Низомномаи Шӯрои ҳамоҳангсоз оид ба таҳсилоти касбӣ дар Ҷумҳурии Тоҷикистон

1. МУҚАРРАРОТИ УМУМӢ

1. Шӯрои ҳамоҳангсоз оид ба таҳсилоти касбӣ дар Ҷумҳурии Тоҷикистон (минбаъд - Шӯро) мақоми машваратӣ буда, ҳамоҳангсозӣ ва дастгирии рушди низоми таҳсилоти касбӣ, тамоюли он ба талаботи бозори меҳнат, инчунин ҳамкории самарабахши Ҳукумати Ҷумҳурии Тоҷикистонро бо вазорату идораҳо, мақомоти иҷроияи маҳаллии ҳокимияти давлатӣ, корфармоён ва ташкилотҳои ҷамъиятӣ оид ба татбиқи сиёсати давлат дар соҳаи таҳсилоти касбӣ таъмин намуда, дар назди Ҳукумати Ҷумҳурии Тоҷикистон фаъолият менамояд.

2. Шӯро фаъолияти худро дар асоси Конститутсияи (Сарқонуни) Ҷумҳурии Тоҷикистон, Қонуни Ҷумҳурии Тоҷикистон "Дар бораи маориф", Қонуни Ҷумҳурии Тоҷикистон "Дар бораи таҳсилоти ибтидоии касбӣ", Қонуни Ҷумҳурии Тоҷикистон "Дар бораи таҳсилоти олии касбӣ ва таҳсилоти касбии баъди муассисаи олии таълимӣ", Стратегияи миллии рушди маориф дар Ҷумҳурии Тоҷикистон то соли 2020, дигар санадҳои меъёрии ҳуқуқии Ҷумҳурии Тоҷикистон, инчунин санадҳои ҳуқуқии байналмилалие, ки онҳоро Тоҷикистон эътироф кардааст ва Низомномаи мазкур амалӣ менамояд.

2. ҲУҚУҚ ВА ӯҲДАДОРИҲОИ ШӯРО

3. Шӯро ҳуқуқ дорад:

- иттилооти заруриро аз вазорату идораҳо ва дигар ташкилотҳое, ки бо масъалаҳои таҳсилоти касбӣ машғуланд, дархост намояд;

- манфиатҳои вазорату идораҳо ва дигар ташкилотҳоро бо мақсади дастгирӣ ва рушди низоми таҳсилоти касбӣ, тамоюли он ба талаботи бозори меҳнат ҳимоя намояд;

- барои дастгирии фаъолияти худ коршиносонро даъват кунад.

4. Ба ӯҳдадориҳои Шӯро дохил мешавад:

- мусоидат дар таҳияи сиёсати ягонаи давлатӣ оид ба рушди низоми таҳсилоти касбии мутобиқ ба талаботи бозори меҳнат;

- ба Ҳукумати Ҷумҳурии Тоҷикистон манзур намудани пешниҳоду тавсияҳо ҷиҳати ташаккул додани муносибати ягона дар ҳалли масъалаҳои марбут ба таҳсилоти касбӣ;

- мусоидат ба ислоҳот ва рушди низоми таҳсилоти касбии мутобиқ ба талаботи бозори меҳнат:

- ба Ҳукумати Ҷумҳурии Тоҷикистон манзур намудани пешниҳодот оид ба ислоҳот ва рушди низоми таҳсилоти касбӣ, тавсия ва пешниҳодҳои вазорату идораҳо ва ташкилотҳои ҷамъиятӣ оид ба ислоҳот ва рушди соҳаи таҳсилоти касбӣ, тавсияҳо ҷиҳати беҳтар намудани инфрасохтори таҳсилоти қасбӣ мутобиқи талаботи стандартҳои нав, пешниҳодот оид ба таҳияи низоми мувофиқашудаи таъмини сифати таҳсилоти касбӣ, аз ҷумла дастур оид ба гузаронидани аккредитатсия, ташкили менеҷменти сифат ва низоми самарабахши мониторинг ва арзёбӣ, тавсияҳо оид ба беҳтар намудани нишондиҳандаҳои сифатӣ ва миқдории таҳсилоти касбӣ;

- ҳамоҳангсозии ҷараёни самараноки таҷрибаомӯзии таълимӣ ва истеҳсолии хонандагону донишҷӯён;

