Барномаи давлатии сохтмон, таъмиру азнавсозии мактабҳо барои солҳои 2008-2015, ки дар хонаҳои шахсӣ, вагонхонаҳо, биноҳои маъмурию ҷойҳои ҷамъиятӣ ҷойгиранд

Шиносномаи Барномаи давлатии сохтмон, таъмиру азнавсозии мактабҳо барои солҳои 2008-2015, ки дар хонаҳои шахсӣ, вагонхонаҳо, биноҳои маъмурию ҷойҳои ҷамъиятӣ ҷойгиранд

Номи Барномаи

Барномаи давлатии сохтмон, таъмиру азнавсозии мактабҳо барои солҳои 2008 - 2015, ки дар хонаҳои шахсӣ, вагонхонаҳо, биноҳои маъмурию ҷойҳои ҷамъиятӣ ҷойгиранд

Асосҳои таҳияи барнома

Қарори Ҳукумати Ҷумҳурии Тоҷикистон аз 5 феврали соли 2008 № 56 "Дар бораи натиҷаҳои рушди иҷтимоию иқтисодии Ҷумҳурии Тоҷикистон дар соли 2007 ва вазифаҳо барои соли 2008"

Таҳиякунанда

Вазорати маориф ва илми Ҷумҳурии Тоҷикистон (қарори Ҳукумати ҶТ аз 10.02.2016 № 66)

Ҳадафҳо

Дар асоси Барномаи давлатии сохтмон, таъмиру азнавсозии мактабҳо барои солҳои 2008 - 2015, ки дар хонаҳои шахсӣ, вагонхонаҳо, биноҳои маъмурию ҷойҳои ҷамъиятӣ ҷойгиранд, мустаҳкам намудани заминаи моддию техникии муассисаҳои таълимӣ, мукаммалгардонии инфраструктураи системаи маориф ва ба талаботу меъёрҳои мавҷуда мувофиқ гардонидани биноҳои таълимӣ ва дигар иншооти соҳаи маориф.

Вазифаҳо

Мустаҳкам намудани заминаҳои моддию техникии муассисаҳои таҳсилоти умумии ҷумҳурӣ, таъмиру сохтмони биноҳои таълимӣ.

Манбаҳои молиявӣ

Маблағгузории барномаи мазкур дар доираи маблағҳои давлатии барои соҳаи маориф ҷудо карда шаванда амалӣ карда мешавад. Дурнамои арзиши умумии лоиҳа 590063,2 ҳазор сомониро ташкил медиҳад, аз ҷумла:

- буҷети давлатии соҳаи маориф - 352978,9 ҳазор сомонӣ;

- сармоягузории хориҷӣ - 55800,0 ҳазор сомонӣ;

- сармоягузории дохилӣ - 181284,3 ҳазор сомонӣ.

Натиҷаҳои ниҳоӣ

Дар натиҷаи амалӣ гардидани барнома базаи моддӣ - техникии муассисаҳои таҳсилоти умумии кишвар мустаҳкам мегардад, барои гирифтани маълумоти босифат ва рақобатпазир шароит муҳайё мегардад, барои гузаштан ба таҳсилоти ҳатмии умумӣ заминаҳо фароҳам оварда мешавад, беҳтар гардидани шароити таҳсил ба болоравии сифати таълиму тарбия мусоидат менамояд.

Дар натиҷа 136 мактаб аз хонаҳои шахсӣ, 101 мактаб аз вагонхонаҳо бароварда мешавад. Ба ҷойи 284 мактаби садамавӣ мактабҳои нав сохта мешаванд. 208 мактаб таъмири асосӣ карда шуда, сохтмони 75 мактаби нотамом ба истифода дода мешавад.

Мӯҳлати амалӣ гардидани барнома

Солҳои 2008-2015

Эзоҳ

1. Нишондиҳандаҳои дурнамои маблағҳои сохтмон, ки дар барнома қайд карда шуданд ҳамасола вобаста ба сатҳи рушди иқтисодиёт ва имкониятҳои Буҷети давлатӣ дақиқ гардида, аз нав дида баромада мешаванд.

