Созишнома байни Ҳукумати Ҷумҳурии Тоҷикистон ва Ҳукумати Федератсияи Россия дар бораи кушодани намояндагиҳои хадамоти гумруки Ҷумҳурии Тоҷикистон ва Федератсияи Россия

Ҳукумати Ҷумҳурии Тоҷикистон ва Ҳукумати Федератсияи Россия, ки минбаъд, Тарафҳо номида мешаванд,

бо нияти рушди ҳамкории мутақобилаи судманд оид ба масоили танзими гумрукӣ;

бо кӯшиши таъмини татбиқи самараноки Созишнома оид ба ҳамкорӣ ва кӯмаки дуҷониба дар фаъолияти гумрукӣ аз 15 апрели соли 1994;

бо хоҳиши мусоидат намудан ба таъмини манфиатҳои мутақобилаи Ҷумҳурии Тоҷикистон ва Федератсияи Россия дар соҳаи фаъолияти гумрукӣ, ба мувофиқаи зайл расиданд:

Моддаи 1

1. Мафҳумҳои дар Созишномаи мазкур истифодашаванда дорои чунин маъно мебошанд:

"шахсони мансабдор" - шахсоне, ки барои кор ба намояндагии хадамоти гумрук равон карда шудаанд ва ба иҷрои вазифаи тибқи моддаи 3 Созишномаи мазкур ба ин намояндагӣ вогузоршуда шурӯъ намудаанд;

"намояндагии хадамоти гумрук" - воҳиди ваколатдори хадамоти гумруки давлати як Тараф, ки дар худуди давлати дигар Тараф амал мекунад;

"хадамоти гумрук" дар Ҷумҳурии Тоҷикистон - Хадамоти гумруки назди Ҳукумати Ҷумҳурии Тоҷикистон; дар Федератсияи Россия - Хадамоти федералии гумрук;

"аҳли оилаи шахсони мансабдори намояндагии хадамоти гумрук" ҳамсар, кӯдакони ноболиғи шахсони мансабдори намояндагии хадамоти гумрук, инчунин шахсони бо шахсони мансабдори намояндагии хадамоти гумрук якҷоя доимӣ зиндагидошта ва хешу табори дар саробонии ин шахсони мансабдор қарордошта.

2. Тарафҳо дар шакли хаттӣ бо роҳҳои дипломатӣ ҳамдигарро аз тағйироти номи хадамоти гумруки давлати худ хабардор менамоянд.

Моддаи 2

Намояндагии хадамоти гумруки Ҷумҳурии Тоҷикистон тибқи қонунгузории Ҷумҳурии Тоҷикистон кушода мешавад.

Намояндагии хадамоти гумруки Федератсияи Россия тибқи қонунгузории Федератсияи Россия кушода мешавад.

Намояндагии хадамоти гумрукро роҳбари намояндагии хадамоти гумрук роҳбарӣ менамояд.

Моддаи 3

Намояндагии хадамоти гумрук вазифаҳои асосии зеринро иҷро мекунад:

муаррифии манфиатҳои хадамоти гумруки давлати худ оид ба масоили танзими гумрукӣ;

мусоидат ҷиҳати рушди ҳамкориҳои гумрукӣ байни давлатҳои Тарафҳо;

иштирок дар мувофиқа намудани қарорҳои хадамоти гумруки давлатҳои Тарафҳо дар соҳаи фаъолияти гумрукӣ, аз ҷумла қарорҳое, ки ба рушди инфрасохтори гумрук дахл доранд ва қарорҳои фаврӣ оид ба баланд бардоштани самаранокии назорати гумрукӣ;

ташкили мубодилаи иттилоот оид ба масъалаҳои фаъолияти гумрукӣ;

иштирок дар чорабиниҳо оид ба татбиқи шартномаҳои байналмилалии давлатҳои Тарафҳо дар соҳаи фаъолияти гумрукӣ;

таҳияи пешниҳодот оид ба ҳамоҳангсозии заминаи меъёрию ҳуқуқӣ дар соҳаи фаъолияти гумрукии Ҷумҳурии Тоҷикистон ва Федератсияи Россия;

иштирок дар мувофиқакунонии масъалаҳои ташкили таълими касбӣ ва такмили ихтисоси шахсони мансабдори хадамоти гумруки давлатҳои Тарафҳо дар муассисаҳои таълимии давлатҳои Тарафҳо.

Моддаи 4

Шумораи шахсони мансабдори намояндагии хадамоти гумруки Ҷумҳурии Тоҷикистон дар Федератсияи Россия аз тарафи хадамоти гумруки Ҷумҳурии Тоҷикистон дар мувофиқа бо хадамоти гумруки Федератсияи Россия муайян карда мешавад.

Шумораи шахсони мансабдори намояндагии хадамоти гумруки Федератсияи Россия дар Ҷумҳурии Тоҷикистон аз тарафи хадамоти гумруки Федератсияи Россия дар мувофиқа бо хадамоти гумруки Ҷумҳурии Тоҷикистон муайян карда мешавад.

Моддаи 5

Намояндагии хадамоти гумруки Ҷумҳурии Тоҷикистон дар асоси қонунгузории Ҷумҳурии Тоҷикистон амал менамояд.

Намояндагии хадамоти гумруки Федератсияи Россия дар асоси қонунгузории Федератсияи Россия амал менамояд.

Намояндагии хадамоти гумрук қонунгузории давлати будубошро риоя мекунад.

Моддаи 6

Ба шахсони мансабдори намояндагии хадамоти гумрук ва аъзои оилаи онҳо дар ҳудуди давлати будубош тибқи шартномаҳои байналмилалии давлатҳои Тарафҳо ва қонунгузории онҳо амният кафолат дода мешавад.

