Бо қарори Ҳукумати ҶТ аз 29.12.2017 № 597 аз эътибор соқит дониста шуд.

НИЗОМНОМАИ Хадамоти назорати давлатии фаъолияти фармасевтӣ

I. Муқаррароти умумӣ

1. Хадамоти назорати давлатии фаъолияти фармасевтӣ (минбаъд Хадамот) - мақоми ваколатдори ҳокимияти иҷроияи давлатӣ буда, назорати давлатии фаъолияти фармасевтиро дар Ҷумҳурии Тоҷикистон амалӣ менамояд.

2. Хадамот дар Нақшаи идоракунии Вазорати тандурустӣ ва ҳифзи иҷтимоии аҳоли Ҷумҳурии Тоҷикистон қарор дорад (қарори Ҳукумати ҶТ аз 3.06.2014 № 382).

3. Хадамот дар ҳамкорӣ бо мақомоти ҳокимияти иҷроия, дигар ташкилотҳо ва мақомоти ҳифзи ҳуқуқ фаъолияти худро дар соҳаи муқарраршуда амалӣ мегардонад.

4. Асоси ҳуқуқии фаъолияти Хадамот Конститутсияи (Сарқонуни) Ҷумҳурии Тоҷикистон, Қонуни Ҷумҳурии Тоҷикистон "Дар бораи маводи доруворӣ ва фаъолияти фармасевтӣ", қонунҳо ва дигар санадҳои меъёрии ҳуқуқии Ҷумҳурии Тоҷикистон, инчунин санадҳои ҳуқуқии байналмилалии эътирофнамудаи Ҷумҳурии Тоҷикистон ва ҳамин Низомнома мебошад.

II. Ваколатҳо

5. Вазифаҳои асосии Хадамот:

- дар ҳамкорӣ бо мақомоти хифзи ҳуқуқ ва дигар вазорату идораҳо барномаи рушди соҳаи давлатии экспертиза, стандартонӣ, сертификатсияро дар қисмати кафолати таъмини давлатии аҳолӣ бо маводи дорувории хушсифат, ашёи хоми доруворӣ, маводи нашъадор, моддаҳои психотропӣ ва прекурсорҳои онҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона бо татбиқи стандартҳои байналмилалӣ амалӣ менамояд (қарори Ҳукумати ҶТ аз 3.06.2014 № 382);

- назорат ва санҷиши фаъолияти ташкилотҳои фармасевтӣ, новобаста аз шакли моликият ва тобеияти идоравиашон, инчунин муомилоти қонунии маводи доруворӣ, маводи нашъадор, психотропӣ ва прекурсорҳои онҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишии дорои хусусияти табобатию пешгирӣ;

- ҳамоҳангсозии байнисоҳавӣ ва назорати давлатии фаъолияти ташкилотҳои фармасевтӣ, новобаста аз шакли моликият ва тобеияти идоравиашон оид ба масъалаҳои истеҳсол, тайёркунӣ, воридот, содирот, санҷиши сифат, нигоҳдорӣ, фурӯш ва истифодабарии маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишии дорои хусусияти табобатию пешгирӣ;

- таҳия ва пешбурди феҳристи давлатии маводи доруворӣ, ашёи хоми доруворӣ ва молҳои тиббӣ, маводи санитарию гигиенӣ;

- тибқи тартиби муқаррарнамудаи Ҳукумати Ҷумҳурии Тоҷикистон амалӣ намудани корҳои омодасозӣ, барасмиятдарорӣ ва пешниҳоди ҳуҷҷатҳои рухсатномадиҳии воридот ва содироти маводи доруворӣ, молҳои тиббӣ, ашёи хоми доруворӣ, маводи санитарию гигиенӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона дар Ҷумҳурии Тоҷикистон (қарори Ҳукумати ҶТ аз 3.06.2014 № 382);