2. Арзиши таъмиру сохтмони бинову иншооти дар барнома пешбинигардида, бо нархҳои дар ҳолати то 1 августи соли 2008 амалкунанда бидуни корҳои ободгардонӣ ва маҳкам кардани гирду атрофи иншоот, бо барқу об таъминкунӣ ва таҷҳизонидан бо мебел ҳисоб карда шудааст ва ҳамасола бо назардошти дараҷаи таваррум ва таҳияи ҳуҷҷатҳои лоиҳавию сметавӣ тағйир ёфта метавонад.

3. Мақомоти иҷроияи маҳаллии ҳокимияти давлатӣ метавонанд дар рафти таъмиру сохтмони иншоот масолеҳи сохтмонии маҳаллиро истифода намуда, маблағҳои шаҳрвандони алоҳида, сармоягузорони дохилӣ, хориҷӣ ва хусусиро ҷалб намоянд.

4. Роҳбарони раёсату шӯъбаҳои маориф, директорони мактабҳо вазифадоранд ҳолати физикию техникии биноҳои муасисаҳои таълимиро зери назорати қатъӣ қарор диҳанд.

1. Муқаддима

Барномаи давлатии сохтмон, таъмиру азнавсозии мактабҳо барои солҳои 2008-2015, ки дар хонаҳои шахсӣ, вагонхонаҳо, биноҳои маъмурию ҷойҳои ҷамъиятӣ ҷойгиранд (минбаъд Барнома) дар асоси қарори Ҳукумати Ҷумҳурии Тоҷикистон аз 05 феврали соли 2008 №56, "Дар бораи натиҷаҳои рушди иҷтимоию иқтисодии Ҷумҳурии Тоҷикистон дар соли 2007 ва вазифаҳо барои соли 2008", Стратегияи миллии рушди Ҷумҳурии Тоҷикистон барои давраи то соли 2015 ва дар чаҳорчӯбаи Матритсаи амалиётҳои Стратегияи паст кардани сатҳи камбизоатӣ дар Ҷумҳурии Тоҷикистон барои солҳои 2007-2009 таҳия гардидааст. Барномаи мазкур стратегия, самтҳои асосӣ, афзалият, вазифаҳо ва механизми амалӣ намудани сиёсати давлатиро дар самти сохтмону таъмир ва азнавсозии муассисаҳои таҳсилоти умумӣ барои солҳои 2008-2015 муайян намуда, имконият медиҳад, ки яке аз вазифаҳои асосии Стратегияи паст кардани сатҳи камбизоатӣ дар Ҷумҳурии Тоҷикистон ва афзалиятҳои Стратегияи миллии рушд дар соҳаи маориф амалӣ карда шавад.

Ҷумҳурии Тоҷикистон пас аз ба даст овардани истиқлолияти давлатӣ барои пешрафти соҳаи маориф ва баланд бардоштани сифати таълиму тарбия корҳои назаррасро ба анҷом расонид. Дар ин давра пояи модддӣ-техникии муассисаҳои таълимӣ пурқувват шуда, мактабҳои нав сохта шуда, аксарияти мактабҳо аз таъмир бароварда шуданд.

Амалӣ намудани Барнома аз ҳисоби буҷети давлатӣ, сармоягузории дохилӣ ва хориҷӣ, сектори хусусӣ, хоҷагиҳои кишоварзӣ, ва дигар корхонаҳо новобоста аз шакли моликияташон таъмин карда мешавад.

Иҷрокунандагон ва мутасадциёни асосии Барнома Вазорати маорифи Ҷумҳурии Тоҷикистон, Вазорати рушди иқтисод ва савдои Ҷумҳурии Тоҷикистон, Вазорати молияи Ҷумҳурии Тоҷикистон, Кумитаи давлатии сармоягузорӣ ва идораи амволи давлатии Ҷумҳурии Тоҷикистон, мақомоти иҷроияи ҳокимияти давлатии Вилояти Мухтори Кӯҳистони Бадахшон, вилотяҳои Суғд, Хатлон, шаҳри Душанбе ва ноҳияҳои тобеи ҷумҳурӣ ва раёсату шӯъбаҳои маорифи вилоят ва шаҳру ноҳияҳои ҷумҳурӣ мебошанд.

