Ҳукумати Ҷумҳурии Тоҷикистон

ҚАРОР

Дар бораи Барномаи давлатии корҳои соҳилмустаҳкамкунӣ дар Ҷумҳурии Тоҷикистон барои солҳои 2018-2022

Мутобиқи моддаи 6 Кодекси оби Ҷумҳурии Тоҷикистон бо мақсади барқарорсозӣ, нигоҳдорӣ ва ҳифзи иншооти муҳофизатии зидди обхезӣ дар Ҷумҳурии Тоҷикистон, Ҳукумати Ҷумҳурии Тоҷикистон қарор мекунад:

1. Барномаи давлатии корҳои соҳилмустаҳкамкунӣ ва нақшаи гузаронидани корҳои соҳилмустаҳкамкунӣ дар Ҷумҳурии Тоҷикистон барои солҳои 2018-2022 тасдиқ карда шавад (замимаҳои 1 ва 2).

2. Агентии беҳдошти замин ва обёрии назди Ҳукумати Ҷумҳурии Тоҷикистон якҷо бо вазоратҳои молия, рушди иқтисод ва савдо, энергетика ва захираҳои об, Кумитаи давлатии сармоягузорӣ ва идораи амволи давлатии Ҷумҳурии Тоҷикистон ва мақомоти иҷроияи маҳаллии ҳокимияти давлатӣ тибқи тартиби муқарраргардида ҷиҳати амалӣ намудани барномаи мазкур аз ҳисоби маблағҳои буҷетҳои давлатӣ ва маҳаллӣ, инчунин маблағҳои ҳаққи хизмати обрасонӣ ва ҷалби манбаъҳои ғайрибуҷетӣ тадбирҳои зарурӣ андешанд.

3. Вазоратҳои саноат ва технологияҳои нав, энергетика ва захираҳои об, Кумитаи давлатии сармоягузорӣ ва идораи амволи давлатӣ, Кумитаи ҳифзи муҳити зист, Агентии беҳдошти замин ва обёрӣ, Саридораи геология ва мақомоти иҷроияи маҳаллии ҳокимияти давлатӣ фаъолияти корхонаҳои коркарди қуму шағалро ба танзим дароварда, онҳоро ҷиҳати гузаронидани корҳои соҳилмустаҳкамкунӣ ва ба танзим даровардани маҷрои дарёҳо ҷалб намоянд.

4. Агентии беҳдошти замин ва обёрии назди Ҳукумати Ҷумҳурии Тоҷикистон рафти иҷрои Барномаи давлатии корҳои соҳилмустаҳкамкунӣ дар Ҷумҳурии Тоҷикистон барои 2018-2022-ро таҳти назорат қарор дода, ҳар нимсола аз ҷараёни иҷрои он ба Ҳукумати Ҷумҳурии Тоҷикистон маълумот пешниҳод намояд.