Созишнома дар бораи истеҳсоли муштараки филмҳо

Ҳукуматҳои давлатҳои аъзои Иттиҳоди Давлатҳои Мустақил, ки минбаъд Тарафҳо номида мешаванд,

дар асоси Созишнома оид ба ҳамкориҳои башардӯстонаи давлатҳои аъзои Иттиҳоди Давлатҳои Мустақил аз 26 августи соли 2005 ва Созишнома оид ба ҳамкориҳо дар соҳаи кинематография аз 10 феврали соли 1995,

бо кӯшиши мусоидат ба рушди ҳамкориҳо дар соҳаи аудиовизуалӣ,

бо назардошти саҳме, ки истеҳсоли якҷояи филмҳо баҳри рушди кинематография, инчунин баҳри таҳкими робитаҳои иқтисодӣ ва фарҳангӣ байни давлатҳо мегузорад,

бо тасдиқи нияти худ ҷиҳати мусоидати ҳамаҷониба ба истеҳсол ва истифодаи филмҳо дар ҳар як давлати Тарафҳо мутобиқи қонунгузории онҳо ва ӯҳдадориҳои байналмилалӣ

ба мувофиқаи зайл расиданд:

Моддаи 1

Барои мақсадҳои Созишнома истилоҳоти зерин чунин маъниҳоро ифода мекунанд:

"филм" - асари аудиовизуалӣ, ки дар шакли бадеӣ, хроникию ҳуҷҷатӣ, илмию оммавӣ, таълимӣ, аниматсионӣ, телевизионӣ ва ғайра дар асоси бозёфтҳои эҷодӣ таҳия шуда, аз тасвири дар навори филм инъикосёфта ё дигар намудҳои навор иборат аст, кадрҳои байни худ мунтазам алоқамандро дар мавзӯи ягона ба ҳам мепайвандад ва барои қабул тавассути таҷҳизоти махсус таъин шудааст;

"продюсер" - шаҳрванди давлати Тараф ва ё шахси ҳуқуқӣ, ки мувофиқи қонунгузории давлатҳои Тарафҳо фаъолият бурда, ба маблағгузорӣ, таҳия ва/ё истифодаи филм масъул аст;

"ҳампродюсерон" - продюсерҳое, ки бо шартнома оид ба истеҳсоли муштараки филм ва ё истифодаи он, аз ҷумла, иштирок дар маблағгузории филм алоқамандӣ доранд;

"филми истеҳсоли муштарак" - филме, ки истеҳсоли он аз тарафи ҳампродюсерони ду ва ё зиёда Тараф амалӣ мегардад;

"филми миллӣ" - филми истеҳсоли муштарак, ки ба он тамоми шаклҳои дастгирии давлатии кинои миллӣ мутобиқи қонунгузории лоақал як давлати Тарафҳо расонида мешавад;

Моддаи 2

Тартиб ва шартҳои гирифтани мақоми "филми миллӣ" тавассути Низомнома оид ба додани мақоми "филми миллӣ" ба филмҳои истеҳсоли муштарак (минбаъд Низомнома), ки қисми ҷудонашавандаи ин Созишнома маҳсуб меёбад, муайян карда мешавад (замима мегардад).

Барои мақомоти салоҳиятдори Тарафҳо ҳуқуқи муайян кардани шакл ва ҳаҷми дастгирии давлатиро ба филмҳои истеҳсоли муштарак ҳангоми қабул ва/ё такмили қонунгузории миллӣ дар соҳаи кинематография нигоҳ дошта мешавад.

Моддаи 3

Қарор оид ба додани мақоми "филми миллӣ" ба филмҳои истеҳсоли муштарак дар ҳар як мавриди алоҳида аз тарафи мақомоти салоҳиятдори Тарафҳо қабул карда мешавад.

Моддаи 4

Қарори мақомоти салоҳиятдори яке аз Тарафҳо дар бораи додани мақоми "филми миллӣ" ба филмҳои истеҳсоли муштарак дар ҳолате, ки филм ба шартҳои Низомнома мутобиқат накунад, аз ҷониби онҳо бекор карда мешавад.