- тибқи тартиби муқаррарнамудаи Ҳукумати Ҷумҳурии Тоҷикистон амалӣ намудани корҳои омодасозӣ, барасмиятдарорӣ ва пешниҳоди ҳуҷҷатҳои рухсатномадиҳии воридот ва содироти иловаҳои фаъоли биологӣ дар Ҷумҳурии Тоҷикистон дар асоси хулосаи санитарию эпидемиологӣ;

- иҷрои корҳои бақайдгирии давлатии дорувории истеҳсоли ватанию хориҷӣ, ашёи хоми доруворӣ, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишии дорои хусусияти табобатию пешгирӣ, бо тартиби муқарраргардида бекор кардани гувоҳномаҳои бақайдгирии онҳо;

- манъи истеҳсол, фурӯш ва аз муомилот бозпас гирифтани маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона, ки ба талаботи стандартҳои амалкунанда дар Ҷумҳурии Тоҷикистон мутобиқат намекунанд (қарори Ҳукумати ҶТ аз 3.06.2014 № 382);

- бо тартиби муқарраргардида таҳия ва тасдиқ намудани санадҳои меъёрии ҳуқуқие, ки соҳаи фаъолияти фармасевтиро ба танзим медароранд;

- назорати фаъолияти муассисаҳои соҳаи тандурустӣ бо мақсади аттестатсия ва аттестатсияи такрорӣ оид ба ҳуқуқи гузаронидани озмоиши клиникии маводи доруворӣ, ашёи хоми доруворӣ ва молҳои тиббӣ;

- гузаронидани санҷиши назоратии лабораторияҳо, новобаста аз шакли ташкилию ҳуқуқӣ ва моликият, ки ба фаъолияти фармасевтӣ машғуланд (қарори Ҳукумати ҶТ аз 3.06.2014 № 382);

- гузаронидани аккредитатсияи муассисаҳои фармасевтӣ, корхона ва нуқтаҳои савдои маҳсулоти табобатию профилактикӣ, маводи ороишию гигиенӣ, шахсони воқеӣ ва ҳуқуқӣ, аз ҷумла намояндагиҳои тиббии корхонаҳои истеҳсолии фармасевтии хориҷие, ки ба фаъолияти фармасевтӣ машғуланд;

- ташкил ва гузаронидани санҷишҳои назоратӣ дар муассисаҳои фармасевтӣ, табобатию профилактикӣ, нуқтаҳои фурӯш, новобаста аз шакли моликият ва тобеияти идоравиашон оид ба иҷрои тартиб ва қоидаҳои нигоҳдорӣ, истифодабарӣ, тақсимот, истеҳсол ва фурӯши маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона (қарори Ҳукумати ҶТ аз 3.06.2014 № 382);

- гузаронидани санҷишҳои назоратии фаъолияти шахсони воқеӣ ва ҳуқуқӣ, сарфи назар аз шакли моликият ва тобеъияти идоравиашон, инчунин ташкилотҳои байналмилалӣ оид ба иҷрои тартиб ва қоидаҳои воридот ва содирот, нигоҳдори ва тақсимоти ёрии башардӯстонаи маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишии дорои хусусияти табобатию пешгирӣ;

- назорати давлатии шахсони воқеӣ ва ҳуқуқие, ки ба фаъолияти фармасевтӣ машғуланд, новобаста аз шакли моликият ва тобеъияти идоравиашон оид ба риоя гардидани талаботи стандартҳои давлатӣ ва соҳавӣ, санадҳои меъёрию ҳуқуқӣ, инчунин талабот оид ба бастабандӣ ва тамғагузории маводи доруворӣ, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишии дорои хусусияти табобатию пешгирӣ;

- назорати давлатии шахсони воқеӣ ва ҳуқуқие, ки ба фаъолияти фармасевтӣ машғуланд, новобаста аз шакли моликият ва тобеияти идоравиашон оид ба иҷро гардидани амрномаҳои Хадамот доир ба бартараф кардани қонуншиканиҳо, беҳтар намудани сифат, пешгирӣ намудани истеҳсол ва фурӯши маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишии дорои хусусияти табобатию пешгирие, ки ба талаботи стандартҳои амалкунандаи Ҷумҳурии Тоҷикистон ҷавобгӯй нестанд;

