Ҳукумати Ҷумҳурии Тоҷикистон

ҚАРОР

Дар бораи ташкил намудани Парки табиии миллии "Яғноб"

Мутобиқи моддаҳои 6 ва 27 Қонуни Ҷумҳурии Тоҷикистон "Дар бораи ҳудудҳои табиии махсус муҳофизатшаванда" бо мақсади ҳифз, барқарорсозии комплексҳои табиии дорои аҳамияти махсуси экологӣ, ҳифзи мероси фарҳангӣ (объектҳои этнографӣ, бостоншиносӣ ва таърихӣ), рушди сайёҳии экологӣ, пешбурди корҳои илмӣ ва истифодаи устувори захираҳои табиӣ, Ҳукумати Ҷумҳурии Тоҷикистон қарор мекунад:

1. Парки табиии миллии "Яғноб" аз ҳисоби заминҳои захираи давлатӣ ва дигар заминистифодабарандагони ноҳияи Айнии вилояти Суғд ташкил карда шавад.

2. Низомномаи Парки табиии миллии "Яғноб" тасдиқ карда шавад (замима мегардад).

3. Маблағгузории Парки табиии миллии "Яғноб" аз ҳисоби даромади бадастовардашудаи фаъолияти хоҷагидорӣ ва сармояи дохилию хориҷӣ амалӣ карда шавад.

4. Кумитаи давлатии идораи замин ва геодезии Ҷумҳурии Тоҷикистон якҷо бо Агентии хоҷагии ҷангали назди Ҳукумати Ҷумҳурии Тоҷикистон бо тартиби муқарраргардида оид ба ҷудо намудани қитъаи замин ба Парки табиии миллии "Яғноб" санадҳои дахлдорро таҳия ва барои тасдиқ ба Ҳукумати Ҷумҳурии Тоҷикистон пешниҳод намоянд.