Ҳукумати Ҷумҳурии Тоҷикистон

ҚАРОР

Дар бораи тасдиқ намудани шакли бланкҳои сабти асноди ҳолати шаҳрвандӣ ва бланки шаҳодатномаҳое, ки дар асоси сабтҳо дода мешаванд, бланки дигар ҳуҷҷатҳое, ки фактҳои бақайдгирии давлатии асноди ҳолати шаҳрвандиро тасдиқ мекунанд ва шакли варақаҳои ариза дар бораи бақайдгирии давлатии асноди ҳолати шаҳрвандӣ

Мутобиқи моддаи 4 Қонуни Ҷумҳурии Тоҷикистон "Дар бораи бақайдгирии давлатии асноди ҳолати шаҳрвандӣ" Ҳукумати Ҷумҳурии Тоҷикистон қарор мекунад:

1. Шакли бланкҳои сабтҳои асноди ҳолати шаҳрвандӣ: таваллуд, вафот, ақди никоҳ, бекор кардани ақди никоҳ, фарзандхондӣ, муқаррар намудани падарӣ, иваз намудани насаб, ном ва номи падар, барқарор намудани сабти асноди таваллуд, шакли бланкҳои дигар ҳуҷҷатҳое, ки факти бақайдгирии асноди ҳолати шаҳрвавдиро тасдиқ мекунанд ва шакли варақаҳои ариза дар бораи бақайдгирии давлатии асноди ҳолати шаҳрвандӣ (замимаҳои 1-71) тасдиқ карда шаванд.

2. Шакли бланкҳои ҳисоботии қатъии зерин мавриди истифода қарор дода шаванд:

- шаҳодатномаҳои таваллуд ва фарзандхондӣ -аз 1 январи соли 2011;

- шаҳодатномаҳои ақди никоҳ ва вафот - аз 1 феврали соли 2011;

- шаҳодатномаҳои бекор кардани ақди никоҳ ва иваз намудани насаб, ном ва номи падар - аз 1 марти соли 2011;

- шаҳодатномаи муқаррар намудани падарӣ - аз 1 январи соли 2012 (Қарори Ҳукумати ҶТ аз 30.12.2010 № 716).

3. Арзиши 1 адад бланки ҳисоботи қатъии сабти асноди ҳолати шаҳрвандӣ ба андозаи 20 фоиз аз нишондиҳанда барои ҳисобҳо муқаррар карда шуда, маблағи он ба суратҳисоби махсуси Вазорати адлияи Ҷумҳурии Тоҷикистон интиқол карда шавад(Қарори Ҳукумати ҶТ аз аз 30.04.2012 № 213).

4. Аз 1 марти соли 2020 дар мақомоти сабти асноди ҳолати шаҳрвандӣ дар баробари шакли дастнависшуда инчунин шаклҳои тариқи низоми электронии давлатии сабти асноди ҳолати шаҳрванди чопшавандаи бланкҳои шаҳодатномаҳои таваллуд, вафот, ақди никоҳ, бекор кардани ақди никоҳ, фарзандхондӣ, муқаррар кардани падарӣ, иваз намудани насаб, ном ва номи падар тибқи талаботи пешбининамудаи замимаҳои 1-7 қарори мазкур ҷорӣ карда шаванд. Муқаррар карда шавад, ки аз тарафи бахшҳои ноҳия ва шаҳрии сабти асноди ҳолати шаҳрвандӣ додани шаҳодатномаҳои таваллуд, вафот, ақди никоҳ, бекор кардани ақди никоҳ, фарзандхондӣ, муқаррар кардани падарӣ, иваз намудани насаб, ном ва номи падар, инчунин сабтҳои асноди ҳолати шаҳрвандӣ оид ба барқарор кардани сабти асноди ҳолати шаҳрвандӣ, ворид намудани тағйиру ислоҳот ва бекоркунии сабти асноди ҳолати шаҳрвандӣ ва ҳуҷҷатҳои дигари тасдиқкунандаи факти бақайдгирии давлатии асноди ҳолати шаҳрвандӣ бо роҳи ба низоми электронии давлатии сабти асноди ҳолати шаҳрвандӣ ворид намудан ва чоп кардан дар бланкҳои шаҳодатномаҳои ҳисоботи қатъӣ амалӣ карда мешавад (қарори Ҳукумати ҶТ 30.12.2019 № 668, аз 27.03.2023 № 121).

5. То пайиаст намудани ҷамоатҳои шаҳрак ва деҳот, инчунин муассисаҳои консулии Ҷумҳурии Тоҷикистон берун аз ҳудуди Ҷумҳурии Тоҷикистон ба Феҳристи давлатии сабти асноди ҳолати шаҳрвандӣ дар шакли электронӣ бақайдгирии асноди ҳолати шаҳрвандӣ аз ҷониби онҳо ба воситаи тартиб додани сабти марбутаи дастнависи асноди ҳолати шаҳрвандӣ ба амал бароварда шуда, дар асоси он шаҳодатнома оид ба бақайдгирии давлатии асноди ҳолати шаҳрвандӣ дар шакли дастнависшуда дода мешавад (қарори Ҳукумати ҶТ 30.12.2019 № 668).

6. Аз эътибор соқит дониста шаванд:

- қарори Совети Вазирони СССР аз 15 марти соли 1968 № 880 оид ба тасдиқ намудани "Шаҳодатнома дар бораи муқаррар кардани падарӣ ва шаҳодатнома дар бораи дигар кардани фамилия, ном ва номи падар";

- қарори Совети Вазирони СССР аз 2 июни соли 1969 № 410 оид ба тасдиқ намудани "Формаҳои шаҳодатномаҳо дар бораи таваллуд, вафот, қайди никоҳ, бекор кардани никоҳ, фарзандхонӣ, ки дар асоси қайди китобҳои акти ҳолати гражданӣ дода мешаванд";

- қарори Совети Вазирони РСС тоҷикистон аз 24 апрели соли 1970 № 128 оид ба тасдиқ намудани "Дастурамал оид ба тартиби бақайдгирии асноди ҳолати шаҳрвандӣ дар РСС Тоҷикистон".

Замимаҳои 1 7 дар таҳрири нав (қарори Ҳукумати ҶТ аз 27.03.2023 № 121)

Замимаҳои 1-8 (қарори Ҳукумати ҶТ аз 26.09.2020 № 505)