- таҳия ва нашр намудани Фармакопеяи давлатии Ҷумҳурии Тоҷикистон;

- ташкили экспертизаи озмоиши токлиникӣ ва клиникии маводи доруворӣ, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишии дорои хусусияти табобатию пешгирӣ, маводи нашъадор, моддаҳои психотропӣ ва прекурсорҳо;

- ташкили назорати давлатӣ ва санҷиши истифодаи мақсадноки маводи доруворӣ, ашёи хоми доруворӣ, маводи нашъадор, моддаҳои психотропӣ, прекурсорҳо, молҳои тиббии аз ҳисоби маблағҳои буҷетӣ ва ғайрибуҷетӣ дастрасшаванда;

- амалӣ намудани санҷиши фаъолияти базаҳои тадқиқотӣ ҳангоми тадқиқоти маводи доруворӣ ва молҳои тиббӣ, маводи санитарию гигиенӣ дар шароити клиникӣ, инчунин ҳангоми гузаронидани озмоишҳои токлиникии маводи нави доруворӣ ва молҳои тиббӣ дар миқёси Ҷумҳурии Тоҷикистон;

- санҷиши (пешакӣ, минбаъдӣ, интихобӣ, арбитражӣ) сифати маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона (қарори Ҳукумати ҶТ аз 3.06.2014 № 382);

- назорат, бақайдгирӣ, сертификатсиякунонӣ ва дигар амале, ки ба муомилоти маводи дорувории сахттаъсир, маводи дорувории нашъадор, моддаҳои психотропӣ, прекурсорҳо, моддаҳои заҳрнок ва реактивҳои ташхисӣ вобаста мебошад;

- санҷиши назоратии таҳвилгарони хориҷӣ ва корҳои истеҳсолкунанда, новобаста аз шакли моликият ва тобеияти идоравишон, аз ҷумла хориҷӣ ҳангоми бақайдгирии маводи доруворӣ, молҳои тиббӣ, маводи санитарию гигиенӣ ва иловаҳои фаъоли биологӣ ва воситаҳои ороишии дорои хусусияти табобатию пешгирӣ дар асоси созишнома ва шартномаҳои дутарафа;

- тибқи тартиби муқарраргардида ҳангоми воридоту содирот ва пеш аз фурӯш додани сертификати мутобиқат ва хулосаи сифати маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона (қарори Ҳукумати ҶТ аз 3.06.2014 № 382);

- муайян намудани тартиби гузаронидан, арзиш, маблағгузорӣ ва мӯҳлати ҳамаи давраҳои экспертизаи токлиникӣ ва озмоишҳои клиникӣ, бақайдгирии давлатӣ, реклама, озмоиши маводи доруворӣ ва молҳои тиббӣ, сертификатсияи онҳо, бо тартиби муқарраргардида амалӣ намудани назорати риояи онҳо (қарори Ҳукумати ҶТ аз 3.06.2014 № 382);

- ташкили мақомоти давлатии экспертии машваратӣ (шӯроҳо, комиссияҳо ва гурӯҳҳо) дар соҳаи фаъолияти муқарраршуда;

- дар асоси қарордод таъмин намудани кормандони соҳаи тибб бо иттилооти касбии фармасевтӣ;

6. Хадамот ҳуқуқ дорад:

- бо тартиби муқаррарнамудаи қонунгузорӣ бемамоният ва дар ҳар маврид дар тамоми корхонаҳо, муассиса ва дигар ташкилотҳо, новобаста аз шакли моликият ва тобеъияти идоравиашон, инчунин дар ташкилотҳои байналмилалӣ санҷиш ва назорати сифат ва безарарии маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона гузаронад (қарори Ҳукумати ҶТ аз 3.06.2014 № 382);

- намунаҳои маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, иловаҳои фаъоли биологӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона барои гузаронидани таҳлили (озмоиши) сифат бо тартиби муқарраршуда, аз ҳисоби корхонаҳо, муассисаҳо ва дигар ташкилотҳо ройгон гирад (қарори Ҳукумати ҶТ аз 3.06.2014 № 382);

