Ҳукумати Ҷумҳурии Тоҷикистон

ҚАРОР

Дар бораи тасдиқи Барномаи рушди забони давлатии Ҷумҳурии Тоҷикистон барои солҳои 2012-2016

Мутобиқи моддаи 17 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва бо мақсади татбиқи ҳамаҷонибаи муқаррароти Қонуни Ҷумҳурии Тоҷикистон "Дар бораи забони давлатии Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1. Барномаи рушди забони давлатии Ҷумҳурии Тоҷикистон барои солҳои 2012-2016 ва Нақшаи чорабиниҳои татбиқи он тасдиқ карда шавад (замима мегардад).

2. Кумитаи забон ва истилоҳоти назди Ҳукумати Ҷумҳурии Тоҷикистон ҳамоҳангсози татбиқи Барномаи рушди забони давлатии Ҷумҳурии Тоҷикистон барои солҳои 2012-2016 муқаррар карда шавад.

3. Вазорату идораҳо, ташкилоту муассисаҳо дар доираи маблағҳои буҷетӣ ва махсуси худ амалӣ намудани чорабиниҳои Барномаи рушди забони давлатии Ҷумҳурии Тоҷикистон барои солҳои 2012-2016ро таъмин намоянд.

4. Вазорату идораҳо ва мақомоти иҷроияи маҳаллии ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ:

- аз ҳисоби сарфаи моддаҳои хароҷотии дигар ва маблағхои махсус, аз ҳисоби маблағҳои бақияи озод ва иҷрои барзиёди даромади буҷети маҳаллӣ, тавассути ҷалби маблағҳои ташкилоту муассисаҳои ғайридавдатӣ ва сарпарастон барои иҷрои чорабиниҳои Барномаи мазкур тадбирҳои иловагӣ андешанд;

- татбиқи Барномаи рушди забони давлатии Ҷумҳурии Тоҷикистон барои солҳои 2012-2016-ро таъмин намуда, аз натиҷаи корҳои анҷомдодашуда ҳар сол на дертар аз 1 март ба Ҳукумати Ҷумҳурии Тоҷикистон маълумоти муфассал пешниҳод намоянд.