Ҳукумати Ҷумҳурии Тоҷикистон

ҚАРОР

Дар бораи ҳамроҳшавии Ҷумҳурии Тоҷикистон ба Ташаббуси шаффофият дар соҳаҳои истихроҷ

Мутобиқи моддаи 21 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва бо мақсади такмил додани усули идоракунӣ дар соҳаҳои истихроҷ, беҳтар намудани фазои сармоягузорӣ дар ҷумҳурӣ, пурзӯр намудани мубориза бо коррупсия, таъмин намудани иштироки ҷомеаи шаҳрвандӣ дар назорат аз рӯи воридоти пурраи маблағҳо ба буҷети давлатӣ аз фаъолияти марбут ба истихроҷи канданиҳои фоиданок, Ҳукумати Ҷумҳурии Тоҷикистон қарор мекунад:

1. Лоиҳаи пешниҳодгардидаи Баёнияи Ҳукумати Ҷумҳурии Тоҷикистон "Дар бораи ҳамроҳшавии Ҷумҳурии Тоҷикистон ба Ташаббуси шаффофият дар соҳаҳои истихроҷ" маъқул дониста шавад (замимаи 1).

2. Вазорати молияи Ҷумҳурии Тоҷикистон мақоми ваколатдори Ҳукумати Ҷумҳурии Тоҷикистон оид ба масъалаҳои амалӣ намудани Ташаббуси шаффофият дар соҳаҳои истихроҷ дар Ҷумҳурии Тоҷикистон муайян карда шавад.

3. Шӯрои Ташаббуси шаффофият дар соҳаҳои истихроҷ аз ҳисоби мақомоти давлатӣ бо ҷалби намояндагони корхонаҳои соҳаҳои истихроҷ ва ташкилотҳои ҷомеаи шаҳрвандии Ҷумҳурии Тоҷикистон, ки ба татбиқи Ташаббуси шаффофият дар соҳаҳои истихроҷ манфиатдор мебошанд, дар асоси баробарӣ таъсис дода шавад.

4. Ҳайат ва Низомномаи Шӯрои Ташаббуси шаффофият дар соҳаҳои истихроҷи Ҷумҳурии Тоҷикистон тасдиқ карда шавад (замимаҳои 2 ва 3).

5. Ба Шӯрои Ташаббуси шаффофият дар соҳаҳои истихроҷи Ҷумҳурии Тоҷикистон супориш дода шавад:

- дар мӯҳлати ду моҳ лоиҳаи Нақшаи кориро оид ба татбиқи Ташаббуси шаффофият дар соҳаҳои истихроҷ дар Ҷумҳурии Тоҷикистон барои солҳои 2012-2014 мутобиқ ба талаботи қоидаҳои байналмилалии Ташаббуси шаффофият дар соҳаҳои истихроҷ таҳия намуда, барои тасдиқ ба Ҳукумати Ҷумҳурии Тоҷикистон пешниҳод намояд;

- ҷиҳати ташкил намудани котиботи доимоамалкунандаи Шӯрои Ташаббуси шаффофият дар соҳаҳои истихроҷ чораҳо андешад.

6. Вазорати молияи Ҷумҳурии Тоҷикистон якҷоя бо Вазорати рушди иқтисод ва савдои Ҷумҳурии Тоҷикистон ва Кумитаи давлатии сармоягузорӣ ва идораи амволи давлатии Ҷумҳурии Тоҷикистон барои таъмин намудани маблағгузории татбиқи Ташаббуси шаффофият дар соҳаҳои истихроҷ дар Ҷумҳурии Тоҷикистон аз ҳисоби маблағҳои буҷетӣ дар доираи Барномаи миёнамӯҳлати хароҷоти давлатӣ, ҷалби кӯмаки молиявӣ ва техникии ташкилотҳои байналмилалӣ, институтҳои молиявӣ ва кишварҳои донор чораҳои зарурӣ андешанд.

7. Вазорати корҳои хориҷии Ҷумҳурии Тоҷикистон бо тартиби муқарраргардида Котиботи байналмилалии Ташаббуси шаффофият дар соҳаҳои истихроҷро дар шаҳри Осло (Норвегия) оид ба қабули қарори мазкур огоҳ намояд.

Баёнияи Ҳукумати Ҷумҳурии Тоҷикистон дар бораи ҳамроҳшавӣ ба Ташаббуси шаффофият дар соҳаҳои истихроҷ

Ҳукумати Ҷумҳурии Тоҷикистон дар кори гузаронидани ислоҳоти иқтисодӣ ва боз ҳам бештар ворид шудан ба иқтисодиёти ҷаҳонӣ, ки натиҷаи он беҳтар гардидани фазои соҳибкорӣ ва сармоягузорӣ мебошад, кӯшишҳои зиёд ба харҷ медиҳад.