- ҳангоми назорати ташкилотҳои фармасевтӣ, табобатию профилактикӣ ва дигар муассисаҳо, маводи дорувор дар Ҷумҳурии Тоҷикистон бақайдгирифтанашуда, агар ин баҳри пешгирии зиён ба саломатии аҳолӣ зарур бошад ва ё агар воситаҳои доруворӣ тибқи нишондодашон фоидаовар набошанд, ва ё сифати воситаҳои доруворӣ ба талаботи стандарти амалкунанда ҷавобгӯ набошад ва ё мӯҳлати истифодаи воситаҳои доруворӣ ва молҳои тиббӣ гузашта бошад воситаҳои доруворӣ ва молҳои тиббии қалбакӣ, ки сертификати мутобиқати сифат надоранд тибқи тартиби муқаррарнамудаи қонунгузории Ҷумҳурии Тоҷикистон аз муомилот гирифта ва бо иштироки комиссияи босалоҳият нобуд (сӯзонида) мешаванд (қарори Ҳукумати ҶТ аз 3.06.2014 № 382);

- истеҳсол, ҳамлу нақл ва муомилоти маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишии дорои хусусияти табобатию пешгириеро, ки дар Ҷумҳурии Тоҷикистон ба қайд нагирифта нашудаанд ва ё иҷозат дода нашудаанд ё ҳуҷҷатҳои меъёриашон мувофиқи тартиби муқарраргардида тасдиқ карда нашудаанд ё сертификати мутобиқат надоранд боздорад ва ё манъ намояд;

- тибқи тартиби муқаррарнамудаи Кодекси Ҷумҳурии Тоҷикистон оид ба ҳуқуқвайронкунии маъмурӣ пешбурди мурофиаи парвандаҳоро оид ба ҳуқуқвайронкуниҳои маъмурӣ анҷом диҳад ва муҷозоти маъмуриро татбиқ намояд;

- тибқи тартиби муқарраргардида фаъолияти шахсони воқеӣ ва ҳуқуқиеро, ки ба фаъолияти фармасевтӣ машғуланд, инчунин лабораторияҳои соҳаи фармасевтиро, новобаста аз шакли моликият ва тобеияти идоравиашон, ки талаботҳои қонунгузории вобаста ба ҳифзи саломатии аҳолиро риоя намекунанд, боздорад;

- барои қабул намудани қарорҳое, ки ба салоҳияти Хадамот марбут аст, маълумоти заруриро тибқи тартиби муқарраргардида талаб намояд ва гирад;

- маводи доруворӣ, маводи нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона, ки сертификати мутобиқат ё хулосаи ташхис надоранд ва ба талаботи стандартҳои Ҷумҳурии Тоҷикистон мутобиқат намекунанд, аз муомилот гирад (қарори Ҳукумати ҶТ аз 3.06.2014 № 382);

- барои гузаронидани санҷиш нусхаҳои ҳуҷҷатҳои заруриро гирад;

- ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва дигар мақомоти дахлдори Ҷумҳурии Тоҷикистон ҳангоми ошкор намудани қонуншиканиҳои ҷиддӣ аз ҷониби шахсони воқеӣ ва ҳуқуқии ба фаъолияти фармасевтӣ машғулбуда, ҷиҳати роҳ надодани онҳо ба амалӣ намудани фаъолияти фармасевтӣ таклифҳо пешниҳод намояд (қарори Ҳукумати ҶТ аз 3.06.2014 № 382);

- барои рекламаи маводи доруворӣ, маводҳои ороишӣ, ки хусусияти табобатӣ доранд, хулосаи асоснокро ба мақоми ваколатдор дар соҳаи реклама пешниҳод менамояд (қарори Ҳукумати ҶТ аз 3.06.2014 № 382);

- назорати рекламаи маводи доруворӣ, молҳои тиббӣ ва иловаҳои фаъоли биологӣ ва ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона доранд ба амал мебарорад (қарори Ҳукумати ҶТ аз 3.06.2014 № 382);

