Низомномаи қисми тоҷикистонии комиссияҳои байниҳукуматӣ бо кишварҳои хориҷӣ оид ба ҳамкориҳои тиҷоратию иқтисодӣ ва илмию техникӣ

1. Қисми тоҷикистонии комиссияҳои байниҳукуматӣ оид ба ҳамкориҳои тиҷоратию иқтисодӣ ва илмию техникӣ байни Ҷумҳурии Тоҷикистон ва кишварҳои хориҷӣ мақоми доимоамалкунанда мебошад, ки Тарафи Тоҷикистонро дар комиссияҳои байниҳукуматӣ муаррифӣ намуда, кори худро мутобиқи созишномаҳои тиҷоратию иқтисодӣ ва илмию техникии аз ҷониби Ҷумҳурии Тоҷикистон имзошуда, ҳамчунин Низомномаи мазкур анҷом медиҳад.

2. Қисми тоҷикистонии комиссияҳои байниҳукуматӣ (минбаъд - ҚТКБҲ номида мешавад) фаъолияти худро бо мақсадҳои зерин амалӣ менамояд:

- муҳайё намудани шароити мусоид ҷиҳати рушди ҳамкориҳои мутақобилан судманд миёни Ҳукумати Ҷумҳурии Тоҷикистон ва Ҳукумати кишварҳои хориҷӣ дар соҳаҳои тиҷоратию иқтисодӣ ва илмию техникӣ бо дарназардошти вазифаҳои рушди иҷтимоию иқтисодии Ҷумҳурии Тоҷикистон;

- таъмини алоқамандии стратегияи фаъолияти иқтисодии хориҷии Ҷумҳурии Тоҷикистон бо бозсозии сохтории иқтисодиёти он, муносибати маҷмӯӣ ҳангоми таҳияи лоиҳаҳои ҳамкорӣ ва татбиқи шартномаҳои имзошуда, ки манфиат ва имкониятҳои Ҷумҳурии Тоҷикистонро дар назар доранд;

- афзун намудани самараи ҳамкорӣ байни Ҳукумати Ҷумҳурии Тоҷикистон ва Ҳукумати кишварҳои хориҷӣ, аз ҷумла бо роҳи муайян кардани самтҳои ояндадор ва такмили шаклҳои чунин ҳамкорӣ, ки таъмиқи минбаъдаи мутақобилаи иқтисоди Ҷумҳурии Тоҷикистонро бо хоҷагии ҷаҳонӣ, ҷалби сармояи хориҷӣ ва технологияи пешқадамро таъмин менамояд;

- ҷалби сохторҳои соҳибкории тоҷикистонӣ дар вусъати ҳамкорӣ байни Ҳукумати Ҷумҳурии Тоҷикистон ва Ҳукумати кишварҳои хориҷӣ.

3. ҚТКБҲ таҳти роҳбарии Ҳукумати Ҷумҳурии Тоҷикистон кор карда, фаъолияти худро дар ҳамоҳангӣ бо Вазорати рушди иқтисод ва савдои Ҷумҳурии Тоҷикистон, Вазорати корҳои хориҷии Ҷумҳурии Тоҷикистон ва дигар вазорату идораҳои дахлдори Ҷумҳурии Тоҷикистон, ҳамчунин муассисаҳои тиҷоратию ғайритиҷоратӣ амалӣ мегардонад.

Вазорати рушди иқтисод ва савдои Ҷумҳурии Тоҷикистон барои ноил шудан ба мақсадҳои зикргардидаи комиссияҳои байниҳукуматӣ, ки ҳамоҳангсозӣ ва назорати иҷрои ӯҳдадориҳоро аз тарафи мақомоти ҳокимияти давлатӣ ва субъектҳои хоҷагидор, ки аз санадҳои байналмилалии ҳуқуқӣ дар соҳаи ҳамкориҳои иқтисодии хориҷӣ ва созишномаҳо оид ба ҳамкориҳои иқтисодию тиҷоратӣ ва илмию техникӣ бармеоянд, амалӣ намуда, дар доираи ваколати худ:

