Бо қарори Ҳукумати ҶТ аз 26.02.2015 № 66 аз эътибор соқит дониста шуд.

Тартиби расонидани хизмати пулакии байторӣ дар Ҷумҳурии Тоҷикистон

1. Муқаррароти умумӣ

1) Тартиби мазкур мутобиқи қонунҳои Ҷумҳурии Тоҷикистон "Дар бораи байторӣ" ва "Дар бораи ҳимояи ҳуқуқи истеъмолкунандагон" таҳия шуда, қоида ва шартҳои пешниҳоди хизмати пулакии байториро ба шаҳрвандон ва субъектҳои фаъолияти хоҷагидорӣ новобаста ба шакли моликият - соҳибони ҳайвонот муайян мекунад.

2) Тартиби мазкур қоидаҳои хизмати байториро, ки бо тартиби кафолатҳои давлатӣ аз ҳисоби маблағи буҷетҳои ҳамаи сатҳҳо, маблағи фондҳои махсуси байторӣ ва сарчашмаҳои дигари маблағгузории мақсаднок пардохт мегарданд, муайян намекунад.

3) Ба хизматҳои пулакии байторӣ инҳо мансубанд:

- чорабиниҳои клиникӣ, табобатаю профилактикӣ, байторию санитарӣ, терапевтӣ, ҷарроҳӣ, акушерӣ - гинекологӣ, зиддиэпизоотӣ, чорабиниҳои санитарию гигиенӣ, эмкунӣ (фаъол ва мафъул), дезинфексия, дезинсексия, дератизатсия, дегелминтизатсия;

- ҳамаи намудҳои таҳқиқотҳои лабораторӣ (ба истиснои номгӯи бемориҳои ҳайвонот, ки ташхис ва пешгирии хоссаи онҳо барои ҳамаи категорияи хоҷагиҳо ва шаҳрвандон аз ҳисоби буҷети давлатӣ сурат мегиранд), ташхиси байторию санитарии гӯшт, маҳсулоти чорво ва растанипарварӣ;

- таҳқиқот ва дигар чорабиниҳои байторӣ, ки ба фурӯши чорвои зотӣ, иштирок дар намоишҳо ва мусобиқот, фурӯш ба хориҷи кишвар ва дигар мақсадҳои тиҷоратӣ алоқаманд мебошанд;

- муайян кардани бордорӣ ва ҳомилаи ҳамаи намудҳои чорво, гирифтан ва гузаронидани эмбрионҳо ва дигар чорабиниҳои вобаста ба зиёдшавии чорво, парранда, моҳӣ, занбӯри асал ва ҳамлу нақли онҳо;

- ба расмиятдарорӣ ва додани ҳуҷҷатҳои байторӣ (шаҳодатномаи байтории гузариш, сертификатҳо, маълумотномаҳо, шиносномаҳо, шаҳодатномаи бақайдгирӣ ва ғайраҳо);

- маслиҳатҳо оид ба масъалаҳои ташхис, табобат, пешгирии ҳама намуди касалиҳо ва технологияи нигаҳдории чорво;

- додани шаҳодатномаи мутобиқати байторию санитарии шароити истеҳсолии шахсони воқеӣ ва ҳуқуқие, ки ба куштани ҳайвонот, истеҳсол, коркард, нигоҳдорӣ, интиқол, фурӯши гушт, маҳсулоти гӯштӣ, ашёи хоми ҳайвонот, инчунин ба воридоту содироти чунин маҳсулот дар Ҷумҳурии Тоҷикистон машғуланд;

- барасмиятдарории хулосаҳои байторӣ оид ба сохтмони иншооти таъиноти байторӣ;

- сӯзонидан, эвтаназия (маҷбуран куштан) ва дигар хизматрасониҳои байторӣ.

2. Маълумот дар бораи хизматҳои байтории пулакӣ, тартиби пур кардани шартномаҳо ва пардохти хизматрасонӣ

4) Корхона, муассиса ва ташкилотҳое, ки ҳуқуқи хизмати пулакии байториро доранд, вазифадор мебошанд, ки дар бораи касб ва шакли ташкилии фаъолият, номгӯи фирмавӣ, суроға ва реҷаи кор навиштаҷот дошта бошанд.

