Тартиби барҳам додан ва аз ҳисоб баровардани аслиҳаву техникаи ҳарбӣ, объектҳои мудофиавӣ ва дигар амволи ҳарбӣ

1. Муқаррароти умумӣ

1. Тартиби барҳам додан ва аз ҳисоб баровардани аслиҳаву техникаи ҳарбӣ, объектҳои мудофиавӣ ва дигар амволи ҳарбӣ (минбаъд - Тартиб) бо мақсада ҷорӣ намудани низоми ягонаи барҳам додан ва аз ҳисоб баровардани аслиҳаву техникаи ҳарбӣ, объектҳои мудофиавӣ ва дигар амволи ҳарбӣ, ки аз лиҳози ҷисмонӣ ё маънавӣ фарсуда шуда, корношоям гардидаанд, таҳия шудааст.

2. Меъёрҳои Тартиб нисбат ба аслиҳа, техникаи ҳарбӣ, объектҳои мудофиавӣ ва дигар воситаҳои асосӣ (минбаъд - воситаҳои асосии ҳарбӣ), ки дар тавозуни Вазорати мудофиаи Ҷумҳурии Тоҷикистон ва воҳидҳои ҳарбии тибқи Қонуни Ҷумҳурии Тоҷикистон "Дар бораи мудофиа" муайянгардида (минбаъд - Ташкилотҳои давлатии ҳарбикунонидашуда) қарор доранд, татбиқ мегарданд.

3. Воситаҳои асосии ҳарбӣ дар ҳолатҳои зерин аз ҳисоб бароварда шуда, барҳам дода мешаванд:

- дар ҳолати аз лиҳози ҷисмонӣ пурра фарсуда шуда, барои истифодаи минбаъда корношоям гардидан;

- дар ҳолати имконнопазир будан ё аз ҷиҳати иқтисодӣ фоидаовар набудани барқарорсозии онҳо;

- дар ҳолате, ки бо сабаби қабул намудани аслиҳа ва техникаи ҳарбии нави такмилёфта ва дигар амволи ҳарбӣ, нигоҳдории ояндаи онҳо аз ҷиҳати иқтисодӣ ва техникӣ мувофиқи мақсад набошад;

- дар ҳолати арзиши бақиявии тавозунӣ надоштани воситаҳои асосии ҳарбӣ (ба истиснои аслиҳа ва техникаи ҳарбӣ, ки тибқи рақами истеҳсолкунанда ба ҳисоб гирифта мешаванд);

- дар ҳолати ба нақша гирифтани сохтмони иншооти дигар дар мавқеи ҷойгиршавии онҳо;

- дар ҳолати корношоям шудан ва ё нобуд гардидан дар натиҷаи гузаронидани машқҳо ва амалиётҳо, санҷиш, офати табиӣ, сӯхтор ва садама;

- дар ҳолати ба охир расидани мӯҳлати истифодабарии воситаҳои асосии ҳарбӣ, захираи муқарраргардида ва мӯҳлати истифодабарӣ то таъмири асосӣ ва баъд аз таъмири асосӣ мувофиқи дастурамали истифодабарӣ.

4. Ташкилоти давлатии ҳарбикунонидашуда, бо мақсади муайян намудани ҳолати корношоямӣ ва омода намудани ҳуҷҷатҳои муҳосибавии воситаҳои асосии ҳарбии аз ҳисоб бароварда шаванда, дар асоси фармоиши худ Комиссия оид ба муайян намудани ҳолати воқеии воситаҳои асосии ҳарбӣ ва додани хулоса ҷиҳати барҳам додан ва аз ҳисоб баровардани онҳо (минбаъд-Комиссия) дар ҳайати на камтар аз 7 нафар аз ҳисоби мутахассисони дахлдор таъсис медиҳад, ки ба он муовини роҳбари Ташкилоти давлатии ҳарбикунонидашуда, роҳбари воҳиди ҳарбӣ, муовини роҳбари воҳиди ҳарбӣ, сармуҳандис, сармуҳосиб, муҳандис, механик, муҳосиб, сохтмончӣ ва кормандони дигар ворид мешаванд.

5. Вазифаҳои Комиссия иборатанд аз:

- азназаргузаронӣ ва санҷиши бевоситаи воситаҳои асосии ҳарбӣ ҷиҳати муайян намудани корношоямӣ ва мувофиқ набудани онҳо барои истифодабарӣ дар фаъолияти минбаъдаи Ташкилоти давлатии ҳарбикунонидашуда;

- муайян намудани сабабҳои корношоям гардидани воситаҳои асосии ҳарбӣ;

- муайян намудани қисмҳои коршоями воситаҳои асосии ҳарбӣ бо мақсади истифодаи минбаъдаи онҳо дар фаъолияти Ташкилоти давлатии ҳарбикунонидашуда;

- таҳияи хулоса оид ба ҳолати воқеии воситаҳои асосии харбӣ ва аз ҳисоб баровардани онҳо.

