Низомномаи Фонди миллии муқовимат ба вируси норасоии масунияти одам ва бемории пайдошудаи норасоии масуният

1. Фонди миллии муқовимат ба вируси норасоии масунияти одам ва бемории пайдошудаи норасоии масуният (минбаъд - Фонд), мутобиқи моддаи 5 Қонуни Ҷумҳурии Тоҷикистон "Дар бораи муқовимат ба вируси норасоии масунияти одам ва бемории пайдошудаи норасоии масуният" бо мақсади ташаккули манбаи мутамаркази маблағҳо ҷиҳати мусоидат намудан ба татбиқи Барномаи давлатии муқовимат бо вируси норасоии масунияти одам ва бемории пайдошудаи норасоии масуният дар Ҷумҳурии Тоҷикистон ташкил карда шудааст.

2. Фонд фаъолияти худро мутобиқи Конститутсия (Сарқонун), қонунгузории Ҷумҳурии Тоҷикистон, қарорҳои Ҳукумати Ҷумҳурии Тоҷикистон, фармоишҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, инчунин Низомномаи мазкур ба роҳ мемонад.

3. Фонд - Фонди давлатии ғайрибуҷетӣ мебошад ва дар назди Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таъсис дода мешавад.

4. Фонд бо ташкилотҳои давлатӣ, ҷамъиятӣ, хусусӣ, байналмилалӣ, инчунин бо шахсони воқеӣ ва воситаҳои ахбори омма бо мақсади татбиқ намудани вазифаҳои гузошташуда ҳамкорӣ менамояд.

5. Вазифаҳои асосии Фонд инҳо мебошанд:

- маблағгузории барномаҳои ҷумҳуриявӣ ва чорабиниҳое, ки ба пешгирӣ, ташхис, муолиҷа, нигоҳубин ва дастгирӣ дар соҳаи вируси норасоии масунияти одам ва бемории пайдошудаи норасоии масуният равона карда шудаанд;

- сафарбарии воситаҳо барои амалисозии вазифаҳои асосӣ дар соҳаи вируси норасоии масунияти одам ва бемории пайдошудаи норасоии масуният дар Ҷумҳурии Тоҷикистон;

- ширкати якҷоя бо мақомоти давлатӣ ва ташкилотҳои ҷамъиятӣ дар таҳияи чорабиниҳои марбут ба муқовимат бо вируси норасоии масунияти одам ва бемории пайдошудаи норасоии масуният дар Ҷумҳурии Тоҷикистон;

- тибқи мақсаду вазифаҳои Фонд иштирок дар анҷуманҳо, конфронсҳо, ҷаласаҳо, симпозиумҳо ва дар ҳамкорӣ бо мақомоти давлатӣ ва ташкилотҳои ҷамъиятӣ ташкил намудани онҳо;

- мусоидат ба рушди ҳамкорӣ бо фондҳои миллии давлатҳои дигар, инчунин фондҳои байналмилалӣ дар соҳаи вируси норасоии масунияти одам ва бемории пайдошудаи норасоии масуният.

6. Манбаи пайдоиш ва ташаккулёбии Фонд инҳо мебошанд:

- маблағҳои аз дивидендҳо, фоизҳо аз рӯи маблағгузорӣ ва депозитҳои бонкӣ бадастовардашуда;

- пардохтҳои ихтиёрии вазорату идораҳои Ҷумҳурии Тоҷикистон, мақомоти иҷроияи маҳаллии ҳокимияти давлатӣ, корхонаҳо, муассисаҳо, ташкилотҳо, новобаста аз шакли ташкилию ҳуқуқии онҳо, инчунин шаҳрвандони Ҷумҳурии Тоҷикистон, аз ҷумла шахсони воқеӣ ва ҳуқуқии хориҷӣ;

- воридоти маблағҳо аз фаъолияти ноширӣ, гузаронидани шабнишиниҳо, намоишномаҳо, консертҳо, аксияҳо ва дигар чорабиниҳои фарҳангиву оммавӣ ба фоидаи Фонд;

- пардохти хизматрасониҳои машваратию экспертӣ;

- дигар воридоте, ки қонунгузории Ҷумҳурии Тоҷикистон манъ накардааст.

