Ҳукумати Ҷумҳурии Тоҷикистон

ҚАРОР

Дар бораи намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россия

Мутобиқи моддаҳои 12 ва 21 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон", моддаи 23 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" ва бо мақсади иҷрои қарори Ҳукумати Ҷумҳурии Тоҷикистон аз 8 апрели соли 2016, № 168 "Дар хусуси Созишнома байни Ҳукумати Ҷумҳурии Тоҷикистон ва Ҳукумати Федератсияи Россия дар бораи кушодани намояндагиҳои хадамоти гумруки Ҷумҳурии Тоҷикистон ва Федератсияи Россия", Ҳукумати Ҷумҳурии Тоҷикистон қарор мекунад:

1. Намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россия таъсис дода шавад.

2. Низомнома, рӯйхати вазифаҳо ва сметаи хароҷоти намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россия тасдиқ карда шаванд (замимаҳои 1, 2 ва 3).

3. Вазорати молияи Ҷумҳурии Тоҷикистон маблағгузории саривақтии хароҷоти нигоҳдории намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россияро аз ҳисоби маблағҳои буҷети ҷумҳуриявӣ, ки барои фаъолияти сиёсати берунӣ пешбинӣ шудаанд, таъмин намояд.

4. Вазорати корҳои хориҷии Ҷумҳурии Тоҷикистон ҷониби Россияро ҷиҳати дар низоми Хадамоти гумруки назди Ҳукумати Ҷумҳурии Тоҷикистон таъсис додани намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россия огоҳ созад.