Тартиби номгузорӣ ва дигар кардани номи корхонаҳои давлатӣ, истгоҳҳои роҳи оҳан, фурудгоҳҳо, ташкилоту муассисаҳо, таълимгоҳҳо, инчунин объектҳои физикию ҷуғрофӣ

Тартиби мазкур низоми номгузорӣ ва дигар кардани номи корхонаҳои давлатӣ, истгоҳҳои роҳи оҳан, фурудгоҳҳо, ташкилоту муассисаҳо, таълимгоҳҳо, инчунин объектҳои физикию ҷуғрофиро бо мақсади абадӣ гардонидани хотираи арбобони давлатӣ ва ҷамъиятию сиёсӣ, муҳофизони Ватан, ходимони илм, маориф ва фарҳанг муайян мекунад.

1. Номгузорӣ ва дигар кардани номи корхонаҳои давлатӣ, ташкилоту муассисаҳо ва таълимгоҳҳо

1) Номгузорӣ бо мақсади пос доштани хотираи арбобони давлатӣ ва ҷамъиятию сиёсӣ, муҳофизони Ватан, ходимони илм, маориф ва фарҳанг аз рӯи пешниҳоди ташкилотҳои давлатию ҷамъиятӣ, коллективҳои меҳнатӣ ва иттиҳодияҳои шаҳрвандон сурат мегирад.

2) Номи арбобони давлатӣ, ҷамъиятию сиёсӣ, муҳофизони Ватан, ходимони илм, маориф ва фарҳанг ҳангоми дар ҳаёт буданашон ба корхонаҳо, ташкилоту муассисаҳо, таълимгоҳҳо ва объектҳои физикию ҷуғрофӣ дода намешавад. Номи арбобони давлатӣ ва ҷамъиятию сиёсӣ, муҳофизони Ватан, ходимони илм, маориф ва фарҳанг фақат баъд аз вафот бо мақсади абадӣ гардонидани хотираи онҳо гузошта мешавад.

3) Номи арбобони давлатӣ, ҷамъиятию сиёсӣ, муҳофизони Ватан, ходимони илм, маориф ва фарҳанг, ки дар назди халқу ватан хизматҳои шоиста намуда, дар ҷодаи илм, фарҳанг, санъат, ҳимояи Ватан, сохтори давлатӣ, тарбия, маърифат, тандурустӣ, ҳифзи ҳаёт ва ҳуқуқи инсон, фаъолияти хайриявӣ саҳми арзанда гузоштаанд, танҳо дар ҳолатҳои ниҳоӣ ва мутобиқи Тартиби мазкур амалӣ гардонда мешавад.

4) Масъалаҳоро барои баррасии Комиссияи ҷумҳуриявӣ оид ба номгузории корхонаҳои давлатӣ, ташкилоту муассисаҳо ва абадӣ гардонидани хотираи ходимони илм, маориф ва фарҳанг (минбаъд Комиссияи ҷумҳуриявӣ) мақомоти иҷроияи маҳаллии ҳокимияти давлатӣ омода ва пешниҳод менамояд.

Барои баррасии пешакии масъалаҳои вобаста ба абадӣ намудани хотира дар мақомоти иҷроияи маҳаллии ҳокимияти давлатӣ оид ба омода намудани маводи зарурӣ барои номгузории корхона, ташкилоту муассисаҳо ва абадӣ гардонидани хотираи ходимони илм, маориф ва фарҳанг комиссия таъсис дода мешавад.

5) Пешниҳод оид ба абадигардонӣ метавонад аз ҷониби мақомоти иҷроияи маҳаллии ҳокимияти давлатӣ, мақомоти худидораи шаҳрак ва деҳот, коллективи меҳнатии корхона, муассиса, ташкилотҳо новобаста аз шакли моликият, ташкилотҳои ҷамъиятӣ мутобиқи шакли дар замимаи 1 муайяншуда амалӣ гардад.

Пешниҳод бо замима намудани ҳуҷҷатҳои дар банди 12 Тартиби мазкур пешбинигардида манзур мегардад.

Баъди баррасӣ ва қабули қарори мусбӣ ҳуҷҷатҳои зикргардида бо пешниҳоди раисони ВМКБ, вилоятҳо, шаҳри Душанбе, шаҳру ноҳияҳои тобеи ҷумҳурӣ ба Комиссияи ҷумҳуриявӣ супорида мешаванд (Замимаи 2).

6) Комиссияи ҷумҳуриявӣ:

- маводро арзёбӣ менамояд;

- хулосаҳоро оид ба имконпазирии абадӣ гардонидани хотира ва ё асосҳои далелнокӣ рад намудани он таҳия менамояд;

- лоиҳаи дахлдори қарори Ҳукумати Ҷумҳурии Тоҷикистонро омода месозад.

