Низомномаи Агентии омори назди Президенти Ҷумҳурии Тоҷикистон

1) Агентии омори назди Президенти Ҷумҳурии Тоҷикистон (минбаъд Агентӣ) мақомоти давлатии соҳаи сиёсати баҳисобгирии оморӣ ва таҳлили иқтисодӣ буда, дар фаъолияти худ ба Президенти Ҷумҳурии Тоҷикистон тобеъ мебошад.

2) Агентӣ дар фаъолияти худ Конститутсияи  Ҷумҳурии Тоҷикистон, қонунҳои Ҷумҳурии Тоҷикистон "Дар бораи хизмати давлатӣ" ва "Дар бораи омори давлатӣ", санадҳои меъёрии ҳуқуқии Маҷлиси Олии Ҷумҳурии Тоҷикистон, фармонҳо ва амрҳои Президенти Ҷумҳурии Тоҷикистон, қарору фармоишҳои Ҳукумати Ҷумҳурии Тоҷикистон, Низомномаи мазкур, инчунин санадҳои меъёрии ҳуқуқии байналмилалии эътирофнамудаи Ҷумҳурии Тоҷикистонро ба роҳбарӣ мегирад  (Фармони Президенти ҶТ аз 14.12.2020 № 110).

3) Агентӣ фаъолияти худро дар ҷамъовардан ва паҳн намудани иттилооти оморӣ, дар асоси принсипҳои омӯзиши объективӣ ва ҳаматарафаи равандҳои иҷтимоию иқтисодӣ, ки дар ҷумҳурӣ ба вуҷуд меоянд, амалӣ мегардонад, бақайдгирии воҳидҳои марзиву маъмурӣ ва маҳалҳои аҳолинишинро ба ҷо меорад (Фармони Президенти ҶТ аз 30.10.2013, № 1527).

4) Системаи ягонаи давлатии омори Ҷумҳурии Тоҷикистонро Агентӣ, Муассисаи давлатии "Маркази кулли ҳисоббарорӣ", сарраёсатҳо, раёсатҳо, шӯъбаҳо ва бахшҳои Агентӣ дар Вилояти Мухтори Кӯҳистони Бадахшон, вилоятҳо, шаҳри Душанбе, шаҳрҳо ва ноҳияҳо ташкил медиҳанд.

5) Методологияи нишондиҳандаҳои омории мутобиқ ба стандартҳои байналмилалӣ, шаклҳо, усулҳои ҷамъовардан ва коркарди маълумота оморӣ, ки Агентӣ муқаррар кардааст, стандартҳои расмии омории Ҷумҳурии Тоҷикистон мебошанд.

6) Агентӣ дар фаъолияти худ Барномаи корҳои омориро, ки Ҳукумати Ҷумҳурии Тоҷикистон тасдиқ мекунад, ба роҳбарӣ мегарад.

7) Агентӣ корҳои омориеро, ки ба Барномаи корҳои оморӣ дохил нестанд, аз ҳисоби маблағи фармоишгар, аз ҷумла аз рӯи фармоиши мақомоти иҷроияи маҳаллии ҳокимияти давлатӣ аз ҳисоби маблағи буҷетҳои маҳаллӣ иҷро мекунад.

8) Вазифаҳои асосии Агентӣ:

- ба Президенти Ҷумҳурии Тоҷикистон, Маҷлиси миллии Маҷлиси Олии Ҷумҳурии Тоҷикистон, Маҷлиси намояндагони Маҷлиси Олии Ҷумҳурии Тоҷикистон, Ҳукумати Ҷумҳурии Тоҷикистон, вазорату идораҳо, мақомоти иҷроияи маҳаллии ҳокимияти давлатӣ тибқи мувофиқа бо Президенти Ҷумҳурии Тоҷикистон (аз рӯи рӯйхати тасдиқшуда 1 нусха ба таври ройгон), инчунин ба аҳли ҷомеа ва ташкилотҳои байналмилалӣ (пулакӣ) пешниҳод намудани иттилооти расмии оморӣ;

- такмили методологияи ягонаи илмии оморӣ ташкили баҳисобгирии оморӣ ва системаи нишондиҳандаҳои оморӣ, ки ба талаботи ҷомеа дар давраи ҳозира, инчунин ба стандартҳои байналмилалӣ мувофиқ бошад;