Барнома бо дарназарадошти вазъи воқеии соҳаи маориф ба баланд бардоштани сифати таълим дар муассисаҳои таҳсилоти умумӣ, таъмини ҷои нишаст, ҳалли масъалаҳои стратегӣ ва дигар масъалаҳои ҳалталаби муассисаҳои таҳсилоти умумӣ мусоидат менамояд.

Нишондиҳандаҳои дурнамои таъмиру сохтмони бинову иншооти дар барнома пешбинигардида, бо нархҳои дар ҳолати то 1 августи соли 2008 амалкунанда бидуни корҳои ободгардонӣ ва маҳкам кардани гирду атрофи иншоот, бо барқу об таъминкунӣ ва таҷҳизонидан бо мебел ҳисоб карда шудааст ва ҳамасола бо назардошти дараҷаи таваррум ва таҳияи ҳуҷҷатҳои лоиҳавию сметавӣ тағйир ёфта метавонад.

Вобаста аз сатҳи рушди иқтисодиёт, буҷети давлатӣ ва имкониятҳо нишондиҳандаҳои дурнамои маблағгузории дар Барнома нишондодашуда аниқ карда шуда, аз нав дида мешавад.

2. Таҳлили вазъи муассисаҳои таҳсилоти умумӣ

Дар Ҷумҳурии Тоҷикистон 3810 мактабҳои таҳсилоти умумӣ, аз ҷумла, 662 мактаби таҳсилоти ибтидоӣ, 778 мактаби таҳсилоти асосӣ, 2181 мактаби таҳсилоти миёна, 87 гимназия, 43 литсей, 42 мактаб-интернат, 8 мактаби хусусӣ ва 9 мактаби ғоибона фаъолият доранд.

Дар мактабҳои таҳсилоти умумии ҷумҳурӣ 1692115 нафар хонандагон, аз ҷумла 794377 нафар духтар таҳсил менамоянд. Алҳол дар мактаб-интернатҳо 8950 нафар тарбиядгирандагон, аз ҷумла 2143 духтар ба таълиму тарбия фаро гирифта шудаанд.

Ба таълиму тарбияи хонандагон 99354 нафар омӯзгор, аз ҷумла 52985 зан машғул мебошанд. Аз шумораи умумии омӯзгорон 61570 нафар дорои таҳсилоти олӣ (62 фоиз), 5030 нафар дорои таҳсилоти олии нопурра (5 фоиз), 25726 нафар дорои таҳсилоти миёнаи касбӣ (25 фоиз) ва 7028 нафар дорои таҳсилоти миёнаи умумӣ (7 фоиз) машғул мебошанд.

Имрӯз дар ҷумҳурӣ дар 284 мактаб дар ҳолати садамавӣ, 208 мактаб ба таъмири асосӣ ниёз дошта, 101 адад мактаб дар вагонхонаҳо ва 136 адад мактаб дар хонаҳои шахсӣ ҷойгир мебошад, аз ҷумла:

- дар вилояти Хатлон 118 мактаб дар ҳолати садамавӣ, 95 мактаб ба таъмири асосӣ ниёз дошта, 49 мактаб дар вагонхонаҳо ва 93 мактаб дар хонаҳои шахсӣ ҷойгиранд;

- дар вилояти Суғд 47 мактаб дар ҳолати садамавӣ, 30 мактаб ба таъмири асосӣ ниёз дошта, 7 мактаб дар вагонхонаҳо ва 7 мактаб дар хонаҳои шахсӣ ҷойгиранд;

- дар Вилояти Мухтори Кӯҳистони Бадахшон 34 мактаб дар ҳолати садамавӣ, 28 мактаб ба таъмири асосӣ ниёз дошта, 2 мактаб дар вагойхонаҳо ва 3 мактаб дар хонаҳои шахсӣ ҷойгиранд;

- дар ноҳияҳои тобеи ҷумҳурӣ ва шаҳри Душанбе 88 мактаб дар ҳолати садамавӣ, 55 мактаб ба таъмири асосӣ ниёз дошта, 43 мактаб дар вагонхонаҳо ва 33 мактаб дар хонаҳои шахсӣ ҷойгиранд.