- мувофиқи қонунгузории Ҷумҳурии Тоҷикистон ва бо мақсади пешгирии ҳуқуқвайронкуниҳо чораҳои маҳдудкунӣ, огоҳкунӣ ва пешгирикуниро ҷиҳати роҳ надодан ва ё барҳам додани оқибатҳои вайронкунии талаботи ҳатмии фаъолияти соҳаҳои муқараргардида аз тарафи шахсони воқеӣ ва ҳуқуқӣ қабул ва татбиқ намояд;

- ба дорухонаҳо, муассисаҳо, корхонаҳо ва дигар ташкилотҳои табобатию профилактикие, ки ба фаъолияти фармасевтӣ машғуланд, новобаста аз шакли моликият ва тобеъияти идоравиашон, инчунин ба шахсони воқеӣ ва ҳуқуқӣ, ташкилотҳои байналмилалию хориҷӣ, ҷиҳати бартараф намудани ҳуқуқвайронкуниҳо ва камбудиҳои ҳангоми санҷиш ошкоргардида, дастур ва амрнома диҳад;

- чорабиниҳоро оид ба тайёр намудан, таҷрибаомӯзӣ, бозомӯзӣ ва такмили ихтисоси мутахассисон барои Хадамот ва дигар муассисаҳои фармасевтӣ амалӣ намояд;

- мутобиқи қонунгузории Ҷумҳурии Тоҷикистон ҳамкориҳои байналмилалиро дар соҳаи стандартонӣ, сертификатсиякунонӣ, экспертизаи маводи доруворӣ, аз ҷумла нашъаовар, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, иловаҳои фаъоли биологӣ ва воситаҳои ороишӣ, обҳои минералии дорои хусусияти табобатию пешгирӣ ва маводи безараркунанда, реагентҳои ташхисию ғизои кӯдакона, инчунин баланд бардоштани тахассуси мутахассисон анҷом диҳад (қарори Ҳукумати ҶТ аз 3.06.2014 № 382).

- фаъолияти намояндагиҳои тиббии ташкилотҳои фарматсевтии дохилӣ ва хориҷии ба фаъолияти фарматсевтӣ машғулбударо назорат мекунад (қарори Ҳукумати ҶТ аз 3.06.2014 № 382);

- корҳоро оид ба тарҷума, таҳлилу такмили ҳуҷҷатҳои меъёрию техникӣ ташкил ва амалӣ менамояд (қарори Ҳукумати ҶТ аз 3.06.2014 № 382);

- гирифтани маълумотро аз муассисаҳои табобатию профилактикӣ, новобаста аз шакли моликиятшон, оид ба самаранокӣ ва бехатарии (таъсири иловагӣ) маводи доруворӣ ва молҳои тиббӣ ташкил менамояд (қарори Ҳукумати ҶТ аз 3.06.2014 № 382);

- маълумотро оид ба таъсири иловагии маводи доруворӣ байни кормандони муассисаҳои фарматсевтӣ ва табобатию профилактикӣ, инчунин истеҳсолкунандагон паҳн менамояд (қарори Ҳукумати ҶТ аз 3.06.2014 № 382);

- дар якҷоягӣ бо мақомоти манфиатдор пешгирӣ ва мубориза ба муқобили паҳншавии сӯиистеъмоли маводи дорувории нашъадор, дорои моддаҳои психотропӣ ва моддаҳои сахттаъсирро амалӣ менамояд (қарори Ҳукумати ҶТ аз 3.06.2014 № 382).

III. Ташкили фаъолият

7. Хадамотро Сардор роҳбарӣ мекунад, ки маълумоти олии фармасевтӣ дошта, ӯро Ҳукумати Ҷумҳурии Тоҷикистон бо пешниҳоди Вазири тандурустӣ ва ҳифзи иҷтимоии аҳолии Ҷумҳурии Тоҷикистон ба вазифа таъин ва аз вазифа озод менамояд (қарори Ҳукумати ҶТ аз 3.06.2014 № 382).