- таҳияи иттилооти иқтисодию оморӣ, таҳлили он, тартиб додани ҳисоби миллӣ, ҳисоби тавозуни зарурӣ;

- ҳамоҳанг сохтани фаъолияти омории мақомоти иҷроияи ҳокимияти давлатӣ;

- таъмини иттилооти расмии омории фаврӣ, мӯътамад, пурраю сифатнок ва илман асосноккардашуда;

- ба ҳамаи истифодабарандагон дастрасии баробар ба иттилооти омории ошкор тавассути паҳн кардани гузоришҳои расмӣ дар бораи вазъи иҷтимоию иқтисодии Ҷумҳурии Тоҷикистон, вилоятҳо, шаҳрҳо, ноҳияҳо, соҳаҳои иқтисодиёт, табъу нашри маҷмӯаҳои оморӣ ва дигар маводи оморӣ:

- тибқи тартиби муқарраргардида муайян ва тасдиқ намудани таснифоти умумии намудҳои фаъолияти иқтисодии Ҷумҳурии Тоҷикистон.

9) Агентӣ мувофиқи вазифаҳои ба зиммааш гузошташуда:

- аз рӯи барнома, шаклҳо ва методологияи таҳия ва тасдиқкардаи Агентӣ гузаронидани мушоҳидаҳои омории давлатиро ташкил мекунад, барномаҳои гузаронидани мушоҳидаи омории соҳавӣ (идоравӣ)-ро мутобиқ месозад, дар ҳудуди Ҷумҳурии Тоҷикистон барӯихатгирии аҳолӣ, фонди манзил ва хоҷагии кишоварзиро мегузаронад, омори хоҷагиҳои хонаводаҳо, омори инкишофи ҳар гуна шаклҳои хоҷагидорӣ ва намудҳои фаъолияти соҳибкориро ташкил мекунад;

- фаъолияти феҳристи давлатии корхонаҳо ва дигар ташкилотҳоро дар асоси баҳисобгирии ҳамаи субъектҳои хоҷагидорӣ дар ҳудуди Ҷумҳурии Тоҷикистон таъмин мекунад ва ба онҳо бо назардошти таснифоти иттилоотии техникию иқтисодӣ ва иҷтимоӣ рамзҳои мушобеҳ медиҳад;

- муносибати ягонаи вазорату идораҳоро ба ташаккули феҳристҳои мақсаднок таҳия мекунад;

- ҷамъовардан, коркард, нигаҳдорӣ ва муҳофизати иттилооти оморӣ, махфӣ нигоҳ доштани сирри давлатӣ ва тиҷоратӣ, ҳифзи манфиатҳои қонунии шахсони ҳуқуқӣ ва воқеиро таъмин мекунад;

- нишондиҳандаҳои асосии иҷтимоию иқтисодии Ҷумҳурии Тоҷикистонро бо нишондиҳандаҳои байналмилалӣ муқоиса мекунад;

- якҷоя бо Бонки миллии Тоҷикистон дар асоси маълумоти аз вазорату идораҳо ва дигар мақомот гирифташуда тавозунҳои пардохтро тартиб медиҳад;

- якҷоя бо Вазорати молияи Ҷумҳурии Тоҷикистон барои субъектҳои хоҷагидор, сарфи назар аз шаклҳои ташкилию ҳуқуқӣ, шаклҳои ҳисоботи муҳосибавиро тасдиқ мекунад;

- барои субъектҳои хоҷагидори ҳамаи шаклҳои моликият ва намудҳои фаъолияти иқтисодӣ, ки дар қаламрави ҷумҳурӣ мебошанд ва вобаста ба иқтисоди бозорӣ ба миён меоянд, шаклҳои ҳисоботи омориро тасдиқ менамояд, доир ба пур кардани шаклҳои ҳисоботи оморӣ дастурамалҳо ва тавсияҳои методологӣ тартиб медиҳад;

- сиёсати ягонаи технологияи ҷамъовардан, таҳия ва интиқоли ахбори оморӣ техникиро таъмин мекунад;

- бо тартиби муқарраргардида ҷиҳати такмили қонунгузории соҳаи омор ва баҳисобгирӣ таклифҳо пешниҳод мекунад, инчунин барои афзудани самараи корҳои ҳуқуқии Агентӣ ва мақомоти маҳаллии он тадбирҳо меандешад;

