Тартиб ва шароити нигоҳдошти ҳудудҳои маҳалҳои аҳолинишин дар Ҷумҳурии Тоҷикистон

1. Муқаррароти умумӣ

1) Ташкил намудани рӯбучини ҳудуд, системаи ҷамъоварии нақшавӣ, нигоҳдории муваққатӣ ва мунтазам баровардани партовҳои сахти маишӣ бояд ба талаботи Тартиб ва шароити нигоҳдошти ҳудудҳои маҳалҳои аҳолинишин дар Ҷумҳурии Тоҷикистонро мутобиқ бошанд.

2) Ба иншооти тозакунии санитарӣ ва рӯбучинӣ ҳудуди хонаҳо, кӯча ва гузаргоҳҳои маҳаллаҳо, гулгашту хиёбонҳо, ҷойҳои истифодаи ҷамъиятӣ ва истироҳат (дохил мешаванд).

3) Дар мавриди мавҷуд будани қарордод бо истифодабарандагон, нигоҳубини ҳудуди шаҳрҳо, ноҳияҳо ва дигар маҳалҳои аҳолинишин аз ҷониби Корхонаи воҳиди давлатии "Хоҷагии манзилию коммуналӣ" гузаронида мешавад.

4) Вобаста намудани ҳудудҳои тозакунии санитарӣ ба корхона, муассиса ва хонаводаҳо ва муқаррар намудани марз, дар асоси санадҳои барӯйхатгирии аз тарафи муассисаҳои бақайдгирии техникӣ пешниҳодшуда, ки бо қарори Ҳукумати Ҷумҳурии Тоҷикистон аз 30 декабри 1998, №513 муқаррар шудаанд ва тибқи қарори мақомоти иҷроияи маҳаллии ҳокимияти давлатӣ (ноҳия, шаҳрак ва шаҳр) гузаронида мешавад. Марзҳо дар Нақшаи генералии ҳудуд аз ҷониби мақомоти меъморӣ ва шаҳрсозӣ дар якҷоягӣ бо мақомоти хоҷагии коммуналӣ дар мувофиқа бо хадамоти назорати давлатии санитарию эпидемиологӣ ва мақомоти ҳифзи муҳити зист гузошта мешаванд. Нусхаи Нақшаи генералӣ дар корхонаҳо, муассисаҳо, ташкилот нигоҳ дошта мешавад.

5) Тавсия дода мешавад, ки ҳудуди тозакунии санитарӣ ба тариқи зайл муайян карда шавад:

- дар кӯчаҳои аз ду тараф дорои биноҳо - бо дарозии майдончаи ишғолшуда то маркази қисми саворагарди роҳ;

- дар кӯчаҳои аз як тараф дорои биноҳо - бо дарозии майдончаи ишғолшуда дар тамоми бари роҳ (дар хатҳои сурх);

- дар майдонҳо - бо пешниҳоди мақомоти хоҷагии коммуналӣ;

- дар роҳҳо, гузаргоҳҳо ба корхонаҳо, маҳаллаҳои истиқоматӣ, гараж, анборхонаҳо ва дигар иншоот - дар тамоми дарозӣ, аз ҷумла қитъаи 10- метра.

6) Марзи ҳудуди тозакунии санитарии майдонҳои қитъаҳои манзилию коммуналӣ, шӯъбаҳои истиқоматию коммуналӣ, корхонаҳои манзилию сохтмонӣ аз ҷониби сардори муассисаи истеҳсолӣ-сохтмонӣ муайян карда мешавад.

7) Марзи ҳудуди тозакунии санитарии ба бино ва хонаҳои алоҳида вобасташуда, ки моликияти хусусии шаҳрвандон ба ҳисоб мераванд, аз ҷониби мақомоти коммуналию хоҷагӣ дар якҷоягӣ бо мақомоти меъморӣ ва шаҳрсозӣ, мақомоти заминсозӣ муайян карда мешавад ва дар шиносномаҳои бюрои бақайдгирии техникӣ ба қайд гирифта мешаванд.

8) Нигоҳубину тозакунии санитарии платформаи роҳи оҳан, ҳудудҳо ва минтақаҳои қад-қади роҳҳои оҳан аз ҷониби мақоми давлатии назорат ва танзим дар соҳаи нақлиёт таъмин карда мешаванд. 9) Нигоҳубину тозакунии санитарии минтақаҳои қад-қади роҳҳои автомобилгард ҷудокардашудаи моҳияти ҷумҳуриявӣ дошта, аз ҷониби муассисаи хизматрасонӣ ва истифодабарии роҳҳои Вазорати нақлиёти Ҷумҳурии Тоҷикистон таъмин карда мешавад.

10) Системаи тозакунии санитарӣ ва рӯбучини ҳудуди шаҳрҳо ва маҳалҳои аҳолинишин бояд ҷамъоварии ратсионалӣ, ба зудӣ бартараф намудан, безараркунии боэътимод ва истифодаи партовҳои маишӣ ва истеҳсолӣ, партов ва рӯфтаниҳои кӯчагиро, ки дар ҳудуди маҳалҳо ҷамъ мешаванд, пешбинӣ намояд.

11) Сардорони муассисаҳо оид ба истифодаи биноҳо, ширкатҳои соҳибмулкони манзил, комендантҳо, роҳбарони муассисаҳои истиқоматию сохтмонӣ, хонаҳо тибқи Қоидаҳои ободонии беруни шаҳрҳо, шаҳракҳо ва маҳалҳои аҳолинишини Ҷумҳурии Тоҷикистон вазифадоранд, дар ҳудуди ба онҳо вобасташуда тозакунии санитариро ташкил намуда, назорат баранд, аз ҷумла:

- таъмир ва рангубори саривақтии биноҳо, пойдеворҳо, тирезаҳо, дарҳо, балконҳо ва панҷараҳо;

- тоза намудани ҳудудҳо аз барфу ях, баровардани партовҳо ва ифлосиҳо ба ҷойҳои махсуси ҷудокардашуда;

- мунтазам тоза ва ҳамвор намудани ҷӯйборчаҳои дохили маҳаллагӣ;

- бо мум (шағал) пӯшидани қисми роҳҳои автомобилгарди кандашуда, пиёдагардҳо ва обрезии рӯйпӯши роҳ;

- ташкили нигоҳубини ниҳолҳои сабз тибқи талаботи санитарӣ (қайчизании буттаҳо ва дарахтони мавсимӣ, буридани дарахтон, бартараф намудани дарахтони хушкшуда ва бемор), мунтазам даравидани алафҳо ва нобуд сохтани растаниҳои бегона;

- нигоҳ доштан, таъмир, рангубор ва тоза кардани иншоотҳои хурди меъморӣ.

12) Нигоҳубин ва тозакунии санитарию экологии хатти муҳофизатии ҷӯю каналҳо (манбаъҳои обӣ), ки аз ҳудуди шаҳрҳо, ноҳияҳо ва маҳаллаҳои аҳолинишин мегузаранд, аз тарафи мақомоти дахлдор таъмин карда мешаванд.

13) Назорати тартиб ва шароити нигаҳдошти ҳудудҳои нуқтаҳои аҳолинишин дар Ҷумҳурии Тоҷикистон аз тарафи Хадамоти назорати давлатии санитарию эпидемиологии Вазорати тандурустии Ҷумҳурии Тоҷикистон ва Кумитаи ҳифзи муҳити зисти назди Ҳукумати Ҷумҳурии Тоҷикистон амалӣ карда мешавад.