7) Қарор дар бораи абадӣ гардонидан аз ҷониби Ҳукумати Ҷумҳурии Тоҷикистон қабул мегардад.

8) Ифтитоҳи объектҳои абадигардонидашуда метавонад дар муҳити тантанавӣ аз ҷониби мақомоти иҷроияи махаллии ҳокимияти давлатӣ, мақомоти худидораи шаҳрак ва деҳот, коллективҳои меҳнатии муассиса, корхона, ташкилот ва иттиҳодияҳои ҷамъиятӣ амалӣ гардад.

9) Шаклхои асосии абадӣ гардонидани хотира:

- додани ном ба корхонаи давлатӣ, корхона, муассиса, ташкилот ва объекти дигар;

- гузоштани лавҳаи хотиравӣ дар хона, корхона, муассиса, ташкилот ва объекти дигар;

- гузоштани асарҳои санъати ороишӣ ва муҷассама;

- номгузорӣ ба кӯчаҳо, майдонҳо ва ғайра;

- сабти номи шахсони дар ҳифзи Ватан ҳалокгашта дар Китоби Хотира ва ғайра.

10) Номгузорӣ ва дигар кардани номи корхонаҳои давлатӣ, ташкилоту муассисаҳои тобеи Ҷумҳурии Тоҷикистон, муассисаҳои таҳсилоти ибтидоӣ, миёна ва олии касбӣ аз тарафи Ҳукумати Ҷумҳурии Тоҷикистон сурат мегирад (қарори Ҳукумати ҶТ аз 26.11.2016 № 483).

11) Номгузорӣ ва дигар кардани номи ташкилот, муассиса ва корхонаҳои давлатии тобеи маҳаллиро Маҷлисҳои вакилони халқи ВМКБ, вилоятҳо, шаҳри Душанбе, шаҳру ноҳияҳои тобеи ҷумҳурӣ, ки ин объектҳо дар ҳудуди онҳо ҷойгиранд, дар мувофиқа бо мақомоти иҷроияи марказии ҳокимияти давлатии дахлдори соҳа амалӣ мегардонанд (қарори Ҳукумати ҶТ аз 26.11.2016 № 483).

12) Барои баррасии масъалаҳои номгузорӣ ва дигар кардани номи ташкилот, муассиса ва корхонаҳои давлатӣ, таълимгоҳҳо ба Ҳукумати Ҷумҳурии Тоҷикистон ҳуҷҷатҳои зерин пешниҳод карда мешаванд:

- протоколи маҷлиси умумии коллективи меҳнатии корхона, муассиса, ташкилот, дигар иттиҳодияи шаҳрвандон, маҷлиси умумии коллективи омӯзгорон, донишҷӯён ва толибилмони муассисаҳои таҳсилоти олии касбӣ, миёнаи касбӣ, ибтидои касбӣ ва миёнаи умумӣ;

- мактуби ташреҳӣ бо далелҳои зарурати номгузорӣ ва дигар кардани номи корхона, муассиса, ташкилот, таълимгоҳ;

- пешниҳоди бо мақомоти дахлдори болоӣ мувофиқатшуда дар бораи номгузорӣ ва дигар кардани ном;

- ҳисоби хароҷот оид ба номгузорӣ ё номивазкунии объектҳо;

- қарори Маҷлиси дахлдори вакилони халқ (дар сурати ба Маҷлиси болоии вакилони халқ ва Ҳукумати Ҷумҳурии Тоҷикистон пешниҳод намудани ҳуҷҷатҳо).

2. Номгузорӣ ва дигар кардани номи истгоҳҳои роҳи оҳан ва истгоҳҳои мусофирон, фурудгоҳҳо, муассисаҳои почтаю телеграфи соҳаи алоқа

13) Ба истгоҳҳои роҳи оҳан, исттоҳҳои мусофирон ва фурудгоҳҳо, аз рӯи қоида, номи маҳалҳои аҳолинишине дода мешавад, ки ин обьектҳои нақлиётӣ дар он ҷо воқеъ гардидаанд. Дар ин ҳолат ба объектҳои нақлиёти роҳи оҳан, автомобилӣ ва ҳавоӣ, ки дар як маҳал воқеъ шудаанд, номи якхела дода мешавад. Оид ба ин масъала Вазорати нақлиёт ва коммуникатсияи Ҷумҳурии Тоҷикистон қарор қабул менамояд.