- барои истифодаи самараноки воситаҳои электронии ҳисоббарорӣ ва ташкилӣ, навсозии онҳо шароит муҳайё мекунад, технологияҳои навтарини тахия ва интишори иттилоот, маҳсулоти барномавии муосир, системаи идораи махзани маълумот, системаҳои таҳлилӣ ва иттилоотию маълумотдиҳиро татбиқ менамояд;

- ба шахсони ҳуқуқӣ ва воқеӣ, инчунин ташкилотҳои байналмилалӣ, мувофиқи шартномаю қарордодҳои хоҷагӣ, дархостҳои яквақтаина, хизмати пулакии итгилоотию таҳлилӣ мерасонад;

- корхонаҳо, муассисаҳо ва дигар ташкилотҳои дар қаламрави ҷумҳурӣ бударо бо варақаҳои шаклҳои мутамаркази ҳисоботи оморӣ ва дастурамал барои пуркунии онҳо оид ба тартиби таҳия ва пешниҳоди ҳисоботи оморӣ таъмин менамояд;

- оид ба тағйирёбии нарху тариф дар ҷумҳурӣ мушоҳидаи оморӣ ташкил мекунад ва дар ҳамин асос сохти системаи намояи нархҳо, намояи дефляторҳоро таъмин мекунад ва барои истифодабарандагон иттилоот таҳия месозад.

10) Агентӣ ҷиҳати ҳалли масъалаҳо ва иҷрои вазифаҳои ба зиммааш гузошташуда ҳуқуқҳои зерин дорад:

- доир ба масъалаҳои омор ва баҳисобгирӣ фармонҳо мебарорад, ки иҷрои онҳо барои ҳамаи субъектҳои хоҷагидор, сарфи назар аз тобеияти идоравӣ ва шакли моликияташон, инчунин барои шахсони воқеӣ, ки бо фаъолияти соҳибкорӣ машғуланд, ҳатмист;

- аз ҳамаи шахсони ҳуқуқӣ ва воқеии дар қаламрави Ҷумҳурии Тоҷикистон қарордошта, сарфи назар аз шакли моликият, намуди фаъолияти иқтисодӣ ва тобеияти идоравӣ, аз он ҷумла аз мақомоти иҷроияи маҳаллии ҳокимияти давлатии Ҷумҳурии Тоҷикистон дар мӯҳлатҳои муқарраршуда дар ҳаҷми пурра тариқи ройгон ҳисоботи дақиқи оморӣ (аз он ҷумла сирри тиҷоратдошта) гирад;

- аз хадамоту идораҳои молия, бонк, гумрук, андоз ва дигар хадамоту идораҳо, инчунин аз ташкилотҳои хориҷӣ ва ҷамъиятӣ маълумоти оморӣ гирад ва истифода барад;

- аз шаҳрвандон роҷеъ ба вазъи иҷтимоию демографӣ ва фаъолияти истеҳсолиашон варақаи пурсиши мушоҳидаҳои оморӣ гирад;

- дар корхонаю муассисаҳо ва ташкилотҳои ҷумҳурӣ вазъи баҳисобгирии аввалия ва дақиқии маълумоти омориро санҷад ва дар баҳисобгирии аввалия ва дигар нишондиҳандаҳои ба ҳам алоқаманд ислоҳу тағйиротро ворид намояд. Шахсони дахлдори ҳуқуқӣ ва воқеиро вазифадор намояд, ки ин ислоҳотро дар баҳисобгарии аввалия сабт кунанд;

- иҷрои санадҳои меъёрии ҳуқуқӣ оид ба масъалаҳои оморро назорат намояд;

- нисбат ба шахсони мансабдор барои таҳриф кардан ё ба мақомоти давлатии омор пешниҳод накардани ҳисоботи оморӣ, мувофиқи тартиби муқаррарнамудаи қонунгузорӣ тадбирҳо андешад;

- тартиботи пешниҳоди ҳисоботи омории давлатиро муайян кунад;

- оид ба масъалаҳои салоҳияти Агентӣ тибқи тартиби муқарраргардида машварат, семинарҳо, аз ҷумла конфронсҳои байналмилалӣ гузаронад;

- тибқи тартиби муқарраргардида дар ташкилотҳои байналмилалӣ манфиатҳои ҷумҳуриро муаррифӣ карда, аз номи он оид ба масьалаҳои баҳисобгирӣ ва омор шартномаҳо мебандад;

- бо тартиби муқаррарнамуда ҳамчун фармоишгари давлатӣ амал кунад, бо иштироки вазорату идораҳо, ташкилотҳои илмӣ ва дигар ташкилотҳо доир ба коркарди маълумоти оморӣ барномаҳои мақсаднок таҳия намояд;

- бо тартиби муқарраршуда кормандони арзандаро ба унвонҳо ва мукофотҳои давлатии Ҷумҳурии Тоҷикистон пешниҳод намояд;

- шахсони вайронкунандаи қонунгузории соҳаи оморро тибқи тартиби муқарраргардида ба ҷавобгарӣ кашад.