5) Мутахассиси соҳаи байторӣ, ки ба фаъолияти соҳибкорӣ машғул аст, бояд ба ниёзманд (субъекте, ки ба ӯ хизмати пулакии байторӣ расонида мешавад) дар бораи бақайдгирӣ ва номгӯи мақоми онро бақайдгирифта, иҷозатнома (литсензия) барои анҷом додани фаъолияти хизмати байтории пулакӣ, мазмуни онҳо ва дигар маълумоти заруриро пешниҳод намояд.

6) Иҷрокунанда (субъекте, ки хизмати пулакии байториро мерасонад) бояд ба ниёзманд маълумотро дар шакли аёнӣ ва дастрас оид ба хизмати байторӣ (корҳои иҷрошаванда) пешниҳод намояд. Ин маълумот бояд дар ҷои намоён гузошта шуда, ҳатман маълумоти зеринро дар бар гирад:

- номгӯи намудҳои асосии хизматрасониҳои байтории пулакӣ ва шакли пешниҳоди онҳо;

- тарифҳои хизматрасониҳои байторӣ, ки аз ҷониби мақоми ваколатдори байтории Вазорати кишоварзии Ҷумҳурии Тоҷикистон бо Хадамоти зиддиинҳисориии назди Ҳукумати Ҷумҳурии Тоҷикистон мувофиқашуда, бо нишондоди рақам ва санаи тасдиқи он;

- иҷозатнома (литсензия) оид ба фаъолияти хизмати пулакии байторӣ;

- намунаю воситаҳо доруворӣ ва ғайра;

- воситаҳои таъиноти байторӣ, ки ҳангоми хизмати пулакии байторӣ истифода мешаванд;

- намунаҳои варақаҳои тасдиқшудаи шартномаҳо, квитансияҳо, тамғаҳо, забонхат, талонҳо ва дигар ҳуҷҷатҳои шаҳодатдиҳандаи иҷро ва пардохти ҳаққи хизмат;

- маълумот дар бораи имтиёзҳое, ки мутобиқи қонунгузории Ҷумҳурии Тоҷикистон ба категорияи алоҳидаи ниёзмандон (маъюбон, иштирокчиёни Ҷанги Бузурги Ватанӣ ва монанди инҳо) пешбинӣ гардидааст;

- ҳуҷҷатҳои меъёрӣ оид ба масъалаҳои хизматрасонии байторӣ ба ҳайвонот;

- маълумот дар бораи мақоми ҳифзи хуқуқҳои истеъмолкунандагон;

- маълумот дар бораи маҳали ҷойгиршавии иҷрокунанда ва маҳали ҷойгиршавии ташкилоти ваколатдори қабулкунандаи шикояти ниёзмандон.

3. Тартиби пешниҳоди хизмати пулакии байторӣ

7) Иҷрокунанда истифодаи воситаҳои доруворӣ ва усулҳоеро, ки ҳангоми ташхис, табобату, пешгирӣ таъсири манфиро ба чорво бартараф, дорувории баландсифати байторӣ ва усулҳои таъсиррасонии байториро таъмин менамояд.

8) Иҷрокунанда бехатарии чорабиниҳои байторцро барои саломатӣ, маҳсулнокии ҳайвонот, ҳаёт ва саломатии истеъмолкунанда ва инчунин муҳити атрофро кафолат медиҳад.

9) Истеъмолкунанда вазифадор аст:

- ба иҷрокунанда ба талаби он чорворо барои азназаргузаронӣ пешниҳод намояд, бетаъхир дар бораи ҳама гуна ҳодисаҳои вобаста бо фавти ногаҳонӣ ва ё касалшавии оммавии яквақтаи чорво ва дар бораи рафтори ғайримуқаррарии ҳайвонот хабар диҳад;

- барои ҷудо нигоҳ доштани ҳайвоноти ба касали гумонбар то омадани иҷрокунанда чораҳо андешад;

- фурӯши гӯшт, шир, маҳсулоти гӯштӣ ва ширӣ, тухм ва дигар маҳсулоти чорворо қатъиян баъди гузаронидани ташхиси байторию санитарӣ ва гирифтани хулосаи иҷрокунанда дар бораи хӯрданибоб будани онҳо ба роҳ монад;

- нигоҳдории чорво ва хӯрокаи онро мутобиқи талаботи зоогигиенӣ инчунин гузаронидани чорабиниҳри табобатию профилактикии ҳатмиро дар мӯҳлаташ, ки дар дастурҳо, нишондодҳо тавсияномаҳои нигаҳдории чорво муайян шудаанд, таъмин намояд.

