Низомномаи Комиссияи ҷамъиятӣ оид ба назорати харҷи маблағи аз фурӯши саҳмияҳои Ҷамъияти саҳомии кушодаи НБО "Роғун" ва маблағҳои кӯмаку хайрияи молию моддии барои сохтмони НБО "Роғун" ҷамъшуда

1) Комиссияи ҷамъияти оид ба назорати харҷи маблағи аз фурӯши саҳмияҳои Ҷамъияти саҳомии кушодаи НБО "Роғун" ва маблағҳои кӯмаку хайрияи молию моддии барои сохтмони НБО "Роғун" ҷамъшуда (минбаъдКомиссия) мақоми ҳамоҳангсози ҷамъиятӣ буда, бо мақсади амалӣ намудани назорати ҷамъиятии доимӣ ва таҳлили рафти фурӯши саҳмияҳои Ҷамъияти саҳомии кушодаи НБО "Роғун", истифодаи мақсадноки маблағҳои аз фурӯши саҳмияҳо ва маблағҳои кӯмаку хайрияи молию моддӣ ҷамъшуда ва ба маълумоти аҳолӣ расонидани натиҷаи назорати ҷамъиятӣ таъсис дода шудааст.

2) Комиссия фаъолияти худро дар асоси Конститутсияи (Сарқонуни) Ҷумҳурии Тоҷикистон, Қонуни Ҷумҳурии Тоҷикистон "Дар бораи ҷамъиятҳои саҳомӣ", дигар санадҳои қонунгузорӣ, санадҳои меъёрии Президенти Ҷумҳурии Тоҷикистон ва Ҳукумати Ҷумҳурии Тоҷикистон ва Низомномаи мазкур амалӣ менамояд.

3) Вазифаҳои Комиссия:

- таҳлили ҳолати фурӯши саҳмияҳо ва хароҷоти мақсадноки маблағҳои аз фурӯши саҳмияҳо ва маблағҳои кӯмаку хайрияи молию моддӣ ҷамъшуда;

- таҳия ва баррасии пешниҳодот ва дида баромадани таклифҳо оид ба беҳтар намудани харҷи маблағҳои аз фурӯши саҳмияҳо ва маблағҳои кӯмаку хайрияи молию моддӣ ҷамъшуда;

- амалӣ намудани назорати ҷамъиятии истифодаи мақсадноки маблағҳои аз фурӯши саҳмияҳо ва маблағҳои кӯмаку хайрияи молию моддӣ ҷамъшуда;

- пешниҳоди ҳармоҳаи ахборот оид ба харҷи ин маблағҳо тавассути воситаҳои ахбори омма.

4) Комиссия ҳуқуқ дорад:

- дар Маҷлисҳои умумии саҳмдорон ва ҷаласаҳои Шӯрои нозирони Ҷамъияти саҳомии кушодаи НБО "Роғун" иштирок карда, дар доираи вазифаҳои худ масъалагузорӣ намояд;

- бо мақомоти идоракунии Ҷамъияти саҳомии кушодаи "НБО Роғун" дар доираи вазифаҳои худ ва бо мақсади амалӣ намудани онҳо ҳамкорӣ намояд;

- назорати ҷамъиятии паҳни саҳмияҳо ва пешбурди дурусти феҳристи саҳмдоронро амалӣ намуда, аз Вазорати молияи Ҷумҳурии Тоҷикистон ахбори заруриро талаб кунад;

- дурустии таъин намудани суди (дивиденди) саҳмияҳоро назорат кунад;

- оид ба рафти фурӯши саҳмияҳо ва истифодаи мақсадноки маблағҳои аз фурӯши саҳмияҳо ва маблағҳои кӯмаку хайрияи молию моддӣ ҷамъшуда ба аҳолӣ ахбор пешниҳод намояд;

- аз Вазорати молияи Ҷумҳурии Тоҷикистон маълумотро оид ба ҷудо намудани маблағҳои аз ҳисоби фурӯши саҳмияҳо ва маблағҳои кӯмаку хайрияи молию моддӣ ҷамъшуда талаб карда гирад;