7. Ҳамаи маблағҳо дар шакли супоришномаи пулӣ ба суратҳисоби Фонд таввасути Сарраёсати хазинадории марказии Вазорати молияи Ҷумҳурии Тоҷикистон ворид мегарданд ва дар асоси дархости Муассисаи давлатии "Маркази ҷумҳуриявии пешгирӣ ва мубориза бар зидди бемории вируси норасоии масунияти одам" мувофиқи харҷномаи ягонаи даромад ва хароҷоти тасдиқшудаи воридоти воқеии маблағҳо мақсаднок истифода карда мешаванд.

8. Маблағҳое, ки дар соли ҳисоботӣ (гузашта) истифода бурда нашудаанд, ситонида намешаванд ва ба соли дигар (навбатӣ) гузаронида мешаванд.

9. Даровардани тағйирот аз як моддаи хароҷотӣ ба дигар моддаи хароҷотии харҷномаи Фонд дар мувофиқа бо Вазорати молияи Ҷумҳурии Тоҷикистон амалӣ карда мешавад.

10. Роҳбарӣ ба фаъолияти Фонд аз тарафи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон амалӣ карда мешавад.

11. Баҳисобгирӣ ва ҳисоботдиҳии муҳосибавии маблағҳои Фонд бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.

12. Вазифаи асосии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон оид ба фаъолияти Фонд инҳо мебошанд:

- пешбурди бақайдгирии умумии ҳамаи пардохткунандагон;

- таҳия намудани ҳисоби хароҷот;

- тартиб додан ва тасдиқ намудани харҷномаҳои асосӣ ва иловагии Фонд;

13. Маблағҳои ҷалбгардидаи Фонд ба самтҳои зерин харҷ карда мешаванд:

- амалӣ намудани чорабиниҳои миллӣ ва минтақавии ба вазифаҳои Фонд мутобиқаткунанда;

- мусоидат дар тайёркунӣ ва бозомӯзии мутахассисони миллӣ оид ба масъалаҳои вируси норасоии масунияти одам ва бемории пайдошудаи норасоии масуният;

- маблағгузорӣ ва харид кардани воситаҳои моддию техникӣ барои амалӣ намудани чорабиниҳои муқовимат бо вируси норасоии масунияти одам ва бемории пайдошудаи норасоии масуният дар Ҷумҳурии Тоҷикистон;

- харидории маводи доруворӣ ва ташхисӣ, инчунин дигар маводи хароҷотӣ;

- табобати ройгон барои одамони бо вируси норасоии масунияти одам зиндагикунанда;

- ташкил намудани чорабиниҳои фарҳангиву маърифатӣ;

- ҷудо намудани грантҳо барои ташкилотҳои ҷамъиятие, ки фаъолияти онҳо ба мақсаду вазифаҳои Фонд ҷавобгӯ аст;

- ташкил ва гузаронидани таҳқиқотҳои илмию техникӣ дар соҳаи вируси норасоии масунияти одам ва бемории пайдошудаи норасоии масуният;

- амалӣ намудани кӯмаки озуқаворӣ барои одамони бо вируси норасоии масунияти одам зиндагикунанда;

- ташкил намудан ва гузаронидани чорабиниҳои таълимию иттилоотӣ тавассути васоити ахбори омма;

- дигар мақсадҳое, ки ба вазифаҳои Низомномаи мазкур мухолиф нестанд.

14. Фаъолияти Фонд метавонад тибқи муқаррароти қонунгузории Ҷумҳурии Тоҷикистон қатъ карда шавад ва дар баробари ин маблағҳои ҷамъгардидаи Фонд ба Буҷети давлатии Ҷумҳурии Тоҷикистон гузаронида мешаванд.

15. Назорат аз болои фаъолияти молиявию хоҷагидории Фонд аз ҷониби мақомоти дахлдор ё аудит ба роҳ монда мешавад.