Сардор як муовин дорад, ки бо пешниҳоди ӯ аз чониби Вазири тандурустии Ҷумҳурии Тоҷикистон ба вазифа таъин ва аз вазифа озод карда мешавад.

8. Сардор ҳуқуқ дорад:

- санадҳоеро, ки Хадамот доир ба ҳамаи масъалаҳои дар доираи салоҳияташ буда баровардааст, имзо кунад;

- тибқи тартиби муқарраргардида фармон ва фармоишҳо барорад, ки иҷрои онҳо барои ҳамаи кормандони Хадамот ва муассисаҳои фармасевтӣ ва муассисаҳое, ки ба фаъолияти фарматсевтӣ алоқаманданд ҳатмӣ мебошад (қарори Ҳукумати ҶТ аз 3.06.2014 № 382);

- роҳбарони корхонаҳои тобеъро ба вазифа таъин ва аз вазифа озод намояд, оинномаҳои корхонаҳоро тасдиқ намояд;

-қоидаҳо, дастурамалҳо ва низомномаҳои ба фаъолияти Хадамот вобаста бударо ва инчунин ҷадвали вазифавии кормандонро тасдиқ намояд;

- сарфи мақсадноки маблағҳои Хадамотро таъмин намуда, ҳуҷҷатҳои пулӣ ва молиро имзо намояд;

- аз мақомоту муассисаҳои тандурустӣ ва дигар ташкилотҳо оид ба маводи бесифати доруворӣ, маводи дорувории нашъадор, моддаҳои психотропӣ ва прекурсорҳо, молҳои тиббӣ, маводи санитарию гигиенӣ, маҳсулоти ғизоии табобатию профилактикӣ, иловаҳои биологӣ ва воситаҳои ороишӣ маълумоти заруриро гирад;

- барои тағйири сохтори Хадамот таклиф пешниҳод намояд;

- тибқи тартиби муқарраргардида роҷеъ ба масъалаҳои ба Хадамот тааллуқдошта аз номи Вазорати тандурустии Ҷумҳурии Тоҷикистон намояндагӣ кунад;

- барои иҷрои вазифа ва ӯҳдадориҳои ба зиммаи Хадамот гузошташуда, ҳифзи моликият, инчунин таъмини нигоҳ доштани сирри давлатӣ масъулияти шахсӣ дорад ва вазифаҳои хизматии муовин ва роҳбарони воҳидҳои сохтории Хадамотро муайян намояд;

- роҳбарони раёсат ва намояндагиҳои Хадамотро дар вилоятҳо тибқи тартиби муқарраргардида ба вазифа таъин ва аз вазифа озод намояд;

- роҳбарон ва кормандони воҳидҳои таркибии Дастгоҳи маркази ва корхонаҳои тобеъи Хадамотро тибқи тартиби муқарраргардида ба вазифа таъин ва аз вазифа озод намояд;

9. Хадамот ба Вазири тандурустӣ ва ҳифзи иҷтимоии аҳолии Ҷумҳурии Тоҷикистон ҳисоботдиҳанда мебошад (қарори Ҳукумати ҶТ аз 3.06.2014 № 382).

10. Хадамот метавонад экспертҳои мустақил ва мутахассисони иловагиро дар асоси шартномаи (қарордоди) меҳнатӣ ба кор ҷалб намояд.

11. Дар назди Хадамот кумитаҳои фармакопӣ ва фармакологӣ амал мекунанд, ки аз ҳисоби мутахассисони соҳаи тандурустӣ ташкил карда шуда, низомномаҳои онҳо аз тарафи Вазири тандурустӣ ва ҳифзи иҷтимоии аҳолии тасдиқ карда мешавад (қарори Ҳукумати ҶТ аз 3.06.2014 № 382).

12. Раисони кумитахои фармакопӣ ва фармакологӣ бо пешниҳоди Сардори Хадамот аз тарафи Вазири тандурустӣ ва ҳифзи иҷтимоии аҳолии Ҷумҳурии Тоҷикистон ба вазифа таъин ва аз вазифа озод карда мешаванд (қарори Ҳукумати ҶТ аз 3.06.2014 № 382).