Қатъи назар аз душвориҳо ва таъсири бӯҳрони ҷаҳонии молиявӣ, рушди устувор таъмин гардида, некӯаҳволии аҳолӣ афзоиш меёбад, мувофиқи гузориши Бонки Умумиҷаҳонӣ "Пешбурди тиҷорат" Ҷумҳурии Тоҷикистон ду сол паи ҳам ба қатори даҳ кишвари ислоҳотчӣ шомил аст.

Ҳамаи ин дигаргуниҳои назаррас бо шарофати иродаи сиёсии Президенти Ҷумҳурии Тоҷикистон, ҳамоҳангии кори сохторҳои ҳукуматӣ ва иштироки фаъоли ташкилотҳои байналмилалӣ, намояндагони ҷомеаи шаҳрвандӣ ва бахши хусусӣ имконпазир гаштанд.

Ислоҳоти гузарондашуда ба такмил додани расмиёти оғоз намудани соҳибкорӣ, содда гардонидани низоми иҷозатдиҳӣ, тавсеаи дастрасӣ ба қарзҳо, инчунин такмили маъмурикунонии андозҳо ва ҳимояи сармоягузорон равона шуда буданд.

Дар баробари ин, ислоҳот танҳо ба тағйироти декларативии қонунгузорӣ маҳдуд нагардидааст. Ба таври воқеӣ амалӣ намудани он фазои рақобатнокро барои иштироккунандагони муносибатҳои иқтисодӣ фароҳам оварда, шакл ва таҷрибаи муносибатҳои байниҳамдигарии давлат, ҷомеаи шаҳрвандӣ ва соҳибкориро беҳтар намуд.

Бо мақсади таъмину риояи ҳуқуқ ва ӯҳдадориҳои ҳамаи иштироккунандагони ин раванд ва наздик намудани онҳо ба меъёрҳои байналмилалӣ такмили заминаҳои қонунгузории бахши истихроҷи маъдани кӯҳӣ идома дорад.

Қадами муҳим дар ин самт бояд сиёсати давлатие бошад, ки ба таъмин намудани дастрасии маълумот ба захираҳои табиии худ ҳамчун омили афзоиши иқтисодиёти миллӣ ва ҷалби сармоя равона карда шудааст.

Соҳаи истифодаи қаъри замин метавонад қувваи ҳаракатдиҳандаи рушди саноатии кишвар бошад ва ба ҷалби сармоягузориҳои назаррас мусоидат намояд.

Ҳукумати Ҷумҳурии Тоҷикистон принсипҳои Ташаббуси шаффофият дар соҳаҳои истихроҷро маъқул дониста, мӯътақид аст, ки амалӣ гардонидани он ба такмили шаклҳои идоракунӣ дар соҳаҳои истихроҷ, беҳтар намудани фазои сармоягузорӣ барои самаранок истифода бурдани захираҳои табиӣ мусоидат менамояд.

Ҳукумати Ҷумҳурии Тоҷикистон ҷонибдории худро ба принсипҳои Ташаббуси шаффофият дар соҳаҳои истихроҷ изҳор намуда, дастгирии худро аз татбиқи Ташаббус оид ба шаффофият дар соҳаҳои истихроҷ, ки моҳи октябри соли 2002 дар Вохӯрии умумиҷаҳонии сарони давлатҳо бахшида ба рушди устувор эълон шуда буд, эълом медорад ва ният дорад дар самти ҳамроҳ шудани Ҷумҳурии Тоҷикистон ба ин ташаббуси байналмилалӣ иқдомҳои ҷиддиро ба роҳ монад.

Ҳукумати Ҷумҳурии Тоҷикистон омодагии худро ҷиҳати ҳамкорӣ бо ҷомеаи шаҳрвандӣ, ташкилотҳои байналмилалӣ ва ширкатҳои истихроҷкунанда дар доираи татбиқи Ташаббус оид ба шаффофият дар соҳаҳои истихроҷ тасдиқ намуда, онҳоро ба ҳамкорӣ дар амалӣ намудани он даъват менамояд.

Ҳайати Шӯрои Ташаббуси шаффофият дар соҳаҳои истихроҷи Ҷумҳурии Тоҷикистон

- Муовини Вазири молияи Ҷумҳурии Тоҷикистон - раиси Шӯро;

- Намояндаи Дастгоҳи иҷроияи Президенти Ҷумҳурии Тоҷикистон;

- Намояндаи Вазорати рушди иқтисод ва савдои Ҷумҳурии Тоҷикистон;

- Намояндаи Вазорати адлияи Ҷумҳурии Тоҷикистон;

- Намояндаи Вазорати энергетика ва саноати Ҷумҳурии Тоҷикистон;

- Намояндаи Кумитаи давлатии сармоягузорӣ ва идораи амволи давлатии Ҷумҳурии Тоҷикистон;

- Намояндаи Саридораи геологияи назди Ҳукумати Ҷумҳурии Тоҷикистон;

- Намояндагони корхонаҳои соҳаҳои истихроҷ - 6 намоянда;

- Намояндагони Коалитсияи ташкилотҳои ҷомеаи шаҳрвандии Ҷумҳурии Тоҷикистон "Шаффофият барои рушд" - 6 намоянда.