14) Истгоҳҳою фурудгоҳҳо ба шарафи ҷашни воқеаҳои таърихӣ, инчунин номи арбобони давлатӣ ва ҷамъиятию сиёсӣ, муҳофизони Ватан, ходимони илм, маориф ва фарҳанги Ҷумҳурии Тоҷикистон номгузорӣ шуда метавонанд.

Дар ин маврид номгузорӣ аз тарафи Ҳукумати Ҷумҳурии Тоҷикистон бо пешниҳоди Маҷлисҳои маҳаллии вакилони халқи дахлдор ва Вазорати нақлиёт ва коммуникатсияи Ҷумҳурии Тоҷикистон сурат мегирад.

15) Номгузорӣ ва дигар кардани номи дуроҳаҳои роҳи оҳан, маҳалҳои пешгузар, постгоҳҳои роҳ ва блокпостҳо, ҳангоме ки дар онҳо рақамҳои тартибӣ ва рақамҳои километри дахлдори роҳи оҳан сабт нашудааст, аз тарафи Корхонаи воҳиди давлатии "Роҳи оҳани Тоҷикистон" дар мувофиқа бо Агентии заминсозӣ, геодезӣ ва харитасозии назди Ҳукумати Ҷумҳурии Тоҷикистон, Сарситоди Қувваҳои Мусаллаҳ ва Вазорати нақлиёт ва коммуникатсияи Ҷумҳурии Тоҷикистон, раисони ВМКБ, вилоятҳо, шаҳри Душанбе, шаҳру ноҳияҳои тобеи ҷумҳурӣ амалӣ мегардад.

16) Ба муассисаҳои почтаю телеграфи соҳаи алоқа номи маҳалҳои аҳолинишини мавқеи ҷойгиршавиашон дода шуда, дар ин хусус қарори дахлдори Вазорати нақлиёт ва коммуникатсияи Ҷумҳурии Тоҷикистон қабул карда мешавад.

3. Номгузорӣ ва дигар кардани номи объекҳои физикию ҷуғрофӣ

17) Номгузорӣ ва дигар кардани номи объектҳои физикию ҷуғрофӣ мутобиқи Қонуни Ҷумҳурии Тоҷикистон "Дар бораи номҳои объектҳои ҷуғрофӣ" амалӣ карда мешавад.

18) Объектҳои физикию ҷуғрофӣ ба муносибати ҷашнгирии воқеаҳои таърихӣ, ба шарафи ташкилотҳои давлатию ҷамъиятӣ номгузорӣ шуда, ба онҳо номи кашшофони нахустини онҳо, арбобони давлатӣ ва ҷамъиятию сиёсӣ, муҳофизони Ватан, ходимони илм, маориф ва фарҳанг низ дода мешавад.

Додани номи якхела ба ду ва ё зиёда объектҳои физикию ҷуғрофии ба ҳам монанд дар доираи як воҳиди марзиву маьмурӣ мань аст.

19) Ба объектҳои хурд монондани номи худудҳои миқёсан калон раво нест (масалан, номи давлату вилоятҳо ва шаҳрҳоро барои номгузории қуллаҳом ҷудогонаи кӯҳҳо истифода бурдан мумкии нест ва гайра).

20) Пешниҳодҳо дар бораи номгузорӣ ва дигар кардани номи объектҳои физикию ҷуғрофӣ, аз рӯи қоида, аз ҷониби Маҷлисҳои вакилони халқи ВМКБ, вилоятҳо, шаҳри Душанбе, шаҳру ноҳияҳои тобеи ҷумҳурӣ ва тавассути Агентии заминсозӣ, геодезӣ ва харитасозии назди Ҳукумати Ҷумҳурии Тоҷикистон ба Комиссияи ҷумҳуриявӣ пешниҳод карда мешаванд.

21) Номгузорӣ ва дигар кардани номи объектҳои физикию ҷуғрофӣ бо пешниҳоди Комиссияи ҷумҳуриявӣ аз тарафи Ҳукумати Ҷумҳурии Тоҷикистон сурат мегирад.

22) Ҳангоми номгузорӣ ва дигар кардани номи объектҳои физикию ҷуғрофӣ масъала бо Академияи илмҳо, Вазорати корҳои хориҷӣ, Кумитаи давлатии амнияти миллӣ, Сарситоди Қувваҳои Мусаллаҳи Ҷумҳурии Тоҷикистон ва вазорату идораҳои дахлдор (вобаста аз номе, ки гузошта мешавад) мувофиқа карда мешавад.

23) Номи объектҳои физикию ҷуғрофиро танҳо дар ҳолатҳои истисноӣ ва мувофиқи қоидаҳои барои номгузории ин объектҳо муқаррарнамудаи Тартиби мазкур дигар кардан мумкин аст.