13. Дар назди Хадамот раёсатҳо, намояндагиҳо ва корхонаҳои воҳиди давлатии "Экспертиза ва озмоиши маҳсулотҳои фармасевтӣ ва молҳои тиббӣ"-и дар шаҳри Душанбе ва вилоятҳо буда, амал менамоянд, ки низомнома, дастурамал, шумораи кормандон ва вазифаҳои хизматии кормандони онҳоро Сардори Хадамот муайян ва тасдиқ менамояд;

14. Хадамот вориси ҳуқуқии Маркази назорати давлатии фаъолияти фармасевтӣ ва тиббӣ (бо ҳуқуқи хадамот) мебошад.

Хадамот шахси ҳуқуқӣ буда, дорои мӯҳр бо тасвири Нишони давлатии Ҷумҳурии Тоҷикистон ва сабти номи худ бо забонҳои давлатӣ ва русӣ, мӯҳрҳои дахлдор, штампу бланкаҳо мебошад ва аз суратҳисоби ягонаи хазинадории Вазорати молияи Ҷумҳурии Тоҷикистон ва дигар сарчашмаҳое, ки қонунгузории Ҷумҳурии Тоҷикистон манъ накардааст, маблағгузорӣ карда мешавад.

15. Маҳалли ҷойгиршавии Хадамот ва Корхонаи воҳидии давлатии "Экспертиза ва озмоиши маҳсулотҳои фармасевтӣ ва молҳои тиббӣ": Ҷумҳурии Тоҷикистон, шаҳри Душанбе, кӯчаи Алишер Навоӣ бинои 5/5 мебошад.

СОХТОРИ Дастгоҳи марказии Хадамоти назорати давлатии фаъолияти фармасевтӣ

Роҳбарият

Шӯъбаи назорати давлатии фаъолияти фармасевтӣ

Шӯъбаи назорати давлатии муомилоти қонунии маводи нашъадор, психотропӣ ва прекурсорҳои онҳо

Шӯъбаи назорати давлатии маводи ороишию гигиенӣ

Шӯъбаи бақайдгирии маҳсулотҳои фармасевтӣ ва молҳои тиббӣ

Шӯъбаи барасмиятдарории ҳуҷҷатҳои рухсатномадиҳии воридоту содирот

Шӯъбаи аккредитатсияи муассисаҳои фарматсевтӣ (қарори Ҳукумати ҶТ аз 3.06.2014 № 382)

Шӯъбаи назорати фармакологии маводи доруворӣ (қарори Ҳукумати ҶТ аз 3.06.2014 № 382)

Шӯъбаи кадрҳо ва корҳои махсус

Шӯъбаи баҳисобгирии муҳосибавӣ

Бахши ҳуқуқ

Бахши коргузорӣ

НАҚШАИ идоракунии Хадамоти назорати давлатии фаъолияти фармасевтӣ

Дастгоҳи марказӣ

Раёсати Хадамоти назорати давлатии фаъолияти фармасевтӣ дар вилояти Суғд

Раёсати Хадамоти назорати давлатии фаъолияти фармасевтӣ дар вилояти Хатлон

Намояндагии Хадамоти назорати давлатии фаъолияти фармасевтӣ дар Вилояти Мухтори Кӯҳистони Бадахшон

Намояндагии Хадамоти назорати давлатии фаъолияти фармасевтӣ дар минтақаи Кӯлоб

НОМГӯИ корхонаҳои тобеи Хадамоти назорати давлатии фаъолияти фармасевтӣ

Корхонаи воҳиди давлатии "Экспертиза ва озмоиши маҳсулоти фармасевтӣ ва молҳои тиббӣ"

Корхонаи воҳиди давлатии "Экспертиза ва озмоиши маҳсулоти фармасевтӣ ва молҳои тиббӣ дар вилояти Суғд"

Хориҷ карда шуд (қарори Ҳукумати ҶТ аз 3.06.2014 № 382)

Хориҷ карда шуд (қарори Ҳукумати ҶТ аз 3.06.2014 № 382)