- таҳияи пешниҳодҳоро оид ба самтҳои афзалиятноки ҳамкорӣ байни Ҷумҳурии Тоҷикистон ва кишварҳои хориҷӣ дар асоси таҳлил ва баҳодиҳии ҳолати имрӯзаи иқтисодӣ, имкониятҳои рушди минбаъда ташкил намуда, ҳамчунин пешниҳодҳое, ки аз доираи соҳибкорон ва мақомоти салоҳиятдори Ҷумҳурии Тоҷикистон ворид мешаванд, коркард менамояд;

- омодакунӣ ва татбиқи созишномаҳои байниҳукуматии тиҷоратию иқтисодӣ ва илмию техникӣ, барномаҳои дарозмӯҳлати ҳамкории байни Ҷумҳурии Тоҷикистон ва давлатҳои хориҷӣ, иҷрои қарорҳое, ки дар ҷаласаҳои комиссияҳои байниҳукуматӣ қабул шуда, ба Тарафи Тоҷикистон дахл доранд, назорат мебарад;

- назорати иҷрои Протоколи қаблӣ, фаъолияти вазоратҳо, идораҳо ва ташкилотҳои Ҷумҳурии Тоҷикистонро, ки дар амалӣ кардани самтҳои асосии ҳамкорӣ ширкат меварзанд ва ҳамчунин қисми тоҷикистонии мақомоти кории комиссияҳои байниҳукуматиро (зеркомиссияҳо, гурӯҳҳои корӣ) бо ҷалби сохторҳои соҳибкорӣ ҳамоҳанг месозад;

- ба Ҳукумати Ҷумҳурии Тоҷикистон маълумот пешниҳод менамояд ва ҳангоми зарурат ба мақомоти иҷроияи ҳокимияти давлатӣ, ҳамчунин доираи соҳибкорони Тоҷикистон оид ба масъалаҳои вобаста ба омодагӣ ба ҷаласаҳои навбатии комиссияҳои байниҳукуматӣ машварат медиҳад;

- маводи заруриро барои гузаронидани ҷаласаҳои комиссияҳои байниҳукуматӣ (ҷамъбасти иҷрои Протоколи қаблӣ, таҳияи пешниҳодҳоро ба лоиҳаи Рӯзномаи ҷаласа ва Протоколи ҷаласаи навбатӣ), дар мувофиқа бо Раиси қисми тоҷикистонии Комиссияи марбут омода намуда, ба Ҳукумати Ҷумҳурии Тоҷикистон пешниҳод менамояд.

4. ҚТКБҲ ҳуқуқ дорад:

- дар доираи салоҳияти худ қарорҳои заруриро қабул карда, ба Ҳукумати Ҷумҳурии Тоҷикистон оид ба масъалаҳое, ки ҳалли онро тақозо дорад, таклиф пешниҳод намояд;

- ҳангоми зарурат дар мувофиқа бо қисмҳои хориҷии комиссияҳои байниҳукуматӣ, гурӯҳҳои кориро аз ҳисоби намояндаҳои вазорату идораҳои соҳавӣ, доираи соҳибкорон, муассисаҳо ва ташкилотҳои илмӣ-тадқиқотии Ҷумҳурии Тоҷикистон барои ҳалли масъалаҳои мушаххас ва лоиҳаҳои ҳамкориҳо ташкил намояд;

- аз вазоратҳо, идораҳо ва ташкилотҳои Ҷумҳурии Тоҷикистон, инчунин тибқи тартиби муқарраргардида аз намояндагиҳои хориҷии Ҷумҳурии Тоҷикистон мавод ва иттилооти заруриро дархост намояд ва ба даст орад;

- бо иштироки роҳбарон ва коршиносони вазорат, идора ва ташкилотҳои Ҷумҳурии Тоҷикистон ва ҳамчунин доираи соҳибкорон ҷаласаҳоро доир намояд;

- бо тартиби муқарраршуда ё бо мусоидати қисмҳои хориҷии комиссияҳои байниҳукуматӣ ба ташкилотҳои ҳукуматӣ ва ғайриҳукуматии давлатҳои хориҷӣ оид ба масъалаҳои вобаста ба фаъолияти комиссияҳои байниҳукуматӣ муроҷиат намояд;

- вазорату идораҳои манфиатдори Ҷумҳурии Тоҷикистон, намояндагони доираи соҳибкоронро барои омода намудани ҷаласаҳои комиссияҳои байниҳукуматӣ ҷалб намояд;

