Ҳукумати Ҷумҳурии Тоҷикистон

ҚАРОР

Оид ба тасдиқи Низомнома дар бораи тартиби гузаронидани ташхиси иҷтимоии барномаҳои давлатии мақсаднок ва инвеститсионии таҳияшаванда дар самти таъсири онҳо ба таъсис ва нигоҳдории ҷойҳои корӣ

Мутобиқи моддаи 13 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва бо мақсади амалӣ намудани "Нақшаи генералии татбиқи Консепсияи таъсис ва нигоҳдории ҷойҳои корӣ дар Ҷумҳурии Тоҷикистон барои солҳои 2008-2015" ҷиҳати ташаккули масъулияти иҷтимоии корфармоён, баҳогузории самараноки иҷтимоии барномаҳои давлатии мақсаднок ва инвеститсионии таҳияшаванда оид ба масъалаҳои таъсири онҳо ба таъсису нигоҳдории ҷойҳои корӣ ва шуғли аҳолӣ, Ҳукумати Ҷумҳурии Тоҷикистон қарор мекунад:

1) Низомнома дар бораи тартиби гузаронидани ташхиси иҷтимоии барномаҳои давлатии мақсаднок ва инвеститсионии таҳияшаванда дар самти таъсири онҳо ба таъсис ва нигоҳдории ҷойҳои корӣ тасдиқ карда шавад (замима мегардад).

2) Вазорату идораҳо ва мақомоти иҷроияи маҳаллии ҳокимияти давлатӣ, фармоишдиҳандагон ва ҳамоҳангсозони давлатии барномаҳои давлатии мақсаднок ва инвеститсионии таҳияшаванда минбаъд барномаҳои таҳиянамудаи худро барои гузаронидани ташхиси иҷтимоӣ ба Вазорати меҳнат ва ҳифзи иҷтимоии аҳолии Ҷумҳурии Тоҷикистон ирсол намоянд.

3) Вазорати меҳнат ва ҳифзи иҷтимоии аҳолии Ҷумҳурии Тоҷикистон ташхиси иҷтимоии барномаҳои мақсадноки давлатиро дар самти таъсири онҳо ба таъсис ва нигоҳдории ҷойҳои корӣ, аз ҷумла барои маъюбон ва гурӯҳҳои алоҳидаи аҳолӣ таъмин намуда, хулосаи ташхисн иҷтимоиро ба таҳиякунандагони барнома ирсол намояд.

4) Ба зербанди "б" банди 5 Низомномаи Агентии давлатии ҳифзи иҷтимоӣ, шуғли аҳолӣ ва муҳоҷират, ки бо карори Ҳукумати Ҷумҳурии Тоҷикистон аз 3 марти соли 2007 №102 тасдиқ гардидааст, сархати нав бо мазмуни зайл илова карда шавад:

"-гузаронидани ташхиси иҷтимоии барномаҳои давлатии мақсаднок ва инвеститсионии таҳияшаванда".