- аз роҳбарияти Ҷамъияти саҳомии кушодаи "НБО Роғун" маълумотро оид ба харҷи маблағҳои аз фурӯши саҳмияҳо ва маблағҳои кӯмаку хайрияи молию моддӣ ҷамъшуда ҷудогардида талаб карда гирад;

- ба Ҳукумати Ҷумҳурии Тоҷикистон оид ба харҷи самараноки маблағҳои аз фурӯши саҳмияҳои Ҷамъияти саҳомии кушодаи "НБО Роғун" ва маблағҳои кӯмаку хайрияи молию моддӣ ҷамъшуда таклиф пешниҳод намояд;

- бо мақсади амалӣ намудани фаъолияти худ дар доираи вазифаҳояш аз мақомоти давлатӣ, бонкҳо ва Ҷамъияти саҳомии кушодаи "НБО Роғун" маълумот талаб намояд;

- дар доираи вазифаҳои худ таклифу пешниҳодот омода намуда, барои баррасӣ ба мақомоти давлатӣ, бонкҳо ва Ҷамъияти саҳомии кушодаи "НБО Роғун" ирсол намояд.

5) Фаъолияти Комиссия тавассути гузаронидани ҷаласаҳои Комиссия амалӣ карда мешавад.

6) Ба ҳайати Комиссия Раис, муовини Раис, котиби масъул ва аъзои Комиссия дохил мешаванд, ки онҳо дар фаъолияти Комиссия дар асосҳои ҷамъиятӣ иштирок менамоянд.

7) Комиссияро Раис роҳбарӣ мекунад, ки фаъолияти Комиссияро назорат менамояд. Ҳангоми набудани Раис Комиссияро муовини Раиси Комиссия роҳбарӣ менамояд.

8) Ҷаласаҳои Комиссия дар як моҳ як маротиба баргузор мегарданд. Дар ҳолатҳои зарурӣ Раиси Комиссия ва ҳангоми набудани ӯ муовини Раиси Комиссия метавонад ҷаласаҳои ғайринавбатиро даъват намояд.

9) Ҳуҷҷатҳоро барои баррасӣ дар ҷаласаи Комиссия котиби масъули он тайёр мекунад.

10) Ҷаласаҳои Комиссия дар ҳолати иштироки аз нисф зиёди аъзои он баргузоргардида ҳисобида мешаванд. Ҷаласаҳои Комиссия бо протокол ба расмият дароварда мешаванд, ки ба онҳо раисикунандаи ҷаласа, котиби масъули Комиссия ва се аъзои дар ҷаласа ҳузурдошта имзо менамоянд.

11) Вобаста ба масъалаҳои дар ҷаласаҳо баррасишуда Комиссия қарор қабул менамояд. Қарори Комиссия бо аксарияти овози аъзои дар ҷаласа ҳузурдошта қабул карда мешавад. Ҳангоми баробарии овозҳо, ҳамон қароре қабулшуда ҳисобида мешавад, ки раисикунандаи ҷаласаи Комиссия ба тарафдории он овоз дода бошад.

12) Қарори Комиссия бо имзои раисикунандаи ҷаласа ва котиби масъули Комиссия ба расмият дароварда мешавад.

13) Фаъолияти Комиссия тибқи нақшаҳои кории тасдиқшуда амалӣ мегардад.

14) Ба ҷаласаҳои Комиссия намояндагони вазоратҳо, кумитаҳои давлатӣ, мақомоти марказии ҳокимияти давлатӣ, мақомоти иҷроияи маҳаллии ҳокимияти давлатӣ, дигар шахсони воқеӣ ва ҳуқуқӣ метавонанд даъват шаванд.

15) Таъминоти моддию техникӣ, иттилоотӣ ва ҳуҷҷатгузории фаъолияти Комиссия аз тарафи Вазорати молияи Ҷумҳурии Тоҷикистон амалӣ карда мешавад.