- ҳамоҳангсозии ҷараёни судманди илм ва истеҳсолот, инчунин ҷараёни таъмини мутахассисони ҷавон бо ҷойи кор;

- таҳияи тавсия ва пешниҳодҳо ҷиҳати ҷорӣ намудани таҷрибаи дигар кишварҳо барои такмили низоми таҳсилоти касбӣ;

- таҳияи тавсияҳо оид ба ҷалби диаспораҳои тоҷик, шаҳрвандони тоҷик ва тоҷикони бурунмарзӣ ба ҳамкорӣ ҷиҳати рушди низоми таҳсилоти касбии муҳоҷирони меҳнатӣ - шаҳрвандони Ҷумҳурии Тоҷикистон;

- мусоидат дар ҳамоҳангсозии фаъолияти вазорату идораҳо, ташкилотҳои ҷамъиятӣ барои таъмини муносибати мувофиқашуда дар соҳаи таҳсилоти касбии мутобиқ ба талаботи бозори меҳнат;

- ба Ҳукумати Ҷумҳурии Тоҷикистон манзур намудани пешниҳодҳо оид ба тақвият бахшидани масъулият ва ҷалби самараноки корфармоён дар таҳсилоти касбӣ;

- машваратдиҳӣ ба ташкилотҳои хориҷии донорие, ки дар соҳаи таҳсилоти касбӣ ҳамкорӣ менамоянд;

- ҳалли дигар масъалаҳои марбут ба таҳсилоти касбӣ.

3. ТАРТИБИ ТАШАККУЛЁБИИ ШӯРО

5. Ҳайати Шӯроро Ҳукумати Ҷумҳурии Тоҷикистон тасдиқ менамояд.

6. Раиси Шӯро муовини Сарвазири Ҷумҳурии Тоҷикистон мебошад, ки самти таҳсилоти касбӣ ва таълимро сарпарастӣ менамояд.

4. ТАРТИБИ ТАШКИЛИ ФАЪОЛИЯТИ ШӯРО

7. Фаъолияти Шӯро мутобиқи вазифа ва ӯҳдадориҳои дар банди 2 Низомномаи мазкур дарҷгардида амалӣ карда мешавад.

8. Ҷаласаҳои Шӯро тибқи нақшаи тасдиқшуда на камтар аз ду маротиба дар як сол ва дар ҳолати зарурӣ бошад, ҷаласаи ғайринавбатӣ гузаронида мешавад.

9. Аъзои Шӯро ҳуқуқ доранд, дар шакли хаттӣ ҷиҳати таҳияи нақшаи кор ва рӯзномаи ҷаласаи Шӯро пешниҳод манзур намояд.

10. Котибот ба аъзои Шӯро рӯзнома, дигар мавод ва ҳуҷҷатҳои заруриро дар мӯҳлати на камтар аз як ҳафта то оғози ҷаласаи навбатӣ пешниҳод менамояд.

11. Агар дар ҷаласа на камтар аз нисфи аъзои Шӯро иштирок дошта бошанд, ҷаласаи Шӯро ҳуқуқи қабул намудани қарорро дорад. Қарор бо аксарияти овозҳои аъзои Шӯро, ки дар ҷаласа иштирок доранд, қабул карда мешавад. Ҳангоми баробар будани овозҳо, овози раисикунандаи ҷаласа ҳалкунанда ҳисобида мешавад. Узви Шӯро ҳуқуқи додани ваколатҳои худро ба дигар узви Шӯро надорад. Шӯро ҳуқуқ дорад ба ҷаласаҳои худ намояндагони ташкилотҳои байналмилалӣ ва ғайриҳукуматиро, ки бо масъалаҳои таҳсилоти касбӣ машғуланд, даъват намояд.

12. Қарори Шӯроро Раиси Шӯро имзо мекунад ва котиби Шӯро барои маълумот ва иҷро ба вазорату идораҳои ҷумҳурӣ пешниҳод менамояд.

13. Оид ба раванди ҷаласаи Шӯро протокол тартиб дода шуда, аз ҷониби Раису котиби масъули Шӯро имзо карда мешавад.

5. ГУРӯҲҲОИ КОРИИ ШӯРО

14. Шӯро барои иҷрои вазифаҳои техникии гузошташуда оид ба масъала ва самтҳои гуногуни таҳсилоти касбӣ гурӯҳҳои корӣ таъсис дода, онҳоро роҳбарӣ менамояд.