4. Қабул ва барасмиятдарории дархостҳо барои хизмати пулакии байторӣ

10) Иҷрокунанда дархостҳоро барои хизмати пулакии байторӣ мутобиқи касбу фаъолияташ қабул менамояд.

11) Хизмати пулакии байторӣ аз ҷониби иҷрокунанда дар асоси бастани шартнома, барасмиятдарории хизмати мизоҷӣ ё додани тамға, купон, чеки кассавӣ, варақа ё дигар ҳуҷҷатҳои намунаашон муқарраршуда анҷом дода мешавад.

12) Иҷрокунанда вазифадор аст, ки сари вақт ниёзмандонро дар бораи эҳтимолан мураккабшавӣ ва тартиботи чораҳои пешгирӣ намудан, инчунин дар бораи дигар ҳолатҳои ба иҷрокунанда вобастанабуда, ки ба сифати хизматрасонӣ таҳдид мекунад, огоҳ намояд.

13) Агар ниёзманд ба огоҳсозии иҷрокунанда нигоҳ накарда, чораҳои пешгирикунанда ё тағйирдиҳии ҳолатро, ки ба сифати хизматрасонӣ таҳдид менамояд бартараф насозад, иҷрокунанда ҳуқуқ дорад шартномаро бекор созад ва талофи зарари ба ӯ расонидашударо талаб намоад.

14) Агар иҷрокунанда сари вақт ниёзмандро дар бораи ҳолатҳои мураккабшавии хизматрасонӣ огоҳ ва дар ин бора дар ҳуҷҷати намунаи муқарраршуда қайд накарда бошад, вай барои хизматрасонии номуносиб мутобиқи қонунгузории Ҷумҳурии Тоҷикистон ҷавобгар аст.

5. Тартиб ва шакли пардохти хизматрасонӣ

15) Шаклҳои пардохти хизматрасонӣ бо созишномаи байни ниёзманд ва иҷрокунанда мутобиқи тарифҳои хизматҳои байторӣ, ки аз ҷониби мақоми ваколатдори байтории Вазорати кишоварзии Ҷумҳурии Тоҷикистон дар мувофиқа бо Хадамоти зиддиинҳисориии назди Ҳукумати Ҷумҳурии Тоҷикистон тасдиқ шудааст, бо варақаҳо муайян мегардад, ки он варақаи қатъии ҳисоботӣ маҳсуб меёбад.

16) Маблағҳое, ки аз фаъолияти ташкилотҳои байтории давлатии хизмати пулакии байторӣ расонанда, ҷамъ мешаванд ба мақсади инкишофи Хадамоти назорати давлатии байтории Ҷумҳурии Тоҷикистон тавассути системаи фондҳои инкишофи Хадамоти назорати давлатии байторӣ бо тартиби муқарраркардаи қонунугзории Ҷумҳурии Тоҷикистон истифода мегарданд.

17) Назорати истифодаи мақсадноки ин маблағҳо ба зиммаи Вазорати кишоварзии Ҷумҳурии Тоҷикистон гузошта мешавад.

6. Муқаррароти хотимавӣ

18) Ташкилотҳои байторӣ новобаста ба шакли моликият ӯҳдадоранд, ки ҳисоботи оморӣ ва муҳосибавии хизмати пулакии байториро тартиб диҳанд ва тибқи санадҳои меъёрию ҳуқуқии амалкунанда дар мӯҳлатҳои муқарраршуда ба мақомотҳои дахлдор ва болоии худ пешниҳод намоянд.

19) Барои вайрон кардани Тартиби мазкур шахсони воқеӣ ва ҳуқуқӣ мутобиқи қонунгузории Ҷумҳурии Тоҷикистон ҷавобгар мебошанд.