2. Тартиби барҳам додан ва аз ҳисоб баровардани силоҳи ҷангии сабук ва лавозимоти ҷангии он

6. Барҳам додан ва аз ҳисоб баровардани силоҳи ҷангии сабук ва лавозимоти ҷангии он тибқи Тартиби гардиши силоҳи ҷангӣ ва лавозимоти ҷангии он, ки бо қарори Ҳукумати Ҷумҳурии Тоҷикистон аз 30 майи соли 2014, № 339 "Дар бораи Тартиби гардиши силоҳи ҷангӣ ва лавозимоти ҷангии он" тасдиқ шудааст, амалӣ карда мешавад.

3. Тартиби барҳам додан ва аз ҳисоб баровардани иншооти ҳарбӣ, техникаи махсуси қувваҳои ҳарбӣ-ҳавоӣ ва мудофиаи зиддиҳавоӣ (тайёраҳо ва чархболҳои ҷангӣ, комплексҳои зенитию ракетӣ), техникаи зиреҳпӯш ва ҳамаи намудҳои тӯпҳо

7. Барҳам додан ва аз ҳисоб баровардани иншооти ҳарбӣ, техникаи махсуси қувваҳои ҳарбӣ-ҳавоӣ ва мудофиаи зиддиҳавоӣ (тайёраҳо ва чархболҳои ҷангӣ, комплексҳои зенитию ракетӣ), техникаи зиреҳпӯш ва ҳамаи намудҳои тӯпҳо дар асоси қарори Ҳукумати Ҷумҳурии Тоҷикистон амалӣ карда мешавад.

8. Барои таҳияи лоиҳаи қарори Ҳукумати Ҷумҳурии Тоҷикистон дар бораи барҳам додан ва аз ҳисоб баровардани иншооти ҳарбӣ, техникаи махсуси қувваҳои ҳарбӣ-ҳавоӣ ва мудофиаи зиддиҳавоӣ (тайёраҳо ва чархболҳои ҷангӣ, комплексҳои зенитию ракетӣ), техникаи зиреҳпӯш ва ҳамаи намудҳои тӯпҳо Ташкилоти давлатии ҳарбикунонидашуда:

- дар асоси хулосаи Комиссия номгӯи воситаҳои асосии ҳарбии аз ҳисоб баровардашавандаро муайян ва тасдиқ менамояд;

- маълумотнома дар бораи арзиши тавозунии воситаҳои асосии ҳарбиро бо дарҷи хулосаи Комиссия таҳия ва тасдиқ менамояд;

- дар ҳолати зарурӣ ба ҳуҷҷатҳо аксҳои (суратҳои) воситаҳои асосии ҳарбӣ, ки ҳолати воқеии онҳоро нишон медиҳанд, замима мекунад (дар қафои суратҳо ном ва нишондиҳандаҳои техникии воситаҳои асосии ҳарбӣ навишта шуда, имзои роҳбар ва мӯҳри Ташкилоти давлатии ҳарбикунонидашуда гузошта мешавад);

- лоиҳаи қарори Ҳукумати Ҷумҳурии Тоҷикистонро таҳия ва дар мувофиқа бо вазорату идораҳои дахлдор тибқи тартиби муқарраргардида ба Ҳукумати Ҷумҳурии Тоҷикистон пешниҳод менамояд.

9. Ҳамаи намудҳои тӯпҳо, мушакҳо, тирҳои қутрашон гуногун ва моддаҳои таркандае, ки мӯҳлати истифодабариашон ба охир расидааст, ё ин ки бо сабабҳои гуногун корношоям гардидаанд, баъд аз ҳисоб баровардан барои безараргардонӣ ба Вазорати мудофиаи Ҷумҳурии Тоҷикистон супорида мешаванд.

4. Тартиби барҳам додан ва аз ҳисоб баровардани дигар воситаҳои асосии Ташкилотҳои давлатии ҳарбикунонидашуда

10. Барҳам додан ва аз ҳисоб баровардани дигар воситаҳои асосии дар тавозуни Ташкилотҳои давлатии ҳарбикунонидашуда (ба ғайр аз воситаҳои асосии ҳарбии дар қисмҳои 2 ва 3 Тартиби зикргардида) қарордошта, ки таъиноти мудофиавӣ ва ҳарбӣ надоранд, тибқи Тартиби аз эътибор соқит намудаии воситаҳои асосие, ки моликияти давлатӣ мебошанд, бо қарори Ҳукумати Ҷумҳурии Тоҷикистон аз 30 апрели соли 2012, № 184 "Дар бораи тасдиқи Тартиби аз эътибор соқит намудани воситаҳои асосие, ки моликияти давлатӣ мебошанд" тасдиқ шудааст, амалӣ карда мешавад.