Дар маҷмӯъ, Барномаи сохтмон, таъмир ва азнавсозии 804 мактабро дар қаламрави ҷумҳурӣ пешбинӣ менамояд, ки барои ин аз рӯи ҳисоби пешакӣ 590063,2 ҳазор сомонӣ сарф карда мешавад аз ҷумла:

- буҷети давлатии соҳаи маориф - 352978,9 ҳазор сомонӣ;

- сармоягузории хориҷӣ - 55800,0 ҳазор сомонӣ;

- сармоягузории дохилӣ - 181284,3 ҳазор сомонӣ.

3. Ҳадафҳо ва вазифаҳои асосии Барнома

Ҳадафҳои асосии Барнома фароҳам овардани шароити зарурӣ барои рушди муассисаҳои таҳсилоти умумии кишвар, мутаҳкам намудани пояи моддӣ техникии мактабҳо мебошад, ки он барои гирифтани таҳсилоти босифат дар асоси стандартҳои давлатии таҳсилот ва ба сатҳи соҳаи маорифи давлатҳои мутараққи наздик намудани системаи маорифи ҷумҳурӣ мусоидат менамояд.

Барои расидан ба ҳадафҳои асосӣ зарур аст, ки масъалаҳои зерин ҳал карда шаванд:

- маблағгузории давлатии соҳаи маориф бо дарназардошти рушди иқтисодӣ ва иҷтимоии он;

- муҳайё сохтани шароит барои гирифтани таҳсилоти сифатнок ва ташаккули шаҳрвандӣ:

- мустаҳкам намудани заминаи моддию техникии муассисаҳои таълимӣ;

- ба шароити нави муносибатҳои ҷамъиятӣ ва иқтисодӣ мутобиқ сохтани идоракунии муассисаҳои соҳаи маориф;

4. Самтҳои амалигардонии Барнома

Таъмини заминаи моддию техникии муассисаҳои таълимӣ яке аз шартҳои асосии амалӣ гаштани раванди таълиму тарбия буда, он имконият медиҳад, ки фаъолияти муассисаҳои таълимӣ ба низом дароварда шавад.

Самтҳои асосии рушди он аз инҳо иборат аст:

- нигоҳдорӣ, мустаҳкам намудан ва инкишоф додани заминаи моддию техникии муассисаҳои таълимӣ;

- ба анҷом расонидани бунёди мактабҳои сохтмонашон нотамом сохтмони мактабҳои нав, синфхонаҳои иловагӣ, иншооти ёрирасон, барқарор намудани биноҳои таълимӣ ва таъмири мактабҳо;

- таҷҳизонидани муассисаҳои таҳсилоти умумӣ бо мебелҳо, мизу курсиҳо, тахтаи синфӣ ва дигар воситаҳои таълимӣ;

- муҳайё намудани шароити зарурии иқтисодӣ барои инкишоф ва баланд бардоштани заминаи моддию техникӣ;

- фароҳам овардани шароити зарурӣ барои фаъолияти самараноки муассисаҳои таълимӣ;

5. Маблағгузории Барнома

- бо дарназардошти талаботи Барнома пешбинӣ намудани маблағҳо барои сохтмон, таъмиру азнавсозии мактабҳо;

- ҳамасола ҷудо намудани маблағҳои Буҷети далатӣ барои сохтмон, таъмир ва азнавсозии муассисаҳои таълимӣ;

- истифодаи шаклҳои нави хоҷагидорӣ, таълими пулакӣ, маблағгузории падару модарон, сармоягузорони дохилию хориҷӣ;

- дарёфти қарзҳои дарозмуддат ва кӯтоҳмуддат аз бонкҳо ва ташкилоту созмонҳои дохилию хориҷӣ барои сохтмон, таъмир ва азнавсозии муассисаҳои таълимӣ;

- таҷдиди назар намудани роҳҳои маблағгузории соҳа аз ҳисоби буҷети ҷумҳуриявӣ ва маҳаллӣ, ҷалби маблағҳои институтҳои молиявии байналхалқӣ бо назардошти рушди соҳа;

- ба низом даровардани хизматҳои пулакии гирифгани таҳсилот дар муассисаҳои таълимӣ;

- истифодаи ҳамаҷонибаи сарчашмаҳои ғайрибуҷетии маблағгузорӣ барои рушди соҳа;

-ҷалби сармоягузории хориҷӣ, сектори хусусӣ, хоҷагиҳои кишоварзӣ ва дигар корхонаҳо новобоста аз шакли моликияташон.

