Ҳукумати Ҷумҳурии Тоҷикистон

ҚАРОР

Масъалаҳои Вазорати тандурустии Ҷумҳурии Тоҷикистон

Мутобиқи моддаи 12 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва моддаи 58 Кодекси граждании Ҷумҳурии Тоҷикистон, Ҳукумати Ҷумҳурии Тоҷикистон қарор мекунад:

1. Муассисаи давлатии "Маркази ҷумҳуриявии илмию клиникии педиатрӣ ва ҷарроҳии кӯдакона" бо роҳи ҷудо кардан аз "Пажӯҳишгоҳи илмию тадқиқотии акушерӣ, гинекологӣ ва педиатрии Тоҷикистон" таъсис дода шавад.

2. Номи муассисаи давлатии "Пажӯҳишгоҳи илмию тадқиқотии акушерӣ, гинекологӣ ва педиатрии Тоҷикистон" ба Муассисаи давлатии "Пажӯҳишгоҳи тадқиқотии акушерӣ, гинекологӣ ва перинатологии Тоҷикистон" иваз карда шавад.

3. Вазорати тандурустии Ҷумҳурии Тоҷикистон бо тартиби муқарраргардида масъалаҳои ташкилию ҳуқуқии муассисаҳои мазкурро ҳал намуда, санадҳои меъёрии ҳуқуқии худро ба қарори мазкур мутобиқ намояд.

4. Сархати бисту чоруми банди 7 Низомномаи Вазорати тандурустии Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 28 декабри соли 2006 № 603 тасдиқ шудааст, дар таҳрири зайл ифода карда шавад:

"иҷозатномадиҳии фаъолияти соҳаҳои тандурустӣ мутобиқи қонунгузории амалкунанда;".

5. Сархати сеюми Сохтори дастгоҳи марказии Вазорати тандурустии Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 28 декабри соли 2006 № 603 тасдиқ шудааст, дар таҳрири зайл ифода карда шавад:

"Раёсати илм ва таҳсилоти тиббию фармасевтӣ"

6. Дар Номгӯи муассисаҳо ва ташкилотҳои системаи Вазорати тандурустии Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 28 декабри соли 2006 № 603 тасдиқ шудааст:

- сархати шашум дар таҳрири зайл ифода карда шавад:

"Муассисаи давлатии "Пажуҳишгоҳи тадқиқотии акушерӣ, гинекологӣ ва перинатологии Тоҷикистон".

- сархати нав дар таҳрири зайл ифода карда шавад:

"Муассисаи давлатии "Маркази ҷумҳуриявии илмию клиникии педиатрӣ ва ҷарроҳии кӯдакона".