дар ҷаласа ҳалкунанда мебошад.

15. Қарорҳои қабулгардидаи ҷаласаи Комиссия бо протоколҳо ба расмият дароварда шуда, аз тарафи раиси Комиссия ё муовини якум ё муовини ӯ, ки дар ҷаласа раисӣ мекунад, имзо карда мешаванд. Нусхаҳои протокол дар муҳлати даҳ рӯз ба аъзои Комиссия, инчунин мақомот ва ташкилотҳои дахлдор дар қисмате, ки ба онҳо тааллуқ дорад, ирсол мегарданд.

16. Қарорҳои Комиссия, ки мувофиқи ваколати он қабул гардидаанд, барои ҳамаи мақомоти марказӣ ва ташкилотҳое, ки дар он намояндагӣ мекунанд, ҳатмӣ мебошанд, агар қонунгузории Ҷумҳурии Тоҷикистон тартиби дигареро муқаррар накарда бошад.

17. Таъмини ташкилию техникии фаъолияти Комиссияро Агентии авиатсияи граждании назди Ҳукумати Ҷумҳурии Тоҷикистон амалӣ менамояд.

Ҳайати Комиссияи байниидоравӣ оид ба таъмини бехатарии авиатсионии авиатсияи гражданӣ

Раиси Комиссия - муовини Сарвазири Ҷумҳурии Тоҷикистон, сарпарасти соҳаи авиатсияи гражданӣ;

Муовини якуми раиси Комиссия - директори Агентии авиатсияи граждании назди Ҳукумати Ҷумҳурии Тоҷикистон;

Муовини раиси Комиссия - муовини директори Агентии авиатсияи граждании назди Ҳукумати Ҷумҳурии Тоҷикистон;

Муовини раиси Комиссия - муовини раиси Кумитаи давлатии амнияти миллии Ҷумҳурии Тоҷикистон;

Муовини раиси Комиссия - муовини вазири корҳои дохилии Ҷумҳурии Тоҷикистон.

Аъзои Комиссия:

Муовини якуми вазири адлияи Ҷумҳурии Тоҷикистон;

Муовини вазири молияи Ҷумҳурии Тоҷикистон;

Муовини вазири нақлиёти Ҷумҳурии Тоҷикистон;

Муовини вазири меҳнат, муҳоҷират ва шуғли аҳолии Ҷумҳурии Тоҷикистон;

Муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон;

Муовини раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон;

Муовини сардори Хадамоти гумруки назди Ҳукумати Ҷумҳурии Тоҷикистон;

Муовини сардори Хадамоти алоқаи назди Ҳукумати Ҷумҳурии Тоҷикистон;

Сардори хадамоти ҳамлу нақли харбии ситоди генералии Қувваҳои Мусаллаҳи Ҷумҳурии Тоҷикистон ва сардори шуъбаи бехатарии парвозҳо ва бақайдгирии тайёраҳои давлатии Қувваҳои ҳарбӣ-ҳавоӣ ва мудофиаи зиддиҳавоии Қувваҳои Мусаллаҳи Ҷумҳурии Тоҷикистон;

Сардори бозрасии назорати давлатии техникаи кишоварзии Вазорати кишоварзии Ҷумҳурии Тоҷикистон;

Муовини директори генералии КВД "Тоҷикаэронавигатсия".

Котиби Комиссия:

Сардори раёсати назорати Агентии авиатсияи граждании назди Ҳукумати Ҷумҳурии Тоҷикистон.