24) Транскрипсияи ягонаи номҳои объектҳои физикию ҷуғрофӣ бо дастурамалу қоидаҳои транскрипсияи номҳои ҷуғрофӣ ва луғатмаълумотномаҳои номҳои ҷуғрофӣ, ки бо пешниҳоди Академияи илмҳои Ҷумҳурии Тоҷикистон аз тарафи Ҳукумати Ҷумҳурии Тоҷикистон тасдиқ карда мешаванд, таъмин мегардад.

25) Пешниҳодҳо дар бораи номгузорӣ ва дигар кардани номи объектҳои физикию ҷуғрофӣ, ки ба Комиссияи ҷумҳуриявӣ фиристода мешаванд, бояд маълумотҳои зеринро дар бар гиранд:

- нишондодҳои навъи объект (кӯҳ, қулла, дара, дарё, кӯл, обанбор ва ғайра);

- ҷои аниқи воқеъшавии объект (нишонаҳои зарурӣ, аз рӯи имконият, координатҳо);

- номи ҳозираи объект, агар он бошад;

- мактуби ташреҳӣ бо далелҳои зарурати номгузорӣ ва дигар кардани номи объекти физикию ҷуғрофӣ;

- нақша ва тарҳи ҳудудҳое, ки дар онҳо ин объектҳо ҷойгиранд;

- нишон додани объектҳои ҳамноми наздики объекти номгузоришаванда, ки дар қаламрави воҳиди маъмурию ҳудудӣ воқеъ аст, дар навбати аввал, ноҳия ва вилоят;

- хулосаи Комиссияи ҷумҳуриявӣ оид ба номгузорӣ ва дигар кардани номи корхонаҳои давлатӣ, ташкилоту муассисаҳо ва абадӣ гардонидани хотираи ходимони илм, маориф ва фарҳанг;

- ҳисоби хароҷот барои номгузорӣ ё дигар кардани номи объектҳои ҷуғрофӣ.

26) Таъсис ва барҳам додан, номгузорӣ ва номивазкунии ВМКБ, вилоятҳо, шаҳрҳо, ноҳияҳо ва деҳот мутобиқи Қонуни конститутсионии Ҷумҳурии Тоҷикистон "Дар бораи ҳалли масъалаҳои сохти марзиву маъмурии Ҷумҳурии Тоиҷикистон" амалӣ карда мешавад.

  Ба Раиси (вилоят, шаҳр ва ноҳия)
                                      ________________________________

     Ба Комиссия  оид  ба  номгузорӣ  ва дигар кардани номи корхонаҳои
давлатӣ,  ташкилоту муассисаҳо ва абадӣ гардонидани  хотираи  ходимони
илм, маориф ва фарҳанги (вилоят, шаҳр, ноҳия)_________________________

                               ПЕШНИҲОД

Мақомоти иҷроияи ҳокимияти давлатии___________________________________
______________________________________________________________________
                      (номи вилоят, шаҳр, ноҳия)
Барои абадӣ гардонидани хотираи_______________________________________
                                          (ному насаб)
______________________________________________________________________
                         (шакли абадигардонӣ)

Хоҳиш дорем пешниҳоди моро дастгирӣ намоед.

Хароҷоти______________________________________________________________
                (сохтан, бунёдкунӣ, гузориш ва ғайра)
______________________________________________________________________
          (номи корхона, ташкилот, муассиса, гурӯҳ ва ғайра)

ба ӯҳда мегирад.

Раиси (вилоят, шаҳр, ноҳия)__________________(ному насаб)

_________с.200__

  Ба Раиси (вилоят, шаҳр ва ноҳия)
                                      ________________________________

     Ба Комиссия  оид  ба  номгузорӣ  ва дигар кардани номи корхонаҳои
давлатӣ,  ташкилоту муассисаҳо ва абадӣ гардонидани  хотираи  ходимони
илм, маориф ва фарҳанги (вилоят, шаҳр, ноҳия)_________________________

                               ПЕШНИҲОД

Мақомоти иҷроияи ҳокимияти давлатии___________________________________
______________________________________________________________________
                      (номи вилоят, шаҳр, ноҳия)
Барои абадӣ гардонидани хотираи_______________________________________
                                          (ному насаб)
______________________________________________________________________
                         (шакли абадигардонӣ)

Хоҳиш дорем пешниҳоди моро дастгирӣ намоед.

Хароҷоти______________________________________________________________
                (сохтан, бунёдкунӣ, гузориш ва ғайра)
______________________________________________________________________
          (номи корхона, ташкилот, муассиса, гурӯҳ ва ғайра)

ба ӯҳда мегирад.

Раиси (вилоят, шаҳр, ноҳия)__________________(ному насаб)

_________с.200__