- ҳамкориҳои зичро бо қисмҳои хориҷии комиссияҳои байниҳукуматӣ ба роҳ монда ва дастгирӣ намуда, дар баррасии фаврии пешниҳодҳои аз онҳо ё ба воситаи онҳо расида, дархостҳо ва муроҷиатҳои мақомоти ҳокимияти давлатӣ, намояндаҳои доираи соҳибкорон оид ба масъалаҳои марбут ба салоҳияти комиссияҳои байниҳукуматӣ ба онҳо мусоидати зарурӣ намояд ва дар баробари ин аз чунин мусоидати ҷониби қисмҳои хориҷии комиссияҳои байниҳукуматӣ бархурдор бошад.

5. Ташкили фаъолияти ҚТКБҲ.

ҚТКБҲ аз раис, муовини раис, котиби масъул ва аъзои қисми тоҷикистонии комиссия, аз ҷумла сафир, намояндаи тиҷоратии Ҷумҳурии Тоҷикистон дар кишвари дахлдор иборат мебошад.

ҚТКБҲ-ро аъзои Ҳукумати Ҷумҳурии Тоҷикистон ё муовини ӯ роҳбарӣ менамояд, ки бо қарори Ҳукумати Ҷумҳурии Тоҷикистон, бо пешниҳоди Вазорати рушди иқтисод ва савдои Ҷумҳурии Тоҷикистон ва бо мувофиқаи вазорату идораҳои дахлдори Ҷумҳурии Тоҷикистон тасдиқ карда мешаванд.

Дар ҳолате, ки ҚТКБҲ-ро Вазири рушди иқтисод ва савдои Ҷумҳурии Тоҷикистон роҳбарӣ нанамояд, он гоҳ муовини раиси ҚТКБҲ муовини Вазири рушди иқтисод ва савдои Ҷумҳурии Тоҷикистон дар мувофиқа бо раиси ҚТКБҲ мебошад.

ҚТКБҲ аз ҷониби Раиси ҚТКБҲ, вобаста ба доираи масъалаҳои муҳокимашаванда бо пешниҳоди вазорату идораҳои дахлдори Ҷумҳурии Тоҷикистон ва дар мувофиқа бо Вазорати рушди иқтисод ва савдои Ҷумҳурии Тоҷикистон ташкил карда мешавад.

Бо дарназардошти зарурати таъмини таҳияи маҷмӯӣ ва салоҳиятноки масъалаҳои асосӣ, ки ба ҳамкории тиҷоратию иқтисодӣ ва илмию техникии байни Ҳукумати Ҷумҳурии Тоҷикистон ва Ҳукумати кишварҳои хориҷӣ дахл доранд, бо назаргирии миқёс ва махсусиятҳои чунин ҳамкорӣ ва ҳамчунин мавқеи давлати хориҷӣ оид ба ҳайати эҳтимолии қисми хориҷии комиссияи байниҳукуматӣ ба ҳайати ҚТКБҲ намояндагони вазорату идораҳо, кормандони масъули Дастгоҳи иҷроияи Президенти Ҷумҳурии Тоҷикистон, Вилояти Мухтори Кӯҳистони Бадахшон, вилоят, шаҳри Душанбе, шаҳр ва ноҳия, ки ба масъалаҳои робитаҳои иқтисодии хориҷӣ ва ҳамкориҳои илмию техникӣ машғуланд, инчунин намояндагони доираҳои соҳибкорӣ дохил карда мешаванд.

6. Раиси қисми тоҷикистонии комиссияҳои байниҳукуматии дахлдор:

- ҚТКБҲ-ро ташкил мекунад;

- ҷаласаҳои ҚТКБҲ-ро мегузаронад, рӯзномаи ҷаласа ва дастури кориро омода менамояд ва қарорҳои протоколиро ба имзо мерасонад;

- омода намудани ҷаласаҳои комиссияҳои байниҳукуматиро дар бахши вобаста ба масъалаҳои ташкилӣ, техникӣ, моддӣ, молиявӣ ва таъминоти дигари ҷаласаҳое, ки дар ҳудуди Ҷумҳурии Тоҷикистон гузаронида мешаванд, ташкил менамояд;

