Ҳукумати Ҷумҳурии Тоҷикистон

ҚАРОР

Оид ба ворид намудани тағйирот ба қарори Ҳукумати Ҷумҳурии Тоҷикистон аз 2 марти соли 2013, №87

Мутобиқи моддаи 42 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" ва моддаи 3 Қонуни Ҷумҳурии Тоҷикистон "Дар бораи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ" Ҳукумати Ҷумҳурии Тоҷикистон қарор мекунад:

1. Ба замимаи 1 қарори Ҳукумати Ҷумҳурии Тоҷикистон аз 2 марти соли 2013, № 87 "Дар бораи Комиссияи давлатӣ оид ба татбиқи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ" тағйироти зерин ворид карда шаванд:

- калимаҳои "Раиси Шӯрои ҳамоҳангсозии ассотсиатсияҳои соҳибкорон ва иттиҳодияҳои ҷамъиятии Ҷумҳурии Тоҷикистон" ба калимаҳои "Намояндаи бахши хусусӣ (дар мувофиқа)" иваз карда шаванд.

2. Банди 5 Низомномаи Комиссияи давлатӣ оид ба татбиқи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ, ки бо қарори Ҳукумати Ҷумҳурии Тоҷикистон аз 2 марти соли 2013, № 87 тасдиқ шудааст, дар таҳрири зайл ифода карда шавад:

"5. Ҷаласаҳои Комиссия дар ҳолати зарурӣ даъват карда мешаванд.".

3. Банди 6 замимаи 2 Низомномаи Комиссияи давлатӣ оид ба татбиқи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ дар таҳрири зайл ифода карда шавад:

"6. Гузаронидани санҷишҳои фаъолияти дорандаи Шаҳодатномаи мазкурро дар давраи мораторияи эълоннамудаи Президенти Ҷумҳурии Тоҷикистон аз ҷониби мақомоти зерин ва зерсохторҳои он манъ аст:

Мақомоти ваколатдори давлатӣ дар соҳаҳои молия (оид ба истеҳсол, истихроҷ, коркард, истифода, нигоҳдорӣ ва баҳисобгирии металлҳо ва сангҳои қиматбаҳо, инчунин дигар амалиёт бо металлҳо ва сангҳои қиматбаҳо), корҳои дохилӣ (оид ба иҷрои чорабиниҳои бехатарӣ ва пешгирии сӯхтор), энергетика ва захираҳои об (оид ба истифодаи оқилона ва самараноки қувваи барқу гармӣ, сифати қувваи барқи таҳвилшаванда, ҳолати баҳисобгирии истеҳсол ва истеъмоли қувваи барқу гармӣ, тартиби тасдиқ ва тақсими меъёрҳои истеъмоли қувваи барқу гармӣ, ҳолати техникии нерӯгоҳҳои барқӣ, шабакаҳои барқӣ ва таҷҳизоти барқию гармӣ, низоми истеъмоли қувваи барқу гармӣ, гузаронидани чорабиниҳои таъминкунандаи хизматрасонии бехатарии таҷҳизоти барқӣ ва истифодабарандаи гармӣ), тандурустӣ ва ҳифзи иҷтимоии аҳолӣ (оид ба сифати хизматрасонии тиббӣ аз тарафи шахсоне, ки ба фаъолияти хусусии тиббӣ машғул мебошанд, оид ба риояи қоидаҳои санитарӣ), кишоварзӣ (дар соҳаи байторӣ, оид ба тухмипарварӣ, оид ба карантини растаниҳо, оид ба зотпарварӣ дар чорводорӣ ва паррандапарварӣ, оид ба истифодаи техникаи соҳаи кишоварзӣ), меҳнат ва шуғли аҳолӣ (оид ба ҳифзи меҳнат дар ҷараёни истеҳсолот), нақлиёт (дар соҳаи нақлиёт ва хоҷагии роҳ), сармоягузорӣ ва идораи амволи давлатӣ (оид ба моликият ва идоракунии моликияти давлатӣ), телевизион ва радио (дар соҳаи телевизион ва радио), ҳифзи муҳити зист (оид ба ҳифзи муҳити зист ва хоҷагии ҷангал), сохтмон ва меъморӣ (оид ба соҳаи сохтмон ва меъморӣ, истеҳсоли масолеҳ, маснуот ва таркиби сохтмонӣ), стандартизатсия (оид ба стандартизатсия,. сертификатсияи маҳсулот ва хизматрасонӣ, метрология ва таъмини ягонагии ченакҳо), назорати давлатии молиявӣ (оид ба гирифтан, гузарондан ё истифодаи маблағҳои Буҷети давлатӣ, фондҳои давлатӣ, қарзҳои аз тарафи Ҳукумати Ҷумҳурии Тоҷикистон ва бо ваколати он аз тарафи соҳибкорони инфиродӣ ва шахсони ҳуқуқии ғайридавлатӣ ҷалбшаванда), зиддиинҳисорӣ (дар соҳаи рақобат ва маҳдудсозии фаъолияти инҳисорӣ дар бозорҳои мол, монополияҳои табиӣ, ҳифзи ҳуқуқҳои истеъмолкунандагон ва фаъолияти рекламавӣ), алоқа (оид ба истифодаи каналҳо ва хатҳои басомад, тавсифи техникӣ ва истифодабарии радиосигналҳои паҳншаванда), бехатарии корҳо дар соҳаи саноат ва кӯҳкорӣ (оид ба бехатарии пешбурди корҳо дар саноат ва соҳаи кӯҳкорӣ), андоз (оид ба пешбурди сиёсати давлатӣ дар соҳаи андоз) ва гумрук (оид ба пешбурди сиёсати давлатӣ дар соҳаи гумрук).".