Моддаи 5

Тарафҳо ба вуруд ва хуруҷи ашхоси ҳунарию истеҳсолӣ ба ҳудуди мамлакати худ, ҳамчунин барои муваққатан ворид намудан ва баровардани таҷҳизот ва маводи барои истеҳсоли филмҳои якҷоя зарур мувофиқи қонунгузории давлатҳои Тарафҳо мусоидат мекунанд.

Моддаи 6

Дар титрҳои филмҳои муштарак истеҳсолшуда, инчунин дар маҳсулоти рекламавӣ давлатҳои Тарафҳо, ки дар истеҳсоли филмҳо ширкат меварзанд, зикр карда мешаванд.

Моддаи 7

Истифода ва паҳн намудани филмҳои истеҳсоли муштарак ба ҷуз ҳолатҳое, ки дар қонунгузории давлатҳои Тарафҳо пешбинӣ гардидаанд, ба ягон маҳдудият рӯ ба рӯ намешаванд.

Моддаи 8

Додани мақоми "филми миллӣ" ба филмҳои истеҳсоли муштарак давлати Тарафро ӯҳдадор намекунад, ки барои намоиш додани филмҳо дар қаламраваш иҷозат диҳад.

Моддаи 9

Ҳалли масоили баҳсноки байни Тарафҳо, ки ҳангоми истифода ва баррасии Созишномаи мазкур ба миён меоянд, аз тариқи машварат ва гуфтушуниди Тарафҳои манфиатдор ё ба воситаи расмиёти дигари мувофиқашудаи Тарафҳо сурат мегиранд.

Моддаи 10

Ин Созишнома аз рӯзи имзо шуданаш муваққатан истифода мешавад ва пас аз 30 рӯзи қабули огоҳиномаи сеюми депозитор оид ба иҷрои расмиёти дохилидавлатии барои эътибор пайдо кардани он зарур аз ҷониби Тарафҳои онро имзокарда, эътибор касб мекунад.

Барои Тарафҳое, ки расмиёти дохилидавлатиро дертар ба иҷро расонидаанд, ин Созишнома пас аз 30 рӯзи гирифтани ҳуҷҷатҳо аз тарафи депозитор эътибор пайдо мекунад.

Моддаи 11

Бо мувофиқаи Тарафҳо ба ин Созишнома метавонанд тағйиру иловаҳо ворид гарданд, ки тавассути протоколи мувофиқ ба расмият дароварда мешаванд.

Моддаи 12

Ин Созишнома баъди эътибор пайдо карданаш барои ҳамроҳшавии давлатҳои аъзои Иттиҳоди Давлатҳои Мустақил, ки ба нуқтаҳои он ҳамраъйӣ мекунанд ва барои ба зимма гирифтани ӯҳдадориҳое, ки аз ин Созишнома бармеоянд, омодаанд, кушодааст. Барои давлати ҳамроҳшаванда Созишнома баъд аз 30 рӯзи қабули ҳуҷҷатҳо дар бораи ҳамроҳшавӣ аз ҷониби депозитор эътибор касб мекунад.

Моддаи 13

Ин Созишнома дар давоми 5 сол пас аз санаи эътибор пайдо карданаш амал мекунад. Баъд аз гузаштани ин мӯҳлат, агар Тарафҳо ба ягон қарори дигаре наоянд, Созишнома ҳар дафъа худ ба худ боз ба мӯҳлати 5 соли дигар дароз карда мешавад.

Моддаи 14

Ҳар яке аз Тарафҳо бо фиристодани огоҳномаи хаттие, ки на дертар аз 6 моҳ пеш аз баромадан ба депозитор равон карда шудааст, аз ин Созишнома баромада метавонад.

Дар шаҳри Кишинёв 14 ноябри соли 2008 дар як нусхаи асл бо забони русӣ ба имзо расидааст. Нусхаи асл дар Кумитаи иҷроияи Иттиҳоди Давлатҳои Мустақил маҳфуз аст, ки нусхаи тасдиқшудаи онро ба ҳар як давлати Созишномаи мазкурро имзо карда, мефиристад.