11) Агентиро Директор роҳбарӣ мекунад, ки ӯро Президенти Ҷумҳурии Тоҷикистон ба вазифа таъин ва аз вазифа озод мекунад. Директори Агентӣ бевосита ба Президенти Ҷумҳурии Тоҷикистон итоат мекунад.

12) Директори Агентӣ дорои се муовин, аз ҷумла як муовини якум мебошад, ки онҳоро Президенти Ҷумҳурии Тоҷикистон ба вазифа таъин ва аз вазифа озод мекунад.

13) Дирекгори Агентӣ:

- аз номи Агентӣ амал мекунад, дар Ҷумҳурии Тоҷикистон ва хориҷи кишвар манфиатҳои онро муаррифӣ менамояд, аз рӯи ҳамаи масьалаҳои фаъолияти Агентӣ қарор қабул мекунад;

- барои иҷрои вазифаҳои ба зиммаи Агентӣ гузошташуда шахсан ҷавобгар мебошад, доираи ваколати муовинони Директор ва роҳбарони воҳидҳои сохториро муқаррар мекунад;

- кормандони Дастгоҳи марказии Агентӣ, роҳбар ва муовинони роҳбари Муассисаи давлатии "Маркази кулли ҳисоббарорӣ", роҳбарони сарраёсатҳо, раёсатҳо, шӯъбаҳо ва бахшҳои омории шаҳрҳо ва ноҳияҳоро тибқи тартиби муқарраргардида ба вазифа таъин ва аз вазифа озод мекунад, онҳоро мувофиқи қонунгузории Ҷумҳурии Тоҷикистон ҳавасманд мекунад ва ҷазои интизомӣ медиҳад;

- дастурамалҳои мансабии хизматчиёни давлатии Агентиро тасдиқ менамояд;

- харҷнома ва ҷадвали воҳидҳои кории Агентиро дар доираи фонди пардохти музди меҳнат ва шумораи кормандони аз ҷониби Президенти Ҷумҳурии Тоҷикистон муқарраргардида, харҷномаи нигаҳдории онро дар доираи маблағҳои барои давраи дахлдор тасдиқгардида, ки дар буҷети ҷумҳуриявӣ пешбинӣ шудаанд, тасдиқ менамояд;

- ба Президенти Ҷумҳурии Тоҷикистон нақшаи кори омории ҳарсола, инчунин ҳисобот оид ба иҷрои онро пешниҳод менамояд;

- тибқи тартиби муқарраргардида лоиҳаҳои санадҳои меъёрии ҳуқуқиро оид ба масъалаҳои марбут ба салоҳияти Агентӣ таҳия менамояд;

- қарорҳои хилофи қонунгузории Ҷумҳурии Тоҷикистон қабулнамудаи воҳидҳои сохтории Агентиро бекор мекунад, агар тартиби дигари бекор кардани онҳо муқаррар нашуда бошад;

- дар доираи ваколати худ ба хизматчиёни давлатии Агентӣ рутбаҳои тахассусӣ медиҳад;

- аъзои ҳайати мушовараи Агентиро барои тасдиқ ба Президенти Ҷумҳурии Тоҷикистон пешниҳод менамояд;

- санадҳои меъёрии ҳуқуқӣ ва хусусияти ғайримеъёрӣ доштаро дар доираи салоҳияти худ қабул менамояд.

14) Агентӣ дорои ҳайати мушовара иборат аз 7 нафар мебошад, ки онро Директор роҳбарӣ мекунад.

15) Аъзои ҳайати мушовараи Агентиро Президенти Ҷумҳурии Тоҷикистон тасдиқ мекунад.

16) Дар назди Агентӣ Шӯрои байниидоравии оморӣ амал мекунад, ки Низомномаи онро Президенти Ҷумҳурии Тоҷикистон тасдиқ мекунад.