Моддаи 7

Намояндагии хадамоти гумрук дар давлати будубош аз ҳуқуқи шахси ҳуқуқӣ, аз ҷумла, доштани тавозуни мустақил, суратҳисобҳо дар бонкҳо ва дигар муассисаҳои қарздиҳӣ истифода мебарад.

Бақайдгирии давлатии намояндагии хадамоти гумрук мутобиқи қонунгузории давлати будубош амалӣ карда мешавад.

Моддаи 8

Роҳбари намояндагии хадамоти гумрук, инчунин аъзои оилаи ӯ аз масуният ва имтиёзҳо, ки мутобиқи Конвенсияи Вена дар бораи муносибатҳои дипломатӣ аз 18 апрели соли 1961 барои аъзои оилаҳои ҳайати дипломатии намояндагиҳои дипломатӣ пешбинӣ карда шудаанд, истифода мебаранд. Дигар шахсони мансабдори намояндагии хадамоти гумрук, аз он ҷумла аъзои оилаҳои онҳо аз масуният ва имтиёзҳо, ки мутобиқи Конвенсияи Вена дар бораи муносибатҳои дипломатӣ аз 18 апрели соли 1961 барои аъзои оилаҳои ҳайати маъмурию техникии намояндагиҳои дипломатӣ пешбинӣ карда шудааст, истифода мебаранд.

Моддаи 9

Намояндагии хадамоти гумрук метавонад ба ҳудуди давлати будубош ва аз ҳудуди ин давлат молҳоеро, ки барои истифодабарии расмии намояндагии хадамоти гумрук бо озодкунӣ аз боҷҳои гумрукӣ ва андозҳо мутобиқи қонунгузории давлатҳои Тарафҳо таъин шудаанд, ворид ва содир намоянд.

Шахсони мансабдори намояндагии хадамоти гумрук, инчунин аъзои оилаҳои онҳо, агар онҳо дар давлати будубош доимӣ зиндагӣ намекунанд ва шаҳрванди давлати будубош намебошавд, метавонанд, метавонанд ба ҳудуди давлати будубош молҳои барои истифодабарии шахсии онҳо пешбинишударо, ҳамчунин молҳои барои ҷиҳозониданро ворид ва аз ҳудуди давлати будубош молҳои барои истифодабарии шахсии онҳо пешбинишударо бо озодкунӣ аз супоридани боҷҳои гумрукӣ, андозҳо ва бе татбиқи чораҳои танзими ғайритарифӣ, ки бо қонунгузории давлатҳои Тарафҳо пешбинӣ шудааст, содир намоянд.

Намояндагии хадамоти гумрук аз ҳама гуна намуди андоз, ки ба буҷети давлати Тарафи дигар бояд ворид шавад, озод мебошад.

Моддаи 10

Ҳар яке аз Тарафҳо дар асоси ройгон ва баробар ба намояндагии хадамоти гумруки давлати Тарафи дигар пешниҳоди биноҳои хизматии барои иҷрои ӯҳдадориҳояш зарурро таъмин менамояд.

Ҳар яке аз Тарафҳо бо шартҳои эҳтироми дутарафа ва мутобиқи қонунгузории давлати худ пешниҳоди таъминоти иҷтимоию маишӣ ва хизматрасонии тиббии шахсони мансабдори намояндагии давлати Тарафи дигарро, инчунин аъзои оилаи онҳоро таъмин менамояд.

Моддаи 11

Намояндагии хадамоти гумрук ҳуқуқ дорад парчам ва аломати хадамоти гумруки давлати худро дар бинои ишғолнамуда истифода барад.

Моддаи 12

Хадамоти гумруки ҳар яке аз давлатҳои Тарафҳо мустақилона хароҷот оид ба нигоҳдории намояндагии хадамоти гумруки давлати худро ба ӯҳда мегирад.

Моддаи 13

Ҳангоми зарурат хадамоти гумруки давлатҳои Тарафҳо протоколҳои алоҳида қабул менамоянд, ки бо онҳо тартиби татбиқи Созишномаи мазкур муайян карда мешавад.

Моддан 14

Масъалаҳои баҳснок ва ихтилофоти байни Тарафҳо, ки ба тафсир ва татбиқи муқаррароти Созишномаи мазкур дахл доранд, бо роҳҳои гуфтушунид ва машваратҳо ҳал карда мешаванд.

Моддаи 15

Бо розигии мутақобилаи Тарафҳо ба Созишномаи мазкур метавонанд тағйирот ворид карда шаванд, ки онҳо бо протоколҳои алоҳида ба расмият дароварда мешаванд.

Моддаи 16

Созишномаи мазкур аз рӯзи бо роҳи дипломатӣ гирифтани огоҳиномаи хаттии охирин оид ба иҷрои расмиёти дохилидавлатӣ аз ҷониби Тарафҳо, ки барои эътибор пайдо кардани он заруранд, эътибор пайдо мекунад.

Ҳар як Тараф ҳуқуқ дорад, ки амали Созишномаи мазкурро тавассути ирсол намудани огоҳиномаи хаттӣ ба Тарафи дигар оид ба чунин нияти худ қатъ намояд. Дар ин ҳолат Созишномаи мазкур пас аз шаш моҳ аз рӯзи гирифтани чунин огоҳинома қатъ мегардад.

Дар шаҳри Душанбе 23 сентябри соли 2015 дар ду нусха, бо забони тоҷикӣ ва русӣ, ки ҳар ду матн қувваи якхела дорад, ба имзо расид.