ФАРМОНИ ПРЕЗИДЕНТИ ҶУМҲУРИИ ТОҶИКИСТОН

Дар бораи сарфароз намудан бо медали ягонаи ҷашнии "65-солагии Ғалаба дар Ҷанги Бузурги Ватании солҳои 1941-1945"

Бо мақсади ботантана ҷашн гирифтани 65-солагии Ғалабаи халқи Иттифоқи Советӣ ва Қувваҳои Мусаллаҳи он дар Ҷанги Бузурги Ватании солҳои 1941-1945 фармон медиҳам:

1) Шахсони категорияи зерин бо медали ягонаи ҷашнии "65-солагии Ғалаба дар Ҷанги Бузурги Ватании солҳои 1941-1945" сарфароз гардонида шаванд:

-хизматчиёни ҳарбӣ ва шахсони ҳайати кироя, ки дар ҳайати Қувваҳои Мусаллаҳи Иттифоқи Ҷумҳуриҳои Советии Сотсиалистӣ дар амалиёти ҷангии фронтҳои Ҷанги Бузурги Ватанӣ иштирок кардаанд;

-партизанҳо ва иштирокчиёни амалиёти махфӣ дар Ҷанги Бузурги Ватанӣ;

-хизматчиёни ҳарбӣ ва шахсони ҳайати кироя, ки дар давраи Ҷанги Бузурги Ватанӣ дар Қувваҳои Мусаллаҳи Иттифоқи Ҷумҳуриҳои Советии Сотсиалистӣ хизмат кардаанд;

-шахсоне, ки бо медалҳои "Барои Ғалаба бар Германия дар Ҷанги Бузурги Ватании солҳои 1941-1945", "Барои Ғалаба бар Япония" мукофотонида шудаанд, инчунин шахсоне, ки шаҳодатномаи медалҳои "Барои Ғалаба бар Германия дар Ҷанги Бузурги Ватании солҳои 1941-1945", ё ки шаҳодатномаи иштирокчии ҷанг доранд;

-меҳнаткашони ақибгоҳ, ки барои меҳнати фидокоронаашон дар солҳои Ҷанги Бузурги Ватанӣ бо орденҳои Иттифоқи Ҷумҳуриҳои Советии Сотсиалистӣ ё бо медалҳои "Барои меҳнати шуҷоатнок дар Ҷанги Бузурги Ватании солҳои 1941-1945", "Барои шуҷоати меҳнатӣ", "Барои меҳнати шоён", "Барои мудофиаи Ленинград", "Барои мудофиаи Москва", "Барои мудофиаи Одесса", "Барои мудофиаи Севастопол", "Барои мудофиаи Кавказ", "Барои мудофиаи Киев", "Барои мудофиаи Сталинград", "Барои мудофиаи Заполярияи Советӣ" мукофотонида шудаанд;

-шахсоне, ки нишони "Ба сокини Ленингради муҳосирашуда" доранд;

-собиқ маҳбусони ноболиғи лагерҳои консентратсионӣ, гетто ва дигар ҷойҳои нигоҳдории маҷбурӣ, ки фашистон ва иттифоқчиёни онҳо дар давраи ҷанги дуюми ҷаҳон барпо карда буданд;

-шаҳрвандоне, ки дар давраи аз 22 июни соли 1941 то 9 майи соли 1945 на кам аз 6 моҳ, ба истиснои вақти кор дар ноҳияҳои муваққатан ишғолкардаи душман, кор кардаанд;

- ҳамсарони бесаробонмондаи ҷанговарони дар Ҷанги Бузурги Ватанӣ ҳалокгардида;

- сафирон ва консулҳои давлатҳое, ки дар Ҷанги Бузурги Ватанӣ иттифоқчии Иттифоқи Ҷумҳуриҳои Советии Сотсиалистӣ буданд ва дар Ҷумҳурии Тоҷикистон фаъолият менамоянд.

2) Ҳукумати Ҷумҳурии Тоҷикистон тартиби супоридани медали ягонаи ҷашнии "65-солагии Ғалаба дар Ҷанги Бузурги Ватании солҳои 1941-1945"-ро таҳия ва тасдиқ намояд.