Низомномаи Комиссияи давлатӣ оид ба қабули заминҳои нави азхудкардашуда

I. Муқаррароти умумӣ

1. Комиссияи давлатӣ оид ба қабули заминҳои нави азхудкардашуда, (минбаъд - Комиссияи давлатӣ) тартиби ба истифода қабул намудани иншооти сохтмонаш баитмомрасида (азхудкунии заминҳои нави обёрӣ) - ро муайян менамояд. Иншооти сохтмон бе хулосаи Комиссияи давлатӣ ба истифода қабул карда намешавад.

2. Комиссияи давлатӣ дар фаъолияти худ Конститутсияи (Сарқонуни) Ҷумҳурии Тоҷикистон, санадҳои меъёрии ҳуқуқии Ҷумҳурии Тоҷикистон ва ҳамин Низомномаро ба роҳбарӣ мегирад.

2. Вазифаҳои асосии Комиссияи давлатӣ

3. Вазифахои асосии Комиссияи давлатӣ аз инҳо иборатанд:

- баҳогузории пешрафти технологӣ ва хулосаҳои меъморию сохтмонӣ;

- санҷиши мувофиқати иқтидорҳои бакорандохташуда ва арзиши аслии заминҳои азхудкардашуда, ки дар лоиҳаи тасдиқшуда пешбинӣ шудааст;

- муайяи намудани мувофиқати иншоот ба меъёрҳои азхудкунии иқтидорҳои лоиҳавӣ;

- муайян намудани мувофиқатии иҷрои корҳо тибқи талаботи меъёрҳо ва қоидаҳои сохтмонӣ;

- қабули иншоот баъд аз санҷидани вазъи он аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон;

- ба Ҳукумати Ҷумҳурии Тоҷикистон пешниҳод намудани хулосаи асоснок дар ҳолати муайян намудани корношоямии иншооти ба истифода додашуда;

- ба мақомоти дахлдор пешниҳод намудани мавод ҷиҳати ба ҷавобгарӣ кашидани шахсоне, ки ба иҷрои бесифати корҳои лоиҳавӣ роҳ додаанд;

- ба Ҳукумати Ҷумҳурии Тоҷикистон барои тасдиқ пешниҳод намудани санади қабули иншооти сохтмонаш баитмомрасида.

4. Комиссияи давлатӣ вобаста аз моҳият ва мураккабии иншоот, лекин на дертар аз 90 рӯз то мӯҳлати муқарраршуда бояд фаъолият намояд. Мӯҳлати оғоз ва анҷоми кори Комисияи давлатӣ бо дарназардошти мӯҳлати муқарраргардидаи ба истифода додани иншоот муайян карда мешавад.

3. Сохтор ва ташкили кори Комиссияи давлатӣ

5. Ҳайати Комиссияи давлатиро Ҳукумати Ҷумҳурии Тоҷикистон тасдиқ менамояд. Комиссияи давлатӣ аз раис, муовини ӯ ва дигар аъзонамояндагони вазорату идораҳои дахлдор аз рӯи вазифа иборат мебошанд.

6. Раиси Комиссияи давлатӣ:

- маҷлисҳои Комиссияи давлатиро даъват мекунад ва мегузаронад;

- нақшаи кори Комиссияи давлатиро тасдиқ мекунад;

- гузориши мухтасарро ба санади қабул, ки дорои хулосаи Комиссияи давлатӣ дар бораи омодагии иншоот ба истифодаи мӯътадил ва таъмини он бо захираҳои моддию техникии зарурӣ мебошад, пешниҳод менамояд.

7. Оид ба қабули заминҳои нави азхудкардашуда аз ҷониби Комиссияи давлатӣ санад тартиб дода мешавад. Санад аз ҷониби раис ва ҳамаи аъзои Комиссияи давлатӣ ба имзо расонида мешавад. Ҳангоми мавҷуд будани эродҳо аз ҷониби баъзе аъзои Комиссияи давлатӣ, бо иштироки мақомоте, ки намояндагони онҳо ба Комиссия шомиланд, он то тасдики санад баррасӣ карда мешаванд. Қабули иншоот ба истифода бе имзои ҳамаи аъзои Комиссияи давлатӣ дар санад роҳ дода намешавад. Қарори қатъиро раиси Комиссияи давлатӣ қабул менамояд ва дар ҳолати пайдоиши мухолифати ҳалнашаванда оид ба масъалаҳои баҳснок дар гузориш ба санади қабул қарори қабулнамудаашро асоснок месозад.