Тартиб, шарт ва мӯҳлати гузаронидани моҳвораи Ҳилоли Аҳмар

1) Тартиб, шарт ва мӯҳлати гузаронидани моҳвораи Ҳилоли Аҳмар мутобиқи моддаи 15 Қонуни Ҷумҳурии Тоҷикистон "Дар бораи Ҷамъияти Ҳилоли Аҳмари Тоҷикистон" таҳия гардида, тартиб, шарт ва мӯҳлати гузаронидани моҳвораи Ҳилоли Аҳмарро танзим менамоянд.

2) Мақсади гузаронидани моҳвораи Ҳилоли Аҳмар дар байни аҳолии Ҷумҳурии Тоҷикистон паҳн кардани маълумот оид ба ҳуқуқи башардӯстии байналмилалӣ ва Принсипҳои бунёдии Ҳаракати Байналмилалии Салиби Сурх ва Ҳилоли Аҳмар ва ҷалб намудани таваҷҷӯҳ ба фаъолияти барномавии Ҷамъияти мазкур мебошад, дар баробари ин:

- баланд бардоштани маърифати санитарӣ ва таълимоти тиббии аҳолӣ ҷиҳати расонидани кӯмаки аввалияи тиббӣ ва нигоҳубини беморон дар хона, сабук кардани азияти шахсони бехонумон ва гурезаҳо;

- ҷалби таваҷҷӯҳ ба барномаҳои Ҷамъияти Ҳилоли Аҳмари Тоҷикистон дар самти бартараф намудани оқибатҳои офати табиӣ ва расонидани кӯмак ба аҳолӣ дар ҳолатҳои фавқулоддаи дигар.

3) Шарти гузаронидани моҳвораи Ҳилоли Аҳмар аз ҷалби васеи аҳолӣ ва таъмини иштироки корхона, ташкилоту муассисаҳо новобаста аз шакли моликият, дар амалигардонии чорабиниҳои зерин иборат аст:

- гузаронидани мизҳои мудаввари телевизионӣ;

- чоп намудани хабару мақолаҳо дар воситаҳои ахбори омма оид ба гузаронидани моҳвораи Ҳилоли Аҳмари;

- эълон намудан ва гузаронидани озмунҳои "Ташкилоти ибтидоии намунавӣ" ё "Бахши маҳаллии ҳудудии хуб фаъолияткунандаи Ҷамъияти Ҳилоли Аҳмари Тоҷикистон" (таъсиси Комиссияи озмун, таҳияи низомномаи гузаронидани озмун, ба ғолибон супурдани ҷоизаҳо барои ишголи ҷойҳои 1,2 ва 3);

- гузаронидани мусобиқаҳои варзишӣ дар байни ташкилотҳои ибтидоӣ, бахшҳои маҳаллӣ ва ҳудудии Ҷамъияти Ҳилоли Аҳмари Тоҷикистон;

- эълон намудан ва гузаронидани озмуни "Мақолаи беҳтарин дар мавзӯи фаъолияти башардӯстӣ";

- гузаронидани маъракаҳои хайрия дар хонаҳои бепарсторон, хонаҳои пиронсолон, маҳаллаҳое, ки ба дастгирӣ эҳтиёҷманд мебошанд;

- гузаронидани машқҳои амалӣ ва корҳои иттилотӣ, озмунҳои расмҳои беҳтарин бахшида ба расонидани кӯмаки зарурӣ дар минтақаҳои зери хатари офатҳои табиӣ қарордошта;

- гузаронидани консертҳои хайрия бо мақсади расонидани кӯмак ба аҳолии эҳтиёҷманд аз ҳисоби маблағҳои бадастомада;

- гузаронидани викторинаҳои мухталиф (саволу ҷавоб) мутобиқи талаботи барномаҳои расонидани ёрии аввалияи таъҷилӣ ва таҳкимбахшии саломатии ҷомеа;

- гузаронидани корҳои фаҳмондадиҳӣ оид ба пешгирии бемориҳо тавассути иҷрои лоиҳаю барномаҳои тиббию иҷтимоӣ ва маърифатӣ;

- ҷамъбасти натиҷаҳои моҳвора ва гузаронидани консерти хотимавӣ.

4) Гузаронидани моҳвораи Ҳилоли Аҳмар аз ҷониби Ҷамъияти Ҳилоли Аҳмари Тоҷикистон дар ҳамкорӣ бо вазорату идораҳои дахлдор, мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳо сурат мегирад.

5) Моҳвораи Ҳилоли Аҳмар тибқи барномае, ки аз ҷониби Ҷамъияти Ҳилоли Аҳмари Тоҷикистон тасдиқ карда мешавад, баргузор мегардад.

6) Дар доираи моҳвораи Ҳилоли Аҳмар Ҷамъияти Ҳилоли Аҳмари Тоҷикистон аз майдонҳои варзишӣ, боғ ва дигар иншооти фарҳангӣ- иҷтимоӣ истифода бурда метавонад.

7) Моҳвораи Ҳилоли Аҳмар ҳар сол моҳи май гузаронида мешавад.