6. Натиҷаҳо ва индикаторҳои баҳодиҳии Барнома

Барнома то соли 2015 амалӣ гардонида шуда, раванди дар амал ҷорӣ шудани он бо Стратегияи миллии рушди Ҷумҳурии Тоҷикистон то соли 2015, Стратегияи паст кардани сатҳи камбизоатии Ҷумҳурии Тоҷикистон барои солҳои 2007-2009, Барномаи миёнамӯҳлати хароҷоти давлатӣ дар бахши маориф ва дигар ҳуҷҷатҳои аҳамияти стратегӣ дошта ва ба рушди соҳаҳои иҷтимоӣ равонагардида ҳамоҳанг гардонида шудааст.

Дар натиҷаи амалӣ намудани барнома мутобиқи мақсад ва афзалиятҳои Стратегияи паст кардани сатҳи камбизоатии Ҷумҳурии Тоҷикистон барои солҳои 2007-2009 ва Стратегияи миллии рушди маорифи Ҷумҳурии Тоҷикистон барои солҳои 2006-2015 ноил шудан ба мақсади асосии Стратегияи паст кардани сатҳи камбизоатии Ҷумҳурии Тоҷикистон барои солҳои 2007-2009 дар соҳаи маориф, таъмини дастрасии умумӣ ва баробарии духтарону писарон ба маълумоти миёна амалӣ мегардад. Ин натиҷа дар асоси беҳбудӣ бахшидан ба системаи идоракунии соҳаи маориф, сохтмону барқароркунӣ ва азнавсозии муассисаҳои тахсилоти умумӣ, баланд бардоштани самарабахшии системаи истифодаи захираҳои мавҷуда, беҳтар гардонидани таъминоти методӣ ва қадрии системаи маориф ва пурқувват намудани заминаи моддию техникии муассисаҳои таълимӣ ба даст меояд.

Дар натиҷаи амалӣ гардидани Барнома ба ивази мактабҳои дар вагонҳо ва хонаҳои шахсӣ ҷойгирифта 237 мактаб бо 29437 ҷойи нишаст сохта мешавад ва ба замми ин сохтмони 75 мактаби нотамом ба охир расонида шуда, 284 мактаби дар ҳолати садамавӣ қарордошта, ва 208 мактаби ба таъмири асосӣ ниёздошта сохта ва таъмир карда мешаванд.

Ба сифати индикаторҳои мониторинги Барнома индикаторҳои натиҷаҳои ниҳоӣ ва самара, ки дар Стратегияи паст кардани сатҳи камбизоатии Ҷумҳурии Тоҷикистон барои солҳои 2007-2009, Стратегияи милии рушди системаи маориф барои солҳои 2006-2015 оварда шудаанд низ истифода бурда мешаванд.

Ҳамин тавр, дар натиҷаи пурра амалӣ гардидани Барнома системаи маориф ба шакли куллӣ ва мусбӣ тағйир дода шуда, он имконият медиҳад, ки дастрасии комил ва ҳаматарафаи хонандагон ба таълим фароҳам оварда шавад ва сифати он ба стандартҳои ҷаҳонӣ баробар гардад.

Таҳлили амалӣ гардидани чорабиниҳо ва баҳодиҳии иҷрои индикаторҳои Барнома аз ҷониби раёсатҳои маорифи вилоятҳо ва шӯъбаҳои маорифи шаҳру ноҳияҳои ҷумҳурӣ дар ҳамоҳангсозӣ бо - Вазорати маориф ва илми Ҷумҳурии Тоҷикистон гузаронида мешавад. Раёсат ва шӯъбаҳои маориф ҳар сол на дертар аз 10 феврал ба Вазорати маорифи Ҷумҳурии Тоҷикистон ҳисобот пешниҳод менамоянд (қарори Ҳукумати ҶТ аз 10.02.2016 № 66).

* Замимаҳо оварда намешаванд.