- ба кори котиби масъул ҷиҳати омода намудани ҳисобот ва таҳияи пешниҳодҳо ба Ҳукумати Ҷумҳурии Тоҷикистон оид ба натиҷаҳои ҷаласаи комиссияҳои байниҳукуматӣ, ки барои татбиқи аҳдномаҳои ҳосилшуда равона гардидаанд, инчунин ба Ҳукумати Ҷумҳурии Тоҷикистон мунтазам (на камтар аз як маротиба ҳар се моҳ) пешниҳод намудани маълумот оид ба иҷроиши муқаррароти протоколии ҷаласаи комиссияҳои байниҳукуматӣ барои омода намудани супоришҳои дахлдор ба мақомоти ҳокимияти давлатӣ назорат мебарад.

7.Ҷиҳати таъмини иҷрои вазифаҳое, ки дар назди ҚТКБҲ гузошта шудаанд, дар Вазорати рушди иқтисод ва савдои Ҷумҳурии Тоҷикистон бо иштироки намояндагони вазорату идораҳои дахлдор ва мақомоти ҳокимияти давлатӣ дар мувофиқа бо раисони комиссияҳои байниҳукуматӣ, гурӯҳҳои кории ҚТКБҲ таҳти роҳбарии котиби масъул ташкил карда мешаванд.

Котибони масъули комиссияҳои байниҳукуматӣ дар мувофиқа бо Вазорати корҳои хориҷии Ҷумҳурии Тоҷикистон дар хусуси сана ва маҳали баргузории ҷаласаи комиссияҳои байниҳукуматӣ таклифҳо манзур намуда, бо раисони ҚТКБҲ лоиҳаи ҷадвали баргузории ҷаласаҳои комиссияҳои байниҳукуматиро барои соли оянда мувофиқа намуда, онро ҳамасола (на дертар аз 15 декабр) ба Ҳукумати Ҷумҳурии Тоҷикистон пешниҳод менамоянд.

Пеш аз баргузории ҷаласаи навбатии комиссияҳои байниҳукуматӣ барои коркард ва мувофиқаи лоиҳаи протоколҳо, дар мувофиқа бо ҳукуматҳои Тарафҳо ва раисони комиссияҳои байниҳукуматӣ, ҷаласаи гурӯҳи кории ҳар ду қисми комиссияҳои байниҳукуматӣ дар ҳудуди Тарафе гузаронида мешавад, ки ҷаласаи навбатии комиссияи байниҳукуматиро мегузаронад.

Котибони масъули комиссияҳои байниҳукуматӣ таҳияи маводи заруриро барои гузаронидани ҷаласаи комиссияҳои байниҳукуматӣ таъмин менамоянд, ҳамчунин корро вобаста ба омода кардани дархостҳо ба вазорату идора, муассиса ва ташкилотҳо, фиристодани муроҷиатномаҳо ба ташкилотҳои ҳукуматӣ ва ғайриҳукуматии давлатҳои хориҷӣ оид ба масъалаҳои ҳамкории мутақобила дар доираи фаъолияти комиссияҳои байниҳукуматӣ, ҷалби вазорату идораҳои манфиатдор, мақомоти ҳокимияти давлатӣ ва намояндагони доираи соҳибкорон ба кори комиссияҳои байниҳукуматӣ анҷом медиҳанд.

8. Ҳамаи масъалаҳои ташкилиро оид ба гузаронидани ҷаласаҳои комиссияҳои байниҳукуматӣ вазорат ё идорае ба зимма мегирад, ки роҳбараш Раиси Комиссияи байниҳукуматӣ мебошад (таҳия ва мувофиқа қардани Барномаи ташриф, сенарияи баргузории ҷаласа, қабул ва гусели ҳайати намояндагон, барномаи фарҳангӣ, тӯҳфаҳои хотиравӣ, таъмин бо маводи дафтардорию техникӣ ва ғайра).

9. Маблағгузории хароҷоти вобаста ба гузаронидани ҷаласаи комиссияҳои байниҳукуматӣ ва мақомоти кории онҳо дар қаламрави Ҷумҳурии Тоҷикистон, пазироӣ дар Ҷумҳурии Тоҷикистон бо шартҳои мутақобилаи аъзо ва коршиносони қисми хориҷии комиссияҳои байниҳукуматӣ бо тартиби муқарраршуда амалӣ мегардад.