17) Низомнома, сохтор ва шумораи ниҳоии кормандони Агенгиро Президенти Ҷумҳурии Тоҷикистон тасдиқ мекунад. Ҷадвали штатҳо, харҷномаи Дастгоҳи марказии Агентӣ ва воҳидҳои сохтории онро дар ҳаҷми шумораи муқарраршуда ва фонди музди меҳнат, инчунин Низомномаи воҳидҳои сохтории тобеи Агентиро Директори Агентӣ тасдиқ мекунад.

18) Дар ҳалли масъалаҳои марбут ба салоҳияти Агентӣ ва сохторҳои вилоятӣ, ноҳиявӣ ва шаҳрии он дахолати мақомоти иҷроияи марказӣ ва маҳаллии ҳокимияти давлатӣ манъ аст.

19) Маблағгузории хароҷоти нигоҳдории Агентӣ аз ҳисоби маблағҳои буҷети ҷумҳуриявӣ ва дигар маблағҳо дар мувофиқа бо Вазорати молияи Ҷумҳурии Тоҷикистон анҷом дода мешавад.

20) Агенгӣ дар асоси санадҳои меъёрии ҳукуқии Ҷумҳурии Тоҷикистон фармонҳо мебарорад, ки иҷрои онҳо барои воҳидҳои сохтории Дастгоҳи марказӣ, мақомоти маҳаллии омор ва дигар мақомоти давлатӣ ҳатмист.

21) Агентӣ шахси ҳуқуқӣ буда, мӯҳри худро дорад, ки дар он тасвири Нишони давлатии Ҷумхурии Тоҷикисгон ва номи Агентӣ бо забони давлатӣ сабт шудааст, инчунин мӯҳрҳо, штампҳо, бланкҳои дахлдор дорад ва аз суратҳисоби ягонаи Сарраёсати хазинадории марказии Вазорати молияи Ҷумҳурии Тоҷикистон маблағгузорӣ мегардад.

22) Маҳали ҷойгиршавии Агетӣ-шаҳри Душанбе, кӯчаи Бохтар, 17 мебошад.

Сохтори Дасттоҳи марказии Агентии омори назди Президенти Ҷумҳурии Тоҷикистон

Роҳбарият

Раёсати методология ва таснифот

Раёсати ҷамъбасту таҳлили иқтисодӣ ва робитаҳои байналмилалӣ

Раёсати омори саноат ва инвеститсияҳо дар сохтмон

Раёсати омори кишоварзӣ ва ҳифзи муҳити зист

Раёсати системаи ҳисобҳои миллӣ ва омори молия

Раёсати нархҳо ва тарифҳо

Раёсати омори демографӣ, шуғли аҳолӣ ва иҷтимоӣ Раёсати омори савдо ва хизматрасонӣ

Раёсати корҳо

Шӯъбаи молия ва ҳисобот

Бахши ҳуқуқ

Нақшаи идоракунии Агентии омори назди Президенти Ҷумҳурии Тоҷикистон

Дастгоҳи марказӣ

Сарраёсати Агентии омори назди Президенти Ҷумҳурии Тоҷикистон Вилояти Мухтори Кӯҳистони Бадахшон, раёсату шӯъба ва бахшҳои шаҳриву ноҳиявии он

Сарраёсати Агентии омори назди Президенти Ҷумҳурии Тоҷикистон дар вилояти Суғд, раёсату шӯъба ва бахшҳои шаҳриву ноҳиявии он

Сарраёсати Агентии омори назди Президенти Ҷумҳурии Тоҷикистон дар вилояти Хатлон, раёсату шӯъба ва бахшҳои шаҳриву ноҳиявии он

Сарраёсати Агентии омори назди Президенти Ҷумҳурии Тоҷикистон дар шаҳри Душанбе ва шӯъбаҳои ноҳиявии он

Раёсат, шӯъба ва бахшҳои Агентии омори назди Президенти Ҷумҳурии Тоҷикистон дар шаҳру ноҳияҳои тобеи ҷумҳурӣ

Номгӯи ташкилотҳои системаи Агентии омори назди Президенти Ҷумҳурии Тоҷикистон

Муассисаи давлатии "Маркази кулли ҳисоббарорӣ"-и Агентии омори назди Президенти Ҷумҳурии Тоҷикистон