Ҳукумати Ҷумҳурии Тоҷикистон

ҚАРОР

Дар бораи намояндагии тиҷоратии Ҷумҳурии Тоҷикистон дар давлатҳои хориҷӣ

Бо мақсади мусоидат ба амали намудани сиёсати иқтисодии хориҷии кишвар, мутобиқи моддаҳои 14 ва 21 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва моддаи 57 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Низомномаи намояндагии тиҷоратии Ҷумҳурии Тоҷикистон дар давлатҳои хориҷӣ тасдиқ карда шавад (замима мегардад).

2. Дар назди муассисаҳои хориҷии Ҷумҳурии Тоҷикистон (Федератсияи Россия, Ҷумҳурии Халқии Хитой, Ҷумҳурии Федералии Германия, Ҷумҳурии Туркия, ҷумҳуриҳои ӯзбекистон ва Қазоқистон) воҳидҳои кории иловагӣ барои намояндагони тиҷоратӣ таъсис дода шаванд.

3. Вазорати молияи Ҷумҳурии Тоҷикистон маблағгузории воҳидҳои кории иловагии намояндагони тиҷоратиро тибқи тартиби муқарраргардида аз ҳисоби маблағҳои буҷети ҷумҳуриявӣ таъмин намояд.

4. Вазорати рушди иқтисод ва савдои Ҷумҳурии Тоҷикистон, Вазорати корҳои хориҷии Ҷумҳурии Тоҷикистон якҷо бо дигар вазорату идораҳо ҷиҳати такмил додани санадҳои меъёрии ҳуқуқии дахлдор ва мутобиқсозии меъёрҳои қонунгузорӣ, ки аз муқаррароти қарори мазкур бармеоянд, тадбирҳои зарурӣ андешанд.

5. Қарори Ҳукумати Ҷумҳурии Тоҷикистон аз 3 сентябри соли 1998, № 356 "Дар бораи тасдиқи Низомномаи намояндагии таҷоратии Ҷумҳурии Тоҷикистон дар хориҷа" аз эътибор соқит дониста шавад.