Барнома байни Ҳукумати Ҷумҳурии Тоҷикистон ва Ҳукумати Москваи Федератсияи Россия оид ба ҳамкорӣ дар соҳаи мубодилаи меҳнатӣ

Ҳукумати Ҷумҳурии Тоҷикистон ва Ҳукумати Москваи Федератсияи Россия, ки минбаъд Тарафҳо номида мешаванд,

бо дарназардошти кӯшиши халқҳои ҳарду давлат ҷиҳати ҳифз ва таҳкими робитаҳои дӯстонаю анъанаҳои таърихӣ,

бо азми фароҳам овардани шароити мусоид ба шаҳрвандони ҳарду Тараф ва ҳарду давлат ҷиҳати амалӣ намудани фаъолияти меҳнатӣ дар Ҷумҳурии Тоҷикистон ва ҳудуди Москваи Федератсияи Россия,

принсипҳои Аҳдномаи дӯстӣ, ҳамкорӣ ва ёрии ҳамдигар байни Ҷумҳурии Тоҷикистон ва Федератсияи Россияро ба роҳбарӣ гирифта,

дар асоси муқаррароти Созишнома оид ба ҳамкорӣ дар соҳаи муҳоҷирати меҳнатӣ ва ҳифзи иҷтимоии меҳнаткашони муҳоҷир аз 15 апрели соли 1994,

бо мақсади татбиқи якҷояи Созишномаи байни Ҳукумати Ҷумҳурии Тоҷикистон ва Ҳукумати Федератсияи Россия оид ба фаъолияти меҳнатӣ ва ҳифзи ҳуқуқҳои шаҳрвандони Ҷумҳурии Тоҷикистон дар Федератсияи Россия ва шаҳрвандони Федератсияи Россия дар Ҷумҳурии Тоҷикистон аз 16 октябри соли 2004,

бо нияти рушди шакли судманди ҳамкорӣ дар соҳаи муҳочирати меҳнатӣ ва расонидани кӯмак дар ҳалли масъалаҳои ҳамкориҳои судманд, ба мувофиқаи зайл расиданд:

Моддаи 1

Тарафҳо ҳамкориро мувофиқи қонунгузории Ҷумҳурии Тоҷикистон ва Федератсияи Россия, Барномаи мазкур ва бо риояи ӯҳдадориҳои байналмилалии Ҷумҳурии Тоҷикистон ва Федератсияи Россия амалӣ месозанд.

Моддаи 2

Амали Барномаи мазкур нисбати шахсоне, ки шаҳрвандони Ҷумҳурии Тоҷикистон буда, бо тартиби муқарраргардида фаъолияти меҳнатии мувақатиро дар шаҳри Москва амалӣ месозанд, инчунин нисбати шахсоне, ки шаҳрвандони Федератсияи Россия - сокинони шаҳри Москва буда, бо тартиби муқарраргардида фаъолияти меҳнатиро дар Ҷумҳурии Тоҷикистон (минбаъд - кормандони хориҷӣ) амалӣ менамоянд, татбиқ мегардад.

Моддаи 3

Тарафҳо барои ҳалли масъалаҳои вобаста ба иҷрои Барномаи мазкур, мақомоти масьулро ҷиҳати татбиқи Барномаи мазкур муайян менамоянд ва дар ин борп бо тариқи хаттӣ ба якдигар иттилоот манзур менамоянд.

Барои ҳалли масьалаҳои вобаста ба иҷрои Барномаи мазкур Тарафҳо метавонанд гурӯҳҳои кории муштарак таъсис диҳанд, намояндагони худро барои машварат ба Ҷумҳурии Тоҷикистон ё ба шаҳри Москваи Федератсияи Россия оид ба масъалаҳои дар доираи Барномаи мазкур фиристонанд.