15. Номзадҳои намояндагони гурӯҳҳои корӣ аз ҷониби муассисаҳои таҳсилоти касбӣ, корфармоён ва дигар ташкилотҳои ҷамъиятии манфиатдор пешниҳод ва бо қарори Шӯро таъин карда мешаванд.

16. Аъзои гурӯҳҳои корӣ ба мӯҳлати 3 сол таъин шуда, ҳуқуқи ба мӯҳлати дуюм интихоб шуданро доранд. Вохӯрии гурӯҳҳои корӣ дар се моҳ як маротиба гузаронида мешавад, дар ҳолати зарурӣ гурӯҳҳои корӣ иловатан вомехӯранд.

17. Аъзои ҳар як гурӯҳи корӣ роҳбари худро, ки натиҷаи корҳои анҷомдодашударо барои баррасӣ ба Шӯро пешниҳод менамояд, интихоб мекунанд.

18. Ҳар як гурӯҳи корӣ як самти касбӣ ё супориши мушаххасро фаро мегирад. Ба ҳайати ин гурӯҳҳои корӣ мутахассисони вазорату идораҳо ва дигар тарафҳои манфиатдор дохил карда мешаванд.

19. Шӯро метавонад гурӯҳҳои кории муваққатиро барои иҷрои вазифаҳои муайян, масалан барои таҳияи низоми аккредитатсия ва сертификаткунонӣ таъсис диҳад.

20. Намояндагони ташкилотҳои байналмилалӣ, ки бо масъалаҳои таҳсилоти касбӣ машғуланд, метавонанд ба ҳайати гурӯҳҳои корӣ ба сифати мушовирон дохил шаванд.

Ҳайати Шӯрои ҳамоҳангсоз оид ба таҳсилоти касбӣ дар Ҷумҳурии Тоҷикистон

Муовини Сарвазири Ҷумҳурии Тоҷикистон, сарпарасти низоми таҳсилоти касбӣ - Раиси Шӯро;

Сардори Раёсати илму маърифати Дастгоҳи иҷроияи Президенти Ҷумҳурии Тоҷикистон - муовини Раиси Шӯро;

Сармутахассиси Раёсати илму маърифати Дастгоҳи иҷроияи Президенти Ҷумҳурии Тоҷикистон - котиби масъули Шӯро.

Аъзои Шӯро:

Сардори Раёсати рушди иҷтимоии Дастгоҳи иҷроияи Президенти Ҷумҳурии Тоҷикистон;

Муовини Вазири рушди иқтисод ва савдои Ҷумҳурии Тоҷикистон;

Муовини Вазири маориф ва илми Ҷумҳурии Тоҷикистон;

Муовини Вазири кишоварзии Ҷумҳурии Тоҷикистон;

Муовини Вазири саноат ва технологияҳои нави Ҷумҳурии Тоҷикистон;

Муовини Вазири энергетика ва захираҳои оби Ҷумҳурии Тоҷикистон;

Муовини Вазири меҳнат, муҳоҷират ва шуғли аҳолии Ҷумҳурии Тоҷикистон;

Муовини Вазири молияи Ҷумҳурии Тоҷикистон;

Муовини Вазири тандурустӣ ва ҳифзи иҷтимоии аҳолии Ҷумҳурии Тоҷикистои;

Муовини Вазири фарҳанги Ҷумҳурни Тоҷикистон;

Муовини Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон;

Муовини Раиси Кумитаи кор бо занон ва оилаи назди Ҳукумати Ҷумҳурии Тоҷикистон;

Сардори Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон;

Раиси Кумитаи иттифоқҳои касабаи кормандони маориф ва илми Ҷумҳурии Тоҷикистон;

Раиси Иттиҳодияи корфармоёни Ҷумҳурии Тоҷикистон;

Раиси Ассотсиатсияи таълими калонсолони Тоҷикистон;

Намояндаи Палатаи савдо ва саноати Ҷумҳурии Тоҷикистон;

Намояндаи Ассотсиатсияи соҳибкорон;

Намояндаи ташкилотҳои ҷамъиятӣ;

Намояндаи мақомоти иҷроияи ҳокимияти давлатии шаҳри Душанбе.