5. Тартиби ба қисмҳо ҷудо кардан ва таҷзиян воситаҳои асосии ҳарбии аз ҳисоб баровардашуда

11. Ташкилотҳои давлатии ҳарбикунонидашуда вазифадоранд, ки дар муддати 3 моҳ баъд аз қабули қарори Ҳукумати Ҷумҳурии Тоҷикистон:

- воситаҳои асосии ҳарбии аз ҳисоб баровардашударо ба қисмҳо ҷудо ва таҷзия намоянд;

- пораву партовҳои металлҳои сиёҳ ва ранга, қисмҳои эҳтиётӣ, ҳезум ва масолеҳи сохтмонии аз ин ҳисоб бадастомадаро муайян ва ба анборҳо қабул намуда, ҳаҷму арзиши онҳоро дар ҳуҷҷатҳои баҳисобгирии муҳосибавӣ сабт намоянд;

- қисмҳои корношоями дорои металлҳои қимматбаҳоро дар мувофиқа бо Нозироти давлатии иёргирии назди Вазорати молияи Ҷумҳурии Тоҷикистон аз воситаҳои асосии ҳарбии аз ҳисоб баровардашуда ҷудо ва тибқи тартиби муқаррарнамудаи қонунгузории ҷумҳурӣ дар корхонаҳое, ки барои коркарди металлҳои қимматбаҳо иҷозатномаи дахлдор доранд, холискорӣ намуда, ба Вазорати молияи Ҷумҳурии Тоҷикистон супоранд;

- санадҳои барҳамдиҳии воситаҳои асосии ҳарбиро тибқи тартиби муқарраргардида таҳия ва тасдиқ намоянд;

- воситаҳои асосии ҳарбии аз ҳисоб баровардашударо аз тавозун хориҷ намоянд;

- оид ба натиҷаи барҳамдиҳии воситаҳои асосии ҳарбӣ мувофиқан ба Ҳукумати Ҷумҳурии Тоҷикистон ва мақоми ваколатдори давлатии идораи амволи давлатии Ҷумҳурии Тоҷикистон ҳисобот пешниҳод намоянд.

12. Ташкилотҳои давлатии ҳарбикунонидашуда ҳуҷҷатҳои дохилии муҳосибиро барои аз ҳисоб баровардани воситаҳои асосии ҳарбӣ мутобиқи тартиби муқарраргардидаи санадҳои меъёрии ҳуқуқии амалкунандае, ки соҳаи баҳисобгирии муҳосибӣ ва ҳисоботи молиявиро ба танзим медароранд, омода намуда, ба расмият медароранд.

6. Муқаррароти хотимавӣ

13. Ташкилотҳои давлатии ҳарбикунонидашуда баъд аз қабули қарори Ҳукумати Ҷумҳурии Тоҷикистон ё мақоми ваколатдори давлатии идораи амволи давлатии Ҷумҳурии Тоҷикистон миқдор ва арзиши пораву партовҳои металлҳои сиёҳ ва рангаро бо мақоми ваколатдори давлатӣ оид ба идораи амволи давлатии Ҷумҳурии Тоҷикистон мутобиқ ба нархҳои бозори дохилӣ мувофиқа намуда, бо риояи талаботи Қоидаҳои фаъолияти вобаста ба ҷамъоварии пораву партовҳои металлҳои сиёх, ва ранга, ки бо қарори Ҳукумати Ҷумҳурии Тоҷикистон аз 4 марти соли 2005, № 105 тасдиқ шудаанд, шартномаи хариду фурӯши пораву партовҳои металлҳои сиёҳ ва рангаро мустақиман бо харидор ба имзо мерасонанд.

14. Ташкилотҳои давлатии ҳарбикунонидашуда пораву партовҳои металлҳои сиёҳ ва рангаро танҳо баъд аз ворид гардидани маблағи шартномавӣ ба суратҳисоби махсуси худ дар Сарраёсати Хазинадории марказии Вазорати молияи Ҷумҳурии Тоҷикистон ба харидор таҳвил менамоянд.

15. Маблағи аз ҳисоби фурӯши пораву партовҳои металлҳои сиёҳ ва ранга, қисмҳои эҳтиётӣ, ҳезум ва масолеҳи сохтмонӣ бадастомада барои таҳкими заминаи моддию техникии Ташкилоти давлатии ҳарбикунонидашуда равона карда мешавад.

16. Роҳбарияти Ташкилоти давлатии харбикунонидашуда барои риоя накардани талаботи Тартиби мазкур мутобиқи қонунгузории Ҷумҳурии Тоҷикистон ба ҷавобгарӣ кашида мешавад.