Бо Қарори Ҳукумати ҶТ аз 19.07.2012 № 369 беэътибор дониста шуд

Ҳукумати Ҷумҳурии Тоҷикистон

ҚАРОР

Дар бораи таъсис додани шӯъба ва бахшҳои тандурустӣ дар мақомоти иҷроияи маҳаллии ҳокимияти давлатии шаҳру нохияҳо

Мутобиқи моддаи 12 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1) Дар сохтори мақомоти иҷроияи маҳаллии ҳокимияти давлатии шаҳру ноҳияҳо аз ҳисоби ихтисори 224 воҳидҳои кории соҳаи тандурустӣ шӯъба ва бахшҳои тандурустӣ таъсис дода шаванд.

2) Шумораи воҳидҳои корӣ вобаста ба таъсиси шӯъба ва бахшҳои тандурустӣ дар сохтори мақомоти иҷроияи маҳаллии ҳокимияти давлатии шаҳру ноҳияҳо тасдиқ карда шавад (замима мегардад).

3) Хароҷоти нигоҳдории воҳидҳои мазкур аз ҳисоби маблағҳои буҷети мақомоти иҷроияи маҳаллии ҳокимияти давлатӣ, ки барои соҳаи тандурустӣ пешбинӣ шудааст, амалӣ карда шавад.

4) Ба қарори Ҳукумати Ҷумҳурии Тоҷикистон аз 28 декабри соли 2006 №603 "Дар бораи Вазорати тандурустии Ҷумҳурии Тоҷикистон" тағйиру иловаҳои зерин ворид карда шаванд:

сархати сеюми банди 10 Низомномаи Вазорати тандурустии Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 28 декабри соли 2006 №603 тасдиқ шудааст, дар таҳрири зайл ифода карда шавад:

"- низомномаи воҳидҳои сохтории Дастгоҳи марказии вазорат, раёсатҳои тандурустии Вилояти Мухтори Кӯҳистони Бадахшон, вилоятҳо, шаҳри Душанбе ва шӯъбаю бахшҳои тандурустии шаҳру ноҳияҳо, инчунин оинномаҳои корхонаву ташкилотҳои системаи Вазорати тандурустиро тасдиқ менамояд;";

ба Нақшаи идоракунии Вазорати тандурустии Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 28 декабри соли 2006 №603 тасдиқ шудааст, сархати нав дар таҳрири зайл илова карда шавад:

"- Шӯъба ва бахшҳои тандурустии шаҳру ноҳияҳо".

5) Мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Хатлону Суғд, шаҳри Душанбе ва шаҳру ноҳияҳои тобеи ҷумҳурӣ оид ба ҷобаҷогузории шӯъба ва бахшҳои тандурустӣ чораҳои зарурӣ андешанд.

6) Вазорати молияи Ҷумҳурии Тоҷикистон тибқи тартиби муқарраргардида ҷиҳати ворид намудани тағйирот ба қарори Ҳукумати Ҷумҳурии Тоҷикистон аз 31 декабри соли 2008 №667 "Дар бораи лимити шумораи хизматчиёни давлатии мақомоти иҷроияи ҳокимияти давлатӣ" таклиф пешниҳод намояд.

7) Вазорати тандурустии Ҷумҳурии Тоҷикистон дар мӯҳлати ду моҳ Низомномаи шӯъбаҳо ва бахшҳои тандурустии шаҳру ноҳияҳоро таҳия ва тасдиқ намуда, инчунин санадҳои меъёрии ҳуқуқии худро бо қарори мазкур мутобиқ намояд.